اسلام آباد: (ویب ڈیسک) شہباز شریف نے وزیراعظم ہاؤس کو پاکستان ہاؤس میں تبدیل کرنے کا اعلان کرتے ہوئے کہا کہ وزیراعظم ہاؤس میں پورے پاکستان سے بیورو کریسی لائیں گے، اللہ نے اچکن پہنا دی ہے، فوج اور قومی سلامتی کے اداروں کے خلاف مہم ناقابل برداشت ہے، قانون اور ادارے اپنا راستہ خود لیں گے، ہم کسی کے خلاف انتقامی کارروائی نہیں کریں گے۔
وزیراعظم شہباز شریف نے میڈیا سے گفتگو کرتے ہوئے کہا کہ سابق حکومت نے ملک کے وسائل کا ناجائز استعمال کیا، قانون اور ادارے اپنا راستہ خود لیں گے، ہم کسی کے خلاف انتقامی کارروائی نہیں کرینگے، مجھے کسی کو کچھ بتانے کی ضرورت نہیں، سب کچھ ریکارڈ میں موجود ہے، انتخابی اصلاحات ترجیج ہے، فوج اور قومی سلامتی کے اداروں کے خلاف مہم ناقابل برداشت ہے، ایسے عناصر کے خلاف قانون سخت کارروائی کرے گا۔
انہوں نے کہا کہ سپریم کورٹ کے فیصلے پر اس کی روح کے مطابق عمل ہوگا، نیب کو کسی کے خلاف انتقامی کارروائی کے لیے استعمال نہیں کرینگے، وفاقی کابینہ ایک دو روز میں تشکیل پا جائے گی، پارلیمنٹ کا ڈیڑھ سال رہتا ہے، میرا فیصلہ اتحادی کرینگے، پیپلز پارٹی کو کابینہ میں آنا چاہیے۔
صحافی نے وزیراعظم سے سوال کیا اچکن کا طعنہ دینے والوں کو کیا پیغام ہے؟ جس کا جواب دیتے ہوئے شہباز شریف نے کہا کہ دیکھ لیں اللہ نے اچکن پہنا دی ہے، صدر مملکت کی طبیعت ٹھیک نہیں تو اللہ انہیں صحت دے۔
شہباز شریف کا مزید کہنا تھا کہ تارکین وطن ہمارے سفیر ہیں، ان کو ووٹنگ کا پورا حق ہے، جو ممالک دوست بننا چاہتے تھے ان سے بھی تعلقات خراب ہوگئے، عمران خان نے دوست ممالک کو بھی ناراض کیا، مودی کو مشورہ دیا ہے مسئلہ کشمیر حل کر کے پائیدار امن کی طرف چلیں۔
وزیراعظم نے کہا کہ سب سے بڑاچیلنج تباہ حال معیشت اور مہنگائی پر قابو پانا ہے، تحریک انصاف والے خزانہ خالی کر گئے ہیں، گورنر اسٹیٹ بینک کے مستقبل پر بھی مشاورت ہوگی، 2 چھٹیاں خوشحال قومیں کرتی ہیں، باتوں سے قومیں نہیں بنا کرتیں، اتوار کو بھی کام کرنا پڑے گا، مہنگائی کم کرنے کیلئے طویل اور قلیل المدتی پلان بنا رہے ہیں، لیگی وزرا کے قلمدان نواز شریف فائنل کریں گے، سیاسی سرگرمیوں کے علاوہ انتشار پھیلانے کی اجازت نہیں دیں گے، (ن) لیگ کی سوچ ہے اصلاحات لائیں اور الیکشن میں جائیں، اب پنجاب اسپیڈ نہیں پاکستان اسپیڈ ہوگی۔

اسلام آباد: (ویب ڈیسک) پاکستان تحریک انصاف (پی ٹی آئی) کے سربراہ عمران خان نے کہا ہے کہ سازش کے ذریعے ایک امپورٹڈ حکومت ہم پر مسلط کی گئی، حکومت ہٹانے کے بعد کل پشاور میں پہلا جلسہ ہو گا، ملک میں فوری انتخابات کرائیں جائیں۔
سابق وزیراعظم نے اپنے ویڈیو پیغام میں کہا کہ پشاور کے لوگوں کل آپ کے پاس آرہا ہوں، سازش کے ذریعے ایک امپورٹڈ حکومت ہم پر مسلط کی گئی، سازش کے ذریعے حکومت ہٹانے کے بعد یہ پہلا جلسہ ہو گا، پشاور جلسہ میں آپ سے یہ ساری باتیں کروں گا۔
عمران خان نے مزید کہا کہ اپنی آزادی اور جمہوریت کی حفاظت قوم کرتی ہے، جمہوریت کی حفاظت کوئی فوج یا باہر کی قوت نہیں کرسکتی، پاکستان میں فوری انتخابات کروائیں جائیں۔
دوسری جانب عمران خان نے لاہور میں 24 اپریل کو جلسہ کرنے کا فیصلہ کیا ہے، سیاسی کمیٹی کے اجلاس میں جلسے کی تاریخ کا فیصلہ کیا گیا۔
پی ٹی آئی کے رہنما شفقت محمود کا کہنا تھا کہ چوروں لٹیروں کاٹولہ اکٹھا ہوگیا، 24 اپریل کو مینار پاکستان میں جلسہ ہوگا، کل پشاور، 16 اپریل کو مزار قائد کراچی میں جلسہ ہے، پی ٹی آئی ممبران نے ایک دوسرے سے سبقت لیکر قومی اسمبلی میں استعفے دیے، ملک سے انقلابی فضا ختم نہیں ہوگی، ان چوروں، لٹیروں کیساتھ قومی اسمبلی میں نہ بیٹھنے کا فیصلہ کیا۔
انہوں نے مزید کہا کہ ہم نے کسی سے کوئی جھگڑا کیا نہ ہی کسی کے خلاف تھے، ہم ایک آزاد خودمختار ملک ہیں، ایک منتخب حکومت اور وزیراعظم کو ہٹانے پر ملک میں انقلابی فضا پیداہوگئی، ہفتے کی رات ایک کال پر ملک بھر میں عوام کا ایک سمندر نظرآیا۔

اسلام آباد: (ویب ڈیسک) وفاقی دارالحکومت کے نجی ہوٹل میں پاکستان تحریک انصاف (پی ٹی آئی) کے منحرف رکن قومی اسمبلی نور عالم خان کو جملہ کسنے پر مصطفیٰ نواز کھوکھر نے نامعلوم شخص کو مکا مار دیا۔
اسلام آباد کے نجی ہوٹل میں افطاری کا اہتمام کیا گیا، افطاری کے دوران ایک شخص نے نور عالم کو فقرہ کسا جس پر رکن قومی اسمبلی کے ساتھ موجود پاکستان پیپلز پارٹی کے مصطفیٰ نواز کھوکھر مشتعل ہوگئے اور شہری کے ساتھ ہاتھا پائی ہو گئی۔
ندیم افضل چن اور دیگر پیپلزپارٹی کے ارکان بیچ بچاؤ کراتے رہے۔

اسلام آباد: (ویب ڈیسک) وزیراعظم کی آصف زرداری اور بلاول بھٹو کے ساتھ اہم بیٹھک، سیاسی صورتحال اور وزارتو ں کے حوالے سے مشاورت، شہبازشریف کی فضل الرحمان کے گھر آمد، حمایت پر شکریہ ادا کیا، وزیراعظم سے ایم کیوایم کے رہنماؤں، عوامی نیشنل پارٹی اور بلوچستان نیشنل پارٹی کی قیادت سے بھی ملاقاتیں کیں۔
وزیراعظم کا منصب سنبھالنے کے بعد شہبازشریف اتحادیوں سے ملنے جا پہنچے، پہلے پارلیمنٹ لاجز میں ایم کیو ایم پاکستان کی قیادت سے ملاقات کی اور کہا کہ ایم کیو ایم پاکستان سمیت تمام اتحادیوں کو ساتھ لے کرچلیں گے۔
بعد میں شہبازشریف نے آصف علی زرداری اور بلاول بھٹو سے ملاقات کی، وفاقی کابینہ کی تشکیل سمیت سیاسی صورتحال پر بات چیت کی گئی، وہ مولانا فضل الرحمان کے گھر بھی گئے، ملاقات میں حمایت کرنے پر شکریہ ادا کیا، کابینہ کی تشکیل پر مشاورت کی گئی۔
وزیراعظم نے بلوچستان عوامی پارٹی کے پارلیمانی لیڈر خالد مگسی، بی این پی مینگل کے سربراہ اخترمینگل سے بھی ملاقات کی۔
ادھر وزیراعظم شہباز شریف کل کراچی کا ایک روزہ دورہ کریں گے، جہاں وہ اتحادی جماعتوں کے سربراہان کے ہمراہ مزار قائد پر حاضری دینگے۔
وزیراعظم شہبازشریف کے ایم کیو ایم پاکستان کے مرکز بہادر آباد کے دورے کا بھی امکان ہے، وزیراعظم وزیراعلیٰ ہاؤس میں ترقیاتی منصوبوں کی حکمت عملی کے لیے مشاورتی عمل کی صدارت بھی کرینگے۔
وزیرِ اعظم شہباز شریف کے مزار قائد کے دورے کا مقصد پاکستان کی تعمیر و ترقی کیلئے قائد اعظم کے وضع کردہ سنہری اصولوں کی پیروی کا اعادہ کرنا ہے۔
دوسری جانب شہباز شریف کے دورہ سعودی عرب کا امکان ہے، بطور وزیراعظم ان کا کسی بھی ملک کا پہلا دورہ ہوگا جبکہ ان کا دورہ چین بھی جلد متوقع ہے۔