اسلام آباد: وزیرخارجہ شاہ محمود قریشی کا کہنا ہے کہ ہم امن کی کوششوں میں حصہ دار رہیں گے، اور واضح کہہ چکے ہیں کہ قیام امن کیلئے دنيا کے ساتھ تعاون جاری رکھيں گے۔

وزیرخارجہ شاہ محمود قریشی کا کہنا ہے کہ افغان امن عمل نازک مرحلے ميں داخل ہوچکا ہے، افغانستان ميں امن کئی ممالک کی ترجيح ہے، انطالیہ سفارتی فورم میں پاکستان کو اپنا نکتہ نظر پيش کرنے کا موقع ملا، افغانستان کی اعلیٰ سطحی مفاہمتی کونسل کے چیئرمین ڈاکٹر عبداللہ عبداللہ سے مفيد نشست رہی، اور افغانستان کی اندرونی صورتحال کا اندازہ ہوا، جب کہ پاکستان کو دوٹوک مؤقف پيش کرنے کا موقع ملا۔

شاہ محمود قریشی کا کہنا تھا کہ ہم واضح طور پر کہہ چکے ہیں کہ قیام امن کیلئے دنيا کے ساتھ تعاون جاری رکھيں گے، ہم امن کی کوششوں ميں پارٹنر رہيں گے، اور افغانستان ميں قیام امن کیلئے اپنی کوششیں جاری رکھیں گے، پاکستان کے کردار کو آج ساری دنيا مثبت نگاہ سے ديکھ رہی ہے۔

وزیرخارجہ نے بتایا کہ فلسطين کے وزير خارجہ سے مسئلہ فلسطين پر تفصیلی تبادلہ خيال ہوا، قطر کے وزير خارجہ سے مشرقِ وسطیٰ کی صورتحال پر بات ہوئی، يورپی يونين کے وزير خارجہ نے وزيراعظم کو دورہ برسلز کی  اور ترک صدر نے وزيراعظم عمران خان کو دورہ ترکی کی دعوت دی ہے، وزيراعظم کے دورہ ترکی کے خدوخال تيار ہورہے ہيں۔

بھارتی وزیر اعظم نریندر مودی کی جانب سے مقبوضہ کشمیر کی تمام جماعتوں کی کانفرنس بلانے کے حوالے سے وزیرخارجہ کا کہنا تھا کہ نريندر مودی کا اجلاس بلانا غير معمولی ڈيولپمنٹ ہے، تمام کشمیری 5اگست کے فيصلے سے ناخوش تھے۔

لاہور:  وزیراعلیٰ عثمان بزدار نے کہا ہے کہ پی ڈی ایم کے جلسے جلوس بے وقت کی راگنی ہیں، وطن عزیز کو جلسے جلوسوں سے آگے نہیں لے جایا جا سکتا۔

وزیر اعلی پنجاب عثمان بزدار نے اپنے بیان میں کہا کہ اس موقع پر انتشار پھیلانے کی سیاست کرنا ملک اور قوم سے دشمنی کے مترادف ہے، احتجاجی سیاست ملک اور قوم دونوں کیلئے نقصان دہ ہے، اپوزیشن کو ملک کی ترقی کا احساس نہ عوام کی خوشحالی کا، یہ بے حس ٹولہ کورونا کے دوران انسانی زندگیوں پر بھی سیاست چمکاتا رہا۔

عثمان بزدار کا کہنا تھا کہ اب پاکستان کی معیشت جب مضبوط ہو رہی ہے تو یہ عناصر نیا روپ دھار کر سامنے آ رہے ہیں، پی ڈی ایم والے اپنی ناکامیوں کا بدلہ پاکستان کے عوام سے لینا چاہتے ہیں، قوم بہروپئے سیاستدانوں کے عزائم سے بخوبی واقف ہے، عوام مسترد شدہ عناصر کے جھانسے میں کبھی نہیں آئیں گے۔

وزیراعظم عمران خان نے آئندہ ماہ اپنا دورہ برطانیہ ملتوی کردیا۔

ذرائع کے مطابق وزیراعظم نے ملک کی داخلی، سیاسی اور علاقائی صورتحال کے پیش نظر ازخود برطانیہ نہ جانے کا فیصلہ کیا ہے۔

ذرائع کاکہنا ہےکہ وزیراعظم نے افغانستان سے غیر ملکی افواج کے انخلاء کی تکمیل کو خود مانیٹر کرنے کا فیصلہ کیا ہے جس کے باعث وہ آئندہ ماہ برطانیہ کے دورے پر نہیں جائیں گے تاہم رواں سال کے آخر تک وزیراعظم کا دورہ برطانیہ شیڈول ہونے کا امکان ہے۔

ذرائع کے مطابق وزیراعظم کو دورے کی دعوت حال ہی میں برطانوی ہم منصب بورس جانسن نے دی تھی جب کہ انہیں آئندہ ماہ ہونے والی پاک انگلینڈ سیریز کا پہلا میچ دیکھنے کے لیے بھی مدعو کیا گیا تھا۔

وزیر مملکت برائے اطلاعات و نشریات فرخ حبیب نے کہا کہ سندھ میں کرپشن کے ساتھ صلاحیت کا بھی فقدان ہے۔

تفصیلات کے مطابق وزیر مملکت برائے اطلاعات و نشریات فرخ حبیب نے بلاول زرداری کے بیان پر ردعمل دیتے ہوئے کہا کہ بلاول صاحب، وفاق سندھ حکومت کو اب تک این ایف سی کی مد میں 1900 ارب سے زائد دے چکا ہے، بتائیں وہ پیسے کہاں خرچ ہوئے؟

انہوں نے کہا کہ بلاول صاحب،  سندھ حکومت کی غفلت اور لاپرواہی پرسندھ کی عوام سے کب معافی مانگ رہے ہیں؟

وزیر مملکت برائے اطلاعات و نشریات نے کہا کہ سندھ کی عوام نے پیپلز پارٹی کو جو مینڈیٹ دیا وہ پورا کرنے میں بری طرح ناکام رہی ہے۔

فرخ حبیب نے کہا کہ صوبائی حکومت ہدف کے مطابق  53 فیصد محصولات بھی جمع نہیں کرپائیں ، اس کے بعد بھی حکومت کرنے کا کوئی جواز بچتا ہے؟

انہوں نے کہا کہ پیپلز پارٹی کا انتخابی نشان  کرپشن ہونا چاہئے کیونکہ وہ اس کے علاوہ کچھ کرنے کے قابل ہی نہیں ، بلاول صاحب، پیپلز پارٹی تو کرپشن میں ماہر تھی لیکن سندھ کے چوہے 14 ارب کی گندم کھا کر آگے نکل گئے۔

وزیر مملکت برائے اطلاعات و نشریات نے کہا کہ بلاول صاحب گندم چوری کی تحقیقات کہاں تک پہنچیں؟  کیا کسی چوہے نے اعتراف جرم کیا یا معاملہ داخل دفتر ہوگیا۔

فرخ حبیب نے کہا کہ سندھ میں تعلیم کاشعبہ بھی آخری ہچکولے کھاتا نظر آرہا ہے ، سندھ میں ایک کروڑ 25لاکھ (12.5ملین) فیصد بچے ہیں، 50 فیصد سکول سے باہر ہیں۔

انہوں نے کہا کہ تھر کے لوگ صاف پانی، بنیادی صحت اور ضروری سہولیات سے محروم ہیں ، سندھ میں حکومت پیپلز پارٹی کی ہے لیکن نئی گاج ڈیم،رینی کینال، سندھ بیراج،ملتان سکھر موٹر وے،گرین لائن، کے فور وفاق بنا رہا ہے۔

وزیر مملکت برائے اطلاعات و نشریات نے کہا کہ عمران خان کی دانشمندانہ پالیسیوں اور فیصلوں سے ملک ترقی اور عوام خوشحالی کی شاہراہ پر گامزن ہے ، جمہوریت کا راگ الاپنے والے بلاول بتائیں سندھ میں پبلک اکاؤنٹس کمیٹی سمیت قائمہ کمیٹیوں میں اپوزیشن کی کتنی نمائندگی ہے؟

فرخ حبیب نے کہا کہ میثاق جمہوریت جس پر بے نظیر اور مفرور نواز شریف کے دستخط ہیں اس میں پبلک اکاؤنٹس کمیٹی کے چیئرمین شپ اپوزیشن کودینے کا عہد کیا گیا ، پبلک اکاؤنٹس کمیٹی میں اپوزیشن کی نمائندگی نہ ہونے سے سندھ حکومت پرکسی قسم کا چیک اینڈ بیلنس نہیں ہے۔

معاون خصوصی برائے اطلاعات فردوس عاشق اعوان نے ٹوئٹر پر جاری ایک پیغام میں کہا کہ پہلی بار جنوبی پنجاب کا ترقیاتی پروگرام الگ سے ترتیب دیا گیا ہے۔

تفصیلات کے مطابق معاون خصوصی برائے اطلاعات فردوس عاشق اعوان نے ٹوئٹر پر جاری ایک پیغام میں کہا کہ ‏ماضی کے حکمرانوں کی مفاد پرست غلط پالیسیوں کے باعث پنجاب طویل عرصے سے وسائل کی غیرمنصفانہ تقسیم کا شکار رہا۔

انہوں نے کہا کہ کرپٹ حکمرانوں نے جان بوجھ کر نظرانداز کئے جانے والے اضلاع کی عوام میں احساس کمتری کو پیدا کیا۔

معاون خصوصی برائے اطلاعات نے کہا کہ وزیراعلیٰ عثمان بزدار قیادت میں پی ٹی آئی حکومت عوام کی محرومیوں کا ازالہ کررہی ہے۔

فردوس عاشق اعوان نے کہا کہ شوباز اعلیٰ نے ترقی کے نام پر بھی عوام سے ہاتھ کیا ، پنجاب کے دور دراز اضلاع خصوصاً جنوبی پنجاب کی عوام کو انکا جائز حق دیا جارہا ہے۔

انہوں نے کہا کہ جنوبی پنجاب کیلئے 189ارب روپے مختص کئے جو پنجاب کے ترقیاتی پروگرام کا %34 ہے۔

اسلام آباد:  وفاقی وزیر منصوبہ بندی اسد عمر نے کہا ہے کہ گزشتہ ہفتے روزانہ 3 لاکھ 32 ہزار افراد کو کورونا ویکسین لگائی گئی، اگلے ہفتے نیا ریکارڈ قائم کریں گے۔

کورونا ویکسین کی قلت سے متاثر شہریوں کیلئے اچھی خبر، 15 لاکھ خوراکیں آج پاکستان پہنچ جائیں گی۔ وزیر منصوبہ بندی اسد عمر نے ٹویٹر پیغام میں کہا کہ گزشتہ ہفتے روزانہ 3 لاکھ 32 ہزار افراد کو ویکسین لگائی گئی، آئندہ ہفتے مزید ریکارڈ بنائیں گے۔