نیو یا رک،اسلا م آ با د (ویب ڈیسک)امریکہ میں کرونا وائرس وبا کی وجہ سے ہونیوالی اموات کی تعداد ایک لاکھ سے تجاوز کرنے پر صدر ٹرمپ کا سوگوار خاندانوں اور امریکی عوام سے اظہار تعزیت ،امریکہ میںکرونا وائرس کی وجہ سے رپورٹ کی جانیوالی اموات کی تعداد ایک لاکھ سے تجاوز کر گئی۔ اس تعداد کی عکاسی امریکی اخبارنیویارک ٹائمز کی جانب سے مرتب کردہ اعداد و شمار میں کی گئی ہے۔امریکہ میں کرونا وائرس کی وجہ سے ایک لاکھ افراد صرف چار ماہ کے قلیل عرصے میں لقمہ اجل بنے۔ ان ایک لاکھ متوفین میں پاکستانیوں کی صحیح تعداد کا کسی کو علم تو نہیں البتہ خیال کیا جا رہا ہے کہ امریکہ میں کرونا وائرس کی وجہ سے چارسے ساڑھے سو (جبکہ بعض مقامی صحافیوں کے مطابق پانچ سو سے زائد) پاکستانی بھی دنیا سے رخصت ہو گئے ہیں۔کرونا وائرس وبا 1918کے فلو کے بعد امریکہ میں آنے والی ہولناک ترین وبا ہے ۔دریں اثناء وزیراعظم عمران خان کا کہنا ہے کہ ترقی یافتہ ممالک کو چاہیے کہ وہ ترقی پذیر ممالک کی امداد میں اضافہ کریں۔کورونا وائرس کے بعد ترقی اور سرمایہ کاری پر اعلی سطح ورچوئل اجلاس سے خطاب کرتے ہوئے وزیر اعظم عمران خان کا کہنا تھا کہ کورونا ایک عالمی مسئلہ ہے جس نے عالمی معیشت پر منفی اثرات مرتب کیے، وائرس کیوجہ سے ہماری برآمدات متاثر ہوئیں اور ترقی پذیر ممالک زیادہ متاثرہوئے، ترقی یافتہ ممالک مل کر اس مسئلے کا حل نکال سکتے ہیں۔وزیراعظم نے کہا کہ نائیجریا، ایتھوپیا اور مصر کو بھی ہمارے جیسے حالات کا سامنا ہے، عالمی وبا سے مشترکہ کوششوں سے ہی نمٹا جاسکتا ہے، کورونا کے خلاف جی 20 ممالک کے اقدامات کا خیرمقدم کرتے ہیں تاہم ترقی یافتہ ممالک کی جانب سے جو مدد اب تک کی جا چکی ہے اس سے زیادہ مدد ہونی چاہیے جب تک اس مسئلے کو عالمی مسئلے کے طور پر حل نہیں کیا جاتا اس سے نمٹنا مشکل ہوگا۔

نیو یا رک (ویب ڈیسک)فیس بک کے بعد اب امریکا کی مزید 2 ٹیکنالوجی کمپنیاں بھی بھارت میں ٹیلی کام صنعت میں اربوں ڈالرز کا سرمایہ کاری کرنے والی ہیں۔فنانشنل ٹائمز کی رپورٹ کے مطابق گوگل کی جانب سے ووڈا فون آئیڈیا کے 5 فیصد حصص خریدنے پر غور کیا جارہا ہے جو کہ بھارت کی دوسری بڑی ٹیلی کام کمپنی ہے۔اسی طرح ایک اور رپورٹ کے مطابق مائیکرو سافٹ ریلائنس جیو پلیٹ فارمز میں 2 ارب ڈالرز سرمایہ کاری پر بات چیت کی جارہی ہے۔فنانشنل ٹائمز کے مطابق گوگل کی جانب سے ووڈا فون کے ساتھ جیو ریلائنس سے بھی مذاکرات ہورہے ہیں۔یہی وہ کمپنی ہے جس میں حال ہی میں فیس بک سمیت امریکا کی کئی کمپنیوں نے 10.3 ارب ڈالرز کی سرمایہ کاری کی ہے۔اس کمپنی کے بھارت میں 388 ملین سے زیادہ سبسکرائبرز ہیں اور حالیہ ہفتوں میں اس میں بین الاقوامی کمپنیوں کی دلچسپپی میں اضافہ ہوا ہے۔تاہم جیو ریلائنس اور گوگل کی جانب سے اس رپورٹ پر بات کرنے سے گریز کیا گیا ہے جبکہ مائیکرو سافٹ نے بھی کوئی بیان جاری نہیں کیا۔جیو ریلائنس بھارت کے سب سے امیر ترین شخص مکیش امبانی کی کمپنی ہے اور مذکورہ کمپنی میڈیا، ٹیلی کمیونی کیشن، ای کامرس و موبائل مینیو فیکچرنگ سمیت متعدد انڈسٹریز کی مالک کمپنی ہے۔اسی کمپنی کے تحت ریلائنس انڈسٹریز، ریلائنس فاو¿نڈیشن، نیٹ ورک 18 میڈیا انویسٹمنٹ، جیو فائبر، ایل وائے ایف اسمارٹ فونز، جیو فون،جیو مارٹ، جیو نیٹ وائی فائی، جیو ایپس، جیو پیمنٹ بینک اور جیو ساون سمیت کئی کمپنیاں کام کر رہی ہیں۔مکیش امبانی نے مذکورہ کمپنی کی 2016 میں شروعات کی تھی اور محض 4 سال کے عرصے کے دوران جیو ریلائنس نے بھارت کے 40 کروڑ افراد کو آن لائن کردیا ہے اور خیال کیا جا رہا ہے کہ 2022 تک بھارت کے 90 کروڑ افراد آن لائن ہوجائیں گے۔بھارت میں جہاں 40 کروڑ افراد جیو ریلائنس کے بدولت آن لائن ہوئے ہیں، وہیں 20 سے کروڑ تک افراد دوسرے ذرائع سے بھی آن لائن ہیں اور وہاں ہر آنے والے دن ٹیکنالوجی و کمیونی کیشن کی بہتری کے باعث آن لائن ہونے والے افراد کی تعداد میں اضافہ ہو رہا ہے۔گزشتہ ایک دہائی کے دوران فیس بک اور گوگل کی جانب سے بھارت پر بہت زیادہ توجہ دی گئی ہے اور مختلف پروگرامز پر کام ششروع کیا ہے جس کا مقصد زیادہ سے زیادہ لوگوں کو آن لائن لانا ہے۔فیس بک کے بانی مارک زکربرگ نے گزشتہ ماہ کہا تھا کہ ان کی کمپنی جیو پلیٹ فارمز کے ساتھ کام کرکے چھوٹے کاروباری افراد اور اداروں کو آن لائن لانے میں مدد فراہم کرے گی اور دونوں کمپنیوں نے اپنی شراکت داری سے کام بھی شروع کردیا ہے۔ووڈا فون آئیڈیا اور بھارتی کی تیسری بڑی کمپنی ائیر ٹیل کو اس وقت مالی مشکلات کا سامنا ہے اور ووڈا فون کی جانب سے رواں سال کے شروع میں کہا گیا تھا کہ اگر حکومت کی جانب سے مدد نہ کی گئی تو کمپنی کو بند بھی کیا جاسکتا ہے۔

لاہور:(ویب ڈیسک) سوشل میڈیا پر سخت تنقید اور سبکی کے بعد بھارتی پولیس نے دو روز قبل حراست میں لیا جانے والا پاکستانی مبینہ جاسوس کبوتر آزاد کردیا، اس مادہ کبوتر کے مالک حبیب اللہ کو اس کی واپسی کا انتظار ہے۔مقبوضہ جموں و کشمیر کے علاقہ کاتھوا کے سینئر پولیس سپرٹنڈنٹ شالیندر کمار نے اس بات کی تصدیق کی کہ دو روز قبل پکڑے جانے والے پاکستانی کبوتر کو چھوڑ دیا گیا ہے۔ بھارتی پولیس نے دعویٰ کیا تھا کہ یہ جاسوس کبوتر ہے جس کے پنجوں میں ڈالے گئے پلاسٹک کے چھلے پر ایک موبائل نمبر لکھا تھا جسے بھارتی پولیس نے ایک خفیہ کوڈ بتایا تھا۔اس واقعہ کے بعد پاکستان کے سرحدی علاقہ شکر گڑھ کے گاو¿ں بگا کے رہائشی حبیب اللہ کا بیان سامنے آیا، اس نے کہا تھا کہ بھارت میں پکڑا جانے والا کبوتر اس کی ملکیت ہے، اس نے عید کے روز کبوتر اڑائے تھے مگر گولڈن نسل کی یہ مادہ کبوتری واپس نہیں آئی۔ حبیب اللہ نے یہ بھی کہا تھا کہ پلاسٹک کے چھلے پر اس کا موبائل نمبر لکھا ہوا ہے۔یہ بیان سامنے آنے کے بعد سوشل میڈیا پر بھارتی پولیس اور میڈیا پر خوب تنقید شروع ہوگئی، اس شرمندگی سے بچنے کے لیے بھارتی پولیس نے کبوتر کو آزاد کردیا ہے۔

ریاض: (ویب ڈیسک)سعودی وزارت مذہبی امور کا کہنا ہے کہ کورونا وائرس کے بعد موجودہ حالات کے پیش نظر عمرہ اور زیارت ابھی معطل رہیں گے تاہم اس پر نظر ثانی ہوتی رہے گی۔سعودی نیوز ایجنسی کے مطابق وزارت حج نے ایک بیان میں کہا کہ عالمی وبا کی صورتحال کا جائزہ لینے کے لیے ماہرین غور کر رہے ہیں اور صورتحال جیسے ہی بہتر ہوگی تو اسی حوالے سے کوئی بہتر فیصلہ کیا جاسکے گا جب کہ ملک میں معطل ہونے والی معمولات زندگی اب آہستہ آہستہ بحال ہورہی ہے تاہم حج وعمرہ کی بحالی کے حوالے سے ابھی کوئی فیصلہ نہیں ہوا ہے۔سعودی وزارت داخلہ کے مطابق 21 جون کو مکہ مکرمہ کی مساجد نمازیوں کے لیے کھول دی جائیں گی جس کے بعد احتیاطی تدابیر پر عمل کرتے ہوئے باجماعت نماز ادا کی جائے گی البتہ حرم مکی شریف میں موجودہ ضوابط کے تحت نماز ادا کرنے کا سلسلہ جاری رہے گا۔