گلگت(ویب ڈیسک) وزیراعظم عمران خان نے جمعیت علمائے اسلام ف کے آزادی مارچ کے حوالے سے کہا کہ دیکھنا ہے آزادی مارچ والے کس سے آزادی لینے آئے ہیں۔گلگت میں جلسے سے خطاب کرتے ہوئے وزیراعظم عمران خان کا کہنا تھا کہ ایک طرف آج گلگت کی آزادی منائی جا رہی ہے اور دوسری طرف آزادی مارچ والے اسلام آباد میں جمع ہیں، دیکھنا ہے کہ آزادی مارچ والے کس سے آزادی لینے آئے ہیں۔ان کا کہنا تھا اگر پیپلز پارٹی والوں سے پوچھیں کہ آپ یہاں کیوں جمع ہیں تو وہ مہنگائی کی بات کریں گے، ن لیگ والوں سے پوچھیں تو انہیں تو پتہ ہی نہیں ہو گا اور جے یو آئی والے کہیں گے کہ یہودی اسلام آباد پر قبضہ کرنے لگے ہیں۔انہوں نے کہا کہ مولانا فضل الرحمان کے ہوتے ہوئے یہودیوں کو سازش کرنے کی ضرورت ہی کیا ہے، فضل الرحمان کے مارچ کو دکھا کر بھارتی میڈیا بہت خوش ہے اور ایسا لگ رہا ہے کہ فضل الرحمان بھارتی شہری ہے۔عمران خان نے کہا کہ اسلام کو ووٹ لینے اور پیسے کے لیے استعمال کرنا اسلام کو نقصان پہنچاتا ہے اور مولانا فضل الرحمان کو دیکھ کر اسلام کی طرف تو کوئی نہیں آئے گا البتہ لوگ اسلام چھوڑ دیں گے۔انہوں نے مزید کہا کہ اسلام تو مسلمانوں کے عمل سے ظاہر ہوتا ہے لیکن فضل الرحمان کا اسلام تو ڈیزل کے پرمٹ اور کشمیر کمیٹی کا چیئرمین بنانے پر بک جاتا ہے۔وزیراعظم نے کہا کہ یہ جو اسلام آباد میں ایک گلدستہ اکٹھا ہوا ہے ان میں اچکزئی بھی بلوچستان سے آ گیا ہے جو جے یو آئی کی مخالفت کرتا رہا ہے، بلاول جو اپنے آپ کو لبرل کہتا ہے، وہ لبرل صرف ایک طرح ہے کہ لبرلی کرپٹ ہے باقی تو لبرل ازم اس کے قریب سے بھی نہیں گزری۔انہوں نے کہا کہ نیا پاکستان بن چکا ہے اس لیے سب بیروزگار اور سیاسی یتیم اکٹھے ہو گئے ہیں، جب تک ان کا دل کرے بیٹھے رہیں، اگر کھانا ختم ہو گیا تو ان کے لیے تھوڑا کھانا بھی بھجوا دیں گے لیکن کسی کو این آر او نہیں ملے گا کیونکہ میں نے 22 سال تک جدوجہد ہی کرپشن کے خلاف کی ہے۔ان کا کہنا تھا پچھلے 10 سالوں میں جب یہ گلدستہ حکومت کر رہا تھا تو ملک کا قرضہ 6 ہزار ارب روپے سے 30 ہزار ارب روپے ہو گیا، ان سے کوئی پوچھنے والا نہیں تھا کہ کدھر گیا یہ پیسہ، جیسے جیسے ہماری حکومت آگے بڑھ رہی ہے ہمیں پتہ چل رہا ہے کہ زیادہ تر پیسہ ان لوگوں کی جیبوں میں گیا، ہنڈی اور ہوالے کے ذریعے منی لانڈرنگ کی گئی۔عمران خان نے کہا کہ کبھی سنا ہے کہ ایک ملک کے تین بار کے وزیراعظم کے بیٹے لندن میں اربوں روپے کے فلیٹس میں رہتے ہوں، شہباز شریف کا بیٹا اور داماد بھی ملک سے باہر بھاگے ہوئے ہیں، اگر چوری نہیں کی تو حساب دو۔ان کا کہنا تھا ہم نے گزشتہ برس جتنا ٹیکس اکٹھا کیا اس کا آدھا پچھلی حکومتوں کے لیے ہوئے قرضوں کی قسطیں ادا کرنے پر خرچ ہو گیا تو ہم کس طرح سے عوام پر پیسہ لگاتے۔انہوں نے کہا کہ جب تک انہیں سزائیں نہیں ملیں گی اور یہ لوگ عوام کے سامنے مثال نہیں بنیں گے تو تب ہی لوگ سیاست میں کرپشن کرتے ہوئے ڈریں گے۔وزیراعظم پاکستان کا کہنا تھا یہ لوگ اس لیے جمع ہیں کیونکہ انہیں ڈر ہے کہ کہیں اِن کا نمبر بھی نہ لگ جائے، سب غور سے سن لیں دنیا ادھر سے ادھر ہو جائے لیکن میں نے انہیں نہیں چھوڑنا۔

لاہور (ویب ڈیسک)رحیم یار خان میں تیز گام ایکسپریس حادثے پر دنیا بھر سے تعزیتی پیغامات کا سلسلہ شروع ہوگا۔ترکی کے صدررجب طیب اردوان نے قیمتی جانوں کے ضیاع پر رنج و غم کا اظہار کیا۔اپنے ویڈیو پیغام میں انہوں نے کہا کہ ’اپنے ملک کی طرف سے، میں پاکستان کے عوام، دوستوں اور بھائیوں سے گہری تعزیت کا اظہار کرتا ہوں‘۔کینسنٹن پیلس سے برطانوی شہزادے ولیم اور ان کی اہلیہ کیتھرائن کیٹ مڈلٹن نے بھی سانحہ تیز گام پر تعزیتی پیغام ارسال کیا۔انہوں نے کہا کہ ’ابھی ہم پاکستان کے دورے سے واپسی آئے ہیں اور رحیم یار خان میں تیز گام ٹرین میں پیش آنے والی المناک واقعہ کے بارے میں سن کر غمزدہ ہیں‘۔انہوں نے کہا کہ ’ہماری ہمدردیاں اور دعائیں متاثرین اور ان کے اہلخانہ کے لیے ہیں‘۔برطانوی سیکریٹری خارجہ ڈومینک راب نے وزیر خارجہ شاہ محمود قریشی سے برطانیہ کی طرف سے واقعے پر افسوس کا اظہار کیا۔ٹوئٹ میں کہا گیا کہ ’ہماری ہمدردیاں تمام متاثرین، ان کے اہلخانہ اور دوستوں کے لیے ہیں‘۔امریکی محکمہ خارجہ کے بیورو آف ساو¿تھ اینڈ سینٹرل ایشین افیئرز نے اپنے ٹوئٹ میں کہا کہ ’رحیم یار خان میں ٹرین کے المناک واقعہ پیش آیا، میں مسافروں کے اہل خانہ اور پاکستان کے عوام سے گہری تعزیت کرتا ہوں۔پاکستان میں چین کے سفارتخانے کی جانب سے سانحہ تیز گام پر گہرے افسوس اور متاثرہ افراد کے اہل خانہ سے دلی تعزیت اور ہمدردی کا اظہار کیا گیا۔انہوں نے کہا کہ ’رحیم یار خان کے قریب لیاقت پور میں کراچی-راولپنڈی تیز گام ایکسپریس میں آگ لگنے کے افسوسناک حادثے پر سفارتخانہ غمزدہ ہے‘۔علاوہ ازیں انہوں نے غمزدہ اہلخانہ سے دلی تعزیت کی اور ہمدردی کا اظہار کرتے ہوئے زخمیوں کی جلد صحتیابی کی دعا کی۔پاکستان میں برطانیہ کے سابق ہائی کمشنر نے سانحہ تیز گام کی خبر شیئر کرتے ہوئے کہا کہ واقعہ پر افسوس کا اظہار کیا اور کہا کہ’میری ہمدردیاں متاثرین، ان کے اہلخانہ اور دوستوں کے لیے ہیں‘۔واضح رہے کہ کراچی سے راولپنڈی جانے والی تیز گام ایکسپریس میں پنجاب کے ضلع رحیم یار خان کے قریب گیس سلنڈر پھٹنے سے آتشزدگی کے باعث 74 افراد جاں بحق جبکہ 30 سے زائد مسافر زخمی ہوگئے۔ٹرین کو حادثہ صبح 6:15 منٹ پر پنجاب کے ضلع رحیم یار خان کی تحصیل لیاقت پور میں چنی گوٹھ کے نزدیک چک نمبر 6 کے تانوری اسٹیشن پر پیش آیا۔گزشتہ روز پریس کانفرنس کرتے ہوئے وزیر ریلوے شیخ رشید نے اعتراف کیا تھا کہ ‘ہم سے غلطی ہوئی، تبلیغی جماعت والوں کو چولہا لے جانے سے نہیں روکا جاتا تھا تاہم آئندہ سے ایسا نہیں ہوگا’۔وزیر ریلوے نے تمام شہدا کے لیے پاکستان ریلوے کی جانب سے 15 لاکھ روپے اور زخمیوں کے لیے 5 لاکھ روپے معاوضہ ادا کرنے کا اعلان کیا اور امید ظاہر کی کہ وزیر اعظم پیکج سے بھی متاثرین کو کچھ دیا جائے گا۔