اسلام آباد(مانیٹرنگ ڈیسک) پاکستان اور آئی ایم ایف کے درمیان قرض پروگرام کے کئی نکات پر ڈیڈ لاک برقرار ہے۔ذرائع کا بتانا ہے کہ پاکستان کا آئی ایم ایف سے مذاکرات میں مانیٹری پالیسی پر ڈیڈ لاک ہے، آئی ایم ایف نے روپے کی قدر کو کنٹرول نہ کرنے اور شرح سود بڑھانے کی شرائط رکھی ہیں۔ذرائع کا کہنا ہے کہ آئی ایم ایف توانائی اور دوسرے شعبوں پر سبسڈیز ختم کرنے کا مطالبہ کر رہا ہے، اس کے علاوہ آئی ایم ایف سے ٹیکسوں میں اضافے پر بھی اختلاف ہیں۔ذرائع کے مطابق پاکستان نے ٹیکس وصولیوں کا ہدف 4600 ارب روپے مقرر کرنے کا کہا ہے لیکن آئی ایم ایف ٹیکس وصولیوں کا ہدف 5200 ارب روپے سے 5300 ارب روپے کے درمیان چاہتا ہے۔ذرائع کا کہنا ہے کہ وزارت خزانہ اختلافی نکات پر آئی ایم ایف کو قائل کرنے کی کوشش کر رہی ہے۔خیال رہے کہ آئی ایم ایف کی ٹیم قرض پروگرام پر مذاکرات کے لیے اسلام آباد میں موجود ہے اور آج مشیر خزانہ ڈاکٹر عبدالحفیظ شیخ نے آئی ایم ایف سے مذاکرات میں کامیابی کے لیے پرامید ہونے کا اظہار کیا تھا۔

بہاولنگر (ملک مقبول احمد سے )بہاولنگر جہاں ظلم وہاں خبریں خبریں ہیلپ لائن کو کال کہ تھانہ صدر پولیس چشتیاں میں غریب محنت کش کلیم اللہ چشتیاں بغداد کالونی کے رہائشی کو رات کے وقت پولیس کی بھاری نفری گھر سے اٹھا کر تھانہ صدر پولیس چشتیاں لے گئی ہے جہاں کلیم اللہ کو پولیس نے ساری رات تشدد کا نشانہ بنایا اور پانی پلا پلا کر تشدد کرتے رہے اور اس تشدد کی ویڈیو بھی پولیس والے بناتے رہے اور اس پر تشدد کرتے رہے اور حالت غیر ہونے ہر نوجوان کو پولیس والے ویران علاقے میں پھینک گئے شور و واویلا کرنے پر اہل علاقہ آ گئے جنہوں نے کلیم اللہ کو شدید تشویناک حالت میں اٹھا کر طبی امداد کے لیئے پہنچایا ندیم نامی ایلیٹ فورس کے کانسٹیبل کو خوش کرنے کے لیئے اس کو گھر سے اٹھا کر تشدد کا نشانہ بنایا خبریں ہیلپ لائن کی ٹیم ملک مقبول احمد جب چشتیاں بغداد کالونی پہنچی تو کلیم اللہ غریب محنت کش دھاڑے مار مار کے روتا رہا اور اپنی ساتھ ہونے والے ظلم کے حوالے سے اس نے خبریں کو بتایا کہ میں ایک غریب محنت کش ہوں میں اور میرے گھر والے گھر میں سو رہے تھے کہ تھانہ صدر چشتیاں پولیس کی گاڑی لے کر ندیم ایلیٹ فورس کانسٹیبل میرے گھر میں داخل ہو گئے اور مجھے ٹھوکریں مارتے ہوئے گھسیٹ کر گاڑی میں ڈال لیا اور تھانہ صدر پولیس اسٹیشن میں لے گئے جہاں پولیس والوں نے کمرے میں بند کر کے میرے کپڑے اتار کے اور چھتر سے مجھ پر تشدد کیا اور بعد میں میرے ہاتھوں کو ہتھکڑی لگا کر مجھے الٹا لٹکا کر ڈنڈوں سے مجھ پر پولیس والوں نے تشدد کیا جب میں بے ہوش ہو گیا تو صبح چار بجے کے قریب پولیس والے مجھے گاڑی میں ڈال کر ویران علاقہ میں چھوڑ گئے مزید اس نے کہا کہ میرے مخالف کو راضی کرنے کے لیئے پولیس والوں نے مجھ پر تشدد کیا اور میری ویڈیو بھی بنائی اس نے کہا کہ میں نے اپنے میڈیکل کے لیئے علاقہ مجسٹریٹ کے پاس درخواست دی ہے جس پر علاقہ مجسٹریٹ نے فوری طور پر ایکشن لیتے ہوئے مجھے تحصیل ہیڈ کوارٹر ہسپتال منتقل کرنے کا حکم دے دیا ورثاءاور غریب محنت کش کلیم اللہ نے وزیراعلی پنجاب عثمان بزدار اور آئی جی پولیس پنجاب کیپٹن (ر) عارف نواز سے اس سارے واقعہ کا فوری نوٹس لینے کا مطالبہ کیا ہے اور ذمہ داران ملازمین کے خلاف کاروائی کی جائے اس سلسلہ میں خبریں ہیلپ لائن کی ٹیم ملک مقبول احمد نے جب اس تشدد کیس پر ڈسٹرکٹ پولیس آفیسر بہاولنگر میڈم عمارہ اطہر سے بات کی تو انہوں نے کہا کہ میرے علم میں یہ واقعہ آ گیا ہے میں اس پر فوری طور پر ایکشن لے رہی ہوں اور انکوائری کروا کے ذمہ داران پولیس ملازمین کے خلاف کاروائی کی جائے گی ڈی پی او بہاولنگر میڈم عمارہ اطہر نے خبریں کی نشاندہی پر کلیم اللہ تشدد کیس میں دو پولیس ملازمین کو فوری طور پر معطل کر دیا گیا ہے۔

لاہور (مانیٹرنگ ڈیسک) چینل فائیو کے پروگرام ”نیوز ایٹ 7“ میں گفتگو کرتے ہوئے سابق وزیر خارجہ سردار آصف احمد علی نے کہا کہ دینی مدارس کو قومی دھارے میں لانا وقت کی اہم ضرورت ہے اسی معاملے میں مزید تاخیر نہیں کرنی چاہیے۔ 20لاکھ طالب علم مدارس میں پڑھ رہے ہیں آئین کے مطابق تعلیم فراہم کرنا ریاست کا کام ہے تاہم ریاست کی ناکامی کے باعث اتنی بڑی تعداد میں بچے مدارس میں تعلیم حاصل کرتے ہیں ان طالب علموں کے پاس سوائے مسجد کا امام یا خطیب بننے کے اور کوئی آپشن نہیں ہوتا قومی دھارے میں لانے سے ان کے پاس تمام دیگر شعبوں میں جانے کے مواقع حاصل ہونگے۔ بھارت اب مسئلہ کشمیر کو زیادہ دیر طاقت سے نہیں دبا سکتا ہمیں دنیا کو باور کرانا ہوگا کہ پاکستان ایک پرامن ملک ہے جو اپنے ہمسایہ ملکوں سے پرامن تعلقات چاہتا ہے۔ دفاعی تجزیہ کار جنرل (ر) امجد شعیب نے کہا کہ مدارس کو قومی دھارے میں لانا بڑی پیشرفت ہوگی حکومت ایک اچھا اقدام اٹھانے جارہی ہے منظور پینشن کے عزائم سے پہلے دن سے آگاہ تھے ان کے بیرون ملک تعلقات اور فنڈنگ کے شواہد بھی سامنے آگئے ہیں ان کے مطالبات کا تعلق تو فاٹا سے تھا پھر یہ کیسے سارے تجزیوں کے نمائندے بھی بھیجے ہیں۔ افغان ٹریڈ کیلئے باقاعدہ راستے موجود ہیں باقی تمام سرحد پر باڑ لگائی جارہی ہے تاکہ دہشت گردی کو قابو کیا جاسکے۔ ماہر قانون کامران مرتضیٰ نے کہا کہ نوازشریف کی ضمانت دینی ہے یا نہیں یہ سپریم کورٹ کا اختیار ہے سپریم کورٹ جو فیصلہ کرے گی وہ پھر قانون بن جائے گا جس کا ہر شخص پر اطلاق ہوگا اس لئے اعلیٰ عدلیہ کو تمام معاملات کو سامنے رکھ کر فیصلہ کرنا ہے قانون میں مشروط ضمانت کا کوئی تصور نہیں ہے نوازشریف کے وکیل خواجہ حارث نے پھر پھی درخواست دی اور عدالت نے بھی اسے منظور کرلیا مشروط ضمانت پر خوشی کے شادیانے بجانا میری سمجھ سے باہر تھا۔ ماہر معیشت ڈاکٹر فرخ سلیم حکومت کے 5سے 6 شرائط پر آئی ایم ایف سے مذاکرات جاری ہیں 6سے 7 سو ارب کے ٹیکس کی بات ہورہی ہے، ڈالر اور روپے کا ٹیرف کیسے طے کرنا ہے سی پیک پر چین کے قرضہ جات کا معاملہ ڈسکس ہورہا ہے قوم کو مہنگائی کا آدھا ٹیکہ تو لگ چکا ہے۔ 6سے 7سو ارب کا ٹیکہ پچھلے چند ہفتوں میں لگا، 8سے 9سو ارب کا ٹیکہ اگلے چند ہفتوں میں لگنے جارہا ہے آئی ایم ایف کو عوام کی مشکلات سے غرض نہیں ہوتا، موجودہ حکومت بھی پرانی حکومتوں کی ڈگر پر چل رہی ہے حفیظ شیخ تجزیہ کار اور باصلاحیت آدمی ہیں وقت بتائے گا کہ وہ کتنے کامیاب ہوتے ہیں۔

لاہور (مانیٹرنگ ڈیسک) چینل ۵ کے تجزیوں و تبصروں پرمشتمل پروگرام ”ضیا شاہد کے ساتھ“ میں گفتگو کرتے ہوئے سینئر صحافی و تجزیہ کار ضیا شاہد نے کہا ہے کہ اپوزیشن تو متحد ہو سکتی ہے میرا خیال ہے کہ ساری اپوزیشن کو مصیبت پڑی ہوئی ہے ہر ایک کو اپنے آپ کو بچانے کی پڑی ہوئی ہے۔ اپنے آپ کو بچانے کا اور کوئی طریقہ نہیں ہے کہ کسی نہ کسی ایشو کو سامنے کھڑا کر کے اس پر احتجاج کی سی کیفیت پیدا کرے کیونکہ وہ یہ تو کہہ نہیں سکتے کہ ہمیں باہر رہنے دیا جائے یا یہ نہیں کہہ سکتے کہ ہمارے خلاف منی لانڈرنگ کے کیس بند کر دیئے جائیں لہٰذا کسی نہ کسی بہانے، کبھی وہ صدارتی نظام کا لفظ بولیں گے کبھی کہیں گے کہ 18 ویں ترمیم کو نقصان پہنچ رہا ہے کبھی اس کے علاوہ کوئی نہ کوئی اب پنجاب میں بلدیاتی نظام کے خاتمے کو لے لیں گے اب نئے الیکشن کی آمد پر جو بلدیاتی الیکشن ہے اس کی آمد سے پہلے کوئی شور شرابا مچانا چاہیں گے چنانچہ اس کے سوا کوئی چارہ نہیں ہے او ریہ ایک اچھا موقع ہے مسلم لیگ ن کے لئے کہ یہاں پنجاب میں چونکہ ان کی اکثریت رہی ہے یہ تو شہباز شریف صاحب نے بھی بلدیاتی اداروں کو کوئی اختیارات نہیں دیئے تھے۔ اور سارے اختیارات اپنے پاس حکومت نے رکھے ہوئے تھے ورنہ اس سے بھی زیادہ بڑی تحریک چل سکتی تھی کیونکہ بلدیاتی اداروں کو ملا ہی کچھ نہیں ان کے پاس کوئی اختیارات تھا ہی نہیں نہ وہ کوئی کام کروا سکتے تھے نہ ان کے پاس بجٹ تھا میں یہ سمجھتا ہوں کہ شاید کوئی اتنی زیادہ عوام میں رسپانس پیدا کرنا مشکل ہو جائے گا یہ مشکل کام ہے تاہم وہ کوشش ضرور کریں گے۔ میں سمجھتا ہوں کہ یہ بات صحیح ہے کہ بلدیاتی اداروں میں نوجوانوں کو موقع دیا جائے گا کیونکہ تحریک انصاف میں ٹکٹوں کی تقسیم کے موقع پر بے تحاشا لوگوں کو شکایات نہیں اکثر لوگوں کا خیال تھا کہ ٹکٹ صحیح طور پر نہیں تقسیم ہوئے۔ اب ایک موقع ملے گا دوبارہ بلدیاتی الیکشن میں کیونکہ بلدیاتی اداروں کے پاس اگر اختیارات آ جائیں تو بہت حد تک وہ مقامی حکومت کے وہ پردھان بن سکتے ہیں۔ لہٰذا میں سمجھتا ہوں کہ بہت سے نوجوان خاص طور پر پسند کریں گے کہ وہ ایم پی اے یا ایم این اے نہیں بن سکے تو بلدیاتی اداروں میں اپنے شہر کا اقتدار حاصل کرنے والی مشینری ہے اس کے کل پرزے بن جائیں۔ یہ تو ضروری ہے کہ بلدیاتی نمائندوں کو اختیارات دیئے جائیں اور میری خواہش ہے کہ پچھلی حکومت نے غلط کیا تھا اور یہ حکومت بھی یہی کرے گی کہ نام کے اختیارات ہوں اصل میں ان کے پاس کچھ نہ ہو تو پھر اس کا کوئی فائدہ نہیں ہو گا۔ لیکن اگر اختیارات دے دیں تو مقامی سطح پر حکومتیں موثر نظام بنا سکتی ہیں اور شہروں، قصبات اور ڈویژن لیول پر ضلع لیول اور تحصیل لیول پر بہت اچھی سطح کی حکومتیں قائم ہو سکتی ہیں۔ ضیا شاہد نے کہا مزدوروں کے ذکر پر حکومت نے بہت ذکر کیا پیپلزپارٹی نے تو بہت ہی شور مچایا لیکن یہ ایک حقیقت ہے کہ ذوالفقار علی بھٹو کے زمانے میں کراچی کے مزدوروں پر گولی چلی اور کئی مزدور شہید بھی ہو گئے پھر معراج محمد خان نے جن کو بھٹو اپنا جانشین قرار دیتے تھے دو جانشین کیا کرتے تھے نمبر ایک غلام مصطفی کھر نمبر2 معراج محمد خان۔ مصطفی کھر نے بھی ان سے بغاوت کی اور الگ ہو گئے اور جو معراج محمد خان تھے انہوں نے تو الگ ہو کر قومی محاذ آزادی بنا لیا تھا ان کی سارا جھگڑا ہی مزدوروں کو نہ دینے پر تھا۔ میں سمجھتا ہوں کہ پیپلزپارٹی نے بے نظیر بھٹو کے دور میں مزدوروں کے لئے کوئی خاص کام نہیں کیا اور پھر آصف زرداری کے 5 سالہ دور میں بھی تو سرے سے کوئی کام نہیں ہوا۔ اب تو کافی دیر سے یہ بوگی بند پڑی ہے اور میں یہ محسوس کرتا ہوں کہ اگر اس حکومت نے عقل مندی سے کام لیا تو مزدوروں کو اپنے ساتھ ملا سکتی ہے کیونکہ واقعتاً مزدوروں کے لئے کسی نے بھی کام نہیں کیا، نوازشریف کی طرف سے علاج کے لئے باہر جانے کی اجازت کی درخواست کے حوالے سے گفتگو کرتے ہوئے ضیا شاہد نے کہا کہ میں نے بہت شروع میں ہی کہا تھا کہ نوازشریف صاحب پوری کر رہے ہیں کہ وہ باہرجائیں اور اس وقت سب نے اس کا انکار کیا۔ مسلم لیگ ن کی ترجمان مریم اورنگزیب تک نے کہا کہ باہر جانے کی تو کوئی بات ہی نہیں ہوئی لیکن آپ یہ دیکھیں کہ تینوں درخواستیں زبان حال سے چیخ کر کہہ رہی ہیں کہ مجھے باہر بھجوایا جائے۔ میں یہ سمجھتا ہوں کہ آج عمران خان نے اس سلسلے میں ایک بڑے پتے کی بات کی ہے کہ انہوں نے کہا ہے کہ میں عدالتوں کے معاملات میں داخل نہیں دینا چاہتا لیکن انہوں نے ایک سوال کیا، انہوں نے کہا کہ میرا سوال یہ ہے پاکستان کی جیلوں میں بند کتنے قیدی ہیں جنہیں اس قسم کی یا اس سے بھی سنگین بیماریاں ہیں کیا ان سب کو باہر جانے دیا جائے اور انہوں نے کہا کہ یہ میں سوال پوچھتا ہوں کہ اگر ان کو اجازت دے دی جائے گی تو پھر ان لوگوں کا کیا قصور ہے جو جیلوں میں بند ہیں۔ میں یہ سمجھتا ہوں کہ خاص طور پر عمران خان یہ بات کرنے میں حق بجانب ہیں کہ کیوں وہ خود بیمار بھی نہیں ہے اس کے باوجود اپنی والدہ کی بیماری کے حوالے سے انہوں نے شوکت خانم کے نام سے ایک معیاری ہسپتال قائم کیا جو پاکستان کے ممتاز ترین ہسپتالوں میں شامل ہے انہوں نے پشاور میں بھی اس کی ایک شاخ قائم کی اور اب کراچی میں بھی بنانے جا رہے ہیں اس لئے عمران خان یہ کہنے میں حق بجانب ہیں کہ انہوں نے اپنے دور میں کوئی ایک ہسپتال بھی ایسا کیوں نہیں بنایا جس میں خود آپ کا بھی علاج ہو سکے۔ یا وہاں علاج کروانے میں آپ کو کوئی ہچکچاہٹ نہ محسوس ہو۔
قانونی ماہر اور سابق جج خالد رانجھا کی بات میں وزن ہے کہ شاید نوازشریف کو باہر علاج کرانے کی اجازت نہ دی جائے۔ نوازشریف کی جس طرح سے مختلف افراد سے ملاقاتیں جاری ہیں ان کی حالت زیادہ تشویشناک نظر نہیں آتی۔
افغان سرحد پار سے دہشتگردوں نے حملہ کر کے ہمارے 3 فوجی جوان شہید کر دیئے سوال یہ ہے کہ افغان حکومت کہاں ہے۔ ان حملوں سے ثابت ہو رہا ہے کہ افغان حکومت کا کنٹرول صرف کابل تک محدود ہے باقی پورے افغانستان میں ان کی کوئی رٹ نہیں ہے، افغانستان کے مختلف علاقوں میں مختلف گروپوں کا کنٹرول ہے۔ دہشتگرد گروہ افغان سرحد پرباڑ لگنے کے مخالف ہیں کیونکہ باڑ کا منصوبہ مکمل ہونے کی صورت میں ان کی در اندازی ممکن نہ رہے گی۔
افغانستان میں امن قائم کرنے کے لئے لانگ ٹرم مذاکرات ضروری ہیں تاہم جب بھی ایسا ہونے لگتا ہے تو افغان حکومت کسی نہ کسی بہانے مذاکرات سے نکل جاتی ہے۔ قطر کے مذاکرات میں بھی ایسا ہی کیا گیا اور بہانہ یہ بنایا گیا کہ ہم فلاں فلاں بندے کے ہوتے مذاکرات میں شامل نہیں ہوں گے۔ دنیا میں کبھی ایسا نہیں ہوتا اگر آپ نے بات کوئی ہوتو اس سے کوئی فرق نہیں پڑتا کہ مخالف فریق کے ساتھ کون آیا ہے۔
500 ارب کے ٹیکس تو مان لئے گئے ہیں دیکھنا تو یہ ہے کہ مشیر خزانہ حفیظ شیخ یہ بھاری ٹیکس کس سیکٹر سے لیتے ہیں کیا ان لوگوں پر ٹیکس لگاتے ہیں جنہوں نے آج تک ٹیکسی نہیں دیا یا پھر عوام پر ہی یہ بوجھ بھی ڈالتے ہیں جو پہلے میں جانکنی کی کیفیت میں ہے۔ حکومت کو چاہئے کہ وکلا، ڈاکٹرز، انجینئرز اور کاروباری افراد جس کی بھاری آمدن ہوتی ہے ان سے یہ ٹیکس وصول کرے اور عام عوام جو پہلے ہی مہنگائی کے ہاتھوں مرے جا رہے ہیں ان پر مزید بوجھ نہ ڈالے۔

لاہور(ویب ڈیسک)دنیا بھرکی طرح پاکستان میں بھی آج مزدوروں کا عالمی دن منایا جارہا ہے اور اس موقع پر آج ملک بھر میں عام تعطیل کا اعلان کیا گیا ہے۔1886 میں یکم مئی کے دن امریکا کے شہر شکاگو کے مزدور، سرمایہ داروں اور صنعت کاروں کی جانب سے کیے جانے والے استحصال پر سڑکوں پر نکلے تھے لیکن پولیس نے اس پرامن جلوس پر فائرنگ کرکے سیکڑوں مزدوروں کو ہلاک اور زخمی کردیا جبکہ درجنوں کو اپنے حق کے لئے آواز بلند کرنے پر پھانسی دے دی گئی لیکن یہ تحریک ختم ہونے کے بجائے دنیا بھر میں پھیلتی چلی گئی جو اب بھی جاری ہے۔پاکستان میں قومی سطح پر یوم مئی منانے کا آغاز 1973 میں پاکستان کے پہلے منتخب وزیراعظم ذوالفقار علی بھٹو کے دور حکومت میں ہوا۔ اس دن کی مناسبت سے ملک بھر کے تمام چھوٹے بڑے شہروں میں تقریبات، سیمینارز، کانفرنسز اور ریلیوں کا انعقاد کیا جاتا ہے جن میں شکاگو کے محنت کشوں کے ساتھ اظہار یکجہتی سمیت مزدوروں، محنت کشوں کے مسائل کو اجاگر کرنے اور ان کے حل کے لئے اقدامات کا مطالبہ کیا جاتا ہے۔گزشتہ کئی برسوں سے دنیا بھر میں یکم مئی کا دن مزدوروں کے عالمی دن کے طور پر منایاجاتا ہے لیکن محنت کشوں کے مسائل کے حل کے لئے اس قدر سنجیدہ کوششیں نہیں کی گئیں جس قدر ہونی چاہیئں تھیں۔

لاہور ( صدف نعیم سے )صوبائی وزیر معدنیات حافظ عمار یاسر نے کہا ہے کہ ہماری حکومت مزدورں کے مسائل اُنکی دہلیز پر حل کرے گی۔انہوں نے یہ بات چکوال میں مزدوروں کے عالمی دن کے حوالے سے مائنز لیبرہسپتال چوآسیدن شاہ میں منعقدہ اجلاس سے خطاب کرتے ہوئے کہی۔اس موقع پر مزدور فیڈریشن نے ایک ریلی کا انعقاد کیا جس کی قیادت صوبائی وزیر معدنیات حافظ عمار یاسر نے کی۔ تقریب میں کمشنر مائنزچوہدری ریاض،اسسٹنٹ مائنز لیبر ویلفیئر کمشنر عبدالرشید،ڈپٹی ڈائریکٹر مائنز رانا ساجد، ہسپتال لیبرویلفیئر کمیٹی کے سربراہ ہارون غنی چیمہ،چیئرمین پاکستان مائنز ورکرز فیڈریشن راسعید خٹک، راجہ مجاہد افسر،مزدور یونین کے راہنماءشریف الدین سواتی، مائنز اونر اور مزدورں کی ایک بڑی تعداد نے شرکت کی۔ صوبائی وزیر عمار یاسر نے خطاب کرتے ہوئے کہا کہ حکومت پنجاب نے زیرتعلیم بچوں کا وظیفہ 100%بڑھا دیا ہے۔ورکرزویلفیر بورڈ کے تحت ڈیتھ گرانٹ اور شادی گرانٹ کی رقم بڑھا کر جاری کر دی گئی ہے۔EOBIمیں چالیس ہزار مزدور رجسٹرڈ کئے جائیں گے۔انہوں نے آج مائنز میں حادثے میں جانبحق ہونے واے مزدور کی ہلاکت پر ایکشن لیتے ہوئے فوری طور پر مائنز کو بند کرنے اور واقعے کی انکوائری کا حکم دیااور کہا کہ شہید مزدور کے ساتھ پورا انصاف کیا جائے گااور اس کی فیملی کو لیبر لاز کے مطابق تمام مراعات دی جائیں گیں۔انہوں نے 45ویلفیر الاﺅنس کا بھی اعلان کیا۔انہوں نے کہاکہ مزدور بھائیوں کے بچوں اور فیملیز کے مسائل ترجیہی بنیادوں پر حل کئے جائیں گے اورEOBIپر آپکا مقدمہ میں خود لڑوں گا۔ چیئرمین پاکستان مائنز ورکرز فیڈریشن راسعید خٹک نے مزدورں کی پینشن اور مدت ملازمت پر صوبائی وزیر سے EOBIکے خلاف ایکشن لینے کا مطالبہ کیا۔اجلاس سے میاں محمد رمضان،علی شیر،شریف الدین سواتی،رحمت علی،منصور علی شاہ،طلہ فاروق شاہ،میاں محمد افصل،خالد پرویز،راجہ مجاہد افسر اورکمشنر مائنزلیبر ویلفیر ریاض احمد چوہدری نے خطاب کے دوران مزدورں کے حقوق اور اہمیت پر روشنی ڈالتے ہوئے ان کے ساتھ مکمل تعاون اور ہمدردی کے جذبات کا اظہار کیا۔کمشنر مائنزلیبر ویلفیر ریاض احمد چوہدری نے بتایا کہ انہوں نے مکڑ وال میں پینے کے صاف پانی اور 10بیڈ کے ہسپتال کا قیام اور تمام اضلاح میں 100گھروں کی تعمیر،لیبر پارکوں میں بنیادی سہولتوں کی فراہمی اورایک گرلز سکول کا اجراءہوچکا ہے۔ آخر میں صوبائی وزیر معدنیات پنجاب کو چیف مائنر بنانے کے لئے ٹوپی اور میڈل پیش کیاگیا اور خالدپرویز، میاں محمد رمضان،علی شیر،شریف الدین سواتی،رحمت علی،خالد عزیز،ندیم حیات اور کچھ مزدوروں کو سرٹیفکیٹ اور میڈلز دئے گئے۔

لاہور (ویب ڈیسک)پنجاب کے عوام کو مبارک ہو انہیں ایک جعلی،بے اختیار اور مردہ بلدیاتی نظام سے نجات مل گئی۔ پنجاب اسمبلی سے نئے لوکل باڈیز بل کی منظوری سے عوام کی نچلی سطح پر جمہوریت کے ثمرات پہنچیں گے۔ عمران خان حکومت کا پنجاب کے عوام سے کیا گیا ایک بنیادی وعدہ پورا ہو گیا۔ مفلوج بلدیاتی اداروں کی جگہ مفید، موثر اور عوام دوست بلدیاتی نمائندوں کی صورت میں حقیقی معنوں میں اختیارات اور ترقیاتی فنڈز نچلی سطح پر منتقل ہونے کی راہ ہموار ہو گئی۔ ان خیالات کا اظہار صوبائی وزیراطلاعات و ثقافت سید صمصام علی بخاری نے آج یہاں میڈیا سے گفتگو کرتے ہوئے کیا۔ انہوں نے کہا کہ صوبائی بجٹ کا 33 فیصدبلدیاتی اداروں کو منتقل ہونے سے ہمارے گلی محلوں کے تمام مسائل حل ہو جائیں گے۔ پچھلی حکومت کے دوران ن لیگ نے شدید عوامی اور عدالتی دباو¿ پر نمائشی بلدیاتی نظام قائم کیا تھا جس کا مقصد ان کی ذاتی بادشاہت کے نظام کو مستحکم کرنا اور قومی خزانے پر ہاتھ صاف کرنا تھا۔ سید صمصام بخاری نے کہا کہ مضبوط اور مستحکم بلدیاتی ادارے کسی بھی ترقی یافتہ جمہوری ملک کی سیاست، گڈگورننس اور شفافیت کی بنیاد سمجھے جاتے ہیں۔ ہمارے عوام 70 سال سے فرسودہ اور گلے سڑے بلدیاتی نظام کے تحت کسمپرسی اور بدحالی کی زندگی جی رہے تھے۔ جس کی بنیادی وجہ سابقہ حکومتوں کے گماشتوں اور رشتہ داروں کی ان نام نہاد بلدیاتی اداروں پر اجارہ داری تھی جو تمام وسائل اور فنڈز ہڑپ کر جاتے تھے اور عوام بیچارے ہاتھ ملتے رہ جاتے تھے۔ ضلع اور یونین کونسل کی بجائے نئے بلدیاتی نظام میں محلہ کونسل اور ولیج کونسلیں عمل میں آئیں گی جن کا انتخاب 4 سال کی مدت کے لئے غیر جماعتی بنیادوں پر ہو گا۔ صوبائی وزیراطلاعات کا کہنا تھا کہ نئے بلدیاتی نظام کی طرح عمران خان حکومت عوام سے کئے گئے باقی وعدے بھی پورے کرے گی۔ نوکریوں، غریب آدمی کے لئے گھروں کی تقسیم اور معاشی صورتحال کی بہتری جیسے اقدامات عمران خان کی حکومت کے بنیادی ایجنڈے کا حصہ ہیں۔ تاہم اس ایجنڈے کی تکمیل کے ساتھ ساتھ پی ٹی آئی حکومت کا کرپشن کے خلاف مشن کسی قیمت پر رک نہیں سکتا۔ انہوں نے کہا کہ اپوزیشن لیڈر اگر نئے بلدیاتی نظام کے قانون کی منظوری کے خلاف عدالت میں گئے تو اس سے ان کی عوامی مفاد سے ازلی عداوت اور ذاتی مفادات کے لئے بدعنوانی کو اپنے لئے جائز قرار دینے کا تاثر مزید پختہ ہو جائے گا۔

لاہور(صدف نعیم سے )چیئرمین برابری پارٹی پاکستان جواد احمد کا کہنا ہے کہ محض محنت کشوں کے عالمی دن کو منانے سے ان کے مسائل حل نہیں ہوتے، مزدوروں کسانوں اور محنت کشوں کو بنیادی حقوق فراہم کرنا حکومت کی ذمہ داری ہے،یوم مئی شکاگو کے شہداءسے تجدیدعہد کیا جائے۔