کراچی (ویب ڈیسک ) پاکستانی نڑاد کینیڈین سائنسدان نے مصنوعی دماغی چپ بنا لی۔فرض کریں آپ کو لاعلاج دماغی بیماری کا سامنا ہے اور آپ کی زندگی بچانے کے لیے آپ کے دماغ میں مصنوعی سیمی کنڈکٹر چپ لگا دی جائے تو آپ کیسا محسوس کریں گے, یقیناً بہت خوش ہوں گے اب ایساکچھ ممکن ہونے کو ہے اور وہ بھی ایک پاکستانی نڑاد کینیڈین سائنسدان ڈاکٹرنوید سیدکی کاوشوں سے۔تقریباً دو دہائیوں سے جاری کوششوں، تجربات اور مشاہدوں کے بعد مصنوعی دماغی چپ انسانی استعمال کے لیے قابل استعمال ہونے کو ہے۔ پہلے مرحلے میں یہ چپ مرگی کا شکار ان مریضوں کے لیے استعمال میں لائی جائے گی جن پر کوئی دوائی اثر نہیں کرتی۔ڈاکٹرنوید سید دماغی سیل کی دوہری کارکردگی کو چانچنے والی چپ کے بانی ہیں جورواں سال کے وسط میں کسی بھی شخص پر اس چپ کا تجربہ کریں گے۔مجوزہ ہائی برڈ دماغی چپ میں نئی قسم کا طریقہ کار استعمال ہو گا جس کا پہلے استعمال کبھی نہیں ہوا۔دماغی چپ کے استعمال سے نہ صرف مرگی کے دوروں کا معلوم ہو سکے گا بلکہ یہ چپ دماغ میں دوروں کی وجہ سے پیدا ہونیوالی تبدیلیوں کا بھی پتہ دیگی۔ مصنوعی چپ انسانی دماغ کے سیلز کو سن کر جواب بھی دے سکے گی۔
ڈاکٹر نوید سید کی تیار کردہ چپ ایم ا?ر ا?ئی سے بھی مماثلت رکھتی ہے اور سرجن کو ایم ا?ر ا?ئی میں دوروں کی اصل جگہ کا تعین بھی کرنے میں مددگار تصور ہوگی اس طرح دماغی چپ سرجیکل ا?لات اور تربیت کے معاملے میں بھی اہم کامیابی تصور ہوگی۔
Monthly Archives: March 2019
کانگو میں ایبولا کی وبا پھوٹنے سے سیکڑوں افراد ہلاک
کانگو(ویب ڈیسک ) ڈیموکریٹک ریپبلک آف کانگو (ڈی آر سی) میں گزشتہ آٹھ ماہ سے جاری ایبولہ وائرس کی وبا ہولناک صورتحال اختیار کرچکی ہے جس میں اب تک 1000 سے زائد افراد متاثر ہوئے ہیں اور ان کی دو تہائی تعداد لقمہ اجل بھی بن چکی ہے۔طبی ماہرین کے مطابق ڈاکٹروں اور طبی عملے پر عوام کے عدم اعتماد اور جھوٹی افواہوں کی وجہ سے ایبولہ کو قابو کرنے کی تمام کوششیں ناکام ہورہی ہیں جس سے ڈی آر سی میں یہ مہلک وبا پھوٹ پڑی ہے۔ اس ضمن میں کانگو کے دو شہروں بینی اور بیوٹیمبو میں ایک سروے سے انکشاف ہوا ہے کہ تین میں سے ایک فرد ہی اس بات پر یقین رکھتا ہے کہ حکومت اس بیماری سے لڑنے میں اس کی کوئی مدد کرسکتی ہے جبکہ 25 فیصد افراد نے کہا کہ ایبولہ وائرس کا کوئی وجود نہیں۔
اس سروے میں 36 فیصد لوگوں نے کہا کہ یہ ایک خودساختہ بیماری ہے جس کا مقصد کانگو کو غیرمستحکم کرنا ہے۔ جبکہ 1000 میں سے 961 افراد نے کہا کہ انہوں نے اس مرض کے بارے میں طرح طرح کی افواہیں سن رکھی ہیں۔ یہ تحقیق ممتاز طبی جریدے لینسٹ میں شائع ہوئی ہے۔
مطالعے کے سربراہ اور ہارورڈ میڈیکل اسکول سے تعلق رکھنے والے اسکالرپیٹرک ونک نے یہ بھی کہا کہ کانگو میں ایبولہ سے متاثرہ افراد کسی ڈاکٹر کی بجائے اپنے محلے اور برادری میں ہی اس کا علاج کرنے کی کوشش کرتے ہیں۔ ’اس طرح مریض ایبولہ کے مصدقہ مراکزی کی بجائے عطائی ڈاکٹروں کے پاس جارہے ہیں جس سے انفیکشن تیزی سے پھیل رہا ہے،‘
سال 2014 سے 2016 تک ایبولہ وائرس پہلے مغربی افریقہ میں نمودار ہوا تھا جس میں 11 ہزار سے زائد افراد ہلاک ہوئے تھے اور اب کانگو میں اس کے حملہ دوسری بڑی مہلک وبا کی صورت میں سامنے ا?یا ہے۔ 2014 میں ایبولہ کی وبا پھوٹنے کے بعد اس کی ویکسین پر کروڑوں ڈالر خرچ کئے گئے۔
ایتھیوپیا میں کچے گوشت کی ڈشوں کا جنون
ادیس ابابا (ویب ڈیسک ) عام طور پر لوگ کچا گوشت کھانا پسند نہیں کرتے کیونکہ یہ بد ذائقہ ہوتا ہے اور ساتھ ہی کچے گوشت میں موجود جراثیم (بیکٹیریا) لاتعداد مرض کی وجہ بن سکتے ہیں۔ لیکن ایتھیوپیا میں کچا گوشت سب کا من پسند کھاجا ہے۔اگرچہ یہ عام دوکانوں پر فروخت ہوتا تاہم گائے اور بکری کے کچے گوشت کی ڈشیں تہواروں، شادی اور دیگر اہم مواقع پر بہت بڑی تعداد میں فروخت ہوتی ہیں۔ لوگوں کی بڑی تعداد لگ بھگ روزانہ ہی کچا گوشت کھاتی ہے۔ایتھیوپیا کے لوگوں سے اس کی وجہ معلوم کریں تو وہ کہیں گے کہ اس سے جسم کو توانائی اور تازگی سی ملتی ہے۔ تاہم لوگوں کی اکثریت اسے کھانے سے پیٹ میں کیچووں، ای کولائی اور سالمونیلا بیکٹیریا یا کسی اوربیماری سے خوفزدہ نہیں۔ ایتھیوپیا کی نواح میں کچے گوشت خور نے کہا، ’مجھے (کچے گوشت کی بیماری سے) فضول بات کی کوئی پرواہ نہیں۔ میں گزشتہ 20 برس سے کچا گوشت کھارہا ہوں اور کبھی بیمار نہیں ہوا کیونکہ میرا جسم اس عمل سےمحبت کرتا ہے۔‘
کچے گوشت کے ایک شوقین نے کہا،’یہ غلط بات ہے کہ بغیرپکے ہوئے گوشت کا کوئی نقصان ہوتا ہے۔ میری دادی کا انتقال 114 سال کی عمر میں ہوا اور میری والدہ کی عمر 92 برس ہے اور دونوں ا?خری وقت تک کچا گوشت کھاتی رہی تھیں۔‘
ہمایوں سعید کی سائنس فکشن فلم ” پراجیکٹ غازی “ آج ریلیز ہو گی
لاہور (شوبزڈیسک)پاکستانی فلمی صنعت کی نئی پیشکش ” پراجیکٹ غازی“ ڈسٹری بیوشن کلب کے پلیٹ فارم سے سرکٹ کے تمام شہروں میں سنیماﺅں کی زینت بننے کیلئے تیار ہے اور وفاق کے مرکزی سنسر بورڈ کے ساتھ ساتھ پنجاب اور سندھ کے سنسر بورڈز نے بھی فلم کو عام نمائش کی اجازت دے دی ہے ۔ لاہور میں فلم کے سنسر شو کا اہتمام گذشتہ روز کیا گیا جس کے بعد بورڈ اراکین نے فلم کوعام نمائش کا سرٹیفیکیٹ جاری کردیا ۔ سپر سٹار ہمایوں سعید ، شہریار منور اور سائرہ شہروز سمیت دیگر فنکاروں سے سجی ”پراجیکٹ غازی “ایک دلچسپ کہانی اور جدید سائنس ایفیکیٹس پر مبنی سائنس فکشن فلم ہے جس میں کہانی کے مطابق نہ صرف بہترین فنکاروں کا انتخاب کیا گیا ہے بلکہ پروڈکشن کے ہر پہلوپر خاص توجہ دی گئی ہے ۔ڈائریکٹر سید محمد علی شاہ کا کہنا ہے کہ ” پراجیکٹ غازی “ میں شامل تمام فنکاروں نے اپنے فنکارانہ کیرئیر کے بہترین کردار اداکئے ہیں۔ تجزیہ نگاروں کے مطابق غیر ملکی فلموں کی عدم موجودگی میں پراجیکٹ غازی فلم بینوں کیلئے تازہ ہوا کا جھونکا ثابت ہوگی اور سنیما انڈسٹری کی رونقوں کو بحال کرنے میں کامیاب رہے گی ۔
مہوش حیات نے تمغہ امتیاز محنت کش خواتین کے نام کردیا
لاہور (شوبزڈیسک) اداکارہ مہوش حیات نے تمغہ امتیاز ملک کی تمام محنت کش خواتین کے نام کردیا۔مہوش حیات نے سوشل میڈیا پر اپنے پیغام میں لکھا ہے کہ میں کبھی نہیں چاہتی تھی کہ میں اسے صنفی معاملے کے طور پر دیکھوں لیکن لوگوں کی شدید تنقید ، طوائف اور بری عورت جیسے نازیبا الفاظ نے یہ سوچنے پر مجبور کردیا کہ ہمارا معاشرہ کس قدر اخلاقی پستی کاشکار ہے۔ ہم اس انڈسٹری کا حصہ ہوسکتے ہیں جس کی چمک دھمک دکھتی ہو لیکن اس کا مطلب یہ نہیں کہ ہم نے اپنی اخلاقیات فراموش کردیں۔ انہوں نے تنقید کرنے والوں سے کہا کہ آپ مجھے نہیں جانتے اور نہ ہی میرا نام خراب کرنے کا آپ کو کسی نے حق دیا ہے۔ انہوں نے ہمت بڑھانے والوں کیساتھ نفرت کا اظہار کرنیوالوں کا بھی شکریہ ادا کرتے ہوئے کہا کہ تنقید نے مجھے پہلے سے زیادہ مضبوط بنا دیا ہے، میرا ایوار ڈ ملک کی تمام محنت کش خواتین کیلئے ہے۔
اداکارہ ارمیلا متونڈکر کانگریس میں شامل ہوگئیں
نئی دہلی (شوبز ڈیسک) بھارتی فلم انڈسٹری کی معروف اداکارہ ارمیلا ماٹونڈکر نے حزب اختلاف کی جماعت کانگریس میں شمولیت اختیار کرلی ۔ بھارتی میڈیا کے مطابق ارمیلا نے کانگریس کے صدر راہول گاندھی سے ملاقات کے بعد پارٹی میں شامل ہونے کا اعلان کیا۔ بعدا زاں صحافیوں سے گفتگو کرتے ہوئے ارمیلا ماٹونڈکر کا کہنا تھا کہ انتخابات کے لئے کانگریس میں شمولیت اختیار نہیں کی، وہ کانگریس کے نظریات پر یقین رکھتی ہیں اسی وجہ سے یہاں ہیں۔ارمیلا نے راہول گاندھی کی تعریف کرتے ہوئے کہا کہ وہ سب کو ساتھ لے کر چلتے ہیں اور آج کے دور میں ایسے ہی لیڈر کی ضرورت ہے۔
خلا تمام انسانوں کی مشترکہ ملکیت ، بھارت آلودہ کرنے سے باز رہے : امریکہ
واشنگٹن(صباح نیوز) امریکہ نے خلا کو گندا کرنے پر بھارت کو تنبیہ کی ہے ۔ غیرملکی خبررساں ادارے کے مطابق بھارتی وزیراعظم نریندر مودی نے انتخابات سے پہلے اینٹی میزائل ٹیکنالوجی حاصل کرنے کا ایک اور شوشہ تو چھوڑ دیالیکن امریکہ کی طرف سے نہ صرف تجربے پر تشویش ظاہر کی گئی بلکہ اس کے نتائج سے خبردار بھی کیا ہے۔ امریکہ کے قائم مقام وزیر دفاع پیٹرک شیناہن نے بھارت سے کہا ہے کہ وہ خلا کو آلودہ نہ کرے۔ خلا تمام انسانوں کی مشترکہ ملکیت ہے جس کو اینٹی میزائل تجربے جیسے اقدامات سے آلودہ نہیں کیا جانا چاہئے۔ انہوں نے کہا کہ انسانوں کا خلا پر انحصار بڑھ رہا ہے اس لئے بین الاقوامی سطح پر قانون سازی کی ضرورت بڑھ گئی ہے۔دوسری جانب امریکی ائیر سپیس کمانڈ کے وائس کمانڈر لیفٹیننٹ جنرل ڈیوڈ تھامسن نے ایوان نمائندگان کی کمیٹی کو آگاہ کیا ہے کہ بھارتی تجربے کے نتیجے میں ملبے کے 270 ٹکڑے وجود میں آئے اور ان کی تعداد بڑھ سکتی ہے۔ ناسا کے سربراہ نے کمیٹی کو بتایا کہ خلائی ملبہ انتہائی خطرناک ثابت ہو سکتا ہے۔ ایک دفعہ ملبہ پھیل جائے تو اس کو سمیٹنا ناممکن ہوتا ہے۔یاد رہے بھارتی وزیراعظم نریندر مودی نے انتخابی مہم کے سلسلے میں کئے گئے ایک جلسے کے دوران اسپیس ٹیکنالوجی میں انقلاب برپا کرنے کا دعوی کیاہے۔بھارتی وزیراعظم نے خطاب کے دوران کہا کہ امریکا روس اور چین کے بعد بھارت چوتھا ملک ہے جس نے میزائل کے ذریعے سیٹلائٹ کو نشانہ بنانے کی صلاحیت حاصل کرلی ۔انہوں نے کہا کہ مشن شکتی کامیابی سے مکمل کرلیا گیا جس کے تحت میزائل کے ذریعے خلا میں نچلی سطح پر گردش کرنے والے سٹیلائٹ کو کامیابی سے نشانہ بنایا گیا جس پر قوم مبارکباد کی مستحق ہے۔
غربت کے خاتمہ کیلئے جہاد جاری رکھیں گے : عثمان بزدار
لاہور (خبرنگار) وزیراعلیٰ پنجاب عثمان بزدار سے وزیراعلی آفس میں صوبائی وزراءنے ملاقات کی- وزیراعلیٰ سے ملاقات کرنے والوں میں صوبائی وزیر زکوٰة و عشر شوکت علی لالیکا، صوبائی وزیر آبپاشی محمد محسن لغاری، صوبائی وزیر محنت انصر مجید نیازی اور صوبائی وزیر اقلیتی امور اعجاز عالم شامل تھے۔ ملاقات کے دوران محکموں کے امور، کارکردگی اور عمومی سیاسی صورتحال پر تبادلہ خیال کیا گیا۔ وزیراعلیٰ عثمان بزدار نے اس موقع پر گفتگو کرتے ہوئے کہا کہ غربت کا خاتمہ جہاد کے مترادف ہے، یہ جہاد ضرور کریں گے۔ غربت مکاﺅ پروگرام ”احساس اور کفالت“ وزیراعظم عمران خان کے وژن کا عکاس ہے۔ انہوں نے کہا کہ معاشرے کے پسماندہ اور محروم افراد کی معاونت حکومت کا فرض اولین ہے۔ غربت مکاﺅ پروگرام میں خواتین کیلئے معاشی خود کفالت بھی شامل ہوگی۔ انہوں نے کہا کہ عوام کی پسماندگی دور کرنے کیلئے میسر وسائل سے بھرپور استفادہ کریں گے۔ صحت، تعلیم، رہائش اور اچھی خوراک ہر انسان کا بنیادی حق ہے۔ پنجاب میں تاریخ کا بہترین بلدیاتی نظام لائیں گے۔ غربت کے خاتمے کیلئے سب کو مل جل کر کام کرنا ہوگا۔ انہوں نے کہا کہ زکوٰة و عشر کے نظام کو موثر بنانے کے لئے انفارمیشن ٹیکنالوجی سے مدد لی جائے- پنجاب میں محنت کشوں کے حقوق کے تحفظ کے لئے تمام تر اقدامات کئے جائیں- صوبے میں اقلیتوں سے متعلق فلاحی منصوبوں کی جلد اور یقینی تکمیل چاہتے ہیں- صوبائی وزراءنے وزیراعلیٰ کو اپنے محکموں کی کارکردگی سے آگاہ کیا- وزیراعلیٰ پنجاب عثمان بزدار کی زیر صدارت ڈیرہ غازی خان ڈویژن اور لاہور ڈویژن کے انتظامی و پولیس افسران کا اجلاس منعقد ہوا، اجلاس میں عوام کو بہترین خدمات مہیا کرکے ریلیف فراہم کرنے کے عزم کا اعادہ کیا گیا- وزیراعلیٰ عثمان بزدار نے اجلاس سے خطاب کرتے ہوئے کہا کہ اللہ تعالیٰ نے افسران کو لوگوں کی خدمت کا موقع دیا ہے۔ افسران عوام کی مشکلات حل کرنے میں موثر انداز میں بھرپورکردار ادا کریں- افسران بلاخوف اور پورے اعتماد کے ساتھ لوگوں کے جائز کام کریں- دباﺅ یا سفارش کو کسی بھی صورت خاطر میں نہ لایا جائے اور ناجائز کام کسی کا بھی نہ کیا جائے- انہوں نے کہا کہ عوام کے مسائل کے حل کے لئے پنجاب حکومت آپ کے ساتھ ہوگی اور عوام کی خدمت کرنے والے افسروں کی ہر سطح پر حوصلہ افزائی کی جائے گی- انہوں نے کہا کہ عوام کو تبدیلی واضح طور پر نظر آنی چاہےے اور اس ضمن میں ایسے اقدامات کئے جائیں جس سے عوام کو تبدیلی کا احساس ہو- انہوں نے کہا کہ رٹ آف دی گورنمنٹ ہر مقام اور ہر وقت نظر آنی چاہےے- صفائی کے نظام کو بہتر بنانے، کرپشن کے خاتمے اور فلڈ پلان سمیت دیگر نکات پر خصوصی توجہ دی جائے- ڈپٹی کمشنرز اور ڈی پی اوز مشترکہ کھلی کچہریاں لگائیں- انہوں نے کہا کہ مجھے پوری امید ہے کہ میری ٹیم مجھے مایوس نہیں کرے گی- پالیسیاں کافی نہیں، عملدرآمد یقینی بنانا ہوگا- ایڈیشنل چیف سیکرٹری نے کہا کہ انتظامیہ اور پولیس کو مل جل کر ٹیم کی حیثیت سے کام کرنا ہوگا- ریونیو سے متعلق امور اور تنازعات کو جلد حل کرنے پر توجہ دی جائے- انسپکٹر جنرل پولیس نے کہا کہ پولیس میں احتساب کا نظام دوسرے محکموں کے لئے مثال بنے گا- پولیس کو تطہیر کے عمل سے گزار رہے ہیں- امن و امان کی صورتحال بہتر ہے، لاہور میں جرائم کی شرح کم ہوئی ہے- اجلاس میں مال روڈ پر مظاہروں پر پابندی کے عدالتی فیصلے پر عملدرآمد یقینی بنانے کے لئے مختلف تجاویز کا جائزہ لیا گیا جبکہ نیب عدالت کو ٹھوکر نیاز بیگ منتقل کرنے کی تجاویز پر بھی غور کیا گیا- اجلاس میں آر پی او ڈیرہ غازی خان ڈویژن نے جرائم کے خاتمے کے لئے کئے گئے اقدامات سے آگاہ کیا- انتظامی و پولیس افسران نے وزیراعلیٰ کو گڈ گورننس کے لئے تجاویز اور سفارشات بھی پیش کیں- اجلاس میں ایڈیشنل چیف سیکرٹری، انسپکٹر جنرل پولیس، ایڈیشنل چیف سیکرٹری داخلہ، لاہور اور ڈیرہ غازی خان ڈویژن کے کمشنرز، آر پی اوز، ڈپٹی کمشنرز، ڈی پی اوز، متعلقہ سیکرٹریز اور اعلی حکام نے شرکت کی- وزیراعلیٰ پنجاب عثمان بزدار سے آج وزیراعلیٰ آفس میں کیمیکل ڈور سے جاں بحق ہونے والے فیصل آباد کے محمد وقاص کے اہل خانہ نے ملاقات کی۔ ملاقات کرنے والوں میں متوفی محمد وقاص کے والدین اور بھائی محمد شہباز شامل تھے۔ وفاقی پارلیمانی سیکرٹری فرخ حبیب اور ترجمان وزیراعلیٰ پنجاب ڈاکٹر شہباز گل بھی اس موقع پر موجود تھے۔ وزیراعلیٰ عثمان بزدار نے متوفی محمد وقاص کے اہل خانہ سے دکھ اور افسوس کا اظہار کیا اور افسوسناک واقعہ پر سوگوار خاندان سے دلی ہمدردی اور تعزیت کا اظہار کیا۔ وزیراعلیٰ نے مرحوم کے والدین کو 5 لاکھ روپے مالیت کا امدادی چیک دیا۔ وزیراعلیٰ نے متوفی محمد وقاص کے بھائی کو سرکاری ملازمت دینے کا اعلان کیا اور کہا کہ پنجاب حکومت خاندان کو نیا پاکستان ہاﺅسنگ سکیم میں گھر بھی دے گی۔ انہوں نے کہا کہ محمد وقاص کی ناگہانی موت پر بے حد دکھ ہوا، مالی امداد زر تلافی نہیں۔ ہماری تمام تر ہمدردیاں آپ کے ساتھ ہیں۔ حکومت آپ کے خاندان کی ہر ممکن معاونت کرے گی۔ آپ کے خاندان کو تنہا نہیں چھوڑیں گے۔ انہوں نے کہا کہ پتنگ بازی پر پابندی کے قانون پر عملدرآمد یقینی بنانے کیلئے سخت ہدایات جاری کی ہیں اور کیمیکل ڈور تیار کرنے والے عناصر کے خلاف کریک ڈاﺅن کا حکم دیا ہے۔ وزیراعلیٰ نے کہا کہ بے گناہ انسانوں کی موت کا سبب بننے والے کھیل قطعاً برداشت نہیں۔ واضح رہے کہ وزیراعلیٰ نے سعودی عرب میں عمرہ کی ادائیگی کے دوران فیصل آباد کے علاقے رحمانیہ روڈ پر پیش آنے والے اس واقعہ کا نوٹس لیا تھا اور ایس ایچ او کو فرائض سے غفلت برتنے پر معطل کیا گیا تھا۔ متوفی محمد وقاص فیصل آباد کے مقامی کالج میں تھرڈ ایئر کا طالب علم تھا اور پارٹ ٹائم رکشہ چلا کر خاندان کی کفالت کرتا تھا۔ وزیر اعلیٰ پنجاب عثمان بزدار سے آج وزیراعلیٰ آفس میں چیئرمین پنجاب سرمایہ کاری بورڈ سردار تنویر الیاس خان نے ملاقات کی۔ وزیراعلیٰ نے اس موقع پر گفتگو کرتے ہوئے کہا کہ تحریک انصاف کی حکومت کاروبار میں آسانیاں پیدا کرنے کیلئے ٹھوس اقدامات کر رہی ہے اور گورننس کو مزید بہتر بنا کر کاروبار میں آسانیاں پیدا کرےں گے۔ سرمایہ کاروں اور صنعتکاروں کو کاروبار کرنے کےلئے ہر ممکن سہولتیں فراہم کریں گے اور کاروباری سرگرمیاں تیز کرنے کے عمل میں کسی کو رکاوٹ نہیں ڈالنے دی جائے گی۔
سیریز گنوانے کے بعد پاکستان کو وائٹ واش کا خطرہ ،کینگروز سے چوتھا ون ڈے آج
دبئی (اے پی پی) پاکستان اور آسٹریلیا کے درمیان پانچ ایک روزہ بین الاقوامی کرکٹ میچوں پر مشتمل سیریز کا چوتھا میچ (آج) جمعہ کو دبئی میں کھیلا جائے گا۔ڈے اینڈنائٹ میچ پاکستانی وقت شام 4بجے شروع ہوگا۔آسٹریلوی ٹیم کو پاکستان کے خلاف پانچ ون ڈے میچوں کی سیریز میں 3-0 کی فیصلہ برتری حاصل ہے۔ آسٹریلیا نے پہلے میچ میں پاکستان کو 8 وکٹوں سے شکست دی تھی، دوسرے میچ میں کینگروز نے پاکستان کو 8 وکٹوں سے مات دی جبکہ تیسرے میچ میں آسٹریلوی ٹیم نے گرین شرٹس کو 80 رنز سے شکست دیکر 5 میچوں کی سیریز میں 3-0 کی فیصلہ کن برتری حاصل کر رکھی ہے۔ آسٹریلوی ٹیم پاکستان کے خلاف مسلسل تین میچ جیتنے کے بعد سیریز کے آئندہ دونوں میچوں میں بھی کامیابی کے لئے پرعزم ہے۔ اس اعتبار سے توقع کی جارہی ہے کہ دونوں ٹیموں کے درمیان سیریز کا چوتھا میچ سخت اور کانٹے دار ہوگا۔پاکستانی کپتان شعیب ملک نے کہا ہے کہ سیریزمیں ہارنے پر مایوسی ہوئی ۔کوشش ہوگی سکواڈاگلے میں اچھاپرفارم کرے اورآخری دونوں مقابلے جیت کراچھے اندازمیں سیریزکااختتام کرے۔ اس سے قبل تیسرے میچ میں267 رنز کے ہدف کے تعاقب میں قومی ٹیم صرف 186 رنز بنا کر ڈھیر ہوگئی۔ پاکستان کی جانب سے امام الحق 46 رنز بنا کر ٹاپ سکورر رہے جبکہ آل رانڈر عماد وسیم نے 43 رنز بنائے ۔ عمر اکمل نے 36 اور کپتان شعیب ملک نے 32 رنز کی اننگز کھیلی جبکہ باقی کھلاڑی متاثر کن کارکردگی دکھانے میں ناکام رہے۔آسٹریلیا کی جانب سے ایڈم زامپا نے گرین شرٹس کے 4 بلے بازوںکو پویلین کی راہ دکھائی جبکہ کیومنز نے تین کھلاڑیوں کو آﺅٹ کیا۔ خیال رہے کہ آسٹریلیا نے مسلسل ساتویں سیریز میں گرین شرٹس کو دھول چٹائی ہے۔قبل ازیں آسٹریلین ٹیم نے پہلے بیٹنگ کرتے ہوئے مقررہ 50 اوورز میں پاکستان کے خلاف 6 وکٹوں کے نقصان پر 266 رنز بنائے۔ کینگروز کپتان ایرون فنچ 90 رنز بنا کر ٹاپ سکورر رہے جبکہ گلین میکسویل 71 اور ہینڈ کومبز 47 رنز کے ساتھ نمایاں بلے باز رہے تھے۔سیریز کا پانچواں اور آخری میچ 31 مارچ کو دبئی میں ہی کھیلا جائےگا۔
امریکی سرمایہ کار کمپنی تیل و گیس تلاش گروپ وفود کی وزیراعظم سے ملاقاتیں
اسلام آباد(نامہ نگار خصوصی)وزیر اعظم عمران خان سے گزشتہ روزایم او ایل گروپ کے ایگزیکٹیو وائس پریذیڈنٹ اپ سٹریم ڈاکٹر بیریسلاو گاسو اور ریجنل وائس پریذیڈنٹ برائے مشرق وسطیٰ ، افریقہ و پاکستان علی مرتضیٰ عباس نے وزیر اعظم آفس میں ملاقات کی اور ملک میں جاری اپنے آپریشنز پر تفصیلی بات چیت کی۔ایم او یل پاکستان 1999 ءسے پاکستان میں اپنے آپریشنز جاری رکھے ہوئے ہے۔ایم او ایل پاکستان اس وقت ملک کا ایل پی جی کا سب سے بڑا، کروڈ ا?ئل کا دوسرا بڑاجبکہ قدرتی گیس کا پانچواں بڑا پروڈیوسر ہے۔ ڈاکٹر گاسو نے وزیر اعظم کو ایم او ایل گروپ کے دنیا بھر بالخصوص پاکستان میں جاری اپنے آپریشنز کے بارے میں آگاہ کیا۔انہوں نے وزیر اعظم کو بتایا کہ ان کی کمپنی پاکستان میں 20ملین امریکی ڈالر سے صوبہ خیبر پختونخوا کے ٹل بلاک میں اپنے کام کو بڑھاتے ہوئے 3رگ آپریشن کی خواہش مند ہے۔اس کے علاوہ مارگلہ بلاک میں 2ڈی سیسمک جبکہ ٹل بلاک میں 3ڈی سیسمک کرنا چاہتا ہے۔مزید یہ کہ تیل و گیس کی تلاش کے نئے لائسنس کے اجراءمیں شمولیت کا بھی خواہش مند ہے خصوصاً بلوچستان میں۔ملاقات میں وزیر اعظم کو ایم او ایل پاکستان کی جانب سے تاحال سماجی ذمہ داریوں کی مد میں کیے جانے والے اقدامات پر بھی تفصیلی بریفنگ دی گئی۔ انہیں بتایا گیا کہ کمپنی اپنے آپریشنل علاقوں میں سکول تعمیر کرنے اور جامع شجر کاری مہم شروع کرنے کا ارادہ رکھتی ہے۔ اس کے علاوہ بے گھر افراد کیلئے عارضی رہائش گاہ بھی تعمیر کرنا چاہتی ہے۔ ڈاکٹر گاسو نے کہا کہ پاکستان ان کے گروپ کیلئے ایک اثاثے کی حیثیت رکھتا ہے اور ہم ملکی توانائی کی ضروریات کو پورا کرنے میں بھر پور کردار ادا کر رہے ہیں۔علی مرتضیٰ عباس نے وزیر اعظم کا ان کے بھر پور تعاون کا شکریہ ادا کرتے ہوئے کہا کہ ان کی کمپنی آنے والے دنوں میں بھی اپنے کامیابی کے اس سفر کو جاری رکھنا چاہتی ہے۔ وزیر اعظم عمران خان کا کہنا تھا کہ وہ ایم او ایل پاکستان کے ٹل بلاک میں کامیاب آپریشنز سے بخوبی آگاہ ہیں۔ ان کا کہنا تھا کہ خیبر پختونخوا میں کمپنی کی سماجی بہبود کے متعدد پروگرام قابل ستائش ہیں۔ انہوں نے علی مرتضیٰ عباس کی اس ضمن میں کاوشوں کو سراہتے ہوئے اپنے بھر پور تعاون کا یقین دلایا۔وزیر اعظم عمران خان نے کہا ہے کہ پاکستان کا منفرد جغرافیائی عمل وقوع سرمایہ کاروں کو وسیع مواقع فراہم کرے گا ،پاکستان میں سرمایہ کاروں کو آسان اور پرکشش مواقع میسر ہونگے ،معیشت کے استحکام سے نوجوانوں کیلئے روزگار کے مواقع بڑھیں گے جبکہ امریکی کمپنی کیپٹل گروپ کے وفد نے کہا کہ پاکستان میں امن امان کی صورتحال بہتر ہے اور حکومت بھی معاشی بحالی کیلئے سنجیدہ ہے۔جمعرات کو وزیراعظم سے امریکی کمپنی کیپٹل گروپ کے وفد نے ملاقات کی ۔ مالیات سے متعلق امریکی کمپنی کیپٹل گروپ کے وفد کی قیادت مائیکل ٹھالے نے کی۔ اس موقع پر وزیر خزانہ اسد عمر، مشیر تجارت عبدالرزاق داﺅد اور گورنر سندھ چیئرمین سرمایہ کاری بورڈ ہارون شریف اور دیگر سینئر حکام بھی موجودتھے۔ واضح رہے کہ کیپٹل گروپ دنیا کا سب سے قدیم اور بڑا سرمایہ کار ادارہ ہے۔ وفد نے کہا کہ پاکستان میں امن امان کی صورتحال بہتر ہے اور حکومت بھی معاشی بحالی کیلئے سنجیدہ ہے۔ بہتر سیکیورٹی اور معاشی بحالی کیلئے سنجیدگی سے بیرونی سرمایہ کاروں کو پاکستان کی طرف راغب کیا ہے۔ وزیراعظم نے بھی کیپٹل گروپ کے پاکستان میں سرمایہ کاری میں اظہار دلچسپی کو سراہتے ہوئے کہا کہ پاکستان سرمایہ کاروں کو ساز گار ماحول کی فراہمی پر عمل پیرا ہے۔ پاکستان کی 20کروڑ آبادی میں زیادہ تر نوجوانوں پر مشتمل ہے۔ وزیر اعظم عمران خان نے مزید کہا کہ پاکستان کا منفرد جغرافیائی عمل وقوع سرمایہ کاروں کو وسیع مواقع فراہم کرے گا۔پاکستان میں سرمایہ کاروں کو آسان اور پرکشش مواقع میسر ہونگے۔معیشت کے استحکام سے نوجوانوں کیلئے روزگار کے مواقع بڑھیں گے۔ سربراہ کیپٹل نے کہا کہ پاکستان کی موجودہ حکومت نے معیشت کی بحالی کیلئے اہم اقدامات کیے ہیں۔
سندھ ، بلوچستان الیکشن کمیشن ارکان کی تقرری پر حکومت ، اپوزیشن تنازع جاری
اسلام آباد(خبرنگارخصوصی) وزارت خارجہ کے بعد الیکشن کمیشن کے دو ارکان کی تقرری کیلئے وزیراعظم عمران خان کی جانب سے پرنسپل سیکرٹری کے ذریعے بھجوائے گئے 6 ناموں پربھی قائد حزب اختلاف نے اعتراض کردیا ،وزیراعظم آئین کی پاسداری کرتے ہوئے قائد حزب اختلاف سے براہ راست مشاورت کے پابند ہیں ، ذرائع کے مطابق الیکشن کمیشن کے ممبران کی تقرری کے معاملے پر حکومت نے اپوزیشن کو مزید تین، تین نام تجویز کیے ،اس حوالے سے وزیراعظم عمران خان کی جانب سے مشاورت کے لئے خط اپوزیشن لیڈر میاں شہباز شریف کو ارسال کیا گیا ،وزیراعظم کے سیکرٹری اعظم خان کی جانب سے اپوزیشن لیڈر کو لکھے گئے خط میں ممبر بلوچستان اور سندھ کے لئے تین، تین نام تجویز کئے گئے ہیں،بلوچستان کے لئے امان اللہ بلوچ، منیر کاکڑ اور نوید جان بلوچ جبکہ سندھ کے لئے خالد محمود صدیقی، فرخ ضیا شیخ اور اقبال محمود کے نام تجویز کیے گئے ہیں۔ وزیراعظم کے پرنسل سیکرٹری کا خط اپوزیشن لیڈر کو موصول ہو گیا ہے، ذرائع کے مطابق سیکرٹری وزیراعظم کی جانب سے لکھے گئے خط پر اپوزیشن لیڈر شہباز شریف اعتراض اٹھاتے ہوئے کہا ہے کہ ا?ئین کے تحت خط براہ راست وزیراعظم کی جانب سے لکھا جانا چاہیے،ذرائع کے مطابق اپوزیش لیڈر کی جانب سے اٹھائے گئے اعتراض میں کہا گیا ہے کہ آئین کے تحت وزیراعظم اپوزیشن لیڈرسے براہ راست مشاورت کے پابند ہیں، الیکشن کمیشن اراکین کے تقرر کیلئے وزیراعظم خود خط لکھیں۔
سیمی کے قومی ٹیم میں شمولیت کے دروازے کھلنے لگے
جمیکا (آئی این پی)ڈیرن سیمی کے ویسٹ انڈیز ٹیم میں شمولیت کے دروازے کھلنے لگے،ویسٹ انڈین کرکٹ بورڈ کے نئے صدر رکی سکیرٹ نے سیمی کو ٹیم میں شامل کرنے کاعندیہ دیدیا۔ غیر ملکی میڈیا کے مطابق رکی سکیرٹ نے کہاکہ ویسٹ انڈیز کی ٹیم میں کسی بھی اہل کھلاڑی کو شامل کیا جاسکتا ہے۔انہوںنے کہاکہ ٹیم کاانتخاب سلیکشن کمیٹی نے کرنا ہے جوکسی بھی ریجن سے کھلاڑی منتخب کرسکتی ہے،ہمیں اپنے سابق کپتان کو خصوصی اہمیت دینی ہے ۔یاد رہے کہ ڈیرن سیمی نے ویسٹ انڈیز کو 2012 اور 2016 میں ورلڈٹی ٹونٹی کا ٹائٹل جتوایا۔ڈیرن سیمی کی قیادت میں پی ایس ایل میں پشاور زلمی کی ٹیم 2017میں چمپئن بنی۔ دوسری جانب پشاورزلمی کے چیئر مین جاوید آفریدی نے کہاکہ ڈیرن سیمی ٹی ٹونٹی کرکٹ کے منجھے ہوئے اور کامیاب کپتان ہیں۔جاوید آفریدی نے کہاکہ ڈیرن سیمی کی قیادت میں پشاور متحد اور بہترین ٹیم بن کر ابھری۔جاوید آفریدی نے کہاکہ ڈیرن سیمی کی ویسٹ انڈیز ٹیم میں واپسی خوش آئند ہوگی۔جاوید آفریدی نے کہاکہ پاکستان میں انٹرنیشنل کرکٹ کی بحالی میں ڈیرن سیمی کا کردار ہمیشہ یاد رکھا جائیگا۔
بال ٹمپرگ کیس:وانر اور سمتھ کی 1سالہ پابندی ختم
کینبرا(آئی این پی) آسٹریلوی کرکٹ ٹیم کے سابق کپتان اسٹیو اسمتھ اور نائب کپتان ڈیوڈ وارنر کی بال ٹیمپرنگ کیس میں ایک سال کی پابندی ختم ہوگئی۔ جنوبی افریقا کے خلاف کیپ ٹاون ٹیسٹ میں بال ٹیمپرنگ اسکینڈل منظر عام پر آنے کے بعد دونوں کرکٹرز کو 12ماہ کی پابندی کا سامنا کرنا پڑا تھا۔بال ٹیمپرنگ اسکینڈل میں سزا پانے والے تیسرے کردار کیمرون بین کرافٹ تھے جو پہلے ہی 9ماہ کی پابندی کی سزا مکمل کرچکے ہیں۔پابندی مکمل ہونے کے بعد اسٹیو اسمتھ اور ڈیوڈ وارنر آسٹریلوی ٹیم کو ورلڈ کپ کے لیے دستیاب ہوں گے تاہم وہ ٹیم کی قیادت کے اہل نہیں ہوں گے۔ کرکٹ آسٹریلیا نے مارچ 2018میں دونوں کرکٹرز کو کیپ ٹاون ٹیسٹ میں بال ٹیمپرنگ کرنے پر ایک سال کی پابندی کی سزا دی تھی۔سابق کپتان اسمتھ اور وارنر اس وقت آئی پی ایل میں اپنی صلاحیتوں کا مظاہرہ کرنے میں مصروف ہیں، کرکٹ آسٹریلیا کے مطابق وارنر اور اسمتھ ورلڈکپ کے لیے مجوزہ کھلاڑیوں کی فہرست میں شامل ہیں تاہم انہیں ٹیم میں جگہ بنانے کے لیے فٹنس ٹیسٹ پاس کرنا ہوگا۔
