لاہور (کرائم رپورٹر،اپنے سٹاف رپورٹر سے) ایف آئی اے کاوزات داخلہ سے فری ہینڈ ملنے کے بعد گردوں کی خرید فروخت کرنے والوں کے خلاف پہلا کامیاب چھاپہ، ای ایم ای سوسائیٹی میں واقع ایک گھر سے گردوں کی غیر قانونی خرید فروخت کر نےوالا گروہ گرفتار ، مزید تفتیش کیلئے نامعلوم مقام پر منتقل کر دیاگیا ۔بتایا گیا ہے کہ وزارت داخلہ کی جانب سے ایف آئی اے کو فری ہینڈ دیا گیا کہ گردوں کی غیر قانونی خرید و فروخت کی روک تھام اور گھناﺅنے کاروبار میں ملوث افراد کے خلاف فوری اور سخت ایکشن لیا جائے جس کے بعد ایف آئی اے کی ٹیم نے خفیہ انفارمیشن پر لاہور کے علاقہ ای ایم ای سوسائٹی میں واقع ایک گھر پر چھاپہ مار کر 2گردے فروخت کر نے والے اور 2گردے خریدنے والے افراد کو موقع سے گرفتار کر لیا گیا ۔ ایف آئی اے ذرائع کے مطابق جب ٹیم موقع پر پہنچی تو ایک شخص کا گردہ پیٹ سے باہر نکال کر رکھا گیا تھا جوکہ خریدار کے پیٹ میں فٹ کرنا تھا جبکہ دوسرے فروخت کندہ کا ابھی گردہ باہر نکالنا تھا کہ ایف آئی اے نے چھاپہ مار کر ڈاکٹروں سمیت تمام افراد کو موقع سے گرفتار کر لیا۔ ملزمان کے خلاف ہیومن آرگن ٹرانسپلانٹ ایک کے تحت مقدمہ درج کر کے تفتیش شروع کر دی ہے۔ یاد رہے کہ ہیومن آرگن ٹرانسپلانٹ کے تحت ایف آئی اے کی یہ پہلی کاروائی ہے جس کے تحت ملزمان کو 10سال قید اور 10لاکھ روپے جرمانے کی سزا دی جاتی ہے ۔ایف آئی اے حکام کا کہنا ہے کہ اس طرح کی مزید کاروئیاں عمل میں لائی جائیں گی تاکہ اس ناسور کا ملک سے مکمل اور ہمیشہ کیلئے خاتمہ کیا جاسکے ۔ گرفتار ڈاکٹر التمش ینگ ڈاکٹرز ایسوسی ایشن کا جنرل سیکر ٹری ہے۔

اسلام آباد (خصوصی رپورٹ) آئل اینڈ گیس ریگولیٹری اتھارٹی (اوگرا) نے یکم مئی سے پٹرولیم مصنوعات کی قیمتوں میں ردوبدل کی سمری وزارت خزانہ کو ارسال کر دی جس میں مٹی کے تیل کی قیمت میں 15روپے اور لائٹ ڈیزل کی قیمت میں 10 روپے فی لٹر اضافے کی تجویز دی گئی ہے۔ وزارت خزانہ آج 30اپریل کو وزیراعظم کی منظوری کے بعد نئی قیمتوں کا اعلان کرے گی۔ تفصیلات کے مطابق اوگرا نے مٹی کے تیل کی قیمت میں 15 روپے اور لائٹ ڈیزل کی قیمت میں 10 روپے اضافے کی سمری بھجوا دی۔ پٹرول اور ہائی سپیڈ ڈیزل کی قیمت میں ایک روپے کمی کی تجویز بھی دی گئی ہے۔ وزارت خزانہ 30 اپریل کو وزیراعظم کی منظوری کے بعد نئی قیمتوں کا اعلان کرے گی۔

لاہور(مانیٹرنگ ڈیسک ) چینل فائیو سے گفتگو کرتے ہوئے لندن سے تجزیہ کار شمع جونیجو نے کہا ہے کہ نیوز لیکس نوٹی فکیشن پر دونوں طرف سے غلط طریقہ کار اختیار کیا جارہا ہے جو پاکستان کو ایک بری صورتحال کی طرف لے جائے گا جبکہ موجود صورتحال میں ہم کسی قسم کے انارکی برداشت نہیں کرسکتے، مخالفت برائے مخالفت کی جارہی ہے۔وزیر داخلہ نے بھی کہا کہ یہ رپورٹ وزرات داخلہ جاری کرنا تھی، پرنسپل سیکرٹری نے کیسے کردی، اسحاق ڈار بڑے سیاستدان ہیں، معاملے کو دبانے کی کوشش کررہے ہیں، انکایہ کہنا کہ نوٹی فکیشن کا ایک حصہ ہے ابھی دوسرا حصہ آنا ہے، پھر کہنا یہ کہ پرویز رشید بھی ذمہ دار تھے لیکن انہیں بتا چکے ہیں اس لئے نوٹی فکیشن میں انکا نام نہیں تو ہر جگہ غلطیاں ہورہی ہیں، وزیراعظم پانامہ کیس کو تو ہینڈل کرگئے، لیکن جس طرح انہوںنے نیوز لیکس رپورٹ کو میس ہینڈل کیا ہے وہ سوتے شیر کو جگانے کے مترادف ہے، وزیر داخلہ کے بیانات ثابت کرتے ہیں کہ حکومت ایک پیج پر نہیں، یہ معاملہ جلدی انتخابات کے بجائے عدالت میں جاتا دکھائی دے رہاہے، حکومت بری صورتحال سے دوچار ہے، پہلے ہی پانامہ کیوجہ سے دباو¿ میں ہے، ایسے میں خود اپنے پاو¿ں پر کلہاڑی مارنے کی کیا ضرورت تھی، جب وہ خود ہی ایک پیج پر نہیں ہیں، انہوں نے کہا کہ حکومت و آرمی دونوں پھنس چکے ہیں، نکلنے کا کوئی قانونی راستہ نہیں ہے،6 ہزار ٹویٹس ہوچکے ہیں جو اب واپس نہیں ہوسکتے، وزیراعظم کو آرمی چیف سے ملاقات کرکے مشاورت کرنی چاہئے، انہیں تھوڑا جھکنا پڑے گا، اگر وہ فوج ودیگر اداروں کے سربراہان کو منانے میں کامیاب ہوتے ہیں تو بہتری آسکتی ہے لیکن لگتا نہیں کہ یہ معاملہ اب بہتری کی طرف جائے گا، اب یہ خراب ہی ہونے جارہا ہے، آرمی جس شخص کو ذمہ دار دیکھنا چاہتی ہے، وزیراعظم ہاو¿س اسے ذمہ دار قرار نہیں دے گا، جس سے تصادم بڑھے گا۔

لاہور (مانیٹرنگ ڈیسک) چیف ایڈیٹر خبریں گروپ، سینئر صحافی و تجزیہ کار ضیاشاہد نے چینل فائیو سے گفتگو کرتے ہوئے کہا ہے کہ ڈی جی آئی ایس پی آر کا ڈان لیکس پر حکومتی نوٹیفکیشن کو مسترد کرنا بڑی سنجیدہ بات ہے۔ اس معاملے میں سب سے بڑی سٹیک ہولڈر فوج تھی اور چند روز پہلے وزیراعظم نواز شریف نے خود کہا تھا کہ ڈان لیکس کے معاملے میں تمام سٹیک ہولڈرز کو اعتماد میں لیا جائے کیونکہ اس سے ایک دن پہلے ڈی جی آئی ایس پی آر نے واضح کیا تھا کہ کسی قسم کی کوئی مفاہمت یا مشاورت نہیں کی گئی معلوم نہیں کہ کمیشن کیا رپورٹ دے رہا ہے۔ پھر یکطرفہ طور پر کمیشن کی ایسی رپورٹ سامنے آئی جس کو فوج نے مسترد کردیا۔ جس کے بعد بڑی سنگین صورتحال پیدا ہو گئی ہے۔ ملک، حکومت اور ریاست کے حق میں یہ بات نہیں ہے۔ وزیراعظم کو چاہیے کہ ازخود اس معاملے کو دیکھیں، آرمی چیف اور ذمہ داران سے مشاورت کر کے اتفاق رائے پیدا کرنے کی کوشش کریں۔ اس قسم کی رپورٹ جو بظاہر بے جان نظر آئے، فوج مطمئن نہ ہو، اس سے معاملہ حل ہونے کے بجائے مزید الجھے گا۔ اسحاق ڈار نے جو کہا ہے درست کہا ہوگا لیکن میری سمجھ میں یہ بات نہیں آئی، میرے خیال میں جیسی بھی رپورٹ ہے اس کا متن اب تک سامنے آجانا چاہیے تھا۔ انہوں نے کہا کہ وزیر داخلہ کا یہ کہنا کہ رپورٹ وزیراعظم ہاﺅس نے نہیں وزارت داخلہ نے جاری کرنا تھی، پھر ان کا اس بات پر افسوس کا اظہارکرنا کہ وزیراعظم ہاﺅس سے جاری بیان پر ڈی جی آئی ایس پی آر نے کس طرح اتنے سخت ردعمل کا اظہار کر دیا۔ رپورٹ کس کو جاری کرنا تھی اور کس کو نہیں اس بحث میں نہیں پڑنا چاہیے بلکہ اس کا متن دیکھنا چاہیے، پھر رپورٹ کے ابھی دوسرے حصے کے آنے کا کہنا مسئلے کو مزید الجھانا ہے۔ حکومت کو کس نے کہا تھا کہ آدھی رپورٹ جاری کر دو، فوج اس کو مسترد کر دے۔ اب خود کو بچانے کےلئے یہ کہنا کہ دوسرا حصہ ابھی آنا ہے، اس قسم کے طور طریقے نہیں آزمانا چاہئیں۔ جمہوری حکومت کو حساس و نازک صورتحال میں پاک فوج کو مکمل طور پر اعتماد میں لینا چاہیے۔ انہوں نے کہا کہ طارق فاطمی کے بارے میں ایک دن پہلے خود اسحاق ڈار نے کہا کہ انہیں صرف تبدیل کیا کوئی سزا نہیں دی گئی پھر بیان آیا کہ ہٹا دیا گیا، راﺅ تحسین کے بارے میں پہلے کہا گیا کہ ان کے خلاف محکمانہ کارروائی کی جائے لیکن اب لگتا ہے کہ حکومت نے دباﺅ میں آ کر دونوں کو فارغ کرنے کا نوٹیفکیشن جاری کیا۔ اس قسم کی کوششوں سے معاملہ مزید الجھے گا۔ فوج سے مشاورت کر لینی چاہیے۔ یہ معاملہ کورکمانڈر کانفرنس میں زیربحث آیا تھا اور طے پایا تھا کہ حکومت سے کہا جائے کہ فوری سراغ لگا کر ہمیں مطلع کرے اور ذمہ داروں کو سزائیں دی جائیں۔ اب آرمی چیف تبدیل ہو چکے ہیں لیکن میں نہیں سمجھتا کہ فوج کی اجتماعی سوچ میں کچھ زیادہ بڑا فرق پڑا ہوگا۔ انہوں نے کہا کہ میں پاکستان سے دلچسپی و محبت رکھتا ہوں۔ حکومت و فوج کے درمیان کسی قسم کی غلط فہمی، دوری یا مزاحمتی رویے کے بجائے سب کو ملکر چلنا چاہیے اور سب سے اہم ادارے کو بھی حکومت اعتماد میں لیکر چلے۔ وزیر داخلہ کے بیانات سے واضح ہوتا ہے کہ کہیں نہ کہیں تضاد موجود ہے۔ ہو سکتا ہے کہ اپوزیشن اس تضاد کو مزید ہوا دے، وزیراعظم و وزیرداخلہ کے درمیان جو غلط فہمی پیدا ہوتی نظر آتی ہے اسے مزید بڑھانے کی کوشش کرے، میں اس کے حق میں نہیں ہوں۔ ملکی مفاد میں سمجھتا ہوں کہ وزیراعظم چیف ایگزیکٹو جبکہ وزیرداخلہ انہی کی ٹیم کا حصہ ہیں، داخلی طور پر ان دونوں اداروں میں بھی مکمل مفاہمت ہونی چاہیے کہ ملکر آگے کیسے چلنا ہے؟ اگر اسحاق ڈار نے یہ کہہ دیا کہ رپورٹ کا دوسرا حصہ ابھی آنا ہے تو یہ بات پہلے کیوں نہیں بتائی، وزیرداخلہ نے اپنی پریس کانفرنس میں کیوں نہیں بتایا، اس سے معلوم ہوتا ہے کہ کہیں نہ کہیں کوئی تضاد ضرور ہے۔ اس تضاد کو اور فوج کے ساتھ پیدا ہونے والے تضاد کو ختم کرنا چاہیے۔ ایسے فیصلے کریں جس سے سب اداروں کو ملکر آگے بڑھنے کا موقع ملے۔ وزیراعظم ہاﺅس اور کسی وزارت کے درمیان کوئی فاصلہ نہیں ہونا چاہیے۔لوگ سوال کرتے ہیں کہ فوج کے ادارے آئی ا یس آئی اور ایم آئی کے نمائندے کمیٹی میں رہے یا اختلافی نوٹے لکھے۔ انہوں نے کہا حیرت ہے کہ کمیشن کے سربراہ ریٹائرڈ جج عامر رضا نے رپورٹ میں کہا کہ اے پی این ایس ضابطہ اخلاق بنائے۔ کیا سابق جج اتنے لاعلم ہیں کہ انہیں یہ بھی پتہ نہیں کہ سات سال قبل اخباری تنظیموں نے پرویز مشرف کی وزارت اطلاعات سے مل کر ضابطہ اخلاق فائنل کر دیا تھا۔ یہ ضابطہ اخلاق اس وقت بھی نافذ العمل ہے اور حکومتی ادارہ پریس کونسل آف پاکستان اس کی روشنی میں لوگوں کی شکایات پر اخباروں کو نوٹس کر رہا ہے۔ میں خود اس کمیٹی کا رکن تھا پرویز مشرف دور میں بنی تھی 1½ سال میں سات مختلف اجلاسوں میں فائنل ہوا تھا۔