لاہور(ویب ڈیسک ) چیئرمین پی سی بی شہریار خان نے کہا ہے کہ ورلڈ الیون 4میچز کھیلنے کیلئے ستمبر میں پاکستان آئیگی، اس سے سیکیورٹی پر اعتماد کی بحالی کا سفر تیز ہوگا، تمام میچز راولپنڈی میں کرانے کا فیصلہ کرلیا گیا،وزیراعظم پاکستان کو آگاہ کردیا ہے ،مدت کی تکمیل پر چیئرمین بورڈ کا عہدہ چھوڑ دوں گا،ذاتی اور صحت کے مسائل کے پیش نظر کسی عہدے پر کام نہیں کروں گا۔شہریار خان نے کہا کہ پاکستان سپر لیگ کے تیسرے ایڈیشن کی تیاریاں شروع کی جا چکی ہیں۔اس بار کچھ میچز ملک کے مختلف شہروں میں ہوں گے۔گزشتہ ایونٹ میں منافع کا تعین کرنے کیلئے آڈٹ بھی شروع کردیا گیا۔ انھوں نے فائنل کے لاہور میں کامیاب انعقاد پر خوشی کا اظہار کرتے ہوئے کہا کہ میچ دیکھنے کیلئے 8بین الاقوامی سیکیورٹی ایڈوائزرز آئے تھے جس سے دنیا بھر میں مثبت پیغام گیا۔ اس سے قبل جائلز کلارک کا دورہ بھی خوش آئند رہا، سیکیورٹی مشیروں کی اپنے ملکوں کو مثبت رپورٹس پاکستان میں انٹرنیشنل کرکٹ کی بحالی میں اہم کردارادا کریں گی۔چیئرمین پی سی بی نے مزید کہا کہ پینٹنگولر ون ڈے ٹورنامنٹ کے تمام میچز راولپنڈی میں کرانے کا فیصلہ کرلیا گیا ہے، ملک کے مختلف وینیوز پر مقابلوں کی صورت میں انتظامی مشکلات کا سامنا کرنا پڑتا، ٹیموں کے سفراور قیام وطعام پر اخراجات بھی زیادہ ہوتے ہیں، اگلے سال میچز ملک کے مختلف شہروں میں ہوں گے۔دوسری جانب ذرائع کا کہنا ہے کہ اس فیصلے کی اصل وجہ سیکیورٹی انتظامات میں مشکلات تھیں، شائقین کی توجہ کا مرکز بننے والے میچز کے مختلف شہروں میں انعقاد کی صورت میں حفاظتی اقدامات پر توجہ دینا مشکل ہوتا۔یاد رہے کہ 14اپریل سے شروع ہونے والے پاکستان کپ ون ڈے ٹورنامنٹ کا شیڈول بھی شریک پانچوں ٹیموں کو جاری کیا جا چکا تھا لیکن اچانک تمام وینیوز ختم کرتے ہوئے صرف راولپنڈی کو میزبان بنانے کا فیصلہ کرلیا گیا۔دوسری جانب چیئرمین پی سی بی نے بورڈ میں اپنی تقرری کے حوالے سے اس بات کی وضاحت کر دی کہ اٹھارہ اگست کو ان کے عہدے کی مدت پوری ہو جائے گی اور تین سالہ مدت پوری ہونے کے بعد وہ ذاتی اور صحت کے مسائل کے پیش نظر کسی بھی عہدے پر کام نہیں کریں گے اور اس بارے میں پی سی بی کے سرپرست اعلی وزیر اعظم نواز شریف کو بھی آگاہ کر دیا ہے۔واضح رہے کہ حالیہ عرصے میں یہ افواہیں بھی زیر گردش تھیں کہ انہیں عہدے سے ہٹا کر نجم سیٹھی کو چیئرمین کے منصب پر براجمان کر دیا جائے گا تاہم وزیر اعظم کی جانب سے شہریارخان کو عہدے کی تکمیل تک اپنے فرائض کی انجام دہی کی ہدایت کی گئی تھی۔

نئی دہلی(ویب ڈیسک )بھارت کے ٹیسٹ کپتان اور انڈین پریمیئر لیگ کے دسویں ایڈیشن میں رائل چیلنجرز بنگلور کی قیادت کرنے والے بھارتی مایہ ناز کھلاڑی ویرات کوہلی آسٹریلوی کرکٹرز سے دوستی کے بارے میں متنازع کمنٹس سے مکر گئے۔ ویرات کوہلی نے سیریز کے اختتام پر کہا تھا کہ وہ پہلے آسٹریلیا کے کھلاڑیوں کو دوست سمجھتے تھے مگر اب اس نتیجے پر پہنچے ہیں کہ وہ دوست نہیں ہوسکتے۔ان کے اس بیان پر کافی تنقید کی جارہی تھی، جس پر ویرات کوہلی نے اب ٹویٹر پر کہا کہ میری بات کو سیاق و سباق سے ہٹ کر پیش کیا گیا، میں نے پوری آسٹریلوی ٹیم کے بارے میں نہیں بلکہ چند کھلاڑیوں کے حوالے سے بات کی تھی، چند لڑکوں کے ساتھ میرے تعلقات بدستور کافی اچھے ہیں جن کو میں جانتا اور وہ میرے ساتھ رائل چیلنجرز بنگلور میں کھیلتے ہیں۔یاد رہے کہ گزشتہ برس کوہلی کی قیادت میں آئی پی ایل کا فائنل کھیلنے والی بنگلور کی ٹیم میں آسٹریلیا کے مچل اسٹارک، شین واٹسن اور ٹریوس ہیڈ شامل تھے۔ اس بار اسٹارک ٹیم کا حصہ نہیں ہیں تاہم واٹسن اور ٹریویس ہیڈ ان کی قیادت میں کھیلی ۔

بارباڈوس( آن لائن ) قومی ٹیم کے لیگ سپنر شاداب خان نے اپنے پہلے دو ٹی ٹونٹی میچز میں عمدہ پرفارمنس کا مظاہرہ کرنے کے ساتھ ساتھ ایک نیا اعزاز بھی اپنے نام کرلیا۔ 18سالہ شاداب خان نے اپنے پہلے انٹر نیشنل مقابلے میں محض 7رنز دیکر 3شکار کرکے مین آف دی میچ بننے کا اعزاز حاصل کیا اور پھر ویسٹ انڈیز کے خلاف دوسرے ٹی ٹونٹی میچ میں محض 14رنز کے عوض 4شکار کرکے پاکستان کی جیت میں اہم کردار ادا کیا ،انہیں ایک بار پھر اس کاکردگی پر میچ کے بہترین کھلاڑی کا ایوارڈ ملا جس کے ساتھ ہی وہ پہلے دو میچز میں مرد میدان قرار پانے والے پہلے پاکستانی اور دنیا کے تیسرے کھلاڑی بن گئے۔شاداب خان سے قبل سری لنکا کے سابق کپتان سنتھ جے سوریا اور سپنر اجنتھا مینڈس یہ اعزاز اپنے نام کرچکے ہیں۔

لاہور(ویب ڈیسک )گرین شرٹس نے ویسٹ انڈیزکو دوسرے ٹی ٹونٹی میں تین رنز سے ہرا کر مسلسل چھٹی کامیابی حاصل کر لی ،یہ پانچواں موقع ہے کہ پاکستانی ٹیم نے مسلسل پانچ یا زائد ٹی ٹونٹی میچز جیتے ہیں ،گرین شرٹس کے علاوہ کوئی اور ٹیم 5 یا زائدٹی ٹونٹی میچز جیتنے کا کارنامہ4 سے زائد بار سرانجام نہیں دے سکی ہے۔پاکستان ٹیم نے سب سے پہلے 5یا زائد فتوحات حاصل کرنے کا کارنامہ 2009ئ میں یونس خان کی قیادت میں سرانجا م دیا،2009ئ میں نیوزی لینڈکےخلاف یواے ای میں کھیلی گئی سیریز تک پاکستان نے مسلسل 7 ٹی ٹونٹی میچ جیتے جو اب تک اس فارمیٹ میں پاکستان کی سب سے زیادہ مسلسل فتوحات ہیں۔2011ئ میں مصباح الحق الیون نے مسلسل پانچ فتوحات حاصل کیں ،2013ئ میں پاکستان ٹیم نے محمد حفیظ کی زیر قیادت یہ کارکردگی دوبارہ دہرائی۔2015ئ میں شاہد آفریدی کی قیادت میں پاکستا ن نے مسلسل 6 ٹی ٹونٹی جیتے۔پاکستان کے علاوہ اب تک کوئی بھی دوسری ٹیم مسلسل پانچ یا زائد میچز میں فتوحات حاصل کرنے کا کارنامہ پانچ بار سرانجام نہیں دے سکی ہے

اسلام آباد(ویب ڈیسک )قومی کرکٹ ٹیم کے سابق کپتان ومایہ ناز کرکٹرشاہد آفریدی نے کہا ہے کہ مجھ جیسا آدمی سیاست نہیں کرسکتا،میں جس سیاسی جماعت میں جاﺅں گا وہ مجھے جلد نکال دے گی،اپنے گھر میں ہر کوئی نمبر ون ہوتا ہے ،کوئی اچھاکام کرے تو ہمیں اس کی تعریف بھی کرنی چاہیے، خیبر پختونخوا میں عمران خان اور پنجاب میں شہباز شریف اچھے کام کر رہے ہیں۔ان خیالات کا اظہار قومی کرکٹ ٹیم کے سابق کپتان نے اپنے ایک انٹرویو میں کیا ۔ انہوںنے کہا کہ پی ٹی آئی چیئرمین عمران خان کے ہر اچھے کام میں سب سے آگے ہی رہا ہوں، اگر کوئی اچھاکام کرے تو ہمیں اس کی تعریف بھی کرنی چاہیے، خیبر پختونخوا میں عمران خان اور پنجاب میں شہباز شریف اچھے کام کر رہے ہیں۔ ان کا کہنا تھا کہ میں کسی بھی سیاسی جماعت میں نہیں جا سکتا، کچھ عرصے کے بعد میں اپنی ہی جماعت کے خلاف باتیں کررہا ہوں گا اس لیے مجھے پارٹی سے نکال دیا جائے گا۔ واضح رہے کہ شاہد آفریدی نے کچھ عرصہ پہلے ایک بیان میں کہا تھا کہ شہباز شریف بہترین وزیر اعلی ہیں۔ آفریدی کا یہ بیان آنے کے بعد چیئرمین تحریک انصاف عمران خان نے 29 جنوری کو پشاور میں ایک تقریب کے شرکا سے لالہ کی موجودگی میں سوال کیا کہ کون سا وزیر اعلی سب سے بہترین ہے۔ تو حاضرین کی اکثریت نے پرویز خٹک کو پاکستان کا نمبر ون وزیر اعلی قرار دیا ، حاضرین کا جواب سن کر عمران خان نے شاہد آفریدی کی اس طرف توجہ دلائی اور کہا کہ سن لیا تم نے شاہد، پرویز خٹک پاکستان کا نمبر ون وزیر اعلی ہے۔ جب میزبان نے اس سارے واقعے کے حوالے سے شاہد آفریدی سے سوال کیا تو انہوں نے کہا کہ ایسے تو کوئی بھی اپنے گھر میں نمبر ون بن سکتا ہے۔

لاہور(ویب ڈیسک )پی ایس ایل سپاٹ فکسنگ کے مرکزی کردار ناصر جمشید کو ایک اور جھٹکا لگ گیا ، پی سی بی کے بعد برطانیہ میں کلب کرکٹ کے دروازے بھی بند ہوگئے۔سپاٹ فکسنگ کے سائے نے برطانیہ میں بھی ناصر جمشید کا پیچھا نہ چھوڑا فکسنگ نے فکسر کا کیرئیرہی فکس کردیا۔ پی سی بی سے پابندی کے بعد ناصرجمشید پرکلب کرکٹ کے دروازے بھی بند ہونے لگے ۔برطانیہ کے آئی سی اے الیون لوٹن کلب نے بھی ناصرجمشید پرپابندی لگادی، کلب انتظامیہ نے دوبارہ کھیلنا پی سی بی کی کلئیرنس سے مشروط کردیا، وہ اس کلب کے ساتھ چارسال سے کرکٹ کھیل رہے تھے۔پی سی بی کی کلئیرنس کے بغیر ناصرجمشید کا کسی بھی کلب کے ساتھ برطانیہ میں کرکٹ کھیلنا مشکل ہوگیا

لاہور(ویب ڈیسک )پی ایس ایل ٹو سپاٹ فکسنگ سکینڈل پر محمد عرفان اینٹی کرپشن یونٹ کو بکیز کی دھمکیوں کی وجہ سے رپورٹ نہ کر سکے۔ دراز قد باﺅلر سے بکیز نے دو بار رابطہ کیا۔ معاملات طے کرنے پر مجبور بھی کیا۔ محمد عرفان کی شٹ اپ کال یعنی حامی نہ بھرنے پر بکیز جان کی دھمکیاں دینے پر اتر آئے۔محمد عرفان پی سی بی کی طرف سے کئے گئے 10 لاکھ روپے کی معافی کی اپیل بھی کریں گے۔