لاہور(آئی این پی) پاکستان کرکٹ ٹیم کے کپتان سرفراز احمد کی بھتیجی کے جگر نے کام کرنا چھوڑدیا ہے اور اس بچی کو جگر عطیہ کرنیو الے کی فوری ضرورت ہے ۔ سرفراز احمد نے دنیا بھرمیں پھیلے پاکستانیوں سے اپنی بھتیجی کی جان بچانے کے لیے جگرکے عطیے کی دردمندانہ اپیل کی ہے۔وکٹ کیپر کپتان نے سوشل میڈیا سائٹ ٹوئٹر پراپنی بھتیجی آئزہ کے حوالے سے بتایا کہ اس کی ایک سرجری ہوچکی ہے اور اسے فوری طور پر جگر عطیہ کرنے والے کی اشد ضرورت ہے۔اپنے پیغام میں انہوںنے کہا میری یہ اپیل سب سے ہے اور وہ اپنی بھتیجی کی ضرورت پوری ہونے پر تعاون کرنے والے کے بیحدشکرگزار ہوں گے ۔ان کاکہناتھا کہ وہ اپنی بھتیجی کی طرف سے یہ اپیل کررہے جس کی بیماری سے لڑنے کی ہمت ہماری طاقت ہے۔انہوں نے اپنے ٹوئٹر فولوئرز سے اس پیغام کوزیادہ سے زیادہ پھیلانے کی بھی اپیل کی تاکہ بچی کو جلد از جلد جگر عطیہ کرنے والا مل جائے۔

اسلام آباد ( ویب ڈیسک) پاکستان کرکٹ ٹیم کے کپتان سرفراز احمد نے آئی ایس آئی کا شکریہ ادا کیا، تفصیلات کے مطابق تیسرا ٹی ٹوئنٹی میچ جیتنے کے بعد پاکستان ٹیم کے کپتان سرفراز احمد نے گفتگو کرتے ہوئے کہا کہ پاکستان میں میچ آرگنائز کرانے پر پاک فو ج، آئی ایس آئی، حکومت اور عوام کا شکریہ ادا کرتا ہو ں، سرفراز احمد نے کہا کہ اپنے گھر میں کرکٹ کھیلنا بہت اچھا تجربہ ہے اور یہ بہت اہمیت بھی رکھتا ہے، انہوں نے کہا کہ اپنے ملک میں کھیلنے پر داد بھی زیادہ حاصل ہوتی ہے۔ سرفراز احمدنے بات چیتکرتے ہوئے کہا کہ جس طرح ہمارے کھلاڑی کھیل رہے ہیں، اس وجہ سے ان کے مداحوں میں بھی اضافہ ہوتا جا رہا ہے۔ انہوں نے کہا کہ جو بھی نیا لڑکا آتا ہے ہماری پوری کوشش ہوتی ہے کہ اسے پورا اعتماد دیا جائے تاکہ وہ اپنی کارکردگی پر توجہ دے سکے۔ سرفراز احمد نے عمر امین کی تعریف کرتے ہوئے کہاکہ عمر امین نے اچھی پرفارمنس دی اس کے علاوہ فہیم اشرف نے بھی جس طرح آتے ہی لگا تار دو گیندوں پر چھکے لگائے،یہ بھی قابل تعریف ہے۔ سرفراز احمد نے سری لنکن کرکٹ ٹیم کا پاکستان آنے پر شکریہ ادا کیا۔