تہران (اے پی پی) پاکستان کا 34ویں ایشین سنوکر چیمپئن شپ میں سفر تمام ہو گیا، محمد بلال سیمی فائنل میں ایرانی کیوئسٹ عامر سرخوش کے ہاتھوں شکست کے بعد ٹائٹل کی دوڑ سے باہر ہو گئے۔ ایران میں جاری میگا چیمپئن شپ میں کھیلے گئے سیمی فائنل میں ایرانی کیوئسٹ عامر سرخوش نے عمدہ کارکردگی کا مظاہرہ کرتے ہوئے پاکستانی کیوئسٹ محمد بلال کو بیسٹ آف نائن فریمز میں 2 کے مقابلے میں 5 فریمز سے شکست دے کر فائنل میں جگہ بنائی، عامر نے ابتدائی دونوں فریمز 68-41 اور66-19 سے جیت کر بلال کے خلاف 2-0 کی برتری حاصل کی۔، بلال نے تیسرے فریم میں 97-33 سے کامیابی حاصل کر کے مقابلہ 2-1 کر دیا، اس کے بعد عامر نے مسلسل چوتھا اور پانچواں فریم بالترتیب 75-46 اور 100-0 سے جیت کر بلال کے خلاف 4-1 کی برتری حاصل کی اس کے بعد بلال پر دباﺅ بڑھ گیا لیکن بلال نے چھٹا فریم 91-0 سے جیت کر کم بیک کرنے کی کوشش کی تاہم عامر نے ساتواں فریم 67-26 سے جیت کر میچ میں 5-2 سے کامیابی حاصل کر کے فائنل کیلئے کوالیفائی کرنے کا اعزاز حاصل کیا۔ یاد رہے کہ پاکستان کے محمد بلال سیمی فائنل تک ناقابل شکست رہے۔ واضح رہے کہ پاکستانی کیوئسٹ بابر مسیح کو ایونٹ میں کوارٹر فائنل، محمد آصف اور محمد ماجد علی کو لاسٹ 24 راﺅنڈ میں شکستوں کا سامنا کرنا پڑا تھا۔

لاہور (نیوزایجنسیاں) پاکستان کے مایہ ناز سابق آل راﺅنڈر شاہد خان آفریدی انٹرنیشنل کرکٹ سے ریٹائرمنٹ کے بعد وہ ورلڈ الیون کی صورت میں ایک مرتبہ پھر انٹرنیشنل کرکٹ میں واپسی کر رہے ہیں اور 31 مئی کو ویسٹ انڈیز کیخلاف لارڈز کے تاریخی کرکٹ گراﺅنڈ میں ان ایکشن نظر آئیں گے۔یہ وہی کرکٹ گراﺅنڈ ہے جہاں شاہد آفریدی نے ٹی 20 ورلڈکپ 2009ءکے فائنل میچ میں نصف سنچری بنائی تھی۔ اور اپنی ٹیم کو ٹی 20 چیمپئن بنوایا تھا لیکن اس مرتبہ وہ ورلڈ الیون کی جانب سے ایک نیک مقصد کیلئے کھیلتے نظر آئیں گے۔شاہد آفریدی سے جب فیورٹ بھارتی کھلاڑی کے بارے میں پوچھا گیا تو انہوں نے ویرات کوہلی کا نام لے کر سب کو حیران کر دیا اور جب ان سے دنیائے کرکٹ میں سب سے ٹھنڈے مزاج کپتان سے متعلق پوچھا گیا تو انہوں نے قرعہ مہندرا سنگھ دھونی کے نام نکالا۔

ممبئی( آن لائن )عالمی شہرت یافتہ سابق بھارتی بلے باز سچن ٹنڈولکر نے انکشاف کیا ہے کہ کراچی میں پاکستان کے خلاف پہلے ٹیسٹ میچ کے بعد وسیم اوروقارکی باﺅلنگ سے خوفزدہ ہوکر کرکٹ چھوڑنے کے بارے میں سوچنا شروع کردیا تھا۔ایک انٹرویو کے دوران گفتگو کرتے ہوئے عظیم بلے باز نے کہا کہ پہلے میچ میں مجھے کچھ سمجھ نہیں آ رہا تھا۔ ایک اینڈ سے وقار یونس بالنگ کر رہے تھے اور دوسرے اینڈ سے وسیم اکرم بھرپور فارم میں تھے۔ اور ان کی گیند ریورس ہونا شروع ہو چکی تھی ،وہاں کھیلنے کے دوران میں بالکل ایڈجسٹ نہیں کر پا رہا تھا۔ کراچی میں پاکستان کے خلاف اپنی پہلی اننگز کے بعد انہیں لگا کہ یہ ان کے کیریئر کی آخری اننگز ہے کیونکہ وہ بالکل بھی ایڈجسٹ نہیں کر پا رہے تھے۔انہوںنے کہاکہ میری زندگی کی پہلی اننگز کراچی میں تھی۔ مجھے لگا کہ یہ میری پہلی اور آخری اننگز ہو گی۔انہوں نے کہا کہ جب میں اپنی ٹیم کے کھلاڑیوں کو بتایا کہ میں کرکٹ چھوڑنے کے بارے میں سوچ رہا ہوں تو انہوں نے مجھے مشورہ دیا کہ میں خود کو کچھ وقت دوں کیونکہ یہ انٹرنیشنل کرکٹ ہے اور میں دنیا کے بہترین بالنگ اٹیک کا سامنا کر رہا تھا تاہم اس میچ کی دوسری اننگز میں 59 رنز اسکور کیے جس کے بعد میں نے خود کو شاباش دی۔انٹرویو کے دوران سچن ٹنڈولکر نے ایک اور انکشاف کیا کہ مہندرا سنگھ دھونی سے گفتگو کے دوران انہیں اندازہ ہوا کہ دھونی کے اندر قائدانہ صلاحیت موجود ہے۔یاد رہے کہ 2007 ورلڈ کپ کے پہلے رانڈ میں بھارتی ٹیم کے اخراج کے بعد مہندرا سنگھ دھونی کو سینئرز کی موجودگی میں بھارتی ٹیم کی قیادت سونپی گئی تھی اور دھونی اس بات کا اعتراف کرتے ہیں ان کو قائدانہ منصب تک پہنچانے کا سہرا ٹنڈولکر کو جاتا ہے۔سچن نے بتایا کہ میں جب بھی سلپ میں فیلڈنگ کرتا تھا تو میں مستقل دھونی سے فیلڈنگ پوزیشنز کے حوالے سے گفتگو کیا کرتا تھا، میں ہمیشہ اپنی رائے کا اظہار کرتا اور ان کے خیالات بھی دریافت کرتا اور اسی گفتگو کے دوران مجھے اندازہ ہوا کہ ان میں قائدانہ صلاحیتیں موجود ہیں۔۔#/s#

لاہور(نیوزایجنسیاں)پاکستان کرکٹ کے لیجنڈ وسیم اکرم نے قومی ٹیم کے ٹیسٹ کرکٹ کی کٹ میں شامل جرسی میں سے سبزلائن غائب ہونے پر سوال اٹھا دیا۔سوشل میڈیا اکاﺅنٹ پروسیم اکرم کا کہنا تھا کہ ہماری جرسی میں سے سبز لائن کہاں گئی ؟یہ اچھی بات نہیں۔خیال رہے پاکستان ٹیسٹ کرکٹ میں جو جرسی پہنتے ہیں ان کے گلے میں ایک سبز رنگ کی لائن ہوتی ہے جو پاکستان اور آئرلینڈ کے درمیان کھیلے جانے والے ٹیسٹ میچ میں قومی ٹیم کے کھلاڑیوں کی کٹ میں سے غائب ہے۔دوسری جانب پاکستان کرکٹ بورڈ نے اس بارے کوئی بھی ردعمل دینے سے گریز کیا ہے۔واضح رہے پاکستان آئر لینڈ کے خلاف تاریخی ٹیسٹ میچ میں مدمقابل ہے۔معروف صحافی و تجزیہ کار حامد میر کا بھی اپنے سوشل میڈیا اکاﺅنٹ پر کہنا تھا کہ اس سوال کا جواب تو پی سی بی کے چیرمین ہی دے سکتے ہیں۔

ڈبلن (نیوزایجنسیاں) آئرلینڈ ٹیسٹ ڈیبیو کرنے والی دنیا کی 11ویں ٹیم بن گئی آئرلینڈ نے گزشتہ روز پاکستان کے خلاف شروع ہونے والے واحد ٹیسٹ میچ میں شرکت کے ساتھ ہی یہ اعزاز حاصل کیا،کرکٹ کی تاریخ کا پہلا ٹیسٹ میچ 1877 میں کھیلا گیا تھا اور اس وقت سے اب تک صرف 10 ٹیموں کو ٹیسٹ میچ کھیلنے کا اعزاز حاصل ہے جہاں بنگلہ دیش وہ آخری اور 10ویں ٹیم تھی جس نے ٹیسٹ میچ کھیلنے کا اعزاز حاصل کیا۔پاکستا ن نے 1952ءمیں بھارت کیخلاف میچ کھیل کرٹیسٹ ڈیبیوکیا تھا۔پاکستانی کرکٹرز فہیم اشرف اور امام الحق نے آئرلینڈ کے خلاف تاریخی کرکٹ ٹیسٹ میچ میں ڈیبیو کر لیا، اشرف اور امام ٹیسٹ ڈیبیو کرنے والے بالترتیب 230ویں اور 231ویں پاکستانی کھلاڑی بن گئے۔ ایک طویل عرصے کے بعد انٹرنیشنل کرکٹ کونسل(آئی سی سی) نے مستقل عمدہ کارکردگی کا مظاہرہ کرنے پر آئرلینڈ اور افغانستان کو ٹیسٹ اسٹیٹس دینے کا اعلان کیا۔آئرش ٹیم نے گزشتہ روزپاکستان کیخلاف اپنے ڈیبیو میچ کاآغازکردیا جبکہ افغانستان کی ٹیم اپنا پہلا ٹیسٹ کھیلنے کے لیے بھارت کے خلاف میدان میں اترے گی۔اس سے قبل آسٹریلیا، انگلینڈ، پاکستان، بھارت، سری لنکا، بنگلہ دیش، جنوبی افریقہ، ویسٹ انڈیز، زمبابوے اور نیوزی لینڈ کی ٹیموں کو بھی ٹیسٹ کھیلنے کا اعزاز حاصل ہے۔ واضح رہے کہ انٹرنیشنل کرکٹ کونسل نے گزشتہ برس جون میں آئرلینڈ اور افغانستان کی ٹیموں کو ٹیسٹ کھیلنے کا درجہ دیا تھا، افغانستانی ٹیم آئندہ ماہ 14 جون کو بھارت کے خلاف ٹیسٹ کیریئر کا آغاز کرے گی۔پاکستانی کرکٹرز فہیم اشرف اور امام الحق نے آئرلینڈ کے خلاف تاریخی کرکٹ ٹیسٹ میچ میں ڈیبیو کر لیا، اشرف اور امام ٹیسٹ ڈیبیو کرنےوالے بالترتیب 230ویں اور 231ویں پاکستانی کھلاڑی بن گئے۔ پاکستان اور آئرلینڈ کے درمیان واحد ٹیسٹ 11 مئی سے شروع ہونا تھی لیکن پہلے روز کا کھیل بارش کی نذر ہو گیا تھا جس کی وجہ سے ٹاس بھی نہیں ہو سکا تھا، دونوں ٹیموں کے درمیان ٹیسٹ کا آغاز گزشتہ روز ہوا، اس ٹیسٹ میں دو پاکستانی کھلاڑیوں فہیم اشرف اور امام الحق نے ڈیبیو کیا اور اس کے ساتھ ساتھ آئرلینڈ نے بھی کیریئر کا پہلا ٹیسٹ کھیلنے کا اعزاز حاصل کیا۔