ابوظہبی: (ویب ڈیسک) صدر طیب اردوان 2 روزہ سرکاری دورے پر متحدہ عرب امارات پہنچ گئے جو ایک دہائی بعد کسی ترک صدر کا پہلا دورہ ہے۔
عالمی خبر رساں ادارے کے مطابق متحدہ عرب امارات سے دہائی سے علاقائی تنازعات اور کشیدہ تعلقات کے خاتمے کے لیے ابوظہبی پہنچ گئے جہاں ان کا استقبال ولی عہد شیخ محمد بن زائد النہیان نے کیا۔
ترک صدر طیب اردوان نے یہ دورہ ولی عہد شیخ محمد بن زید النہیان کی دعوت پر کیا جو نومبر میں ترکی گئے تھے اور تنازعات کے حل کی خواہش کا اظہار کیا تھا۔
نومبر میں شیخ محمد بن زائد کے دورے کے بعد، متحدہ عرب امارات اور ترکی میں سرمایہ کاری کے لیے 10 بلین ڈالر کے معاہدوں کا اعلان ہوا تھا جس سے معیشت کی تباہ حالی اور مہنگائی کے شکار ترکی کو مشکل دور سے نکلنے میں مدد ملنے کی امید ہے۔
ترک میڈیا کے مطابق صدر اردوان کے متحدہ عرب امارات کے دورے میں میڈیا اور مواصلات سے لے کر اقتصادی اور دفاعی سودوں تک کے 12 معاہدوں پر دستخط کیے جانے کی توقع ہے۔
دونوں رہنماؤں نے ملاقاتوں کو خوش آئند قرار دیا اور خطے میں قیام امن اور استحکام کے لیے مذاکرات کو جاری رکھنے پر اتفاق کیا ہے۔ دونوں ممالک کے درمیان آئندہ بھی اعلیٰ سطح کے مذاکرات ہوں گے۔
واضح رہے کہ ترکی اور متحدہ عرب امارات کے درمیان لیبیا میں خانہ جنگی کے دوران مخالف فریقوں کی حمایت کرنے پر تعلقات کشیدہ ہوگئے تھے جس میں 2017 میں اُس وقت اضافہ ہوگیا جب یو اے ای نے ترکی کے اتحادی قطر سے تعلقات منقطع کرلیے تھے۔

مقبوضہ بیت المقدس: (ویب ڈیسک) مغربی کنارے میں اسرائیلی قابض اہلکاروں کی فائرنگ سے 19 سالہ نیہاد امین برغوطی شہید ہوگیا ہے۔
الجزیرہ کے مطابق فلسطینی وزارت صحت نے نوجوان کی شہادت کی تصدیق کرتے ہوئے کہا کہ شہر راماللہ کے علاقے نبی صالح میں فلسطینیوں کی جانب سے مظاہرہ جاری تھا جس پر اسرائیلی فورسز نے اُن پر فائر کھول دیئے اور آنسو گیس کی شیلنگ بھی کی۔
فلسطینیوں کے مظاہرے میں نیہاد بھی شامل تھا جو اہلکاروں کی فائرنگ سے شہید ہوگیا۔
مقامی میڈیا رپورٹس کے مطابق صیہونی اہلکاروں نے نیہاد امین کے پیٹ میں گولیاں ماریں جس کے بعد اسے فوری طور پر اسپتال پہنچایا گیا تاہم زخموں کی تاب نہ لاتے ہوئے نیہاد نے وہیں دم توڑ دیا۔
واضح رہے کہ ایک ہفتہ قبل مغربی کنارے میں ہی ایسا ایک اور افسوسناک واقعہ پیش آیا تھا جس میں اسرائیلی اہلکاروں نے آپریشن کی آڑ میں 3 فلسطینیوں کو شہید کردیا تھا۔

برلن: (ویب ڈیسک) جرمنی کے ایک نشریاتی ادارے نے سوشل میڈیا پر اسرائیلی مظالم پر تنقید کو یہودی مخالف پوسٹ قرار دیتے ہوئے 2 فلسطینی صحافیوں کو ملازمت سے برطرف کردیا۔
عالمی نشریاتی ادارے کے مطابق ڈی ڈبلیو نے زاہی علوی اور یاسر ابو مالک کو سوشل میڈیا پر یہودی مخالف پوسٹیں کرنے پر ملازمت سے برخاست کردیا۔ اس الزام میں ملامتوں سے ہاتھ دھونے والوں کی تعداد 5 ہوگئی۔
دونوں صحافیوں کے خلاف بیرونی انکوائری 2014 میں کی گئی ایک پوسٹ پر شروع کی گئی تھی جس میں دونوں صحافیوں نے اسرائیلی فوج کے فلسطینیوں پر مظالم پر تنقید کی تھی۔
انکوائری کمیٹی نے اس پوسٹ کو یہودی مخالف قرار دیتے ہوئے کہا کہ یہ اس مہم کا حصہ ہے جسے ماضی میں اینٹی سیمیٹیزم یعنی شام دشمنی کہا جاتا تھا اور جس کی بنیاد پر یہودیوں کو نفرت اور تشدد کا نشانہ بنایا جاتا تھا۔
صحافیوں کے خلاف کارروائی ہولوکاسٹ ریمیمبرنس کی جانب سے سام دشمنی یا یہودی مخالف کی تعریف میں متنازع اضافے کے تحت کی گئی ہے جس میں اسرائیلی پالیسیوں اور کارروائیوں پر تنقید کو بھی اینٹی سیمیٹیزم کے ذمرے میں شامل کیا گیا ہے۔
واضح رہے کہ 2014 میں اسرائیلی حملے میں 2 ہزار 200 فلسطینی شہید ہوگئے تھے جن میں 551 بچے اور 299 بچے شامل تھے اور دونوں صحافیوں اس کی مذمت کی تھی۔

ماسکو: (ویب ڈیسک) روسی پارلیمنٹ نے صدر ولادمیر پوٹن سے مطالبہ کیا ہے کہ وہ یوکرین کے دو خطوں کو آزاد تسلیم کرے۔
امریکی اخبار دی ہِل کے مطابق روسی پارلیمنٹ میں اکثریت ووٹ سے یہ فیصلہ منظور کیا گیا کہ صدر پوٹن یوکرین کے ڈانیسک اور لوہانسک پیپلز ریپبلک کو آزاد خطے تسلیم کریں جیسا کہ پہلے بھی روس اس نظریے کی حمایت کرتا آیا ہے۔
دوسری جانب کریملن کے ترجمان ڈمیتری پیسکو نے کہا کہ روس کیلئے دونوں خطے اہم ہیں تاہم روس امن معاہدے کا حمایتی بھی ہے۔
اسی طرح یوکرین کے وزیر خارجہ نے روس کو خبردار کرتے ہوئے کہا کہ اگر اُس نے سرکاری سطح پر خطوں کو آزاد تسلیم کیا تو امن معاہدہ ٹوٹ جائے گا۔
واضح رہے کہ اگر پوٹن پارلیمنٹ کے اس فیصلے کو سرکاری سطح پر تسلیم کرتے ہیں تو یوکرین اور روس کے مابین جاری تنازع مزید شدت اختیار کرسکتا ہے جبکہ ‘منسک امن معاہدہ’ (ماضی میں یوکرین میں ہوئی جنگ بندی کے عمل) کو توڑنے کے بھی مترادف ہوگا جس میں 15 ہزار افراد ہلاک ہوئے تھے۔

ماسکو: (ویب ڈیسک) روسی فوج کے اہلکار یوکرائن کی سرحد سے واپس اپنے فوجی اڈوں میں لوٹنا شروع ہوگئے۔
عالمی خبر رساں ادارے کے مطابق روسی وزارت دفاع کی جانب سے جاری بیان میں کہا گیا ہے کہ مشقوں کے بعد فوجی اہلکاروں کو یوکرائن کی سرحد سے واپس فوجی اڈے بلا لیا گیا ہے۔
یوکرائن کے وزیر خارجہ دیمیٹرو کولیبا نے صحافیوں سے گفتگو میں کہا کہ ہم اور ہمارے اتحادی روس کو مزید پیشقدمی سے روکنے میں کامیاب ہو گئے ہیں۔
وزیر خارجہ دیمیٹرو کولیبا نے پُرمسرت لہجے میں مزید کہا کہ یہ فروری کا وسط ہے اور آپ دیکھ رہے ہیں کہ سفارت کاری مسلسل کام کر رہی ہے۔
یوکرائن پر ممکنہ حملے کے پیش نظر روس اور مغربی ممالک کے درمیان تناؤ میں اضافہ ہوگیا تھا اور نیٹو افواج بھی روسی سرحدوں کے قریب جمع ہونا شروع ہوگئی تھیں۔
مسئلے کے سفارتی حل کے لیے فرانس اور جرمنی بھی متحرک ہوگئے تھے۔ دونوں ممالک کے سربراہان نے روس اور یوکرائن کا دورہ بھی کیا تھا جب کہ امریکی صدر نے روسی ہم منصب سے ٹیلی فونک گفتگو بھی کی تھی۔
امریکا اور برطانیہ یوکرائن پر حملے کی صورت میں روس پر اقتصادی پابندیوں کا عندیہ دے چکے ہیں جب کہ روس نے بھی مغربی ممالک کے بجائے چین کو ایل این جی کی فروخت کا معاہدہ کیا تھا۔

واشنگٹن: (ویب ڈیسک) یوکرین پر روس کے حملے کا خطرہ سنگین تر ہو گیا ہے اور امریکہ نے یوکرین کے دارالحکومت کیف میں واقع اپنا سفارتخانہ بند کرنے کا اعلان کر دیا ہے۔ میل آن لائن کے مطابق امریکی صدر جوبائیڈن نے حکم دیا ہے کہ کیف میں واقع امریکی سفارتخانہ فوری طور پر بند کر دیا جائے اور سفارتخانے کے کمپیوٹرز اور دیگر ریکارڈ کو تباہ کر دیا جائے تاکہ روسی قبضے کی صورت میں یہ ریکارڈ روس کے ہاتھ نہ لگ سکے۔
رپورٹ کے مطابق یوکرین کے بارڈر پر روسی فوج اور جنگی سازوسامان کی تعداد میں تیزی سے اضافہ ہو رہا ہے اور خدشہ ظاہر کیا جا رہا ہے کہ روس کسی بھی وقت یوکرین پر حملہ کر سکتا ہے۔ مغربی ماہرین کا کہنا ہے کہ روس کی طرف سے یوکرین پر حملہ تیسری عالمی جنگ کا پیش خیمہ ہو سکتا ہے۔ امریکی صدر جوبائیڈن کی طرف سے برطانوی وزیراعظم بورس جانسن کو بھی بتایا گیا ہے کہ یوکرین کی صورتحال بہت نازک ہو چکی ہے مگر صدر پیوٹن کو اس حملے سے روکنے کے لیے سفارتی کوششیں جاری ہیں۔
رپورٹ کے مطابق روس کے سرکاری ٹی وی چینل نے جنگ کے حوالے سے پراپیگنڈہ بھی شروع کر دیا ہے جس کے متعلق مغربی مبصرین کا کہنا ہے کہ روس اس پراپیگنڈے کو یوکرین پر حملے کے جواز کے طور پر پیش کرے گا۔اس پراپیگنڈے میں کہا جا رہا ہے کہ یوکرینی قوم پرست روسیوں کا قتل عام کرنے کی تیاریاں کر رہے ہیں۔