لاہور: (ویب ڈیسک) قومی اسمبلی میں اپوزیشن لیڈر اور مسلم لیگ (ن) کے صدر شہباز شریف کا کہنا ہے کہ حقائق عمران خان کے کھوکھلے لیکچروں کا منہ چڑا رہے ہیں۔
وزیراعظم عمران خان کی جانب سے 10 بہترین وزارتوں کے وزرا اور مشیروں کے لئے تعریفی اسناد دینے پر سماجی رابطے کی ویب سائٹ ٹویٹر پر اپنی ٹویٹ میں ردعمل کا اظہار کرتے ہوئے اپوزیشن لیڈر شہبازشریف کا کہنا تھا کہ حقائق عمران خان کے کھوکھلے لیکچروں کا منہ چڑا رہے ہیں۔
ٹرانسپرنسی انٹرنیشنل کی رپورٹ کا حوالہ دیتے ہوئے اپوزیشن لیڈر شہبازشریف کا کہنا تھا کہ عمران خان کا اخلاقیات پر درس اپنی حکومت کی تاریخی کرپشن، ریکارڈ خساروں ، بے روزگاری اور تاریخی نااہلی چھپانے کی کوشش ہے، لیکن وہ کسی کو بے وقوف نہیں بنا سکتے۔

کراچی: (ویب ڈیسک) انسداد دہشت گردی کی خصوصی عدالت نے ایم کیو ایم کے سابق رہنما انیس ایڈوکیٹ سمیت دیگر نامزد ملزمان کو دہشت گردوں کی سہولت کاری کے الزام سے بری کردیا۔
کراچی کی سینٹرل جیل میں انسداد دہشت گردی کمپلیکس کی خصوصی عدالت نمبر 16 کے روبرو دھماکا خیز مواد اور غیر قانونی اسلحہ کے مقدمے کی سماعت ہوئی۔
دوران سماعت ملزمان کے حتمی بیانات ریکارڈ کیے گئے، استغاثہ انیس ایڈووکیٹ سمیت دیگر ملزمان پر لگائے گئے الزامات ثابت کرنے میں ناکام رہا۔
عدالت نے دوران سماعت انیس احمد ایڈووکیٹ کو الزامات سے جبکہ دیگر ملزمان کو بارودی مواد اور اسلحہ رکھنے کے مقدمے سے بری کردیا۔ دیگر ملزمان میں عمران بشیر اور علیم الدین شامل ہیں جبکہ ایک ملزم نعیم کا جیل میں انتقال ہوگیا ہے۔
یاد رہے کہ ملزمان کے خلاف سی ٹی ڈی نے مقدمات درج کرتے ہوئے بھارتی خفیہ ایجنسی را اور ایرانی ایجنسیوں سے رابطوں، فنڈنگ اور دہشت گردوں کو اسلحہ فراہم کرنے کے الزامات عائد کیے تھے۔ اس معاملے میں سی ٹی ڈی نے ڈاکٹر فاروق ستار کو بھی شامل تفتیش کیا تھا تاہم سی ٹی ڈی فاروق ستار کو پہلے ہی بے گناہ قرار دے چکی ہے۔

اسلام آباد: (ویب ڈیسک) وزیراعظم عمران خان نے کہا ہے کہ ہاؤسنگ سکیم کے تحت ہفتہ وار 7 ارب روپے کی درخواستیں موصول ہونے لگی ہیں۔ 1.4 ٹریلین روپے مالیت کے 70,000 سے زیادہ ہاؤسنگ پروجیکٹس کی منظوری دی گئی، تعمیراتی صنعت پر 7.3 ٹریلین روپے کا اثر پڑے گا اور 12 لاکھ ملازمتیں پیدا ہوں گی۔
وزیراعظم عمران خان کی زیر صدارت قومی رابطہ کمیٹی برائے ہاوسنگ کا اجلاس ہوا، اجلاس میں وفاقی وزراء شوکت فیاض ترین، فواد چودھری، وزیر مملکت فرخ حبیب، معاون خصوصی ڈاکٹر شہباز گل، گورنر سٹیٹ بنک، لیفٹیننٹ جنرل (ر) انور علی حیدر، سی ای او روڈا عمران امین، چیف سیکرٹریز نے بھی شرکت کی۔
بریفنگ کے دوران بتایا گیا کہ پاکستان کی تاریخ میں پہلی بار کم لاگت کے مکانات کے لیے ایک پائیدار ماحولیاتی نظام تیار کیا گیا ہے، اس پر عمل درآمد کیا گیا ہے جس سے شعبہ تیزی سے ترقی کے قابل ہوا ہے، فورکلوزر قانون کو بالکل صحیح طریقے سے لاگو کیا گیا ہے، سبسڈی والے مارک اپ کے ساتھ طویل مدتی قرضے (20 سال تک) دیے جا رہے ہیں، کم آمدنی والی ہاؤسنگ سکیموں کے لیے 300,000 روپے کی لاگت کی سبسڈی اور 90% ٹیکس معافی کے نتیجے میں نجی شعبے کی حوصلہ افزائی ہوئی ہے۔
بریفنگ میں بتایا گیا سکیموں کے تحت ہاؤسنگ یونٹس کی تعمیر میں بڑھ چڑھ کر حصہ لیا جا رہا ہے، منصوبوں میں اربن، پیری اربن، اربن ری جنریشن، حکومتی مالی اعانت سے چلنے والے اور نجی شعبے کے منصوبے شامل ہیں۔
اس موقع پر وزیراعظم کا کہنا تھا کہ 1.4 ٹریلین روپے مالیت کے 70,000 سے زیادہ ہاؤسنگ پروجیکٹس کی منظوری دی گئی ہے، تعمیراتی صنعت پر مجموعی طور پر 7.3 ٹریلین روپے کا اثر پڑے گا اور 12 لاکھ ملازمتیں پیدا ہوں گی، کل 80,000 درخواستوں میں سے 130 ارب روپے کی 35,420 درخواستوں کو منظور کیا گیا ہے، اب تک 13,407 درخواست دہندگان کو 46 ارب فراہم کیے جا چکے ہیں، ہفتہ وار 7 ارب روپے کی درخواستیں موصول ہو رہی ہیں جن میں سے 4 ارب روپے منظور اور 2 ارب روپے ہر ہفتے تقسیم کیے جا رہے ہیں۔
عمران خان کا کہنا تھا کہ ظاہر ہوتا ہے وضع کردہ نظام موثر طریقے سے کام کر رہا ہے، حکومت نے کم اور متوسط آمدنی والے طبقے کو کم قیمت مکانات کی فراہمی کے حوالے سے بہت بڑا سنگ میل حاصل کیا ہے، ہمارے لئے سب سے بڑا چیلنج مالیاتی اداروں کی اشرافیہ کی ذہنیت کو تبدیل کرنا ہے، عام لوگوں کو قرضے حاصل کرنے میں سہولت فراہم کرنا تھا، منظور شدہ اور تقسیم شدہ قرضوں کے اعداد و شمار میں 36 لاکھ مالیت کا اوسط قرض ظاہر کرتا ہے، سبسڈی والے قرضوں کا سب سے زیادہ فائدہ متوسط اور کم آمدنی والے طبقے کو ہے۔
انہوں نے کہا کہ حکومت کے آخری تین سالوں میں ہاؤسنگ فنانس میں 148 فیصد اضافہ اور دسمبر 2022 تک 517 ارب روپے کی متوقع منظوری ہے، حکومت کی جانب سے کم لاگت ہاؤسنگ اور تعمیراتی صنعت کو سہولت فراہم کرنے کے لیے کیے گئے اقدامات کی عکاسی کرتی ہے، حکومت ہمارے جی ڈی پی کے مقابلے میں ہاؤسنگ فنانس میں ہر سال 1% کا اضافہ کرنے کی سمت میں آگے بڑھ رہی ہے، کم اور متوسط آمدنی والے طبقے کو مکانات کی تعمیر اور فراہمی میں تیزی آئے گی۔

پشاور: (ویب ڈیسک) سوات کی تحصیل مٹہ کے گاؤں اونڑہ میں خون خوار جنگلی جانور کے حملے میں دو خواتین اور ایک کمسن بچی جاں بحق ہوگئی۔
ڈی پی او سوات زاہد نواز مروت کے مطابق یہ افسوس ناک واقعہ رات کے وقت پیش آیا جب ایک خونخوار جنگلی جانور میر داد کے گھر میں داخل ہوا اور گھر میں موجود خواتین پر حملہ کر دیا، نتیجے میں میر داد کی بیوی 60 سالہ کابلی زوجہ تاج محمد، جہاں بیگم بیوی اور بچی روبینہ 6 سالہ موقع پر ہی جاں بحق ہوگئے۔
ڈی پی او سوات زاہد نواز مروت کا کہنا تھا کہ خواتین گھر میں اکیلی تھیں اور گھر کے مرد مزدوری کے لیے پنجاب میں تھے، پولیس کی تفتیشی ٹیم نے موقع پر پہنچ کر شواہد جمع کیے، شواہد اور مقامی افراد کے مطابق خواتین اور بچی کی موت خونخوار جنگلی جانور کے حملے سے ہوئی۔
ان کا مزید کہنا تھا کہ لاشوں کو پوسٹ مارٹم کے لیے مٹہ سول اسپتال منتقل کردیا گیا ہے اور اس حوالے سے باقاعدہ انکوائری کی جائے گی۔
گاؤں والوں کا خیال ہے کہ علاقے میں تیندووں کی بڑی تعداد دیکھی گئی ہے اور ان جانوروں پر پہلے بھی حملہ کیا جا چکا ہے۔ گزشتہ سال اسی علاقے کے قریب ایک پہاڑی میں ایک تیندوا بھی مارا گیا تھا۔

اسلام آباد: (ویب ڈیسک) ایون فیلڈ ریفرنسز کی اپیلوں پرسماعت کے دوران اسلام آباد ہائی کورٹ نے کہاہےکہ ثبوت موجود نہ ہوئے تو پانامہ کیس ایک طرف، ہمارا فیصلہ کچھ اور ہو گا۔ والد نے جائیداد غیرقانونی بنا کر بیٹے کو دی تو کیا بیٹی قصور وارہوگی؟ درخواستگزار صرف یہ ثابت کردیں نیب کیس ثابت نہیں کرسکا،باقی کسی چیزکی ضرورت نہیں۔
جسٹس عامرفاروق اورجسٹس محسن اخترکیانی پرڈویژنل بینچ نےایون فیلڈ ریفرنس اپیلیں پرسماعت کی، عدالت نے استفسارکیاکہ مریم نوازکی درخواست پرنیب کا جواب آگیا اب کارروائی آگے کیسے بڑھائی جائے۔
مریم نوازکے وکیل عرفان قادر نے دلائل کا آغاز کرتے ہوئے کہا کہ نیب نے کیس میں بنیادی جزیات ہی پوری نہیں کیں، اثاثے کی اصل قیمت اورذرائع پہلے نہیں بتائے۔ نیب آرڈیننس کی سیکشن نائن اے 5 کے تقاضے پورے نہیں کئے، عدالت چاہے تومریم نوازکوآج ہی بری کرسکتی ہے۔
جسٹس عامر فاروق نے کہاکہ سپریم کورٹ کی آبزرویشنزابتدائی نوعیت کی 184/3 میں تھیں، شواہد دیکھ کر نہیں، ہم ٹرائل کا ریکارڈ دیکھیں گے، دیکھنا ہے نیب شواہد سے ثابت کرسکا یا نہیں، درخواستگزار صرف یہ ثابت کردیں نیب کیس ثابت نہیں کرسکا،باقی کسی چیزکی ضرورت نہیں۔
جسٹس محسن اخترکیانی نے کہاآج کوئی التوا نہیں ملے گا، نیب پہلے سوالات کا جواب دے۔
نیب پراسیکیوٹر سردار مظفرنے کہا کہ مریم نوازنے جائیداد کی ٹرسٹی ہونے کا دعویٰ کیا تھا، نیب نے شواہد کیساتھ ان کا بینیفشل مالک ہونا اور ٹرسٹ ڈیڈ میں جعلسازی ثابت کی ، سپریم کورٹ میں جمع ٹرسٹ ڈیڈ کی جے آئی ٹی کےسامنے تصدیق کی۔
عدالت نے کہاکہ ٹرسٹ ڈیڈ کے فونٹ پر بعد میں آتے ہیں کہیں سے ثابت ہوا کہ مریم نوازیا حسین نوازکے ٹرسٹ ڈیڈ پر دستخط نہیں؟ نیب بولا نہیں ایسا بھی کہیں ثابت نہیں ہوا۔
جسٹس عامرفاروق نے کہاکہ پھر تو ڈاکومنٹ جعلی نہیں، پری ڈیٹڈ کہلائے گا،دونوں دستخط کرنے والے آج بھی ڈیڈ کو مانتے ہیں، کیپٹن صفدرکو صرف اس بات پرسزا ہوئی کہ یہ ان دستخطوں کے گواہ تھے۔
نیب پراسیکیورٹر نے بتایاکہ ٹرسٹ ڈیڈ کی دستاویز مریم نوازنے سپریم کورٹ میں جمع کرائی تھی، عدالت نے تمام فریقین کوکیس پیپردیکھنے کی ہدایت کرتے ہوئے سماعت 17 فروری تک ملتوی کردی۔

اسلام آباد: (ویب ڈیسک) وزیر مملکت برائے پارلیمانی امور علی محمد خان نے کہا ہے کہ جو وزرا اپنی ذمہ داریاں ادا نہیں کرتے، ایوارڈ کے حق دار ٹھہرتے ہیں۔
وزیراعظم کی طرف سے بعض وزرا کو کارکردگی ایوارڈ دینے پر حکومتی بینچوں میں بھی چہ مگوئیاں شروع ہوگئیں اور بعض وزرا زیر لب گلہ کرنے لگ گئے۔ وزیر پارلیمانی امور بھی شکوہ گروپ میں شامل ہوگئے اور قومی اسمبلی کی قائمہ کمیٹی برائے حکومتی یقین دہانیاں میں اظہار کرگئے ۔
علی محمد خان نے کہا کہ جو وزرا اپنی ذمہ داریاں ادا نہیں کرتے، متعلقہ قائمہ کمیٹیز میں نہیں آتے، ایوارڈ کے حق دار ٹھہرتے ہیں، چیئرمین یقین دہانی کمیٹی کی جانب سے ایجنڈے کے مطابق متعلقہ وزرا، سیکرٹریز بلانے کی حمایت کرتا ہوں، بطور پارلیمانی امور وزیر حکومتی وزرا کی طرف سے ان کی وزارتوں سے متعلق یقین دہانی کراتا ہوں، بعض وزرا ان یقین دہانیوں سے ایوان میں اظہار لاتعلقی کردیتے ہیں مگر ایوارڈ کے حق دار بھی وہی ہیں۔
دوسری جانب فواد چوہدری نے بھی دبے لفظوں میں کہا کہ ہم اس لیے جگہ نہیں بناسکے کہ کارکردگی ان پروجیکٹس پرعملدرآمد سے جانچی جاتی ہے جو وزارت وزیراعظم آفس کودیتی ہے۔

اسلام آباد:(ویب ڈیسک) وفاقی وزیر خارجہ شاہ محمود قریشی نے پاکستان مسلم لیگ ن کے صدر، قومی اسمبلی میں اپوزیشن لیڈر میاں محمد شہباز شریف اور پاکستان پیپلز پارٹی کے چیئر مین بلاول بھٹو زرداری کو جنوبی پنجاب کے نئے صوبہ سے متعلق دوبارہ دعوتی خط لکھ دیا۔
وزیر خارجہ نے خطوط پارلیمنٹ میں دونوں رہنماؤں کے چیمبرز میں موصول کرواتے ہوئے کہا کہ 19 جنوری 2022ء کے خط کے تسلسل میں یہ مکتوب تحریر کررہا ہوں، پہلے بھی توجہ الگ صوبے کے قیام کے اہم مسئلے کی طرف مبذول کرائی تھی۔ دعوت دی تھی آئینی ترمیمی بل پر اتفاق پیدا کرنے کے لیے رائے دیں۔
انہوں نے اپنی بات کو جاری رکھتے ہوئے لکھا کہ آپ سے اپنی جماعت کے دو ارکان نامزد کرنے کی بھی درخواست کی تھی، بدقسمتی سے خط کا آج تک کوئی جواب نہیں آیا، مطالبہ کرتا ہوں ہ مرکزی سیاسی جماعت کے صدر کے طورپر آپ فوری جواب دیں، رپورٹ بھجوا رہا ہوں جس میں جنوبی پنجاب صوبے کا سب سے پسماندہ ترین خطہ بتایا گیا ہے۔
خط میں شاہ محمود قریشی نے مزید لکھا کہ جنوبی خطے کی 55 فیصد دیہی آبادی 50 فیصد سے کم فی کس آمدن پر زندگی گزار رہی ہے، جنوب میں 31 فیصد آبادی قومی خط غربت سے نیچے زندگی بسر کررہی ہے۔ صرف 56.2 فیصد آبادی کو نسبتا بہتر صحت وصفائی کی سہولیات استعمال میسر ہیں، جنوبی پنجاب میں شیرخوار بچوں کی اموات کی شرح صوبے بھر سے زیادہ ہے۔
وزیر خارجہ کا کہنا تھا کہ ہمیں جنوبی پنجاب کے الگ صوبے کے قیام کے لئے فی الفور عمل کرنا ہوگا، اسی تناظر میں میں ایک بار پھر آپ کو پاکستان تحریک انصاف (پی ٹی آئی) کا ساتھ دینے کی دعوت دیتا ہوں، اس مقصد کے حصول کے لئے میں آپ کی جماعت کی طرف سے دو ارکان کی نامزدگی کا منتظر ہوں، میں قومی اہمیت کے اس مسئلے پر آپ کی حمایت کا منتظر ہوں۔