ریاض: (ویب ڈیسک) بھارت کے لیجنڈری اداکار امیتابھ بچن کی ریاض اور پی ایس جی فٹبال سیزن میں میسی اور کرسٹیانو رونالڈو سے ملاقات کی ویڈیو وائرل ہو گئی۔
غیر ملکی میڈیا رپورٹ کے مطابق امیتابھ بچن نے سعودی عرب کے دارالحکومت ریاض میں جاری کنگ فہد سٹیڈیم میں ریاض بمقابلہ فرانسیسی کلب پیرس سینٹ جرمن (پی ایس جی) فٹبال ٹورنامنٹ کی افتتاحی تقریب میں بطور مہمان شرکت کی۔
افتتاحی تقریب میں امیتابھ بچن نے سٹار فٹبالر کرسٹیانو رونالڈو اور ارجنٹینا کو عالمی چیمپئن بنوانے والے لیونل میسی سمیت دیگر فٹبالرز سے ملاقات کی جس کی ویڈیو اداکار نے اپنے سوشل میڈیا اکاؤنٹس پر شیئر کر تے ہوئے خوشی کا اظہار کیا ہے۔
ویڈیو میں امیتابھ بچن کو تمام فٹبالرز سمیت میسی اور رونالڈو سے ہاتھ ملاتے ہوئے اور ہم کلام ہوتے ہوئے دیکھا جا سکتا ہے۔
امیتابھ بچن نے ویڈیو کے کیپشن میں لکھا کہ ’ریاض میں ایک شام کیا شام ہے، کرسٹیانو رونالڈو، لیونل میسی، ایمباپے، نیمار سب ایک ساتھ کھیل رہے ہیں اور میں یہاں بطور مہمان خصوصی کھیل کے افتتاح کے لیے مدعو ہوں، پی ایس جی بمقابلہ ریاض سیزنز ناقابل یقین ہے‘۔
بڑا میچ دیکھنے کے لیے آنے والے شائقین بالی ووڈ لیجنڈ امیتابھ بچن کو ٹورنامنٹ میں دیکھ کر حیران رہ گئے، دنیا کے مشہور فٹبالرز میسی، رونالڈو اور امیتابھ بچن کے مداحوں نے ان تینوں شخصیات کو ایک ساتھ دیکھ کر حیرت کا اظہار کیا۔
سوشل میڈیا پر ان سٹارز کی ملاقات کی ویڈیوز اور تصاویر وائرل ہو رہی ہیں جس پر صارفین کی جانب سے دلچسپ تبصرے بھی کیے جا رہے ہیں۔

ممبئی: (ویب ڈیسک) بھارتی میوزک ادارے نے پاکستان گلوکار عطاء اللہ عیسیٰ خیلوی کے کلاسک گانے کو چوری کر کے اس کا دوسری مرتبہ ری میک بنا دیا۔
ٹی سیریز کی جانب سے یوٹیوب پر جاری کیے گئے گانے میں نورا فتیحی اور راج کمار راؤ نے اداکاری کے جوہر دکھائے ہیں۔
کلاسک گانے ’اچھا صلہ دیا‘ کو لیجنڈری گلوکار عطاء اللہ عیسیٰ خیلوی نے 1992 میں گایا تھا پھر اسے 1995 میں سونو نگھم نے بالی وڈ فلم ’بے وفا صنم‘ کیلئے چوری کیا تھا۔
بالی ووڈ نے پاکستانی گانے کو نئے فنکاروں بی پراک اور جانی کے ذریعے ری میک کیا ہے۔
نئے گانے میں دیکھا جاسکتا ہے کہ راجکمار راؤ ایک کار حادثے سے بچ کر اپنے گھر لوٹتے ہیں تاکہ اپنی بے وفا محبوبہ نورا فتیحی سے انتقام لے سکیں۔

نیویارک: (ویب ڈیسک) ہالی وڈ فلم اواتار دی وے آف واٹر اسپائیڈر مین نو وے ہوم کو پیچھے چھوڑ کر کورونا وائرس کی وبا کے بعد دنیا بھر میں سب سے زیادہ کمانے والی فلم بن گئی ہے۔
ڈائریکٹر جیمز کیمرون کی فلم اواتار دی وے آف واٹر اب تک دنیا بھر میں 1.928 ارب ڈالرز کما چکی ہے اور اس طرح اسپائیڈر مین نو وے ہوم (1.91 ارب ڈالرز) کو پیچھے چھوڑ کر سب سے زیادہ کمانے والی چھٹی فلم بن گئی ہے جبکہ کورونا کی وبا کے بعد سب سے زیادہ بزنس کرنے والی فلم کا اعزاز بھی اپنے نام کرلیا ہے۔
اب اواتار سیریز کی دوسری فلم 2 ارب ڈالرز کے سنگ میل کی جانب بڑھ رہی ہے۔
یہ سنگ اب تک صرف 5 فلمیں ہی حاصل کرسکی ہیں جن میں اواتار (2.9 ارب ڈالرز)، ایوینجرز اینڈ گیم (2.79 ارب ڈالرز)، ٹائی ٹینک (2.2 ارب ڈالرز)، اسٹار وارز دی فورس اویکن (2.069 ارب ڈالرز) اور ایوینجرز انفٹنی وار (2.04 ارب ڈالرز) شامل ہیں۔
اگر اواتار دی وے آف واٹر 2 ارب ڈالرز کمانے میں کامیاب ہوتی ہے تو یہ کورونا وائرس کی وبا کے بعد یہ سنگ میل حاصل کرنے والی پہلی فلم ہوگی جبکہ ڈائریکٹر جیمز کیمرون کی مجموعی طور پر تیسری فلم ہوگی۔
16دسمبر 2022 کو ریلیز ہونے والی فلم اواتار دی وے آف واٹر 6 ہفتوں سے بھی کم وقت میں شمالی امریکا میں 57 کروڑ 40 لاکھ ڈالرز جبکہ باقی دنیا میں 1.35 ارب ڈالرز کا بزنس کرچکی ہے۔
خیال رہے کہ اواتار کو 2009 میں ریلیز کیا گیا تھا اور اس کا دوسرا حصہ 13 سال بعد ریلیز کیا گیا۔
اواتار دی وے آف واٹر کی تیاری میں 46 کروڑ ڈالرز خرچ ہوئے اور اسے دنیا کی مہنگی ترین فلموں میں سے ایک قرار دیا گیا ہے۔

ممبئی: (ویب ڈیسک) بالی وڈ اداکارہ رینا رائے نے سابق پاکستانی کرکٹر محسن حسن خان سے طلاق میں خود کو ذمہ دار مان لیا۔
بھارتی میڈیا کو دئیےگئے ایک انٹرویو میں اپنے زمانے کی مشہور اداکارہ رینا رائے کا کہنا تھا کہ وہ خود ایڈجسٹ نہ کر سکیں، محسن خان کے لائف سٹائل میں ایڈجسٹ نہ ہو پانا ہی طلاق کی وجہ بنا ورنہ محسن خان نے تو ساتھ رہنے کی خاطر لندن شفٹ ہونے کی پیشکش بھی کی تھی۔
رینا رائے نے بتایا کہ محسن خان کا اپنی بیٹی جنت کو ساتھ رکھنےکا مقصد بھی یہ تھا کہ میں بیٹی کی خاطر اس کے ساتھ رہ لوں۔
رینا رائے نےطلاق کے بعد بیٹی کو اپنی تحویل میں لینے کے حوالے سے بتایا کہ اس کے لیے میں نے سادھوؤں اور سنتوں کا سہارا بھی لیا ہے۔
اداکارہ نے یہ بھی اعتراف کیا کہ محسن خان اچھے شوہر تھے اور وہ ایک اچھے باپ بھی ہیں اور وہ اپنی بیٹی کے ساتھ رابطے میں رہتے ہیں، باپ بیٹی کے درمیان اچھا تعلق ہے۔
رینا رائے کا کہنا تھا کہ محسن اب اپنی زندگی میں سیٹ ہیں، میں ان کی صحت اور زندگی کے لیے دعا گو ہوں۔
خیال رہے کہ 70 اور 80 کی دہائی میں رینا رائے کا شمار بالی ووڈ کی کامیاب اداکاراؤں میں ہوتا تھا، 1983 میں انہوں نے اپنے کیریئر کے عروج میں پاکستانی اوپننگ بلے باز محسن خان سے شادی کر لی تھی اور فلمی دنیا سے کنارہ کشی اختیار کر کے کراچی شفٹ ہو گئی تھیں۔
اس دوران دونوں کی ایک بیٹی پیدا ہوئی جس کا نام جنت رکھا گیا تھا تاہم بھارت واپس جانے کے بعد رینا رائے نے بیٹی کا نام صنم رکھ دیا۔
1990 میں دونوں کے درمیان طلاق ہو گئی تھی جس کے بعد رینا رائے بھارت واپس چلی گئیں اور اس کے بعد بھی انہوں نے فلموں اور ڈراموں میں کام کیا تاہم انہیں پہلی سی کامیابی نہ مل سکی۔

لاہور: (ویب ڈیسک) نامور ماڈل و اداکارہ صحیفہ جبار خٹک نے انکشاف کیا ہے کہ ان کی ساس اور والدہ سابق وزیراعظم اور پاکستان تحریک انصاف کے چیئرمین عمران خان کی بہت بڑی مداح اور سپورٹر ہیں۔
اداکارہ نے کہا کہ مجھے سیاست میں کوئی دلچسپی نہیں ہے البتہ میری والدہ اور ساس دونوں ہی عمران خان کی بہت بڑی مداح ہیں، وہ دونوں ان کی بہت زیادہ حمایت کرتی ہیں۔
صحیفہ جبار نے بتایا کہ اگر کبھی غلطی سے ہم میں سے کسی نے عمران خان کے خلاف کچھ کہہ دیا اور اگر سامنے کھانا پڑا ہے تو دونوں ہی اسے اٹھا کر واپس لے جاتی ہیں ۔
انہوں نے مسکراتے ہوئے کہا کہ عمران خان کو کچھ کہنے پر ان دونوں سے لڑائی ہوجاتی ہے اور وہ لوگ لڑائی بھی ایسی کرتی ہیں کہ بدتمیزی پر آسکتی ہیں ۔
اداکارہ کا مزید کہنا تھا کہ عمران خان کے مداح ان کے خلاف کچھ نہیں سن سکتے، ان میں شدید غصہ پایا جاتا ہے ۔