اسلام آباد: (ویب ڈیسک) وفاقی وزیراحسن اقبال نے کہا ہے کہ بارش اورسیلاب سے 10ارب ڈالر کے نقصان کا خدشہ ہے، ترقیاتی ممالک میں بھی اتنی بڑی تباہی سے تنہا نہیں نمٹ سکتے۔
اپنے بیان میں انہوں نے کہا کہ سیلاب کے نقصانات کا سروے ہو رہا ہے جس کے بعد دوست ممالک ہماری مزید مدد کریں گے۔
ان کا کہنا تھا کہ لوگوں کی سال بھر کی کمائی تباہ ہوئی ہے، وفاقی حکومت تمام صوبائی حکومتوں کی مدد کر رہی ہے،ہم نے ماضی میں بھی بڑی بڑی قدرتی آفات دیکھی ہیں۔
انہوں نے کہا کہ پاکستان غیر معمولی بارشوں اور سیلاب سے تباہی کا سامنا کر رہا ہے، بلوچستان اور سندھ میں لوگوں کا مال اور خوراک تباہ ہوچکا ہے،ڈیرہ اسماعیل خان اور ڈیرہ غازی خان میں بھی بڑے پیمانے پر تباہی ہوئی ہے۔
ان کا کہنا تھا کہ حالیہ بارشیں ماحولیاتی تبدیلیوں کا نتیجہ ہے،سیلاب سے ایک ہزار سے زائد افراد جان کی بازی ہارچکے ہیں، فصلوں اور لائیواسٹاک کو بڑے پیما نے پر نقصان پہنچا ہے۔
انہوں نے کہا کہ افغانستان اور ایران سے پیاز اورٹماٹر کی درآمد شروع کرنے کی منظوری دیدی۔

کوئٹہ: (ویب ڈیسک) بلوچستان کے ضلع قلات میں زلزلے کے جھٹکے محسوس کیے گئے، زلزلے کی شدت 4 اعشاریہ 7 ریکارڈ ہوئی۔
زلزلہ کے جھٹکے بلوچستان کے وسطی شہر قلات اور گردونواح میں محسوس کیے گئے۔
زلزلہ پیما مرکز کے مطابق زلزلے کی شدت 4 اعشاریہ 7 ریکارڈ کی گئی، گہرائی 34 کلو میٹر اور زلزلے کا مرکز قلات سے 15 کلو میٹر جنوب مشرق میں تھا۔

لاہور: (ویب ڈیسک) ملک میں سیلاب سے ریلوے انفراسٹرکچر کو 11ارب روپے کا نقصان پہنچا ہے جس میں ریلوے پلوں اور ٹریک کو شدید نقصان پہنچنے سے ساڑھے 8 ارب روپے جبکہ 3 ارب روپے ری فنڈ ٹکٹوں، ڈیزل، انتظامی معاملات اور ٹرین آپریشن بند ہونے کی مد میں شامل ہیں۔
ریلوے حکام نے ٹرین آپریشن کی بحالی سے قبل ریلوے پلوں کی مرمت کے لیے ٹیکنیکل برج اسٹاف اور گینگ مین عملہ پر مشتمل ٹیموں کی ڈیوٹیز مختلف سیکشنز پر لگا دی ہیں، جو ریلوے پلوں اور ٹریک کی بحالی کے لیے کام کر رہی ہیں۔ ان ٹیکنیکل اسٹاف کی مکمل رپورٹ کے بعد ہی سیکشنوں پر ٹرین آپریشن بحال کیا جائے گا۔
ذرائع کا کہنا ہے کہ محکمہ کو سیلابی پانی سے 11 ارب روپے کا نقصان ہوا ہے جس میں سب سے زیادہ ریلوے پلوں اور ٹریک متاثر ہوئے ہیں، ریلوے نیٹ ورک پر کوئٹہ کراچی اور سکھر ڈویژن میں ریلوے پلوں سیلابی پانی سے زیادہ ٹوٹ گئے ہیں جبکہ باقی ڈویژنوں میں سات سے آٹھ ریلوے پلوں کو بھی نقصان ہوا ہے۔
اسکے ساتھ ساتھ ریلوے ٹریک پر پانی آجانے کی وجہ سے پٹریوں کو ٹیکنیکل طور پر شدید نقصان پہنچا ہے جس کی وجہ سے ریلوے کو اپنا ٹرین آپریشن منسوخ کرنا پڑا، متعدد سیکشنوں پر ریلوے پٹریاں پانی میں تیری ہوئی نظر آئی ہیں جبکہ سیلاب ٹریک کے نیچے سے مٹی، کنکریٹ اور سلیپرز بہا کر لے گیا ہے۔
کوئٹہ ڈویژن اور کراچی ڈویژن میں ریلوے پل ٹوٹنے سے کوئٹہ اور کراچی ڈویژن مکمل طور پر بند ہیں۔
سی ای او ریلوے فرخ تیمور اور ایڈیشنل جنرل مینیجر ریلوے انفراسٹرکچر ارشد اسلام خٹک کا کہنا ہے کہ بارشوں اور سیلاب سے ریلوے انفراسٹرکچر کو بہت نقصان پہنچا ہے اور جب تک پانی ریلوے ٹریک اور پلوں سے نیچے نہیں اتر جاتا اس وقت تک مکمل طور پر ٹرین آپریشن شروع نہیں کیا جا سکتا۔
انہوں نے کہا کہ ٹرین آپریشن شروع کرنے سے قبل ریلوے ٹریک اور پلوں کا مکمل طور پر معائنہ کیا جائے گا اور جہاں کہی بھی ٹریک اور پلوں کو نقصان ہوا ہوگا اسکی تعمیر و مرمت مکمل کی جائے گی۔
سی ای او نے کہا کہ ٹرینوں سے سفر کرنے والے مسافروں کی جان و مال کی حفاظت زیادہ ضروری ہے لہٰذا ٹیکنیکل طور پر ٹریک اور ریلوے پلوں کی انسپکشن مکمل ہونے کے بعد ہی ٹرین آپریشن مکمل بحال کرنے کے لیے کوئی حتمی فیصلہ کیا جائے گا۔

اسلام آباد: (ویب ڈیسک) اسلام آباد ہائیکورٹ نے ایڈیشنل سیشن جج زیباچوہدری کو دھمکانے پر سابق وزیراعظم عمران خان کے خلاف توہین عدالت کیس کی آج کی سماعت کا تحریری حکم نامہ جاری کردیا۔
تحریری حکم میں کہا گیا ہے کہ توہین عدالت کیس میں عمران خان کا جواب تسلی بخش نہیں اور عمران خان کے خلاف توہین عدالت کیس میں شوکاز نوٹس ختم نہیں کیا جاسکتا۔
عدالت نے حکم میں کہا ہے کہ عمران خان کو ضمنی جواب جمع کرانے کیلئے 7 دن کی مہلت دیتے ہیں اور ان کا جواب 8 ستمبر سے پہلے فریقین کو بھی پہنچایا جائے۔
خیال رہے کہ اسلام آباد ہائیکورٹ نے خاتون جج کو دھمکی دینے سے متعلق توہین عدالت کے کیس میں چیئرمین پاکستان تحریک انصاف عمران خان کو 7 روز میں دوبارہ جواب جمع کرانے کی مہلت دے دی۔

اسلام آباد: (ویب ڈیسک) وفاقی وز یر ریلوے خواجہ سعد رفیق نے کہا ہے کہ ریاست چلانا کِھلنڈرے لوگوں کا کام نہیں۔ جب جنگل میں آگ لگ جائے تو درندے بھی اکٹھے ہو جاتے ہیں۔ سیلاب متاثرین کی بحالی کے لئے سب کو مل کر ان کی مدد کرنا چاہئے، مشکل کی گھڑی میں تمام صوبائی حکومتوں کو ساتھ لے کر چلیں گے۔
ان خیالات کا اظہار وفاقی وزیر ریلوے نے وزیراعظم کے مشیر برائے امور کشمیر و گلگت بلتستان قمرزمان کائرہ کے ہمراہ پریس کانفرنس کرتے ہوئے کیا۔
خواجہ سعد رفیق نے کہا کہ حالیہ مون سون میں تباہ کن سیلاب نے 2010 کا ریکارڈ توڑ دیا ہے،بلوچستان اور سندھ کے علاقے زیادہ متاثر ہوئے ہیں، خیبرپختونخوا اور پنجاب کے حالات بھی اچھے نہیں، ملک معاشی بحران کا شکار ہے، ایسے موقع پر سیلاب نے معیشت کی کمر توڑ کر رکھ دی ہے، حکومت پاکستان، ریاستی ادارے سب ریسکیو آپریشن میں مصروف ہیں،بحالی کا مرحلہ اس سے بھی مشکل ہوگا۔
انہوں نے کہاکہ سیلاب کی وجہ سے فصلوں اور انفراسٹرکچر کو شدید نقصان پہنچا جس کی وجہ سے سبزیوں کی قیمتوں میں اضافہ ہوا ہے ،قوم کی بڑی تعداد بھی متاثرین سیلاب کی مدد کے لیے سرگرم عمل ہے،دوسری جانب عالمی برداری ہماری مدد کر رہی ہے۔ موجودہ صورتحال میں سیاست پر بات نہیں کرنا چاہتے تھے،سب جانتے ہیں ہم آئی ایم ایف کو خیرآباد کر گئے تھے، ماضی کی حکومت نے آیی ایم ایف کا پروگرام لیا لیکن اصلاحات نہ کی،ماضی میں سابقہ حکومت نے ملک کو معاشی طورپر کمزورکیا لیکن موجودہ حکومت نے پاکستان کو دیوالیہ ہونے سے بچایا ۔
سعد رفیق نے کہا کہ وزیراعظم ہاؤس میں فلڈ کانفرنس کی جس میں فوجی قیادت بھی بھی موجود تھی، بلوچستان اور سندھ کے وزرائے اعلیٰ بھی شریک ہوئے لیکن ملک کے لیے پنچاب اور خیبرپختونخواکے وزرائے اعلیٰ نہیں آئے۔
انہوں نے کہاکہ جو بھی مدد مل رہی ہے وہ بحالی کے لیے کم ہے، ریلوے کو بھی سیلاب میں نقصان ہوا ہے، کوئٹہ اور سبی کے راستے میں جو پل ہے اس کو بھی نقصان پہنچا ہے، ترکی سے چار ٹرین سامان لیکر یہاں آرہی ہیں۔
انہوں نے کہا کہ سیلاب متاثرین کی مدد کے لئے سب کو ایک چھت کے نیچے بیٹھنا چاہئے جو لڑائی کی سیاست کررہے ہیں انہیں کرنے دیں لیکن اب لڑائی کا وقت نہیں ہے بلکہ جو لوگ متاثر ہوئے ہیں ان کی بحالی و خدمت کا ہے ۔ وفاقی حکومت متاثرین کی بحالی کے لئے کوشش جاری رکھے ہوئے ہے ، مشکل وقت میں سب کو اکٹھا ہونا چاہئے توقع رکھتے ہیں کہ حکومت کی پوری کوشش ہو گی اس مشکل کی گھڑی میں تمام صوبائی حکومتوں کو ساتھ لیکر چلیں۔
وزیراعظم کے مشیر برائے امور کشمیر و گلگت بلتستان قمر زمان کائرہ نے کہا کہ حکومت شہباز شریف کی قیادت میں عوام کی فلاح و بہبود کے لئے اقدامات کررہی ہے، ہمیں بھی لوگ کہتے ہیں کہ آپ کو سیاسی نقصان ہو رہا ہے ہم نے کہا ہمیں سیاسی نقصان ہو لیکن پاکستان کو نہ ہو۔ قمر زمان کائر نے کہا ہے کہ ٹیلی تھون صرف اعلان ہوتا ہے وہ رقم کہاں ہے۔
قمر زمان کائرہ نے کہا کہ نے کہا کہ پاکستان اس وقت مشکل حالات سے گزر رہا ہے ہم نے حکومت میں آ کر بہت مشکل فیصلے کئے ہیں ،ہمیں سب نے کہا آپ سیاسی نقصان کر رہے ہیں، لیکن ایسے مشکل فیصلے کرنا ہماری مجبوری تھی۔ پاکستان کی تاریخ میں پہلی بار ایسا سیلاب آیا ہے ،سندھ میں 1750 ملی میٹر بارش ہوئی ہے ،بلوچستان اور پنجاب کا پانی سندھ میں شامل ہوتا ہے، سندھ کے دریاں میں پانی بہت زیادہ ہے ،لوگوں تک رسائی مشکل ہے ،ابھی تک کوئی اندازہ نہیں کہ کتنا نقصان ہوا ہے اور کتنے گھر ٹوٹے ہیں۔ ہمارے اوپر اعتراض ہو رہا ہے یہ حکومت کچھ نہیں کر رہی ہے ،ہماری پوری کابینہ اپنے اپنے علاقوں میں کام کر رہی ہے ۔
انہوں نے کہاکہ عمران خان جلسے کرنے میں مصروف ہیں۔ کہا جا رہا ہے عالمی امداد میں ہیرا پھیری ہو رہی ہے ، اس لئے عالمی امداد نہیں مل رہی۔ قومی ادارے اور فوج حکومت کا حصہ ہیں ، ہمارے نوجوان مشکل وقت میں عوام کی خدمت میں مصروف ہیں، وہ ہر مشکل وقت میں اپنی جانوں کی قربانیاں دے رہے ہیں ، دیگر ممالک سمیت این جی اوز اور دوست اور مسلم ممالک بھی پاکستان کی مدد کررہے ہیں جس پر ہم ان کے شکرگزار ہیں ، مشکل کی اس گھڑی میں کسی کو تنہا نہیں چھوڑیں گے۔

پشاور: (ویب ڈیسک) خیبرپختونخوا میں ہونے والی لامتناہی بارشوں کے باعث آنے والے بدترین سیلاب کے دوران جہاں زندگی اُجڑ سی گئی وہاں پر انسانیت ایک بہترین مثال سامنے آئی ہے، ریسکیو 1122 کے اہلکار نے بلی کو بچا کر سب کے دل جیت لیے۔
خیبرپختونخوا میں ریسکیو 1122 کی جانب سے سماجی رابطے کی ویب سائٹ ٹویٹر پر بتایا گیا کہ ریسکیو1122 نے حالیہ سیلاب میں نہ صرف انسانوں کو بچایا بلکہ بے زبان جانداروں کو بچانے کےلیے بھی سرگرم ہے۔
ٹویٹر پر انہوں نے بتایا کہ جی ہاں ریسکیو1122 کے ایک اہلکار نے کیال بادشاگئی میں بپھرے سیلابی ریلے اور دریا میں طغیانی کے دوران پرخطر اندازمیں بلی کو دریا کنارے محفوظ مقام پرمنتقل کیا۔