سابقہ فیصلے انصاف کے ترازو کا منہ چڑھا رہے ہیں، مریم اورنگزیب

اسلام آباد: (ویب ڈیسک) وفاقی وزیراطلاعات و نشریات مریم اورنگزیب نے کہا ہے کہ سابقہ فیصلے انصاف کے ترازو کا منہ چڑھا رہے ہیں۔
پاکستان مسلم لیگ (ن) کی مرکزی ترجمان اور وفاقی وزیر مریم اورنگزیب نے سماجی رابطوں کی ویب سائٹ ’ٹوئٹر‘ پر جاری کردہ بیان میں کہا ہے کہ عمران خان کو 7 دن مہلت ملی تو دانیال عزیز، طلال چودھری اور نہال ہاشمی کو بھی ملنی چاہئے۔
مریم اورنگزیب نے کہا ہے کہ اگر آج کا فیصلہ درست ہے تو ان فیصلوں کو بھی درست کیا جائے، اگر وہ درست تھے تو اس فیصلے میں بھی انصاف ہوتا نظرآنا چاہئے۔
انہوں نے کہا کہ خطے کے مقبول ترین تین بار کے منتخب وزیراعظم کو بیٹے سے تنخواہ نہ لینے پر تا حیات نا اہل کیا گیا، تین بار کے منتخب وزیراعظم کو بیٹی کے ساتھ جیل بھجوا دیا گیا۔
وفاقی وزیر اطلاعات و نشریات مریم اورنگزیب نے استفسار کیا کہ اگر مقبولیت ہی انصاف کا پیمانہ ہے تو وزیراعظم نواز شریف کے معاملے میں یہ پیمانہ کہاں تھا؟

صدر مملکت کی عالمی برادری سے سیلاب زدگان کیلئے دل کھول کرعطیات دینے کی اپیل

اسلام آباد: (ویب ڈیسک) صدر مملکت عارف علوی نے قوم اور عالمی برادری سے سیلاب زدگان کیلئے دل کھول کر عطیات دینے کی اپیل کی ہے۔
خیبر پختونخوا کے دورے کے موقع پر بات چیت کرتے ہوئے صدر مملکت کا کہنا تھا کہ حکومت کے منظور شدہ فنڈز اور حلالِ احمر سمیت رجسٹرڈ تنظیموں کو دل کھول کر نقد اور اجناس عطیا کی جائیں،قوم سیلاب متاثرین کے دکھوں کا ازالہ کرنے کیلئے بڑھ چڑھ کر حصہ ڈالے۔
ان کا کہنا تھا کہ اپنے عزیز کھونے اور نقصان برداشت کرنے والے متاثرین کو فوری معاوضے کی فراہمی کی ضرورت ہے، 7 لاکھ سے زائد مویشیوں، 20 لاکھ ایکڑ سے زائد اراضی پر فصلیں تباہ، بڑی آبادی ذریعہ معاش سے محروم ہو گئی ہے جبکہ ملک بھر میں 10 لاکھ سے زائد مکانات کو نقصان پہنچنے سے لاکھوں افراد بے گھر ہو گئے ہیں۔
صدر مملکت کاکہناتھا کہ امید ہے قوم آزمائش میں سیلاب زدگان کو تنہا نہیں چھوڑے گی،سیلاب متاثرین کی مکمل بحالی تک ان کی تکالیف کم کرنے میں کوئی کسر نہیں چھوڑیں گے،جامع حکمت عملی کے تحت متاثرین تک منظم اور شفاف طریقے سے امداد پہنچائی جائے گی۔
ان کا کہنا تھا کہ ملک میں پانی ذخیرہ کرنے کی صلاحیت بڑھانے کیلئے ڈیلے ایکشن ڈیم تعمیر کیلئے اقدامات کی ضرورت ہے، پاکستان کا عالمی گرین ہاؤس گیسوں کے اخراج میں بہت کم حصہ ہے،پاکستان دنیا بھر میں کاربن اخراج سے گلوبل وارمنگ کے باعث سپرفلڈ کا شکار ہے۔

شوکت ترین نے نیب کیخلاف سپریم کورٹ میں دائر درخواست واپس لینے کی اپیل دائر کردی

اسلام آباد: (ویب ڈیسک) تحریک انصاف کے رہنما و سابق وزیر خزانہ شوکت ترین نے نیب کیخلاف سپریم کورٹ میں دائر درخواست واپس لینے کی اپیل دائر کردی۔
شوکت ترین نے سپریم کورٹ میں مؤقف اپنایا کہ 2014 میں نیب نے میرے خلاف قومی خزانے کو نقصان پہنچانے کا ریفرنس دائر کیا، 30 جون 2020 کو احتساب عدالت ریفرنس میں بری کرنے کا حکم دے چکی، ریفرنس میں بری ہونے کے بعد سپریم کورٹ سے درخواست واپس لیتا ہوں۔
خیال رہے کہ شوکت ترین کی اس درخواست پر چیف جسٹس پاکستان کی سربراہی میں دو رکنی بینچ کل سماعت کرےگا۔

20 سے زائد ممالک کے سفارتکاروں اور نمائندوں کاسیلاب سےمتاثرہ علاقوں کا فضائی دورہ

اسلام آباد: (ویب ڈیسک) وزیر خارجہ بلاول بھٹو زرداری کے ہمراہ 20 سے زائد ممالک کے سفارت کاروں اور عالمی اداروں کے نمائندوں نے سیلاب سے متاثرہ علاقوں کا فضائی دورہ کیا۔
وزیرخارجہ کے ہمراہ سفارتکاروں اور عالمی اداروں کے نمائندگان نے سندھ، بلوچستان اور خیبرپختونخوا کے سیلاب سے متاثرہ علاقوں کا دورہ کیا۔
ترکمانستان، بحرین، سعودی عرب، آذر بائیجان، جرمنی اور سپین کے سفارتکار سیلاب سے متاثرہ علاقوں کے دورہ کے موقع پر بلاول بھٹو زرداری کے ہمراہ تھے۔
ان کے ہمراہ امریکا، چین، فرانس، جاپان، اٹلی، جنوبی کوریا، قطر اور ترکیہ کے علاوہ اقوام متحدہ سمیت دیگر عالمی اداروں کے نمائندگان نے بھی سیلاب سے متاثرہ علاقوں کا فضائی جائزہ لیا۔
وفاقی وزیر خورشید شاہ اور وزیراعلی سندھ نے سکھر ائیرپورٹ پر وزیرخارجہ بلاول بھٹو زرداری، وفاقی وزیر برائے منصوبہ بندی اور سفارت کاروں کا استقبال کیا۔
سفارت کاروں اور عالمی اداروں کے نمائندگان کو سکھر ائیرپورٹ پر سیلاب سے ہونے والی تباہی کے حوالے سے این ڈی ایم اے کی بریفنگ دی گئی۔
وزیر خارجہ نے مختلف ممالک کے سفارت کاروں اور عالمی اداروں کے نمائندگان کو پاکستان میں ہونے والے نقصانات سے آگاہ کیا۔

ایشیا کپ: سوریا اور کوہلی کی شاندار اننگز بھارت کا ہانگ کانگ کو جیت کیلئے 193 رنز کا ہدف

دبئی: (ویب ڈیسک) ایشیا کپ ٹی ٹوئنٹی ٹورنامنٹ کے گروپ اے کے میچ میں بھارت نے سوریا کمار یادیو کی دھواں دار بیٹنگ کی بدولت ہانگ کو جیت کیلئے 193 رنز کا ہدف دے دیا۔
بھارت نے مقررہ 20 اوورز میں2 وکٹوں پر 192رنز بنائے، سوریا کمار یادیو 26 گیندوں پر 68 رنز بناکر نمایاں رہے۔
دبئی انٹرنیشنل کرکٹ اسٹیڈیم میں کھیلے جارہے میچ میں ہانگ کانگ کے کپتان نزاکت خان نے ٹاس جیت کر بھارت کو پہلے بیٹنگ کی دعوت دے دی۔
ہانگ کانگ ایشیا کپ 2022 میں اپنا پہلا جبکہ بھارت دوسرا میچ کھیل رہا ہے، بھارت نے اپنے پہلے میچ میں پاکستان کو سنسنی خیز مقابلے کے بعد 5 وکٹوں سے شکست دی تھی۔
ہانگ کانگ کے خلاف میچ کے لیے بھارتی ٹیم میں ایک تبدیلی کی گئی ہے،ہاردک پانڈیا کی جگہ رشبھ پنٹ کو ٹیم میں شامل کیا گیا ہے۔
واضح رہے کہ ایشیا کپ میں 6 بہترین ٹیموں کو 2 گروپس میں تقسیم کیا گیا ہے، پاکستان گروپ اے میں بھارت اور ہانگ کانگ کے ساتھ جبکہ گروپ بی میں سری لنکا ،افغانستان اور بنگلادیش کی ٹیمیں شامل ہیں۔
دونوں گروپ کی ٹاپ دو ٹیمیں سپر فور مرحلے کیلئے کوالیفائی کریں گی جس کا آغاز 3 ستمبر سے ہوگا۔
افغانستان گزشتہ روز بنگلادیش کو شکست دے کر سپر فور مرحلے میں جگہ بنا چکا ہے۔
سپر فور کی ٹاپ ٹو ٹیموں کے درمیان فائنل 11 ستمبر کو کھیلا جائے گا۔

کوئٹہ: نامعلوم افراد کی فائرنگ، ایک شخص جاں بحق

کوئٹہ: (ویب ڈیسک) اسپنی روڈ پر نامعلوم افراد کی فائرنگ سے ایک شخص جاں بحق ہوگیا۔
پولیس کے مطابق کوئٹہ کے علاقے اسپنی روڈ پر نامعلوم افراد نے کار پر فائرنگ کر دی جسکی نتیجے میں ایک شخص موقع پر ہی دم توڑ گیا، اطلاع ملتے ہی پولیس اور ریسکیو ٹیمیں موقع پر پہنچ گئیں اور لاش قبضے میں لیکر سول ہسپتال منتقل کی گئی۔
اس حوالے سے پولیس کی جانب سے کہا گیا کہ ہسپتال میں لاش کی شناخت عطاء اللہ کے نام سے ہوئی، فائرنگ کا واقعہ پرانی دشمنی کا شاخسانہ معلوم ہوتا ہے۔

سیلاب زدگان کی امداد کیلئے چین سے مزید دو پروازوں کی کراچی آمد

کراچی: (ویب ڈیسک) پاکستان میں سیلاب اور بارشوں سے متاثرہ علاقوں کے متاثرین کی امداد کیلئے چین سے مزید دو پروازیں پاکستان پہنچی ہیں۔
چائنیز ائیر فورس کے دو ٹرانسپورٹ طیاروں نے بدھ کی شام ایک ساتھ کراچی کے جناح انٹرنیشنل ائیرپورٹ پر لینڈ کیا۔
وزارت خارجہ کے نمائندے اور پاک فوج کے فائیو کور کے میجر فرقان اور دیگر نے کراچی ائیرپورٹ پر پروازوں کا استقبال کیا۔
سیلاب متاثرین کیلئے امدادی سامان لے کر چین سے اب تک چار پروازیں پاکستان پہنچ چکی ہیں۔
امدادی سامان میں کپڑے، خیمے، ادویات اور اشیائے خوردونوش شامل ہیں۔ ممکنہ طور پر یہ سامان بلوچستان یا سندھ کے سیلاب متاثرین میں تقسیم کیا جائے گا۔

روس نے جرمنی کو گیس سپلائی عارضی طور پر معطل کر دی

ماسکو: (ویب ڈیسک) روسی کمپنی نے جرمنی کو گیس سپلائی عارضی طور پر معطل کر دی۔
روسی کمپنی کے مطابق نارڈ اسٹریم ون گیس سپلائی مرمتی کام کے لیے روکی گئی ہے، نارڈ اسٹریم ون پائپ لائن سے جرمنی کو تمام گیس سپلائی معطل کی ہے، گیس کمپریسر یونٹ پر آج سے کام شروع کیا جائے گا جو تین روز تک جاری رہے گا۔
روسی گیس معطلی پر جرمن نیٹ ورک ریگولیٹر کا کہنا ہے کہ جرمنی نارڈ اسٹریم ون گیس بندش کے لیے پوری طرح تیار ہے، جرمنی کے پاس گیس کا 85 فیصد ذخیرہ موجود ہے جو سردیوں میں بھی استعمال ہوسکتا ہے۔
جرمن نیٹ ورک ریگولیٹر کے مطابق گیس کی بچت کر رہے ہیں، ایل این جی کے ٹرمینلز بھی آ رہے ہیں،جرمنی میں بیلجیئم، نیدرلینڈز اور ناروے کی بدولت گیس ضروریات پوری ہو رہی ہیں۔

ایل پی جی کی قیمت میں کمی کا اعلان

اسلام آباد: (ویب ڈیسک) ستمبرکیلئے مائع پیٹرولیم گیس (ایل پی جی) کی قیمتوں میں کمی کا نوٹیفکیشن جاری کردیا گیا۔
نوٹیفکیشن کے مطابق ایل پی جی کی قیمتوں میں 6 روپے 36 پیسے فی کلوکمی کی گئی ہے۔
نوٹیفکیشن میں کہا گیا ہے کہ ستمبر کیلئے ایل پی جی کی نئی قیمت 211 روپے 55 پیسے فی کلو ہوگی۔

حکومت کا شوکت ترین کی آڈیو کا فرانزک کروانے کا فیصلہ

اسلام آباد: (ویب ڈیسک) وفاقی حکومت نے فیصلہ کیا ہے کہ سابق وفاقی وزیر خزانہ اور پاکستان تحریک انصاف کے سینیٹر شوکت ترین کی پنجاب اور خیبرپختونخوا کے وزراء خزانہ کے ساتھ آڈیو لیک کی فرانزک تحقیقات کروائی جائینگی۔
پاکستان تحریک انصاف (پی ٹی آئی) کے چیئر مین عمران خان کے خلاف توہین عدالت کیس میں اسلام آباد ہائیکورٹ کے حکم کے بعد میڈیا سے گفتگو کرتے ہوئے وفاقی وزیر قانون اعظم نذیر تارڑ نے کہا کہ ایک تکلیف دہ بات ہمارے سامنے آئی، وہ سابق وزیر خزانہ شوکت ترین کے پنجاب اور خیبرپختونخوا کے وزرائے خزانہ محسن لغاری اور تیمور جھگڑا کے ساتھ گفتگو تھی، ہم جب پارلیمان میں جاتے ہیں تو ایک حلف اٹھاتے ہیں، جس میں کہتے ہیں ملکی مفاد کے خلاف عمل اور کوئی کام نہیں کریں گے، جب بطور وزیر حلف لیتے ہیں تو وزرا، وزرائے اعلیٰ اور وزرائے اعظم کے حلف میں ایک فرق ہے، وہ یہ ہے میں اپنے کارہائے منصبی انجام دیتے ہوئے صرف اور صرف قانون اور ضابطے کا خیال رکھوں گا، کسی کی نہیں سنوں گا۔
اپنی بات کو جاری رکھتے ہوئے انہوں نے کہا کہ اس گفتگو کے بعد یہ لگا تحریک انصاف کے وزیر خزانہ خیبرپختونخوا سے وہ شاید اپنے حلف کی پاسداری سے بھی گئے، سابق وزیر خزانہ سے حدیں ہی عبور کر دیں، انہوں نے سیاست کو مقدم رکھ کے ریاست کو پس پشت ڈالنے کی کوشش کی۔ نہ صرف یہ ملکی مفاد کے منافی ہے بلکہ مملکت خداد سے منافقت اور بغاوت کے زمرے میں آتا ہے، اور پاکستان میں بسنے والے تمام لوگوں کے دل دکھے ہوں گے۔
وفاقی وزیر قانون نے کہا کہ حکومت بھی اس بارے میں وزارت قانون اور وزارت داخلہ میں مشاورت کر رہی ہے، ہم نے آڈیو گفتگو کی فرازک آڈٹ کا فیصلہ کیا ہے، رپورٹ آنے کے بعد مشاورت کا عمل مکمل ہوتا ہے تو اس پر بھی قانون کے مطابق کارروائی کی جائے گی، پاکستان کی ریاست کی طرف اٹھنے والے ہاتھ، پاکستانی مفاد کے خلاف بولنے والوں کے خلاف قانون کے مطابق کارروائی ہو گی، اور آہنی ہاتھوں سے نمٹا جائے گا۔

سیلاب متاثرین سے اظہار یکجہتی، یوم دفاع و شہداء کی مرکزی تقریب ملتوی

راولپنڈی: (ویب ڈیسک) 6 ستمبر کو یوم دفاع و شہداء کی مناسبت سے ہونے والی مرکزی تقریب ملتوی کر دی گئی۔
پاک فوج کے شعبہ تعلقات عامہ ( آئی ایس پی آر ) کے ڈائریکٹر جنرل ( ڈی جی) میجر جنرل بابر افتخار کی طرف سے سماجی رابطے کی ویب سائٹ ٹویٹر پر بتایا گیا کہ ملک میں آنے والے بدترین سیلاب سے متاثر ہونے والوں سے اظہار یکجہتی کے لیے راولپنڈی کے جنرل ہیڈ کوارٹرز (جی ایچ کیو) میں 6 ستمبر کو یوم دفاع و شہدا کی مناسبت سے ہونے والی مرکزی تقریب ملتوی کر دی گئی ہے۔
ترجمان پاک فوج کے مطابق پاکستان کی مسلح افواج بے مثال سیلاب سے متاثرہ ہمارے بھائیوں اور بہنوں کی خدمت جاری رکھے گی۔

تاثر ہے عمران خان کچھ حلقوں کے لاڈلے ہیں: وفاقی وزیر قانون

اسلام آباد: (ویب ڈیسک) وفاقی وزیر قانون اعظم نذیر تارڑ نے کہا ہے کہ توہین عدالت کیس میں عمران خان کو موقع فراہم کیا گیا، تاثر پایا جاتا ہے وہ کچھ حلقوں کے لاڈلے ہیں۔ عمران خان کے خلاف توہین عدالت کے سنگین نوعیت کے کیس میں بطور وکیل مجھے تھوڑا عجیب لگا کہ لارجر بینچ نے نرم دلی کا مظاہرہ کرتے ہوئے انہیں ایک اور موقع دیا۔
وفاقی وزیر قانون نے میڈیا سے گفتگو کرتے ہوئے کہا کہ جب توہین عدالت کے مقدمات چلے تو کئی فیصلوں میں کہا گیا کہ عمومی طور پر توہین عدالت کے حوالے سے عدالتوں کو آہستہ ہونا چاہیے، اگر ایک بار کورٹ توہین عدالت کا معاملہ لے، اور جس نے توہین کی ہے وہ اپنے کیے ہوئے پر شرم محسوس نہ کرے، اور ڈھٹائی کے ساتھ کہے کہ ہاں میں نے یہ بات کی ہے، اور میری نظر میں یہی بات درست ہے، تو پاکستان کی تاریخ میں شاید ہی کبھی یہ ہوا ہو کہ اس شخص کو سزا کے بغیر عدالت سے رخصت کیا گیا ہو۔
ان کا کہنا تھا کہ عمران خان کے بارے میں تاثر پایا جاتا ہے یہ کچھ حلقوں کے لاڈلے ہیں، اس تاثر کو زائل کرنے کے لیے یہ ضروری ہے کہ آئین پاکستان کے آرٹیکل 25 کی روح کو سامنے رکھتے ہوئے جب ان پر قانون کا اطلاق کیا جائے تو اسی آنکھ کے ساتھ کیا جائے، جس آنکھ کے ساتھ پاکستان کے دیگر سیاست دانوں کے مقدمات کا فیصلہ ماضی قریب میں ہوا۔
اعظم نذیر تارڑ نے کہا کہ 2012 میں پاکستان کے منتخب وزیراعظم یوسف رضا گیلانی کو توہین عدالت کے مقدمے میں نہ صرف وزارتِ عظمیٰ سے فارغ کیا گیا بلکہ ان کی پارلیمان کی رکنیت بھی گئی، 18-2017 میں یکے بعد دیگرے سپریم کورٹ آف پاکستان نے تین مقدمات لیے، ان مقدمات میں طلال چوہدری، دانیال عزیز اور نہال ہاشمی کو توہین عدالت کے کیس میں سزا دی گئی اور انہیں اسمبلی کی رکنیت سے بھی ہاتھ دھونا پڑا جبکہ نہال ہاشمی کو جیل بھی بھگتنا پڑی۔
وفاقی وزیر قانون نے کہا کہ ایک جلسے میں احتجاج کے دوران سینہ کوبی کرنے پر قصور کے ممبر قومی اسمبلی وسیم شیخ، دیگر وکلا اور کچھ شہریوں کو نہ صرف 7 اے ٹی کے مقدمے میں چالان کرکے جیل میں ڈالا گیا بلکہ توہین عدالت کے اندر انہیں سزائیں دی گئی اور انہیں بھی نااہلی کا سامنا کرنا پڑا۔ پاکستان کے عوام یہ توقع رکھتے ہیں کہ اعلیٰ عدالتوں کے فیصلے مساویانہ ہونے چاہئیں، ان میں تسلسل اور یکسانیت نظر آنی چاہیے، یہی پریکٹس رکھیں گے تو یہ ملک آگے بڑھے گا اور ملک کا عدالتی نظام آگے بڑھے گا، عدالتی نظام اور خودمختاری کے لیے جو سب سے بڑا ٹیسٹ شفافیت ہے، عدالتی کارروائیوں میں شفافیت اسی صورت میں ہوتی ہے جب آپ انور، اکبر اور اصغر کے لیے ایک جیسا انصاف رکھیں، ایک جیسا معیار رکھیں۔
وفاقی وزیر قانون اعظم نذیر تارڑ کا مزید کہنا تھا کہ یہ کیس عدالت میں زیرِ سماعت ہے، اس لیے بطور وکیل مجھے تھوڑا عجیب لگا کہ سنگین نوعیت کے توہین عدالت کے مقدمے میں جس میں لارجر بینچ بنایا گیا ہے، جواب ملاحظہ کرنے کے بعد عدالت نے نرم دلی کا مظاہرہ کرتے ہوئے ایک اور موقع فراہم کیا کہ آپ اپنے رویے پر مزید نظر ثانی کریں اور آپ سے یہ درخواست کی جاتی ہے کہ آپ ایک اور جواب داخل کرنے کے بارے میں سوچیں تاکہ آپ کو راستہ مل سکے۔ عدالتی سماعت میں بسا اوقات ایسا ہوتا ہے لیکن یہ اس صورت میں ہوتا ہے کہ جب توہین عدالت کرنے والا بار بار یہ استدعا کرے کہ مجھے جواب داخل کرتے ہوئے تھوڑی سی کنفویژن ہوئی تھی، مجھے موقع فراہم کیا جائے، یہ بات طلال چوہدری کے کیس میں کی گئی تھی لیکن انہیں اجازت نہیں دی گئی، یہ شیخ وسیم کے کیس میں بھی ہوئی تھی لیکن انہیں بھی اجازت نہیں ملی تھی۔
وفاقی وزیر نے کہا کہ ہم یہ سمجھتے ہیں کہ پاکستان کا ریاستی نظام آئین پاکستان کے تابع چل رہا ہے، اور آئین پاکستان کے تابع ہی دیگر قوانین بنائے گئے ہیں، جن قوانین پر عمل درآمد اور ان پر صحیح معنوں میں عمل درآمد ہی ریاست کے فائدے اور بقا میں ہے، اگر زیرِ سماعت مقدمات میں سٹنگ ججز کو جلسوں میں بارہا للکارئیں گے۔ بار ایسوسی ایشنز میں میری ساتھی خواتین وکیل ہیں، انہوں نے کہا کہ ہم بہت رنجیدہ اور دل گرفتہ ہیں کہ ہمارے معاشرے میں جنسی مساوات کی بات کی جاتی ہے، خواتین کے بارے میں اس طرح کی زبان استعمال کرنا کبھی بھی اس کو برداشت نہیں کیا گیا اور اس سے چشم پوشی کی بھی نہیں جانی چاہیے کیونکہ خاتون جج کسی کی بہن، بیٹی اور کسی کی ماں بھی ہیں۔
وفاقی وزیر کا کہنا تھا کہ ایک ایسا شخص جو وزیراعظم پاکستان کے منصب پر فائز رہا ہو، اسے تو گھر کے بڑے کی حیثیت حاصل ہو جاتی ہے، اس کی گفتگو بہت نپی تلی ہونی چاہیے، عمران خان جب اسٹیج پر ہوتے ہیں تو ان کے جذبات کا بہاؤ نہ عدلیہ کو ٹہرنے دیتے ہیں نہ انہوں نے افواج پاکستان کو ٹہرنے دیا، نہ انہوں نے عزت افزائی میں پارلیمان کے لیے کوئی کسر چھوڑی، نہ انہوں نے الیکشن کمیشن کو کسی قسم کی رعایت دی ہے، جس طرح کی زبان انہوں نے استعمال کی اور جس طرح کی للکار انہوں نے آئینی ادارے الیکشن کمیشن آف پاکستان، اس کےممبران اور سربراہ کو دی ہیں وہ بھی انتہائی تکلیف دہ ہیں۔ 2015 میں بھی عمران خان کے خلاف ایک کیس کا فیصلہ ہوا تھا، اس وقت کے چیف جسٹس انور جمالی اس بینچ کی سربراہ تھے، جب انہوں نے الیکشن پروسیس کے دوران عدالتی اور عدلیہ کے کردار کو شرمناک کہا تھا اس وقت بھی انہیں وارننگ دے کر چھوڑا گیا تھا، ان سے انڈرٹیکنگ لی تھی کہ آئندہ ایسا نہیں کریں گے۔
وفاقی وزیر کا کہنا تھا کہ بطور شہری میں سمجھتا ہوں کہ قانون اپنا راستہ لے گا، عمران خان کے خلاف توہین عدالت کے اس کیس میں بھی اس معیار کو سامنے رکھا جائے گا، جس قانون کو سامنے رکھتے ہوئے ماضی میں پاکستانی سیاست دانوں بشمول وزرائے اعظم فیصلہ کیا گیا۔ ایک اور تکلیف دہ بات ہمارے سامنے آئی، وہ سابق وزیر خزانہ کے پنجاب اور خیبرپختونخوا کے وزرائے خزانہ کے ساتھ گفتگو تھی، ہم جب پارلیمان میں جاتے ہیں تو ایک حلف اٹھاتے ہیں، جس میں کہتے ہیں ملکی مفاد کے خلاف عمل اور کوئی کام نہیں کریں گے، جب بطور وزیر حلف لیتے ہیں تو وزرا، وزرائے اعلیٰ اور وزرائے اعظم کے حلف میں ایک فرق ہے، وہ یہ ہے کہ میں اپنے کارہائے منصبی انجام دیتے ہوئے صرف اور صرف قانون اور ضابطے کا خیال رکھوں گا، کسی کی نہیں سنوں گا۔
اعظم نذیر تارڑ کا کہنا تھا ان کی گفتگو کے بعد یہ لگا کہ پاکستان تحریک انصاف کے وزیر خزانہ خیبرپختونخوا سے وہ شاید اپنے حلف کی پاسداری سے بھی گئے، سابق وزیر خزانہ سے حدیں ہی عبور کر دیں، انہوں نے سیاست کو مقدم رکھ کے ریاست کو پس پشت ڈالنے کی کوشش کی۔ نہ صرف یہ ملکی مفاد کے منافی ہے بلکہ مملکت خداد سے منافقت اور بغاوت کے زمرے میں آتا ہے، اور پاکستان میں بسنے والے تمام لوگوں کے دل دکھے ہوں گے، حکومت بھی اس بارے میں وزارت قانون اور وزارت داخلہ میں مشاورت جاری ہے، ہم نے آڈیو گفتگو کی فرازک آڈٹ کا فیصلہ کیا ہے، رپورٹ آنے کے بعد مشاورت کا عمل مکمل ہوتا ہے تو اس پر بھی قانون کے مطابق کارروائی کی جائے گی، پاکستان کی ریاست کی طرف اٹھنے والے ہاتھ، پاکستانی مفاد کے خلاف بولنے والوں کے خلاف قانون کے مطابق کارروائی ہو گی، اور آہنی ہاتھوں سے نمٹا جائے گا۔

وقت آ گیا ہے کہ قوم کو اب حقیقی آزادی دلائی جائے، عمران خان

اسلام آباد: (ویب ڈیسک) پاکستان تحریک انصاف کے چیئرمین عمران خان نے کہا ہے کہ وقت آ گیا ہے کہ قوم کو اب حقیقی آزادی دلائی جائے۔
اپنے بیان میں انہوں نے کہا کہ ہم جنگ میں کسی کے ساتھ نہیں دیں گے،امن میں سب کا ساتھ دیں گے، ہم اس ملک میں انصاف کی جنگ لڑ رہے ہیں۔
عمران خان نے کہا کہ بڑے ڈاکو پہلےچوری کرتے ہیں پھر بلیک میل کر کے این آر او لیتے ہیں، ملک میں غریب اورامیر کیلئے یکساں قانون چاہتے ہیں۔
ان کا کہنا تھا کہ قانون کی حکمرانی کےبغیرکوئی معاشرہ ترقی نہیں کرسکتا۔
چیئرمین تحریک انصاف عمران خان نے 5 ستمبر سے ممبرشپ شروع کرنے کا اعلان کرتے ہوئے کہا کہ آئی ایس ایف کے کارکنان یونیورسٹیوں اور کالجز میں ممبرشپ شروع کریں۔