گوجرانوالہ میں سڑک پر کھڑی خاتون کو 4 ملزمان نے اجتماعی زیادتی کا نشانہ بناڈالا جب کہ آئی جی پنجاب کے نوٹس پر چاروں ملزمان کو گرفتار کرلیا گیا۔

گوجرانوالہ میں حافظ آباد روڈ کے اسٹاپ پر خاتون کھڑی تھی اس دوران کار میں سوار 4 ملزمان نے خاتون کے آگے گاڑی روکی اور اسے زبردستی کار میں بٹھایا اور نامعلوم مقام پر لے گیا جہاں سفاک ملزمان نے خاتون کو اجتماعی زیادتی کا نشانہ بنایا۔

بعد ازاں چاروں ملزمان خاتون کو بے ہو شی کی حالت میں چھوڑ کر فرار ہوگئے۔

دوسری جانب آئی جی پنجاب راؤ سردار علی خان نے گوجرانوالہ میں خاتون کے ساتھ مبینہ اجتماعی زیادتی کے واقعہ کا نوٹس لے کر آر پی او گوجرانوالہ سے رپورٹ طلب کر لی۔

آئی جی پنجاب کے نوٹس پر پولیس ٹیم نے فوری کارروائی کرتے ہوئے واقعہ میں ملوث چاروں ملزمان گرفتار کرلئے۔

آئی جی پنجاب نے تفتیش کو جلد مکمل کرتے ہوئے ملزمان کے خلاف سخت قانونی کارروائی کا حکم دیا۔

آئی جی پنجاب نے کہا کہ متاثرہ خاتون کو انصاف کی فراہمی ترجیحی بنیادوں پر یقینی بنائی جائے۔

راؤ سردار علی خان نے کہا کہ خواتین اور بچوں پر تشدد، ہراساں اور زیادتی کے واقعات پر پنجاب پولیس زیرو ٹالرینس کی پالیسی پر عمل پیرا ہے۔

حمزہ شہباز نے کہا ہے کہ آج  پنجاب کے 58 ہزار بلدیاتی نمائندوں کی مدت ختم ہو رہی ہے۔

اپوزیشن لیڈر پنجاب اسمبلی حمزہ شہباز شریف نے بلدیاتی نمائندوں کی مدت ختم ہونے پر پیغام دیتے ہوئے کہا کہ آج  پنجاب کے 58 ہزار بلدیاتی نمائندوں کی مدت ختم ہو رہی ہے ، مسلم لیگ ن نے پارٹی وابستگیوں سے بالاتر ہو کر ان نمائندوں کے جائز آئینی حقوق کی بھرپور جنگ لڑی۔

انہوں نے کہا کہ تحریک انصاف کی جانب سے 30 ماہ تک مقامی حکومتوں کے اختیارات کو غصب کیا گیا ، پنجاب کے عوام سے ان کے منتخب نمائندے بیک جنبش قلم چھین لئے گئے جسے بعد میں سپریم کورٹ کے حکم پر بحال کیا گیا۔

حمزہ شہباز نے کہا کہ سپریم کورٹ کے حکم کے باوجود 7 ماہ تک بلدیاتی نمائندوں کو بحال کرنے میں لیت و لعل سے کام لیا جاتا رہا ، افسوس حکومت نے وقتی مفاد اور چھوٹے سیاسی فائدے کے لئے عوام کا بیڑا غرق کر دیا اور جمہوریت کے اہم درجے کی راہ میں روڑے اٹکائیں۔

اپوزیشن لیڈر پنجاب اسمبلی حمزہ شہباز شریف نے کہا کہ بلدیاتی ادارے موجود ہوتے تو گورننس کے فقدان پر بھی بند باندھا جا سکتا تھا اور مہنگائی بھی ایک حد تک  کنٹرول ہوتی ، میں جمہوریت کے استحکام اور حقیقی معنوں میں جمہوریت کے فروغ کے لئے بلدیاتی اداروں کی مظبوطی کا علمبردار ہوں اور اس کے لئے آئندہ بھی ہر فورم پر جدوجہد کرتا رہوں گا۔

انہوں نے کہا کہ اب بھی بطور اپوزیشن لیڈر پنجاب میں صوبے میں ایک ایسے بلدیاتی نظام کا حامی ہوں جس میں نمائندے مکمل بااختیار ہوں ، مسلم لیگ ن کے مطالبے پر بلدیاتی قانون کے حوالے سے ایوان کی اسپیشل کمیٹی تشکیل دی گئی ہے بلدیاتی قانون اور نمائندوں کے حقوق کے تحفظ کے لئے اپنا کردار ادا کریں گے۔

اسلام آباد: یئرمین ایف بی آر کا کہنا ہے کہ حکومت کو جی ایس ٹی پر چھوٹ واپس لینے کی سیاسی قیمت چکانا پڑے گی۔

اسلام آباد میں پریس کانفرنس کے دوران چیئرمین ایف بی آر ڈاکٹر محمد اشفاق احمد کا کہنا تھا کہ حکومت کو جی ایس ٹی چھوٹ واپس لینے کی سیاسی قیمت چکانا پڑے گی، آئی ایم ایف کا ہمیشہ سے مطالبہ رہا ہے کہ ریونیو بڑھائیں اور اصلاحات کریں، ماضی میں جب بھی آئی ایم ایف کا مطالبہ آتا ہم نئے ٹیکس لگا دیتے ہیں مگر پالیسی سطح کی تبدیلیوں پر کسی نے توجہ نہ دی کیونکہ یہ غیر مقبول فیصلے تھے، آئی ایم ایف کو ٹیکس ریونیو کے اعدادوشمار سے مطلب ہے۔

چیئرمین ایف بی آر نے کہا کہ آئی ایم ایف زیادہ پالیسی سطح کی اصلاحات پر زور دیتا ہے، آئی ایم ایف کا مطالبہ تھا کہ تمام اشیاء پر 17 فیصد جی ایس ٹی لگائیں، اگر کسی کو سہولت دینا ہے تو سبسڈی کے ذریعے دی جائے، آئی ایم ایف کا مطالبہ ٹیکس تفریق کو ختم کرنے کا تھا، ہمارا فوکس بھی ٹیکس تفریق و تضاد کو دور کرنے پر ہے، آئی ایم ایف کا کہنا ہے کہ ٹیکس کو اپنا ریوینیو اکٹھا کرنے تک رکھیں۔

چئیرمین ایف بی آر ڈاکٹر اشفاق احمد نے کہا کہ منی بجٹ کے ذریعے جو اصلاحات متعارف کروائی ہیں وہ تاریخی ہیں، 200 سے زائد مالیت کے درآمدی موبائل فون پر 17 فیصد جی ایس ٹی لاگو کرنے کی تجویز ہے، پاکستان میں ٹیکسوں کی جتنی مراعات ہیں اس حساب سے پاکستان کو دینا سب سے بڑا صنعتی ملک ہونا چاہیے مگر مراعات کے باوجود پاکستان دنیا کا بڑا صنعتی ملک نہیں ہے، یہی آئی ایم ایف کہتا ہے کہ جب ایسا نہیں ہے تو پھر یہ تفریق ختم کی جائے، جی ایس ٹی کی چھوٹ واپس لینا حکومت کا غیر مقبول فیصلہ ہے جس کی سیاسی قیمت چکانا پڑے گی۔

چئیرمین ایف بی آر نے کہا کہ یہ فیصلے ملکی معیشت کیلئے اور ڈاکومنٹیشن کیلئے ضروری تھے، حکومت کے پاس ریونیو زیادہ آئے گا تو ٹارگیٹڈ سبسڈی زیادہ دی جاسکے گی، آئی ایم ایف کے پروگرام سے نکل جائیں تو پھر ایک ہی بجٹ پیش ہوا کرے گا۔

اسلام آباد: دارالحکومت اسلام آباد میں شادی کی تقریب میں شریک ایک ہی خاندان کے 15 افراد میں کورونا وائرس کی نئی قسم اومی کرون کی تصدیق ہوئی ہے۔ شہر میں اومی کرون سے متاثرہ مریضوں کی تعداد 66 تک پہنچ گئی۔

ایکسپریس نیوز کے مطابق اسلام آباد میں اومی کرون وائرس تیزی سے پھیلنے لگا ہے۔ اومی کرون وائرس کے پھیلاؤ میں تیزی سے اضافہ کے پیشِ نظر ڈی ایچ او اسلام آباد ڈاکٹر زعیم ضیاء نے باضابطہ ایڈوائزری جاری کردی۔

ایڈوائزری کے مطابق اسلام آباد میں شادی کی تقریب میں شریک ایک ہی گھر کے 15 افراد میں اومی کرون کی تصدیق ہوئی، شہر میں گزشتہ 24 گھنٹوں کے دوران مزید 34 افراد اومی کرون کا شکار ہوئے جس کے بعد کل مریضوں کی تعداد 66 ہوگئی۔

ڈی ایچ او کے مطابق اسلام آباد میں اومی کرون کا پہلا کیس 25 دسمبر کو سامنے آیا تھا جبکہ گذشتہ روز تک اسلام آباد میں اومی کرون سے متاثرہ مریضوں کی تعداد محض 32 تھی۔

ڈاکٹر زعیم ضیاء کی جانب سے جاری ایڈوائزری میں ہدایت کی گئی ہے کہ شہری نئے سال کی تقریبات میں غیر ضروری شرکت سے گریز کریں، اومی کرون وائرس سے بچاؤ کے لیے ایس او پیز پر عملدرآمد کو یقینی بنائیں، نئے سال کی آمد پر غیر ضروری سفر اور ایس او پیز کی خلاف ورزی سے اجتناب کریں، شہری رش والے مقامات، شادی بیاہ، شاپنگ مالز، مارکیٹ جانے سے گریز کریں، ویکسین شدہ افراد ہی فیملیز کے ساتھ باہر جائیں، ماسک و سینیٹائزر کے استعمال کو یقینی بنائیں۔

ڈی ایچ او کا کہنا ہے کہ اومی کرون وائرس سے محفوظ رہنے کا واحد راستہ ویکسی نیشن ہے، شہری خود کو اور اپنے پیاروں کو ویکسین ضرور لگوائے۔