ان فائلوں میں اعلیٰ پولیس افسروں کی انکوائریاں ،ممنوعہ بور کے اسلحہ لائسنس کی فہرست اور اشتہاریوں کے متعلق معلومات ہیں ۔سیکشن افسر نے پرانے ریکارڈ کو محفوظ کرنا مناسب نہیں سمجھا ،فائلیں اور ٹوٹی کرسیاں ایک جگہ پر پھینک دیں۔لاہور(ویب ڈیسک)محکمہ داخلہ پنجاب سول سیکرٹریٹ اہم فائلیں سنبھالنے میں ناکام ہو کر رہ گیا ہے۔محکمہ داخلہ کے سیکشن افسران نے اہم فائلیں سٹور میں محفوظ کرنے کے بجائے دیمک لگنے کے لیے سول سیکر ٹریٹ کے بر آمدوں میں پھینک دی ہیں بتایا گیا ہے کہ سول سیکر ٹریٹ میں محکمہ داخلہ پنجاب کے اہم ترین سیکشن ہیں جن میں پولیس کے،
مختلف اعلیٰ افسران کی انکوائریاں ،جیلوں میں تعینات افسران کی کارکردگی ممبران اسمبلی کو جاری ممنوعہ بور کے اسلحہ لائسنس کی فہرست اور دیگر مجرمان اور اشتہاریوں کے حوالے سے قیمتی ریکارڈ محفوظ ہے مگر محکمہ داخلہ کے سیکشن افسر نے ان کی حفاظت کرنے کے بجائے ان فائلوں کو بوریوں میں بند کرکے برامدوں میں پھینک دیا ہے۔

وفاقی حکومت کی جانب سے پنجاب کو 70 ہزار کورونا ویکسین ملی گئی۔ وزیراعلی پنجاب عثمان بزدار نے کورونا ویکسین لگانے کی مہم کا باقاعدہ آغاز کردیا۔

پنجاب ہاوس اسلام آبا میں وزیراعلی پنجاب عثمان بزدار نے صوبے میں کورونا ویکسین لگانے کی مہم کا افتتاح کردیا۔

وزیراعلی عثمان بزدار کی موجودگی میں فرنٹ لائن ہیلتھ ورکرز کو کورونا ویکسین لگا کر پہلے مرحلے کا آغاز باقاعدہ آغاز کیا گیا۔

وزیراعلی پنجاب نے کہا کہ 70 ہزار کورونا ویکسین کی ڈوززپنجاب کو مہیا کی گئی ہے جبکہ مزید ویکسین بھی اگلے تین ہفتوں میں ملے گی۔ پہلے مرحلے میں صوبے کے فرنٹ لائن ہیلتھ ورکرز کو جبکہ دوسرے مرحلے میں ہیلتھ ورکرز کے ساتھ بزرگ شہریوں کو مفت کورونا ویکسین لگائی جائے گی-

انہوں نے کہا کہ کوروناویکسین لگانے کے لئے پنجاب میں 189مراکز قائم کئے گئے ہیں جس میں 2500 آئس لائن ریفریجریٹرزکا انتظام کیا گیا ہے۔

تاہم 36 اضلاع میں اب تک 600 سے زائد افرادکو تیکنیکی تربیت فراہم کی گئی ہے-افتتاحی تقریب میں وزیراعلی کے ساتھ گورنر پنجاب بھی موجود تھے۔

لاہور (ویب ڈیسک)چینل۵ کے تجزیوں اور تبصروں پر مشتمل پروگرام ”ضیاءشاہد کے ساتھ“ میں گفتگو کرتے ہوئے پیپلزپارٹی کے رہنما لطیف کھوسہ نے کہا ہے کہ ن لیگ اور پیپلز پارٹی کا اتحاد ختم ہونے کی خوش فہمیوں کا کوئی علاج نہیں ہے تحریک انصاف ایسی افواہیں پھیلانے کی ماہر ہے۔ حکومت خاطر جمع رکھے۔ پی ڈی ایم قائم ودائم ہے۔ اور اپنے اہداف حکومت کے خاتمے پر ہی منطقی انجام پر پہنچیں گے۔ ہم نے پہلے ہی لائحہ عمل طے کر رکھا ہے۔ یوم یکجہتی کشمیر پر ہم بارڈر کے پار تک پیغام دیں گے کہ قوم کشمیر کی آزادی پر متفق ہے۔ موجودہ حکومت سلیکٹڈ ہے جس نے ملک کو تباہی کے دہانے کھڑا کر دیا ہے۔ حکومت کو گھر بھیجنے کی تاریخیںنہیں دینی چاہئیں مگر اس معاملے میں جتنی تاخیر ہوگی ملک کے لیے اتنی ہی بربادی ہوگی۔ پارلیمان کے معاملات عدالتوں میں بالکل نہیں جانے چاہئیں۔ حکومت نے پارلیمان کو بے توقیر کردیا ہے۔ حکومت نے ترامیم کا وقت گزار دیا ہے۔ اب جتنی مرضی ترامیم لیکر آجائیں۔ حکومت پہلے لوٹی ہوئی دولت ثابت کرے پھر کسی کو چور اور ڈاکو کہیں۔ اب تک کوئی لوٹی ہوئی رقم ملک میں واپس کیوں نہیں لائی گئی۔ عمران خان مفروضوں کا جواب دیں۔ آصف زرداری کی ضمانت بیماری کی بنیاد پر ہوئی ہے کوئی ڈیل ڈھیل نہیں۔

لاہور(ویب ڈیسک)پہلی جماعت سے یکساں نصاب ،پرائیویٹ سکولوں میں پلے گروپ ،پریپ کلاسیں ختم۔تمام سرکاری اور پرائیوٹ سکولوں کو کچی کلاس کی کتابیں پنجاب ٹیکسٹ بورڈ دے گا۔ یکساں نصاب کے طور پر اردو، ریاضی اور انگلش کی کتابیں سرکاری اور نجی سکولوں کو ملیں گی۔ ٹیکسٹ بک بورڈ کی جانب سے یکساں نصاب کی کتابیں اردو اور انگلش میں چھاپنے کا فیصلہ۔ یکساں نصابی کتب کی سپلیمنٹری ریڈنگ کے لیے بک ایڈیٹرز کی خدمات حاصل کرنے کا فیصلہ۔16اپریل سے نصابی کتب کی پرنٹنگ کا آغاز، 31جولائی تک تقسیم ہوجائیںگی۔

اسلام آباد: سینیٹ الیکشن کیس میں چیف جسٹس آف پاکستان کا کہنا ہے کہ پارلیمنٹیرنز اوپن بیلٹ کی مخالفت کس بنیاد پر کریں گے اوپن بیلٹ کی مخالفت کا مقصد موجودہ سسٹم چلتا رہے، موجودہ سسٹم کے چلنے کا مطلب یہ ہے اراکین کی خرید و فروخت جاری رہے۔

سپریم کورٹ میں سینیٹ الیکشن انتخابات سے متعلق صدارتی ریفرنس کی سماعت چیف جسٹس کی سربراہی میں پانچ رکنی لارجر بینچ نے کی۔

جسٹس اعجاز الاحسن نے کہاپارٹی کے خلاف ووٹ دینے پر نااہلی نہیں ہو سکتی تو مسئلہ کیا ہے؟ پہلے دن سے مجھے اس سوال کا جواب نہیں مل رہا، کوئی قانون منتحب رکن کو پارٹی امیدوار کو ووٹ دینے کا پابند نہیں کرتا، ووٹ فروخت کرنے کے شواہد پر ہی کوئی کارروائی ہوسکتی ہے، اوپن ووٹنگ میں بھی ووٹ فروخت کرنے کے شواہد نہ ہوں تو کچھ نہیں ہو سکتا۔

جس پر اٹارنی جنرل پاکستان نے کہااوپن بیلٹ کا مقصد سیاستدانوں کو گندا کرنا نہیں ہے۔حکومت صرف انتخابی عمل کی شفافیت چاہتی ہے۔ کسی کی نااہلی چاہتے ہیں نہ ہی کسی منتحب رکن کے خلاف کارروائی کرنا۔ لوگوں کو معلوم ہونا چاہیے انکے نمائندے نے کس کو ووٹ دیا، عوام کو علم ہونا چاہیے کس نے پارٹی کے خلاف ووٹ دیا۔

جسٹس عمر عطا بندیال نے کہا پارٹی کو ووٹ نہ دینے پر نااہلیت نہیں تو یہ تبدیلی صرف دکھاوا ہو گی، پارٹی کو چاہیے کہ عوام کو بتائے کس رکن نے دھوکا دیا۔

چیف جسٹس نے کہا ووٹرز تو کہتے ہیں رکن اسمبلی ہماری خدمت کے لیے ہیں۔عوام اراکین اسمبلی کو اس لیے منتحب نہیں کرتے کہ وہ اپنی خدمت کرتے رہیں۔

جسٹس یحی خان آفریدی نے کہاریفرنس پر عدالتی رائے حتمی فیصلہ نہیں ہوگی، حکومت کو ہر صورت قانون سازی کرنا ہوگی۔

جسٹس عمر عطا بندیال نے کہا اٹھارہویں ترمیم میں بہت کچھ تبدیل کیا گیا، مگر سینیٹ کے سیکرٹ بیلٹ کو تبدیل نہیں کیا گیا اس کی کیا وجہ تھی؟۔ اس پر اٹارنی جنرل نے کہا یہی تو میرا شکوہ ہے۔

چیف جسٹس پا کستان نے کہا اوپن بیلٹ کی مخالفت کس بنیاد پر کریں گے اوپن بیلٹ کی مخالفت کا مقصد موجودہ سسٹم چلتا رہے۔موجودہ سسٹم کے چلنے کا مطلب یہ ہے اراکین کی خرید و فروخت جاری رہے۔

اٹارنی جنرل کے دلائل جاری تھے کہ کیس کی مزید سماعت جمعرات تک ملتوی کردی گئی

سینیٹ الیکشن کے طریقہ کار میں تبدیلی کیلئے ترمیمی بل قومی اسمبلی میں پیش کر دیا گیا ہے۔ اپوزیشن نے شدید ہنگامہ آرائی کرتے ہوئے ایجنڈے کی کاپیاں پھاڑ دیں۔

اپوزیشن نے سپیکر قومی اسمبلی پر جانبداری کا الزام عائد کرتے ہوئے کہا ہے کہ یہ ایوان تحریک انصاف کا نہیں، اسلامی جمہوریہ پاکستان کا ہے۔ ڈھائی سال سے نظر انداز کیا جا رہا ہے، اپوزیشن کے مائیک بھی بند کرا دیئے جاتے ہیں۔

تفصیل کے مطابق وفاقی وزیر قانون بیرسٹر فروغ نسیم نے قومی اسمبلی میں آئین میں 26 ویں آئینی ترمیم کرنے کا بل پیش کر دیا ہے۔ اس بل میں سینیٹ الیکشن اوپن کرنے اور دوہری شہریت والوں کو الیکشن لڑنے کی اجازت دینے کی ترامیم شامل ہم چاہتے ہیں۔

اس موقع پر اجلاس سے خطاب میں وزیر قانون فروغ نسیم کا کہنا تھا حکومت چاہتی ہے کہ سینیٹ الیکشن اوپن بیلٹ سے ہو۔ اپوزیشن سے درخواست ہے کہ ان کے اراکین آئین پڑھ لیا کریں، آئین میں ترمیم لانا کیا غیر آئینی ہے؟

اس موقع پر اپوزیشن کی جانب سے شدید ہنگامہ آرائی کرتے ہوئے بل کے ایجنڈے کی کاپیاں پھاڑ دی گئیں۔ اپوزیشن میں اظہار خیال کرتے ہوئے مسلم لیگ (ن) کے رہنما احسن اقبال کا کہنا تھا کہ حکومت اپوزیشن کے اراکین کو انتقامی کارروائی کا نشانہ بناتی ہے۔ ہمارے مائیک کو بند کر دیا جاتا ہے، ہر منتخب رکن اسمبلی کو بولنے کا حق ہے۔

احسن اقبال کا کہنا تھا کہ سپیکر کسی جماعت کا نہیں پورے ایوان کا ہوتا ہے۔ ایوان میں احتجاج کرنا ہمیں پسند نہیں ہے۔ ہم چاہتے ہیں کہ کارروائی دستور کے مطابق ہو۔

انہوں نے 26ویں آئینی ترمیم کے بل پر بات کرتے ہوئے کہا کہ ہمیں اس پر شدید تحفظات ہیں۔ ہم چاہتے ہیں ایوان کو رولز کے مطابق چلایا جائے۔ پوری دنیا میں جمہوریت اپوزیشن کے ساتھ چلتی ہے۔ ابھی تک ان کے ذہنوں سے ڈی چوک کا کینٹینر نہیں نکلا۔ حکومت چلانے کے لیے برداشت، صبر کی ضرورت ہوتی ہے۔