پی ڈی ایم کے رہنماؤں نے کہا ہے کہ حکومت گھبرا گئی، اپنے ارکان پر عدم اعتمادکر دیا،آرڈیننس کی بھرپورمخالفت کرینگے ۔اپوزیشن اتحاد پاکستان ڈیموکریٹک موومنٹ کے سربراہ مولانا فضل الرحمن اور مریم نواز کی ملاقات میں آرڈیننس کے ذریعے سینیٹ الیکشن شوآف ہینڈ سے کرانے کے اقدام کی شدید مخالفت کافیصلہ کیا گیا ،دونوں رہنماؤں کے درمیان ہونے والی ملاقات میں اتفاق کیا گیا کہ آئینی ترمیم کے بغیر سینیٹ الیکشن کا طریقہ کار تبدیل نہیں کیا جا سکتا،مریم نواز نے کہا کہ سینیٹ الیکشن میں پتا چل جائے گا کہ کون کس کے ساتھ کھڑا ہے ، تحریک عدم اعتماد کا آپشن مسترد نہیں کیا،مولانا فضل الرحمن نے کہا کہ آرڈیننس کے معاملے پر عدالت بھی جانا پڑا تو جائیں گے ۔ملاقات میں اپوزیشن کے لانگ مارچ کے طریقہ کار اور دورانیے پر گفتگو ہوئی۔طے پایا کہ لانگ مارچ سے متعلق تمام تجاویز کا سٹیئرنگ کمیٹی میں جائزہ لیکر حتمی فیصلہ کیا جائے گا۔ دونوں رہنمائو ں کی ملاقات میں لانگ مارچ اسلام آباد پہنچنے پر پہلا پڑا ؤفیض آباد پر ڈالنے کی تجویز سامنے آئی ، ملاقات میں سینیٹ الیکشن میں مشترکہ امیدواروں کی کامیابی یقینی بنانے کی حکمت عملی پر بھی گفتگو ہوئی ۔تحریک عدم اعتماد پہلے پنجاب سے لائی جائے یا بلوچستان سے ، اس حوالے سے پیپلز پارٹی کی تجاویز پر بھی غور کیا گیا۔ صدارتی آرڈیننس کے آئینی اور قانونی پہلوئوں کا جائزہ لیکر اسے عدالت میں چیلنج کرنے بھی مشاورت ہوئی ۔ادھر پیپلز پارٹی کے چیئرمین بلاول بھٹو نے اسلام آباد میں پریس کانفرنس کرتے ہوئے کہا کہ حکومت پی ڈی ایم کے فیصلوں سے گھبراہٹ کا شکار ہے ،آرڈیننس جاری کر کے اپنے ہی اراکین پارلیمنٹ پر عدم اعتماد کا اظہار کردیا ہے ، سپریم کورٹ کو متنازع بنانے کیلئے اسے ریفرنس بھیجاگیا، تحریک انصاف کی دھاندلی کی ہر کوشش ناکام ہوگی۔عمران خان جب بھی بات کرتے ہیں کوئی نہ کوئی غلطی کر بیٹھتے ہیں گزشتہ روز جو بات انہوں نے کی اگر ہم کرتے تو سکیورٹی رسک بن جاتے ، حکومت ٹافیوں کی طرح این آر او بانٹ رہی ہے ،عمران خان پی ڈی ایم سے این آر او مانگ رہے ہیں ،ہم انہیں بھاگنے نہیں دیں گے ۔ حکومت آرڈیننس جاری کرکے سینیٹ انتخابات کو اوپن بیلٹ کے ذریعے کروانا چاہتی ہے اور خفیہ بیلٹنگ کے حق کو ختم کرنے کی کوشش کر رہی ہے ،یہ سیاسی اشار ہ ہے کہ حکومت پی ڈی ایم کے فیصلوں کی وجہ سے گھبراہٹ کا شکار ہے ۔ انہوں نے کہا کہ حکومت پی ڈی ایم کے سینیٹ الیکشن لڑنے کے اعلان سے گھبرائی ہوئی ہے اور اب اداروں کو متنازعہ بنا کر عمران خان کیلئے دھاندلی کرائی جارہی ہے ۔ وہ پورے ملک کو بتارہے ہیں کہ ہم انتخابات سے قبل ہر حربہ استعمال کرتے ہوئے سینیٹ انتخابات میں عمران خان کیلئے دھاندلی کریں گے ۔ جمہوری ملک میں آئین میں تبدیلی کا ایک پارلیمانی طریقہ کار ہوتا ہے ، اگر حکومت نے آئین میں تبدیلی لانے کا فیصلہ کیا ہے تو اس پر سنجیدگی سے کوشش کر نی چاہئے تھی ۔ ا س پر اتفاق رائے قائم کرنے کی کوشش کی گئی نہ مختلف جماعتوں سے کوئی سنجیدہ بات چیت کی گئی۔انہوں نے کہا کہ حکومت نے جمہوری طریقہ کار نہیں اپنایا اور سپریم کورٹ کو متنازع بنانے کا قدم اٹھاتے ہوئے اسے ریفرنس بھیجا۔ حکومت نے سپریم کورٹ کو ایسی پوزیشن میں ڈالا ہے جہاں وہ جو بھی فیصلہ لے وہ متنازع فیصلہ ہوگا۔ آئین میں ترمیم صرف پارلیمان کرسکتی ہے ۔جہاں یہ ریفرنس عدالت میں تھا وہیں اچانک کمیٹی کے ذریعے اسے قومی اسمبلی میں لایا گیا، قومی اسمبلی میں بات تک نہیں کرنے دی گئی اور اراکین پارلیمنٹ پر حملے کئے گئے ۔انہوں نے کہا کہ اس شرمناک واقعے کے بعد ایک اور قدم اٹھایا گیا ہے جس سے ہمارے ادارے ، پارلیمان اور سپریم کورٹ کو متنازع بنایا جائے گا۔ جب ایک معاملہ عدالت میں ہے تو اس قدم کو اٹھانے کا مقصد کیا ہے ، حکومت مختلف حربے استعمال کرتے ہوئے اداروں پر دباؤ ڈالنے کی کوشش کر رہی ہے ۔ تحریک انصاف کی دھاندلی کرنے کی ہر کوشش ناکام ہوگی، حکومت بچگانہ حرکت کرکے نہ صرف ادارے بلکہ پورے سینیٹ انتخابات کو متنازع بنانے جارہی ہے ۔ حکومت کا ارادہ سلیکٹڈ پارٹی کے حق میں سینیٹ انتخابات میں دھاندلی کرنا ہے ۔ پیپلز پارٹی چاہتی ہے کہ دھاندلی جیسے مسئلوں کو ہمیشہ کیلئے حل کریں اور ان میں اصلاحات لائی جائیں۔ تحریک عدم اعتماد کسی بھی وزیر اعظم کو ہٹانے کیلئے جمہوری طریقہ کار ہے ۔پی ڈی ایم اراکین پارلیمنٹ کے استعفوں کے حوالے سے بلاول بھٹو نے کہا کہ اراکین کے استعفے سیاسی جماعتوں کی قیادت کے پاس موجود ہیں اور یہ معاملہ آج بھی پی ڈی ایم میں زیر بحث ہے ۔ سینیٹ انتخابات میں حصہ نہ لیتے تو تحریک انصاف کو بھرپور اکثریت مل جاتی اس وجہ سے ہم نے انتخابات میں شرکت کا فیصلہ کیا۔ ان کا کہنا تھا کہ کچھ توہوا کہ عمران خان کا پسینہ نکل رہا ہے اور وہ چھلانگیں مار کر آئین تبدیل کرنے کی کوشش میں ہیں، سینیٹ انتخابات قریب ہیں، سب دیکھیں گے کہ کیا ہوگا۔18ویں آئینی ترمیم کو بدلنے کے سوال پر چیئرمین پیپلز پارٹی نے کہا کہ 1973 کے آئین کو تبدیل کرنے کا سلسلہ شروع سے چل رہا ہے ، ہم نے شروع سے کہا ہے کہ 18 ویں ترمیم کو ختم کرنے کی سازش چل رہی ہے ۔ اب تک یہ کوشش ناکام رہی ہے اور آئندہ بھی ناکام رہے گی تاہم جس طرح سے آرڈیننس کے ذریعے عمران خان سینیٹ ا لیکشن میں اوپن بیلٹ کی کوشش کر رہے ہیں اسی طرح سے وہ آئین کو تبدیل کرنے کا سوچتے ہیں تو ایسا نہیں ہوسکتا۔پیپلز پارٹی کے اراکین پارلیمنٹ کی حکومت سے ملاقات بارے سوال پر انہوں نے کہا کہ میں اپنے ممبران پر فخر کرتا ہوں کہ اتنے دباؤ کے باوجود بھی انہوں نے کبھی مجھے مایوس نہیں کیا۔ ہم سب پی ڈی ایم کے فیصلے کے پابند ہیں ۔عمران خان کو ہر ظلم کا حساب دینا ہوگا اور وہ دن جلد آئے گا۔ ہم پی ڈی ایم کو سافٹ لائن پر نہیں لائے ،ہم صرف اور صرف عوام کی طاقت پر سیاست کرنا چاہتے ہیں۔ پیپلز پارٹی کو جمہوریت کا سبق نہ سکھایا جائے ،ہم مل کر فیصلے کر رہے ہیں،کوئی دبا ؤنہیں ۔ آصف زرداری نے کوئی ایسا بیان نہیں دیا تھا کہ بلوچستان حکومت کو گراؤنگا۔بلاول نے پاکستانی کوہ پیما علی سدپارہ اور دیگر دو کوہ پیماؤں کے لا پتا ہونے پر تشویش کا اظہار کیا ہے ، ایک بیان میں بلاول بھٹونے کہا کہ محمد علی سدپارہ پاکستان کے قابل فخر ہیرو ہیں، علی سدپارہ نے ملاقات میں کے ٹو سر کرنے کے عزم کا اظہار کیا تھا، علی سدپارہ کی تلاش اولین ترجیح ہونی چاہیے ،بلاول بھٹو نے کہا کہ علی سدپارہ اور ان کے ساتھیوں کی بحفاظت واپسی کے لئے دعاگو ہیں۔عوامی نیشنل پارٹی کے مرکزی صدر اسفندیارولی خان نے سینیٹ انتخابات کیلئے صدارتی آرڈیننس مسترد کرتے ہوئے کہا ہے کہ سلیکٹڈ حکومت پارلیمنٹ کی بے توقیری کررہی ہے ۔آرڈیننس کا نفاذ صرف نئے پاکستان ہی میں ممکن ہے ۔ اپنے بیان میں اے این پی سربراہ نے کہا کہ سینیٹ انتخابات کے طریقہ کار سے متعلق کیس سپریم کورٹ میں زیرسماعت ہونے کے باوجود آرڈیننس کا فیصلہ گھبراہٹ اور نااہلی کا اعتراف ہے ۔آئینی ترمیم کے بغیر سینیٹ الیکشن کا طریقہ کار تبدیل نہیں کیا جا سکتا۔آرڈیننس کے ذریعے آئین میں ترمیم نہیں کی جاسکتی، ان میں ہمت ہے تو قانون سازی کریں۔ان کا کہنا تھا کہ انہیں ڈر ہے کہ انکی نااہلی عیاں ہوجائیگی۔

صوبہ بھر میں سرکاری سکول چھوڑ جانے والے چھ لاکھ بچوں میں ضلع لاہور دوسرے نمبر پر جبکہ رحیم یار خان پہلے نمبر پر رہا ۔

ذرائع کے مطابق صوبہ بھر میں سرکاری سکول چھوڑ جانے والے بچوں میں ضلع لاہور دوسرے نمبر پر ہے جبکہ سکول چھوڑ جانے والے ڈسٹرکٹ میں رحیم یار خان پہلے نمبر پر رہا، صوبہ بھر میں سکول چھوڑ جانے والے طلبا میں زیادہ تعداد لڑکوں کی ہے، رحیم یار خان میں 22 ہزار اور لاہور میں 18 ہزار سے زائد بچے سکول چھوڑ گئے ہیں، صوبہ بھر میں کورونا وائرس کے باعث چھ لاکھ طلبا سکول چھوڑ چکے ہیں۔

ذرائع کا کہنا ہے کہ سکول ایجوکیشن ڈیپارٹمنٹ نے دس لاکھ بچوں کے داخلوں کا ہدف دے رکھا ہے، مذکورہ ہدف آئندہ پانچ ماہ کے دوران مکمل کیا جائے گا، لاہور کے سکولوں میں اس وقت سوا چھ لاکھ طلبہ وطالبات زیر تعلیم ہیں۔

دوسری جانب جنرل سیکرٹری پنجاب ٹیچرز یونین رانا لیاقت علی نے سرکاری سکولوں میں دس لاکھ نئے بچوں کا داخلہ زمینی حقائق کے برعکس قرار دے دیا، کہتے ہیں داخلوں کیلئے نئے سکول بنانے کے ساتھ 77 ہزار اساتذہ، 3 ہزار سربراہ اور ہزاروں درجہ چہارم کے ملازمین کی بھرتی کی جائے۔

وزیراعلیٰ پنجاب عثمان بزدارنے جنوبی پنجاب کے پسماندہ ضلع راجن پور کا طوفانی دورہ کیا اور اربوں روپے کے ترقیاتی پیکیج کا اعلان کیا ۔راجن پو رمیں پناہ گاہ اور لنگر خانے کا دورہ کیا-وزیراعلیٰ راجن پو رکے دور افتادہ مقام ماڑی بھی گئے او رماڑی کو سیاحتی مقام قراردینے کا اعلان کیا-رکن پنجاب اسمبلی سردار فاروق امان اللہ دریشک کی رہائش گاہ گئے اور معززین علاقہ سے ملاقات کی ۔وزیراعلٰی نے کوٹ بہادر میں صوبائی وزیر لائیوسٹاک سردار حسنین بہادر دریشک کی فیکٹری میں مقامی لوگوں او رپارٹی ورکرز سے ملاقات کی۔وزیراعلیٰ نے کوٹ مٹھن میں حضرت خواجہ غلام فریدؒ کے مزار پر حاضری دی اور پھول چڑھائے ۔ میڈیا سے گفتگو کرتے ہوئے عثمان بزدار نے کہامیں آپ کے پاس ضلع راجن پور کیلئے بڑا ڈویلپمنٹ پیکیج لے کر حاضر ہوا ہوں، جس کے تحت مختلف سیکٹرز کے درجنوں بڑے منصوبے 15 ارب روپے کی لاگت سے مکمل کئے جائیں گے ،یہ تمام منصوبے انشاء اللہ2 سال میں مکمل کئے جائیں گے ۔انہوں نے کہاضلع راجن پو رکے عوام کیلئے مدر اینڈ چائلڈ ہسپتال نعمت کے مترادف ہے اور اس پراجیکٹ کو 8 ارب روپے کی لاگت سے مکمل کیا جائے گا جبکہ یہاں 7 مختلف بڑے ترقیاتی منصوبوں کا افتتاح اور سنگ بنیاد رکھا گیا جن کی لاگت تقریباً ایک ارب روپے سے زائد ہے ۔ وزیراعلیٰ نے راجن پور میں یونیورسٹی کے قیام کا اعلان کیا،جو100کروڑ روپے کی لاگت سے مکمل ہوگی۔انہوں نے کہا جام پور سے کشمور تک 2 رویہ سڑک کی تعمیر علاقے کی ترقی اور خوشحالی کیلئے گیم چینجر ثابت ہوگی۔بزدار نے راجن پو رمیں پناہ گاہ اورلنگر خانے کا دورہ کیا-وزیراعلیٰ نے پناہ گاہ اور لنگر خانے میں فراہم کی جانے والی سہولتوں کا جائزہ لیااور لوگوں کے ساتھ بیٹھ کر کھانا کھایا،وزیراعلیٰ بزدار اورپناہ گاہ میں مقیم ایک شخص نے ایک ہی پلیٹ میں کھانا کھایا۔وزیراعلیٰ راجن پور میں رکن پنجاب اسمبلی سردار فاروق امان اللہ دریشک کی رہائش گاہ گئے ۔عثمان بزدار نے کہاکہ راجن پور کے لوگو ں کے ساتھ محبت کا رشتہ ہے اوراسے مرتے دم تک نبھاؤں گا۔کوٹ بہادر میں صوبائی وزیر لائیوسٹاک سردار حسنین بہادر دریشک کی فیکٹری میں مقامی لوگوں او رپارٹی ورکرز نے انہوں نے ملاقات کی ، وزیراعلیٰ نے کہاکہ فلاح عامہ کی سکیموں کو اپنی نگرانی میں مکمل کراؤں گا۔عثمان بزدارماڑی کا دورہ کرنے والے پہلے وزیراعلیٰ ہیں،بزدارنے ماڑی کو سیاحتی مقام قراد دینے ، باڈر ملٹری پولیس میں بھرتیو ں اور کوٹے میں اضافے اور ماڑی میں ریسٹ ہاؤس بنانے کا اعلان کیا۔بزدار نے کوٹ مٹھن میں حضرت خواجہ غلام فریدؒ کے مزار پر حاضری دی اور مزار پر پھولوں کی چادر چڑھائی۔عثمان بزدار اپنی رہائش گاہ سے بغیر پروٹول کے ملتان ائیرپورٹ پہنچے ،انہوں نے راجن پور کے مختلف علاقوں کا تقریباً 9 گھنٹے کادورہ کیا ۔عثمان بزدار آج ڈیرہ غازی خان میں مصروف دن گزاریں گے ،وزیراعلیٰ سخی سروربھی جائیں گے جہاں وہ محکمہ آبپاشی کے حوالے سے مفاہمت کی یادداشت پر دستخط کی تقریب میں شرکت کریں گے ۔

لاہور (ویب ڈیسک)ورچوئل آن لائن ایکسپو اور خبریں کے مابین مل کر کام کرنے کا معاہدہ ہوگیا۔ معاہدے پر ورچوئل ایکسپو کے چیف ایگزیکٹو نعیم ثاقب نے خبریں کے گروپ مارکیٹنگ ہیڈ میاں اکبر علی نے دستخط کیے۔ اس موقع پر ایڈیٹر خبریں گروپ/سی ای او چینل۵ امتنان شاہد بھی موجود تھے۔ ورچوئل ایکسپو کا بنیادی مقصد کرونا وباءکےدور میں تعمیراتی اور کاروباری سرگرمیوں کو فروغ دینا ہے۔ ورچوئل ایکسپو میں کسی بھی وقت بغیر کسی محنت کے سامل ہوا جاسکتا ہے۔ ورچوئل ٹریفک پارکنگ ماحولیاتی آلودگی اور ایندھن کے خرچ جیسے مسائل سے پاک اور ہر وقت لوگوں کی دسترس میں ہے۔ نمائش میں شرکت کیلئے وقت کی قید نہیں کوئی بھی کسی بھی وقت آن لائن فارم پر نمائش میں شرکت کرسکے گا۔ نمائش میں پراپرٹی، الیکٹرانکس، فارما، گارمنٹس، انجینئرنگ، مشینری اور فوڈ سمیت مختلف سیکٹرز سے وابستہ کمپنیاں اپنی مصنوعات کا ڈسپلے کرسکیں گی۔ ورچوئل ایکسپو منصوبہ جات اور مصنوعات کی رسائی پوری دنیا تک آسانی ممکن ہے خاص طور پر بیرون ملک مقیم پاکستانی جو وطن عزیز میں سرمایہ کاری کرنا چاہتے ہیں لیکن پاکستان آنے سے قاصر ہیں یا مصروف ہیں وہ ورچوئل ایکسپو کو ترجیح دے سکتے ہیں۔ اس سلسلے میں ویب www.vexpo.pk کے ذریعے معلومات حاصل کرسکتے ہیں۔

صدر مملکت نے سینیٹ انتخابات اوپن بیلٹ کے ذریعے کرانے کےلیے آرڈیننس پر دستخط کردیے جس کے بعد آرڈیننس جاری کردیا گیا۔

آرڈیننس کو الیکشن ترمیمی آرڈیننس 2021 نام دیا گیا ہے جبکہ آرڈیننس کو سپریم کورٹ کی صدارتی ریفرنس پر رائے سے مشروط کیا گیا ہے۔

آرڈیننس کے مطابق اوپن ووٹنگ کی صورت میں سیاسی جماعت کا سربراہ یا نمائندہ ووٹ دیکھنے کی درخواست کرسکے گا۔

آرڈیننس میں واضح کیا گیا کہ عدالت عظمیٰ سے سینیٹ انتخابات آئین کی شق 226 کے مطابق رائے ہوئی تو خفیہ ووٹنگ ہوگی۔

علاوہ ازیں آرڈیننس کے مطابق عدالت عظمیٰ نے سینیٹ انتخابات کو الیکشن ایکٹ کے تحت قرار دیا تو اوپن بیلٹ ہوگی اور اس کا اطلاق ملک بھر میں ہوگا۔

وفاقی وزیر اطلاعات و نشریات سینیٹر شبلی فراز نے جاری نے والے آرڈیننس کا عکس ٹوئٹر پر شیئر کیا۔

واضح رہے کہ وفاقی حکومت نے 23 دسمبر کو صدر مملکت کی منظوری کے بعد سینیٹ انتخابات اوپن بیلٹ کے ذریعے کرانے کے لیے سپریم کورٹ میں ریفرنس دائر کر دیا تھا۔

صدر مملکت ڈاکٹر عارف علوی نے آئین کے آرٹیکل 186 کے تحت سپریم کورٹ میں ریفرنس بھجوانے کی وزیرِ اعظم کی تجویز کی منظوری دے دی اور ریفرنس پر دستخط کیے تھے۔

عدالت عظمیٰ میں دائر ریفرنس میں صدر مملکت نے وزیر اعظم کی تجویز پر سینیٹ انتخابات اوپن بیلٹ کے ذریعے کرانے کی تجویز مانگی ہے۔

ریفرنس میں مؤقف اپنایا گیا تھا کہ آئینی ترمیم کے بغیر الیکشن ایکٹ میں ترمیم کرنے کے لیے رائے دی جائے۔

وزیراعظم عمران خان کا متحدہ عرب امارات (یو اے ای) کے ولی عہد شیخ محمد بن زید سے ٹیلی فونک رابطہ ہوا ہے جس میں دوطرفہ تعلقات اور باہمی دلچسپی کے امور پر تبادلہ خیال کیا گیا۔

ذرائع کے مطابق دونوں رہنماوَں نے پاک یو اے ای تعلقات مزید مستحکم کرنے کے عزم کا اعادہ کیا اور کورونا کی صورتحال سمیت علاقائی اور عالمی امور پر گفتگو کی۔

اس کے علاوہ دونوں رہنماوَں نے کثیر الجہتی شعبوں میں تعاون بڑھانے پر بھی اتفاق کیا۔

خیال رہے کہ شیخ محمد بن زید ابوظبی کے ولی عہد ،یو اے ای افواج کے ڈپٹی سپریم کمانڈر ہیں۔