لاہور(ویب ڈیسک) اے این ایف ہیڈ کوارٹر راولپنڈی حکام نے رانا ثناءاللہ کی گرفتاری کی تصدیق کردی۔ ذرائع کے مطابق اینٹی نارکوٹکس فورس (اے این ایف) نے مسلم لیگ (ن) کے ایم این اے رانا ثنااللہ کو تحویل میں لے لیا اور ان سے پوچھ کچھ کی جاری ہے تاہم اس حوالے سے کوئی مصدقہ اطلاعات نہیں کہ انہیں کس کیس میں تحویل میں لیا گیا ہے۔اے این ایف ہیڈ کوارٹر راولپنڈی حکام نے رانا ثناءاللہ کی گرفتاری کی تصدیق کرتے ہوئے کہا کہ رانا ثناءاللہ کو اے این ایف لاہور نے گرفتار کیا اور اس حوالے سے اے این ایف لاہور سے مزید تفصیلات حاصل کی جارہی ہیں، انہیں کس کیس میں گرفتار کیا گیا یہ کچھ دیر بعد بتائیں گے۔دوسری جانب مسلم لیگ (ن) کی نائب صدر مریم نواز نے رانا ثنااللہ کی گرفتاری کی خبروں پر ردعمل دیتے ہوئے کہا کہ اس سے ذیادہ مضحکہ خیز بات کیا ہو سکتی ہے کہ اے این ایف رانا ثنااللہ کو گرفتار کرے، اے این ایف کا رانا ثنااللہ سے کیا لینا دینا ہے، انہیں دلیرانہ موقف کی وجہ سے گرفتارکیا گیا جب کہ رانا ثنااللہ کی گرفتاری کے پیچھے عمران خان ہے، جعلی اعظم چھوٹے ذہن کا مالک ہے۔

لاہور:(ویب ڈیسک) وفاقی وزیر سائنس اور ٹیکنالوجی فواد چوہدری نے کہا ہے کہ (ن) لیگ میں قیادت کے لئے چچا بھتیجی کی لڑائی ہورہی ہے۔لاہور میں پریس کانفرنس کے دوران شہباز شریف کبھی بحران کے لیڈر نہیں تھے، مریم نواز نے شہباز شریف کی قیادت پر شب خون مارا، (ن) لیگ میں اب قیادت کے لئے لڑائی ہورہی ہے، چچا بھتیجی آپس میں لڑ رہے ہیں، شہبازشریف کا پارٹی میں اب کوئی پوچھتا نہیں ہے، ان کی حیثیت رفیق تارڑ کی سی ہوگئی ہے۔فواد چوہدری نے مزید کہا کہ وزیر اعظم سے ملاقات کرنے والے (ن) لیگی اراکین کی فہرست جلد منظر عام پرلائی جائے گی، جس نے مریم نواز کی بات مان کر سیاست کی اس کا بیڑہ غرق ہوگیا، مریم نواز کی بات سن کر چلنے والے آج کہاں ہیں، مریم نواز نے اپنے والد کو پہلے اقتدار سے نکلوایا اور پھر جیل بھجوایا، طلال چوہدری اور دانیال عزیز کہاں ہیں۔وفاقی وزیر نے کہا کہ اپوزیشن ٹوٹ رہی ہے، اچھی خبروں کا آغاز ہو گیا ہے، مشکل وقت گزر گیا، عمران خان کی قیادت میں ملک ترقی کی راہ پر گامزن ہے۔اس سے قبل فواد چوہدری نے اپنی ٹوئٹ میں کہا ہے کہ عوامی سطح پر (ن) لیگ اور پیپلز پارٹی کی کوئی حیثیت نہیں رہی، مقامی فیصلوں کی بنیاد سیاسی حقائق ہوتے ہیں اور لوگ اپنے فیصلے سیاسی حقائق پر کریں گے، مسلم لیگ (ن) کے ایم پی اے گروپ کی وزیراعظم سے ملاقات صرف ابتدا ہے، اگلا گروپ (ن) لیگ کے ممبران قومی اسمبلی اور سینیٹ کا ہوگا۔واضح رہے کہ وزیر اعظم کے معاون خصوصی نعیم الحق نے گزشتہ روز اپنی ٹوئٹ میں کہا تھا کہ (ن) لیگ کے ناراض ارکان صوبائی اسمبلی نے وزیراعظم سے بنی گالہ میں ملاقات کی۔ ملاقات کے دوران وزیراعلیٰ پنجاب سردار عثمان بزدار بھی شامل تھے۔ ملاقات کرنے والے (ن) لیگی ارکان میں گوجرانوالہ سے اشرف انصاری، نارووال سے غیاث الدین اور خانیوال سے فیصل نیازی بھی شریک تھے اور انہوں نے (ن) لیگ قیادت پر تحفظات کا اظہار کیا ہے۔

ملتان(کرائم پورٹر) تعلقات کے شبہ میں داماد نے والد اور بھائی کے ساتھ مل کر بیوی اور ساس سمیت 5 افراد کو فائرنگ کر کے قتل اور 3 کو زندہ جلا دیا جبکہ فائرنگ سے سسرسمیت تین افراد شدید زخمی ہو گئے جن میں سے ہادی بھی چل بسا ہے۔تفصیل کے مطابق حسن آباد گیٹ نمبر ایک کی رہائشی کرن کی شادی اجمل کے ساتھ ہوئی جو سعودیہ میں مقیم تھا۔ اجمل چند روز قبل پاکستان آیا تو اسے شبہ ہوا کہ اس کی بیوی کرن کے کسی کے ساتھ تعلقات ہیں۔گزشتہ رات اجمل،ا س کا والد ظفر اور بھائی کے ساتھ اپنے سسرال آیا جہاں تلخ کلامی کے بعد ان کا آپس میں جھگڑا ہو گیا جس پر مشتعل ہو کے اجمل،اس کے والد ظفر اور بھائی نے اندھا دھند فائرنگ شروع کر دی جس سے اجمل کی بیوی ،کرن ،ا سکی ساس تسنیم بی بی ،سالیاں ،صائمہ اور آصفہ ، زخموں کی تاب نہ لا کر موقع پر ہی جاں بحق ہو گئے۔ بعد ازاں ملزمان نے گھر میں پٹرول چھڑک کر آگ لگا دی جس سے گھر میں موجود تین بچے زندہ جل گئے۔ فائرنگ سے ملزم اجمل کا سسر لال محمد ، 8 سالہ سالا صائم اور علی رضا زخمی ہو گئے۔اطلاع ملنے پرسی پی او ملتان پولیس اور ریسکیو 1122 کی ٹیمیں موقع پر پہنچ گئیں۔ زخمیوں کو نشتر ہسپتال کے ایمرجنسی وارڈ جبکہ لاشوں کو سرد خانے منتقل کر دیا۔ سی پی او ملتان عمران محمود نے اس موقع پر میڈیا سے گفتگو کرتے ہوئے بتایا کہ پولیس نے فائرنگ کرنے والے ملزم اجمل اور اس کے والد ظفر کو موقع پر گرفتار کر لیا ہے جبکہ فرار ہونے والے اس کے بھائی کو بھی جلد گرفتار کر لیا جائے گا۔ آٹھ افراد کے قتل کا نوٹس لیتے ہوئے وزیراعلیٰ پنجاب نے آر پی او ملتان اور آئی جی پنجاب نے سی پی او ملتان سے 24 گھنٹے میں رپورٹ طلب کرلی ہے۔

لاہور(خبر نگار)مہنگائی کی ماری عوام کیلئے بری خبر ، حکومت نے بجلی کی قیمتوں میں ایک روپے 80 پیسے فی یونٹ اضافہ جبکہ گیس کی قیمتوں میں 200 فیصد اضافہ کردیا ، اس حوالے سے نوٹیفکیشن بھی جاری کردیا گیا۔نوٹیفکیشن کے مطابق کمرشل صارفین کیلئے گیس 31 فیصد مہنگی ہوگئی، جبکہ ماہانہ 50یونٹ والے گھریلو صارفین کو اضافے سے مستثنیٰ قرار دے دیا گیا، 100 یونٹ والے گھریلو صارفین کیلئے گیس50 فیصد، 200 یونٹ والے گھریلو صارفین کیلئے گیس 75فیصد اور ماہانہ300 یونٹ والے گھریلو صارفین کیلئے گیس 100 فیصد مہنگی ہوگی۔اسی طرح ماہانہ400 یونٹ والے گھریلو صارفین کے لئے گیس150 فیصد اور ماہانہ400 یونٹ سے زائد والے گھریلو صارفین کے لئے گیس 200 فیصد تک اضافے کا اعلان کیا گیا ہے، قیمتوں میں اضافے کا اطلاق یکم جولائی سے ہوگا۔