اسلام آباد(ویب ڈیسک) جعلی اکاﺅنٹس کیس میں اومنی گروپ کے چیف فنانشل آفیسرعارف خان کوگرفتارکرلیا گیا۔ترجمان نیب کے مطابق جعلی اکاﺅنٹس کیس میں ایف آئی اے نے اومنی گروپ کے چیف فنانشل آفیسرعارف خان کو منی لانڈرنگ میں ملوث ہونے کے الزامات پرگرفتارکرلیا۔ گرفتاری کے بعد عارف خان کونیب کے حوالے کردیا گیا ہے۔ذرائع کے مطابق عارف خان میگا منی لانڈرنگ اورجعلی اکاﺅنٹس کیس کے انتہائی اہم کردارہیں اوروہ اومنی کے چیف فنانشنل آفیسر اسلم مسعود کے ساتھ بھی کام کرچکے ہیں۔واضح رہے کہ 2 روزقبل بھی نیب ایگزیکٹو بورڈ کے اجلاس میں بدعنوانی کے 6 ریفرنس دائرکرنے کی منظوری دی گئی تھی۔

اسلام آباد (ویب ڈیسک) بنی گالہ میں عمران خان کے گھر کے پاس سے اینٹی ایئر کرافٹ گن کی 18 گولیاں برآمد ہونے پر حکام کی دوڑیں لگ گئیں۔پولیس کے مطابق بنی گالہ میں عمران خان کے گھر کے پاس ایک خالی پلاٹ میں بچے کھیل رہے تھے جنہیں اینٹی ایئر کرافٹ گن کا ایک راﺅنڈ ملا جس کے بعد پولیس کو اطلاع دی گئی۔ پولیس نے موقع پر پہنچ کر بم ڈسپوزل سکواڈ کو طلب کرلیا جس نے سرچنگ کے دوران اینٹی ایئر کرافٹ گن کی 18 گولیاں برآمد کرلیں۔ پولیس کا کہنا ہے کہ بم ڈسپوزل سکواڈ عمران خان کے گھر کے پاس خالی پلاٹ سے ملنے والے راﺅنڈز کا جائزہ لے رہا ہے۔

لاہور ( صدف نعیم ) مسلم لیگ ن کی رکن اسمبلی عنیزہ فاطمہ کی نیب کی جانب سے حمزہ شہباز کے گھر چھاپہ مارنے کی شدید مذمت۔ عنیزہ فاطمہ نے قرار داد جمع کرادی۔ نیب نے چادر اور چار دیواری کا تقدس پامال کیا۔حکومت کی یہ تمام کاروائیاں ناکام معاشی پالیسیوں سے توجہ ہٹانے کے لیے ہیں۔ حکومت سے مطالبہ ہے کہ سیاسی مخالفین کو انتقام کا نشانہ بنانا بند کرے۔

لاہور  (ویب ڈیسک ) قومی احتساب بیورو (نیب) کے حکام نے پاکستان مسلم لیگ(ن) کے رہنما اور پنجاب اسمبلی میں قائد حزب اختلاف حمزہ شہباز کے گھر پر چھاپہ مارا ہے اور آمدن سے زائد اثاثے سے متعلق ان سے پوچھ گچھ جاری ہے۔میڈیا رپورٹس کے مطابق نیب ذرائع نے مسلم لیگ (ن) کے رہنما کے گھر پر چھاپہ مارنے کی تصدیق کرتے ہوئے کہا گیا کہ یہ چھاپہ حمزہ شہباز کی گرفتاری کے لیے مارا گیا۔نیب ذرائع کا کہنا تھا کہ یہ چھاپہ گھر کی تلاشی کے لیے نہیں بلکہ حمزہ شہباز کی گرفتاری کے لیے مارا گیا ہے اور آمدن سے زائد اثاثوں کے حوالے سے پوچھ گچھ کی جارہی ہے۔رپورٹس کے مطابق نیب ذرائع نے یہ دعویٰ بھی کیا کہ اس چھاپے کے لیے نیب کے پاس وارنٹ موجود ہیں اور نیب مطلوب شخص کو بغیر اطلاع دیے گرفتار کرسکتا ہے۔دوسری جانب اس بارے میں مسلم لیگ (ن) کی ترجمان مریم اورنگزیب نے بھی اس بات کی تصدیق کرتے ہوئے بتایا کہ نیب حکام نے حمزہ شہباز کے گھر چھاپہ مارا۔مریم اورنگزیب کا کہنا تھا کہ حمزہ شہباز کے گھر میں آنے والے نیب حکام کے پاس نہ کوئی وارنٹ تھے اور نہ ہی انہوں نے کوئی اجازت لی تھی۔انہوں نے کہا کہ یہ چھاپے کس قانون کے تحت مارے جارہے ہیں، کیا شہباز شریف اور حمزہ شہباز کیا دہشت گرد ہیں، موجودہ حکومت خوفزدہ ہے کہ وہ اس ہتھکنڈے پر اتر آئے۔مسلم لیگی ترجمان کا کہنا تھا کہ نیب کی ٹیم کے چھاپے کے وقت حمزہ شہباز گھر میں موجود تھے اور نیب کی ٹیم نے ان سے سوالات کیے۔خیال رہے کہ گزشتہ ماہ سپریم کورٹ آف پاکستان کی جانب سے نیب کے اختیارات کو بڑھاتے ہوئے انہیں پیشگی اطلاع دیے بغیر گرفتاری کی اجازت دے دی تھی۔عدالت عظمیٰ نے فیصلہ دیا تھا کہ نیب کسی بھی ملزم کو پیشگی اطلاع دیے بغیر ہی گرفتار کر سکتا ہے، اگر نیب کے پاس ٹھوس شواہد ہوں تو اسے گرفتاری کا مکمل اختیار ہے۔تاہم اعلیٰ عدالت نے ساتھ یہ تنبیہ بھی کی تھی کہ عدالت کو امید ہے کہ نیب اپنے ان اختیارات کا ناجائز استعمال نہیں کرے گا۔

اسلام آباد (ویب ڈیسک ) وفاقی وزیر اطلاعات فواد چوہدری کا کہنا ہے کہ پیپلز پارٹی والے محض ذوالفقار علی بھٹو سے رشتہ داری اور بینظیر بھٹو کا نام کب تک بیچ کر کھاتے رہیں گے؟سابق صدر اور پیپلز پارٹی کے شریک چیئرمین آصف علی زرداری کا حکومت گرانے کی تحریک چلانے کے اعلان پر ردعمل دیتے ہوئے فواد چوہدری نے کہا کہ آج بھٹو صاحب حیات ہوتے تو وہ بھی اس پیپلز پارٹی کی کرپشن کے خلاف احتجاج مارچ کا اعلان کر دیتے۔انہوں نے سوال کیا کہ پیپلز پارٹی اگر عدالتوں کا احترام کرتی ہے تو پھر احتجاج کس کےخلاف اور کیوں کرنے کا اعلان کرتی ہے؟انہوںنے کہا کہ اس پیپلز پارٹی کا ذوالفقار علی بھٹو سے اتنا ہی تعلق ہے جتنا نواز شریف کی مسلم لیگ (ن) کا قائد اعظم محمد علی جناح کی مسلم لیگ کے ساتھ ہے۔انہوں نے کہا کہ بھٹو صاحب نے تو آپ کو کرپشن کے لیے نہیں کہا تھا پھر ان کا نام استعمال کر کے کرپشن کا حساب دینے سے کیوں بھاگ رہے ہیں؟انہوں نے تجویز دی کہ پیپلز پارٹی کے لیے بہتر ہوگا کہ اپنی کرپشن کے خلاف احتجاج کرے۔ان کا کہنا تھا کہ جب کرپشن کے نشے کے عادیوں کا علاج ہو تو وہ مزاحمت کرتے ہیں۔ان کا کہنا تھا کہ تقاریر، چیخ وپکار اور دھمکیاں ان کو احتساب سے نہیں بچا سکتیں، آپ سڑکوں پر ضرور آئیں قوم آپ کا حساب خود لے گی۔انہوں نے بلاول بھٹو زرداری کے کراچی سے لاڑکانہ تک کے ٹرین مارچ کو ناکام قرار دیتے ہوئے کہا کہ پہلے ہی ابو بچاﺅ مارچ ناکام ہوچکا ہے اور اب عوام کی عدم دلچسپی کو دیکھتے ہوئے اسے کاروان بھٹو کا نام دینے کی کوشش کی گئی ہے۔

لاہور (ویب ڈیسک ) چیئرمین اسلامی نظریاتی کونسل نے نیب کا ملزموں کو ہتھکڑیاں پہنانا اسلامی شریعت اور پاکستانی قانون کی خلاف ورزی قرار دے دیا۔اسلامی نظریاتی کونسل کے اجلاس کے بعد گفتگو کرتے ہوئے قبلہ ایاز کا کہنا تھا کہ جرم ثابت ہونے سے قبل ملزم کی میڈیا کے سامنے ہتک اسلام اور تکریم انسانیت کے منافی ہے۔انہوں نے کہا کہ نیب آرڈیننس جانچنے کے لیے جسٹس ریٹائرڈ رضا خان کی سربراہی میں کمیٹی قائم کر دی ہے۔قبلہ ایاز کا کہنا تھا کہ کمیٹی جائزہ لے گی کہ کون کون سا نیب قانون شریعت کے خلاف ہے۔

اسلام آباد (مانیٹرنگ ڈیسک) سپریم کورٹ نے کہا ہے کہ اشتہاری ملزم پرویز مشرف دفاع کا حق کھو چکے ہیں۔ عدالت عظمی کی یہ آبزرویشن پرویز مشرف سنگین غداری کیس کے تحریری حکمنامے میں سامنے آئی ہے۔ پرویز مشرف سنگین غداری کیس کے حوالے سے سپریم کورٹ نے یکم اپریل کی سماعت کا تحریری حکمنامہ جاری کر دیا ہے۔ 5 صفحات پر مشتمل حکمنامہ جسٹس منصور علی شاہ نے تحریر کیا ہے۔ عدالت نے لکھا کہ 2014 سے اب تک ملزم کی غیر موجودگی کے باعث مقدمے کو طوالت دی گئی۔ پرویز مشرف کے خلاف سنگین غداری کیس کے ٹرائل میں تاخیر سے متعلق رجسٹرار خصوصی عدالت کا جواب افسوسناک ہے۔ سپریم کورٹ نے لکھا سنگین غداری کے جرم سے بڑا جرم کوئی نہیں ہو سکتا۔ سنگین غداری ایک آئینی جرم ہے۔ آرٹیکل چھ کے مطابق آئین شکنی یا آئین معطل کرنا سنگین غداری ہے۔آئین وہ بنیادی قانون ہے جو عوامی منتخب کردہ نمائندوں نے بنایا ہے۔پاکستان کے ہر شہری پر آئین پاکستان پر عمل کرنا لازم ہے۔