لاہور(ویب ڈیسک)چیف جسٹس میاں ثاقب نثار سپریم کورٹ لاہور رجسٹری میں آج مختلف کیسز کی سماعت کریں گے، مقدمات کی سماعت کیلئے کاز لسٹ جاری کر دی گئی۔تفصیلات کے مطابق چیف جسٹس آف پاکستان میاں ثاقب نثارکی سربراہی میں 2رکنی بنچ آج مختلف کیسز پر سماعت کرے گا،چیف جسٹس کے ساتھ جسٹس اعجازالحسن 2رکنی بنچ کا حصہ ہوں گے۔2 رکنی بنچ اصغر خان کیس، بیورو کریٹس اور دیگر افسران کے زیر استعمال گاڑیوں پر ازخود نوٹس کیس کی سماعت کرے گا۔بنچ مختلف سرکاری یونیورسٹیز میں وائس چانسلر کی تعیناتی اور پنجاب یونیورسٹی میں مستقل وائس چانسلر کی تعیناتی کے حوالے سے بھی کیس کی سماعت کرے گا۔بنچ غیر متعلقہ اشخاص کو پولیس سیکیورٹی دینے کیخلاف بھی ازخود نوٹس کیس پر سماعت کرے گا۔ چیف جسٹس پاکستان نے اٹارنی جنرل، آئی جی پنجاب، چیف سیکرٹری اور ایڈووکیٹ جنرل پنجاب کو طلب کر رکھا ہے۔

لاہور(مانیٹرنگ ڈیسک) اپوزیشن کو پی ٹی وی سےہمیشہ شکایت رہی ہے وہ اپوزیشن کو کوریج نہیں دیتا مگر نوازحکومت ختم ہوتے ہی پی ٹی وی نے اپنا رنگ بدل ڈالا، گذشتہ روز پی ٹی وی نے بالخصوص عمران خان کو بھرپور کوریج دی، اس طرح حالات بدلتے ہی پی ٹی وی نے بھی اپنا انداز بدل ڈالا اور اپنی نشریات میں صرف نوازشریف شہباز شریف اور وزراءکو دکھانے کی بجائے اپوزیشن کو دکھانا شروع کردیا۔

لاہور (ریاض صحافی) شبنم ڈکیتی اور عصمت دری کیس کا مرکزی مجرم فاروق بندیال تحریک انصاف میں شمولیت سے قبل ن لیگ کی آنکھ کا تارا تھا۔ ن لیگ سے س کی وابستگی 15 برس رہی‘ اس دوران اس کی ن لیگ سے میل ملاقات بھی ہوتی تھی۔ فاروق بندیال نے ایک تقریب میں نااہل وزیراعظم نواز شریف کی صاحبزادی مریم نواز سے عقیدت کا اظہار کرتے ہوئے انہیں شال بھی پہنائی مگر تب کسی کو اس کی ڈکیتی‘ بدمعاشی اور اداکارہ شبنم کی عصمت دری کے بارے میں کچھ علم نہ تھا۔ وہ طویل عرصہ ن لیگ کا ہم نوالہ اور ہم پیالہ رہا۔ مگر جب وہ تحریک انصاف میں شامل ہوا تو اس کے جرائم کے حوالے سے ایک طوفان برپا ہوگیا۔ تحریک انصاف کے قائد عمران خان کو جب اس کے گھناو¿نے جرائم کا پتہ چلا تو انہوں نے فوری ایکشن لیتے ہوئے فاروق بندیال کو تحریک انصاف سے نکال پھینکا۔ ماضی کے بدنام زمانہ فاروق بندیال کے حوالے سے اخبارات و جرائد‘ ٹی وی‘ چینلوں اور سوشل میڈیا پر طرح طرح کی خبریں چل رہی ہیں۔ اس ضمن میں ماضی کے مشہور کرائم رپورٹر جمیل چشتی نے معروف ادیب اور کالم نگار رضی الدین رضی کی سٹوری سوشل میڈیا پر شیئر کی ہے۔ سوشل میڈیا پر گردش کرنے والی سٹوری انتہائی اہمیت کی حامل ہے۔ جو ”خبریں“ کے قارئین کی معلومات کیلئے چشتی صاحب کے شکریہ کے ساتھ شائع کی جا رہی ہے۔ جمیل چشتی کا کہنا ہے کہ فاروق بندیال کا نام 1978ءمیں اداکارہ شبنم گینگ ریپ کیس کے مرکزی مجرم کی حیثیت سے سامنے آیا تھا۔ فاروق بندیال اور اس کے 5 دوستوں نے 12 مئی 1978ءکو گلبرگ لاہور میں اداکارہ شبنم کے گھر واردات کی اور ان کے شوہر موسیقار روبن گھوشی اور بیٹے روفی گھوش کو رسیوں سے باندھ کر ان کے سامنے شبنم سے رات بھر شیطانی کھیل کھیلتے رہے۔ ملزمان صبح سویرے نقدی اور زیورات لیکر فرار ہوگئے۔ تمام ملزمان اعلیٰ اور بااثر گھرانوں سے تعلق رکھتے تھے۔ ان کے قریبی رشتہ داروں میں بیورو کریسی کے اعلی افسران بھی شامل تھے۔ واردات کے 5 روز بعد 17 مئی 1978 کو لاہور پولیس نے ملزمان کو گرفتار کرلیا۔ یہ جنرل ضیاءالحق کے مارشل لاءکا دور تھا اور فاروق بندیال کے ماموں ایس کے بندیال صوبائی سیکرٹری داخلہ کے عہدہ پر فائز تھے۔ فاروق اور اس کے ساتھی مجرموں کو بچانے کی کوشش کی گئی مگر عوامی احتجاج اور فلم انڈسٹری کی ہڑتال کے باعث حکومت ان کے خلاف مقدمہ چلانے پر مجبور ہوگئی۔ 24 اکتوبر 1979 کو فوجی عدالت نے فاروق بندیال اور اس کے 5 ساتھیوں کو سزائے موت سنا دی۔ تاہم بعد میں شبنم پر دباو¿ ڈلوا کر ان کی سزا معاف کر دی گئی۔ فاروق کو کوٹ لکھپت جیل لاہور میں بی کلاس دی گئی۔ جیل میں موجود سیاسی قیدیوں کے مطابق وہ دوسرے ساتھیوں کے ساتھ عام قیدیوں کو بڑے فخر سے بتاتا تھا کہ ہم نے اداکارہ شبنم کے ساتھ کیا سلوک کیا۔ مشرق وسطی کے ایک ملک کی اعلیٰ شخصیت کی سفارش پر ان کی پھانسی کی سزا عمر قید میں بدل گئی اور شبنم انہیں معاف کرنے کے بعد اپنے اکلوتے بیٹے اور شوہر کے ساتھ بیرون ملک منتقل ہوگئیں۔ یہ اداکارہ شبنم کے عروج کا زمانہ تھا اس نے 25 نومبر 1978 کو فوجی عدالت میں بیان ریکارڈ کرایا اور فاروق بندیال اور دیگر ملزمان کی شناخت کی یہ ساراحوال روز نامہ ”امروز“ اور دیگر اخبارات میں تفصیل کے ساتھ شائع ہوا۔ شبنم کے وکیل نامور قانون دان ایس ایم ظفر تھے۔ جبکہ فاروق بندیال کی طرف سے بھی معروف وکیل عاشق حسین بٹالوی کی خدمات حاصل کی گئیں۔ عاشق حسین بٹالوی کی وجہ شہرت یہ تھی کہ وہ اس زمانے میں نواب محمد احمد خان قتل کیس میں وکیل استغاثہ تھے۔ اس کیس کے مرکزی ملزم پیپلز پارٹی کے بانی و چیئرمین سابق وزیراعظم ذوالفقار علی بھٹو تھے۔ اداکارہ شبنم نے بیان ریکارڈ کرانے سے قبل بائیبل پر حلف دیا۔ انہوں نے اردو زبان میں بیان دیا۔ شبنم نے عدالت کے روبرو کہا کہ ملزمان میرے بیٹے روفی کو اغوا اور قتل کرنے کی دھمکیاں دے رہے تھے میں بیٹے کی خاطر ہر قسم کی قربانی دینے کو تیار تھی۔ شبنم نے انتہائی خندہ پیشانی سے مخالف وکیل کی جرح کا سامنا کیا اس موقع پر شبنم کی آنکھوں سے آنسو بہتے رہے جبکہ عدالت میں فاروق بندیال کے ہمراہ دیگر ملزمان وسیم یعقوب بٹ‘ طاہر تنویر بھنڈر‘ جمیل احمد چٹھہ‘ جمشید اکبر ساہی بھی موجود تھے۔ جمیل چشتی اس وقت سید عباس اطہر کی زیر ادارت نکلنے والے روز نامہ ”آزاد“ کیلئے کام کرتے تھے۔ وہ پہلے صحافی تھے جو واردات کے بعد شبنم کے گھر پہنچے۔ ان کا کہنا ہے کہ اس وقت گھر میں سامان بکھرا ہوا تھا۔ شبنم کی حالت غیر تھی روبن گھوش کا کرتا پھٹا ہوا تھا۔ شبنم اپنے بیٹے کو گود میں لئے سو رہی تھی۔ وہ بار بار بہوش ہو جاتی تھی۔ شبنم کے بیڈ روم میں پرفیوم کی بے پناہ خوشبو تھی جو ملزمان شبنم پر انڈیلتے رہے۔ جمیل چشتی کی موجودگی میں ہی اداکار محمد علی شبنم کے گھر پہنچے اور انہوں نے پولیس اور اعلی حکام سے رابطہ کئے۔ جمیل چشتی کے مطابق ایک ملزم جمشید اکبر ساہی کا تعلق پولیس سے تھا۔ اس لئے ملزمان پولیس کی نقل و حرکت سے بھی واقف تھے۔ اس زمانے میں پولیس صبح ساڑے چار بجے تک گشت کیا کرتی تھی۔ ملزمان نے واردات کے بعد ساڑھے چار بجے کا انتظار کیا اور پولیس گشت ختم ہونے کے بعد سارے اطمینان سے فرار ہوگئے۔ دلچسپ بات یہ ہے کہ ملزمان کی گرفتاری بھی اس جمشید شاہی کی وجہ سے عمل میں آئی۔ واردات کے دوران جو زیورات لوٹے گئے ان میں اداکارہ شبنم کا ایک قیمتی ہار بھی تھا۔ جمشید شاہی واردات کے تیسرے روز وہی ہار ایک طوائف کو تحفہ دینے بازارحسن گیا تو وہاں پہلے سے موجود مجرموں کی نشان دہی پر دہر لیا گیا۔ اداکارہ شبنم کے وکیل ایس ایم ظفر نے شبنم ڈکیتی کی واردات اپنی کتاب ” میرے مشہور مقدمے“ میں بھی تفصیل سے درج کی ہے۔ ملزموں نے اس قسم کی واردات اداکارہ زمرد کے ساتھ بھی کی تھی۔ مگر اس نے ان کے ڈر سے خاموشی اختیار کئے رکھی۔

اسلام آباد(انٹرویو:سید انوار زیدی،تصاویر، الفت شاہ)نواز شریف عالمی طاقتوں کے اشاروں پر پاک فوج ۔عدلیہ اور دیگر حساس اداروں کی توہین کرنے میں ملوث ہیں ۔چوہدری نثار علی خان کی سیاست کو بریک لگ گئی نواز شریف کے بغیر تنہا ہوگئے ایک پاﺅں زمین اور دوسرا آسمان پر ہے صاف چھپتے بھی نہیں سامنے آتے بھی نہیں والی بات ہے الیکشن ۔2018 بروقت نہیں ہونگے ان خیالات کا اظہار عوامی مسلم لیگ کے سربراہ شیخ رشید احمد نے خبریں کو دیئے گئے خصوصی انٹرویو میں کیا انہوں نے کہا کہ نواز شریف اور شہباز شریف میں کوئی اختلاف نہیں دونوں اندر سے ایک ہیں بس فرق صرف اتنا ہے کہ ایک بھائی وکٹ کے آگے اور دوسرا وکٹ کے پیچھے کھیل رہا ہے ۔ میرا نواز شریف سے اختلاف اس وقت ہوا جب وہ پرویز مشرف سے خفیہ معاہدہ کرکے سعودی عرب چلے گئے کیونکہ میں اس بات کے حق میں نہیں تھا مجھے اس وقت بتایا گیا جب سب معاملات طے ہوچکے تھے نواز شریف نے اجمل قصاب کے گھر کا پتہ بتایا اور ہیرو بن گئے وہ پاک فوج کو نقصان پہنچانے کے لیے عالمی طاقتوں کے ایجنٹ بن چکے ہیں ۔ جنرل اسد درانی کی کتاب پر کوئی تبصرہ کرنے سے قاصر ہوں کیوں کہ میں نے وہ کتاب ہی نہیں پڑھی ۔ عام انتخابات وقت مقررہ پر نہیں ہوں گے میرے خیال کے مطابق جولائی کی بجائے ستمبر ۔اکتوبر میں ہوں گے ۔ الیکشن جیت کر تحریک انصاف کی کوشش ہوگی کہ حکومت تنہا بنائے اگر اتحاد کرنا بھی پڑا تو سیاست میں اتحادکرنا کوئی گناہ نہیں میں پی ٹی آئی کا اتحادی ہوں اور NA.60/62 دو حلقوں سے انتخاب لڑوں گا اس اس بار پہلے سے دو گنا زیادہ ووٹوں کے ساتھ کامیاب ہوں گا ایک سوال کے جواب میں کہا کہ میں نے 2008کا الیکشن آزاد حیثیت سے جیت کر کبھی نہیں کہا کہ میں اپنی سیٹ نواز شریف کو دے دونگا اور وہ ہی میرے قائد ہیں اگر یہ بات ثابت ہوجائے تو میں سیاست کو خیر باد کہہ دونگا ۔پرویز مشرف کی کابینہ میں حلقے کے عوام سے پوچھ کر شامل ہوا ۔ پاکستان ۔ امریکہ تعلقات گزشتہ کچھ عرصہ سے کشیدہ ہیں پاکستا ن کو امریکہ کے ساتھ بنا کر رکھنی چاہیے مگر ملکی مفادات پر حرف نہ آنے پائے اور بلاوجہ آ بیل مجھے مار والی پالیسی ترک کردینی چاہیے پاک امریکہ تعلقات میں اتار چڑھاﺅ کوئی نئی بات نہیں امریکہ کو پاکستان کی ضرورت ہے ہمیں اپنی آنکھیں کھلی رکھنی چاہیے بھارت کبھی بھی پاکستان کو دل سے تسلیم نہیں کریگا پاک بھارت تعلقات میں تلخی اس لیے بھی بڑھ رہی ہے کہ ہندوستان اب امریکہ کی گود میں چلا گیا ہے۔ ملکی معیشت تباہی کے دھانے پر کھڑی ہے قرضوں نے پوری قوم کو لپیٹ لیا جس کی وجہ سے پاکستان میں مہنگائی کا طوفان ہے ابھی تازہ تازہ چین سے ڈیڑھ بلین ارب ڈالر کا قرضہ لیا ہے اور مزید لینے کے لیے تیار کھڑے ہیں ۔نواز شریف کہتے ہیں کہ مجھے فوج نے ہٹایا میں کہتا ہوں کہ ان کو شیشہ دیکھ لینا چاہیے وہ خود بتا دیگا کہ کس نے ہٹایا بلاول بھٹو بڑی ماں کا بیٹا ہے پیپلز پارٹی سندھ اور بلوچستان میں کسی حد تک کامیاب رہے گی پنجاب اور کے پی کے سے فارغ ہے۔ سپریم کورٹ میں اپنے کیس بارے انہوں نے کہا کہ وہ فیصلہ میرے حق میں آئے گا اور مجھے ناہل کروا کر راستے سے ہٹانے کی مخالفین کی تمام تر کوششیں ناکام ہونگی میرے بارے میں یہ کہنا حقیقت کے برعکس ہے کہ میں اسٹیبلشمنٹ کا بندہ ہوں آج سب کو پھر بتا دیتا ہوں کہ شیخ رشید اللہ کا بندہ ہے اور پیارے نبی کا غلام ہے ۔