کراچی: سپریم جوڈیشل کونسل میں شکایت کنندہ نے جسٹس مظاہر نقوی کے خلاف درج شکایت پر تمام ثبوت و شواہد پیش کردیے جبکہ کونسل نے دلائل مکمل ہونے کے بعد فیصلہ محفوظ کرلیا جو بدھ 22 نومبر کو جاری کیا جائے گا۔

تفصیلات کے مطابق جسٹس مظاہر نقوی کے خلاف سپریم جوڈیشل کونسل میں شکایات کے معاملے پر اجلاس آج ب ھی ہوا، جس میں شکایت کنندہ نے دلائل مکمل کیے۔

سپریم جوڈیشل کونسل نے جسٹس مظاہر نقوی کو دوسرا شو کا نوٹس جاری کرنے کی کاروائی کل تک ملتوی کر دی، بدھ کو ہونے والے اجلاس میں شوکاز نوٹس جاری کرنے یا نہ کرنے کا فیصلہ کیا جائے گا۔

ذرائع کے مطابق جوڈیشل کونسل کا اہم اجلاس کل تین بجے سپریم کورٹ میں ہوگا۔

اس سے قبل جوڈیشل کونسل کی کارروائی میں اُس وقت بڑی پیشرفت ہوئی جب شکایت کنندہ نے جسٹس مظاہر اکبر نقوی کیخلاف تمام شواہد اور متعلقہ دستاویزات کونسل کے سامنے رکھے۔

کونسل میں جسٹس مظاہر نقوی کے اعتراضات کا بھی جائزہ لیا گیا، جس کو منظور یا مسترد کرنے کا فیصلے پر مشاورت کی گئی اور اس پر بھی فیصلہ بدھ کو دوپہر تین بجے ہونے والے اجلاس میں کیا جائے گا۔

 لاہور: پاکستان مسلم لیگ ن پنجاب کے صدر اور سابق وفاقی وزیر داخلہ رانا ثنا اللہ نے کہا ہے کہ کچھ دن پہلے بلاول پیپلزپارٹی کی حکومت کے آنے کا دعویٰ کرتے رہے، اب وہ مخلوط حکومت کی بات کر رہے ہیں لیکن اگلے چند دنوں میں وہ مان جائیں گے کہ آئندہ حکومت مسلم لیگ ن کی آ رہی ہے۔

پارٹی سیکرٹریٹ ماڈل ٹاون میں پی ٹی آئی کے منحرف سابقہ اراکین قومی و صوبائی اسمبلی کی مسلم لیگ ن میں شمولیت کے موقع پر لیگی صوبائی صدر نے بلاول بھٹو زرداری کو چھوٹا بھائی سمجھ کر مشورہ دیتے ہوئے کہا کہ پنجاب میں ہمارے خلاف الیکشن لڑنے کے لئے ہمارے خلاف باتیں ضرور کریں لیکن ہم نے اوئے توئے کی سیاست اور تصادم سے ہر صورت میں بچنا ہے۔

انہوں نے کہا کہ ملک میں جمہوریت بتدریج مضبوط ہو رہی ہے اس لئے اب شاید سیاست میں ماضی کی طرح مداخلت نہ ہو سکے، پی ڈی ایم کبھی بھی انتخابی اتحاد نہیں رہا لیکن الیکشن کے بعد ہم سب کو ساتھ لے کر چلیں گے، اب کی بار جنوبی پنجاب کی 46 میں سے 40 سے زائد نشستیں جیت جائیں گے۔

رانا ثنا اللہ نے کہا کہ ہم بلاول کی زبان یا انداز میں جواب نہیں دینا چاہتے، ہم اس قسم کی تلخیوں کو بڑھائیں گے نہیں بلکہ کم کریں گے، الیکشن کے بعد بھی ہم سب کو ساتھ لے کر چلیں گے، پنجاب میں الیکشن لڑنے کے لئے پیپلزپارٹی کو ہماری مخالفت میں بات کرنا ہو گی۔

لیگی رہنما نے کہا کہ چیئرمین پی ٹی آئی کی حکومت کیخلاف بننے والا اپوزیشن اتحاد بعد میں حکومتی اتحاد تو بنا لیکن وہ کبھی بھی انتخابی اتحاد نہیں تھا، مولانا فضل الرحمان کی جماعت کے ساتھ صوبہ خیبرپختونخوا میں اتحاد کی تجویز ضرور ہے لیکن ابھی اس پر حتمی فیصلہ نہیں ہوا، ملکی مسائل ایسے ہیں کہ آئندہ انتخابات کے بعد سب کو ساتھ لے کر چلیں گے۔

لیگی صوبائی صدر کا مزید کہنا تھا کہ ملکی سیاست میں اب مداخلت پہلے کی طرح نہیں ہو سکے گی، پنجاب کے جس حلقے میں ہمارا اپنا ورکر مضبوط امیدوار ہوا تو اسے ہی ٹکٹ دی جائے گی، دوسری صورت میں الیکٹیبلز کو ٹکٹ دینے میں کوئی حرج نہیں، جنونی پنجاب صوبے کا فیصلہ وقت آنے پر کرینگے۔

انہوں نے مزید کہا کہ خاور مانیکا کا انٹرویو سنیں اور صرف یہ دیکھیں کہ وہ سچ کہہ رہے ہیں یا نہیں، میری اطلاعات کے مطابق خاور مانیکا کی زیادہ تر باتیں درست ہیں۔

 راولپنڈی: چیئرمین پی ٹی آئی کی بہن علیمہ خان نے کہا ہے کہ عمران خان نے دوبارہ کہا ہے کہ ڈونلد لو اور باجوہ نے مل کر ان کی حکومت گرائی، یہ ملک کے خلاف سازش تھی، علیمہ خان نے کہا کہ عمران خان پر سزائے موت کا کیس بنادیا گیا ہے مقصد انہیں موت کی سزا دینا ہے۔ 

اڈیالہ جیل کے باہر صحافیوں سے گفتگو میں انہوں ںے کہا کہ سابق وزیراعظم عمران خان نے دوبارہ کہا ہے کہ ڈونلد لو اور باجوہ نے مل کر اب ان کی حکومت گرائی، یہ ملک کے خلاف سازش تھی، وہ کہتے ہیں میں نے لوگوں کو بتایا کہ ملک کے خلاف سازش ہے اس کے نتیجہ میں ملک میں ایک سال میں معاشی تباہی ہوئی جس سے عوام کو نقصان اٹھانا پڑا۔

علیمہ خان نے کہا کہ آج کی مہنگائی اسی وجہ سے ہے، 15 لاکھ نوجوان ملک چھوڑ کر جاچکے ہیں، نئی حکومت بنا کر چیئرمین پی ٹی آئی کو جیل میں ڈال دیا گیا اور سزائے موت کا کیس بنا دیا گیا اور اس وقت مقصد یہی ہے کہ چیئرمین پی ٹی آئی کو موت کی سزا دلوائی جائے۔

انہوں ںے کہا کہ امریکا میں میٹنگ میں فیصلہ کیا گیا کہ جو عدم اعتماد آئے گی اسے کامیاب کروانا ہے، اگر یہاں انصاف کے تقاضے پورے نہ کیے گئے تو امریکا میں ڈونلڈ لو کے خلاف کیس کریں گے، چیئرمین پی ٹی آئی نے کہا یہ کورٹ نہیں کینگرو کورٹ لگا ہوا ہے۔

علیمہ خان نے مزید بتایا کہ چیئرمین پی ٹی آئی نے کہا ہے کہ نیب والے 190 ملین پاؤنڈ اسکینڈل تفتیش کے لیے آتے ہیں بیٹھتے ہیں اور واپس چلے جاتے ہیں، آج بھی جیل میں گئے تو کچھ غیرملکی جیل کے اندر گئے ہوئے تھے لیکن وہ چیئرمین پی ٹی آئی سے ملنے نہیں آئے تھے۔

آرمی چیف جنرل عاصم منیر نے نشان امتیاز (ملٹری) کی اسٹرائیک کور کا دورہ کیا اور مشترکہ تربیتی مشق کا مشاہدہ کیا۔

آئی ایس پی آر کے مطابق آرمی چیف کی آمد پر کمانڈر منگلا کور نے اُن کا استقبال کیا۔ مشق کا مقصد جاری آپریشنل تیاریوں کی توثیق کرنا ہے۔

آرمی چیف نے جدید ترین VT-4 ٹینکوں سے لیس آرمرڈ فارمیشن کی قیادت میں کی گئی مشقوں کا مظاہرہ بھی دیکھا، مشق میں حصہ لینے والے جوانوں سے ملاقات کی اور ان کے جذبے، آپریشنل کارکردگی اور پیشہ ورانہ مہارت کو بھی سراہا۔

آرمی چیف نے درپیش چیلنجز کا جواب دینے کے لیے جنگی تیاری اور ذہنی صلاحیت کی اہمیت کو بھی اُجاگر کیا۔ آرمی چیف نے تیزی سے بدلتے ہوئے خطرات کے پیش نظر مختلف ہتھیاروں کے درمیان ہم آہنگی کے حصول کی اہمیت پر بھی روشنی ڈالی۔ رات کی تاریکی کے دوران آپریشنز میں حاصل ہونے والی مہارت کو بھی سراہا۔

آرمی چیف نے اس بات کا اعادہ کیا کہ”امن کے وقت میں صرف حقیقت پسندانہ، مشن پر مبنی تربیت ہی میدان جنگ میں بہترین کارکردگی کی ضمانت دے سکتی ہے“۔

 اسلام آباد: سابق وزیراعلیٰ پنجاب چوہدری پرویز الٰہی نے کہا ہے کہ الیکشن بلے کے نشان پر لڑیں گے۔ پی ٹی آئی چھوڑنے والے سب واپس آئیں گے۔

انسداد دہشت گردی عدالت میں صحافیوں سے غیر رسمی گفتگو کرتے ہوئے سابق وزیراعلیٰ پنجاب چوہدری پرویز الٰہی نے کہا کہ نوبت یہاں تک آ گئی ہے کہ ان شریفوں کی وجہ سے مہنگائی بڑھ گئی ہے۔ انتظامیہ کے ذریعے ووٹ مانگ رہے ہیں۔ دفاتر سیاسی کام کررہے ہیں۔ الیکشن کمیشن کو صورت حال کا نوٹس لینا چاہیے۔

پی ٹی آئی رہنما نے کہا کہ تلہ گنگ سے الیکشن لڑ رہا ہوں، وہاں بھی یہی ہو رہا ہے۔ اٹک، فتح جنگ میں بھی یہی کچھ ہو رہاہے، لاہور میں بھی یہی ہو رہاہے، پولیس اور انتظامیہ ان کے لیے کس منہ سے ووٹ مانگ رہے ہیں۔ شیڈول آئے گا تو ہم سپریم کورٹ جائیں گے۔ اللہ کے بعد سپریم کورٹ انصاف فراہم کرے گی۔ ان کے گھر جاتی امرا کا الیکشن نہیں ہے۔

پرویز الٰہی کا کہنا تھا کہ الیکشن کی تاریخ اب تبدیل نہیں ہوسکتی، شیڈول کے بعد انتخابی ماحول بنے گا۔ ایسے ہی پنجاب کے وزیر نے کہہ دیا کہ آئی ایم ایف والے اڈیالہ جیل گئے، ایسا نہیں  ہے۔ چیئرمین پی ٹی آئی کی گرفتاری سے قبل یہ ملاقات ہوئی تھی۔

انہوں نے کہا کہ  بلے کے نشان پر الیکشن لڑیں گے، پارٹی چھوڑنے والے سب واپس آجائیں گے۔ ووٹ پی ٹی آئی کا ہے، پی ٹی آئی کو نہ چھوڑیں۔ چیف الیکشن کمشنر ہمیں ہمارا حق دیں اور جلسے کرنے دیں، جو بھی الیکشن میں کھڑا ہوگا ہمارے ساتھ ہی مقابلہ ہوگا۔

سابق وزیراعلیٰ پنجاب نے مزید کہا کہ ن لیگ اور پیپلز پارٹی کے اختلافات اندرونی خبر ہوگی۔ لاڈلے کا سلوک کسی کو کچھ نہیں دیتا۔ آسٹریلیا جس طرح کھیلا ہے،  کرکٹ میں فیئر اینڈ فری نظر آیا۔ ایسے ہی ہمارا الیکشن بھی فیئر اینڈ فری نہ ہوا تو بہت رولا ہوگا، ہمارا کپتان بھی تگڑا ہے۔جیل میں چیئرمین پی ٹی آئی سے ابھی ملاقات نہیں ہوئی۔

انہوں نے کہا کہ خاور مانیکا کو اپنے ہی گھر کا پردہ چاک نہیں کرناچاہیے تھا۔ جب چیئرمین پی ٹی آئی وزیر اعظم تھے تو اس وقت انٹرویو دینا چاہیے تھا۔ الیکشن شیڈول آنے کے بعد ٹکٹ ہمارا ہی ہوگا۔ ہماری کمپین کو نہیں روک سکتے۔ کسی کا دل کمزور ہے تو ساتھ وکیل کو کورنگ امیدوار کے طور پر کھڑا کرلے۔