لاہور:(ویب ڈیسک) پاکستان تحریک انصاف کے مرکزی رہنما و سابق وفاقی وزیر فواد چودھری نے کہا ہے کہ مفرور شخص دھمکیاں دینے میں مصروف ہے، پہلے پی ٹی آئی حکومت محلاتی سازشوں سے ختم کی گئی اب جوڈیشری کو متنازعہ بنایا جا رہا ہے۔
مسرت چیمہ کے ساتھ میڈیا سے گفتگو کرتے ہوئے فواد چودھری نے کہا کہ کچھ دیر پہلے کور کمیٹی کا ہنگامی اجلاس ہوا، کور کمیٹی اجلاس میں موجودہ ملکی سیاسی حالات پر تبادلہ خیال کیا گیا۔
انہوں نے کہا کہ گزشتہ 10 دنوں میں راشن لیتے ہوئے 20 افراد کی جانیں ضائع ہوئیں، یہ پاکستان کی معیشت کی صورتحال کی عکاسی کرتی ہے، تحریک انصاف کی حکومت کو محلاتی سازش کے ذریعے گرایا گیا، اب بحران سے نکلنے کی ان کو سمجھ نہیں آرہی، پاکستان میں خوراک پر ہنگاموں کی ابتدا ہوچکی ہے، راشن لیتے جانیں ضائع ہونا انسانی المیہ ہے۔
فواد چودھری نے کہا کہ اس سے پہلے پاکستان کے ایسے حالات نہیں دیکھے، میڈیا ان معاملات کو غور سے دیکھے، ملک ایسے بحران میں ہے ایک بھی قدم خانہ جنگی کی طرف دھکیل سکتا ہے، آج عالمی مارکیٹ میں تیل کی قیمتیں کریش کر گئی ہیں، حکومت نے ایک روپیہ بھی پٹرول کی قیمتوں میں کم نہیں کیا، پاکستان کے اندر معاشی بحران سب کے سامنے ہے، تحریک انصاف کی حکومت کو غیر آئینی و غیر قانونی طریقے سے ہٹایا گیا۔
انہوں نے کہا کہ ہم نے اسمبلیاں اس لیے توڑیں کہ 90 دن کے اندر الیکشن ہوں گے، اس سے زیادہ پاکستان کی جمہوری تاریخ میں ایسا فیصلہ نہیں ہوا، ہم نے سوچا دو اسمبلیوں کی تحلیل کے بعد عام انتخابات ہوں گے، یہ آئین کو پامال کر رہے ہیں، پہلے لاہور ہائی کورٹ کے فیصلے پر عملدرآمد نہیں ہوا، چیف الیکشن کمشنر انتہائی ڈھٹائی کے ساتھ فیصلے کر رہے ہیں۔
فواد چودھری نے کہا کہ سپریم کورٹ کے پانچ رکنی بینچ نے کہا الیکشن ہونے چاہئیں، اس کےبعد سپریم کورٹ کے خلاف مہم چلائی جا رہی ہے، عمران خان سب سے بڑی پارٹی کے سربراہ ہیں اور ان کی تقریروں پر پابندی ہے، دوسری جانب سپریم کورٹ، ہائی کورٹ کے ججز کے خلاف کمپین کی حوصلہ افزائی کی جاتی ہے، ایک ادارے کے خلاف بات کرنے پر پیمرا بھی حرکت میں آجاتا ہے، جوڈیشری کو متنازعہ بنایا جا رہا ہے۔
انہوں نے کہا کہ آج نوازشریف سپریم کورٹ کے ججز سے بڑا ناراض ہیں، سپریم کورٹ کے انہی ججز کی وجہ سے شہباز شریف حکومت قائم ہے اگر سپریم کورٹ قاسم سوری کی رولنگ پر مداخلت نہ کرتی تو شہباز شریف کبھی بھی وزیراعظم نہیں بن سکتے تھے، یہ سوموٹو کیس کے ذریعے اقتدار میں آئے ورنہ یہ جیل میں ہوتے۔
فواد چودھری نے کہا کہ مریم اورنگزیب نے زندگی میں کبھی کونسلر کا بھی الیکشن نہیں لڑا، مریم اورنگزیب کہتی ہیں سپریم کورٹ نے اگر فیصلہ کیا تو قبول نہیں کریں گے، آپ کی یہ بات کہنے کی جرأت کیسے ہوئی، آئین کے تحت ہر ایگزیکٹو اتھارٹی سپریم کورٹ کے فیصلوں کی پابند ہے، شریف فیملی کے ملازم کی جرأت نہیں ہونی چاہیے، اسی ہفتے مریم اورنگزیب کے خلاف توہین عدالت کی درخواست دائرکریں گے۔
انہوں نے کہا کہ عمران خان نے ایڈیشنل سیشن جج کے سامنے معافی مانگی پھر بھی روزانہ وارنٹ جاری ہو جاتے ہیں، امید ہے ان کے خلاف بھی کارروائی کی جائے گی، کچھ دیر قبل پاکستان کا ایک مفرور پاکستان کو کہتا ہے فل کورٹ بنائیں، نواز شریف کہتا ہے اگر فیصلہ آئے گا تو ڈالر 500 روپے کا ہو جائے گا، 50 روپے کے شورٹی بانڈ پر لندن بھاگنے والا کہہ رہا ہے معیشت کو تباہ کر دیں گے۔
پی ٹی آئی رہنما کا کہنا تھا کہ جنہوں نے شوکت ترین کے خلاف کیس بنایا تھا کیا آج نوازشریف کی دھمکی پرکیس بنائےگی؟ مفرور شخص چیف جسٹس آف پاکستان کو دھمکیاں دے رہا ہے، اپنی حکومت کو اس وقت سمجھایا تھا اس کو باہر نہ جانے دیا جائے، تحریک انصاف آئین کے ساتھ کھڑی ہے، 96 بار ایسوسی ایشنز نے گائیڈ لائن دی ان کےساتھ کھڑے ہیں۔
انہوں نے کہا کہ بینچ دو یا تین کا بننا ہے یہ چیف جسٹس آف پاکستان کا اختیار ہے، ہم آئین کےساتھ سیسہ پلائی دیوار کی طرح کھڑے ہوں گے، عمران خان نے وکلا سے اپیل کی سپریم کورٹ کے ساتھ کھڑے ہوں۔

اسلام آباد:(ویب ڈیسک) وزیر خارجہ بلاول بھٹو زرداری سے انٹلیکچوئل پراپرٹی رائٹس آرگنائزیشن آف پاکستان (آئی پی آر او) کے چیئرمین فرخ امل نے ملاقات کی۔
ترجمان دفتر خارجہ کے مطابق ملاقات میں پاکستان میں آئی پی ایکو سسٹم کو مضبوط بنانے کے طریقوں پر تبادلہ خیال کیا گیا۔
ملاقات میں پاکستان کے نوجوانوں کو معاشی طور پر بااختیار بنانے اور ان کے لیے مواقع پیدا کرنے کے سلسلے میں بین الاقوامی آئی پی معاہدوں سے الحاق کی ضرورت پر بھی غور و خوض کیا گیا۔

لاہور:(ویب ڈیسک) سابق وزیر اعلیٰ پنجاب چودھری پرویز الٰہی نے کہا ہے کہ نواز شریف اور مریم نواز چاہتے ہیں کہ ان کی مرضی کے بینچ بنیں جو کبھی نہیں ہوگا، وقت بدل چکا، قوم سازشوں کا منہ توڑ جواب دے گی۔
چودھری پرویز الٰہی سے سابق ارکان پنجاب اسمبلی نے ملاقات کی، اس موقع پر گفتگو کرتے ہوئے انہوں نے کہا کہ 2002ء سے 2007ء کے درمیان میرے دور میں پنجاب کی ترقی اور خوشحالی کو عالمی اداروں نے ترقی پذیر ملکوں کیلئے رول ماڈل قرار دیا تھا لیکن آج شہباز شریف اور محسن نقوی پنجاب کیلئے کلنک کا ٹیکہ بن چکے ہیں۔
انہوں نے کہا کہ شہباز شریف نے دنیا کے بہترین زرعی صوبہ پنجاب کو ایتھوپیا بنا کے رکھ دیا ہے، آج جس طرح پنجاب میں لوگ آٹے کیلئے قطاروں میں مر رہے ہیں اس طرح کے دردناک مناظر صرف ایتھوپیا میں نظر آتے ہیں۔
چودھری پرویزالٰہی نے مزید کہا کہ نوازشریف اور مریم چاہتے ہیں کہ بینچ چیف جسٹس کی مرضی کے بجائے ان کی مرضی سے بنیں لیکن انشاء اللہ یہ نہیں ہو گا، چیف جسٹس عمر عطا بندیال اور ان کے ساتھی حق پر کھڑے ہیں، سپریم کورٹ آئین کی بالادستی پر کوئی سمجھوتہ نہیں کرے گی۔
سابق وزیر اعلیٰ کا کہنا تھا کہ آئین کے آرٹیکل 141 میں واضح طور پر لکھا ہے کہ پارلیمنٹ سپریم کورٹ کے خلاف قانون سازی نہیں کر سکتی، یہ منافقت اب نہیں چلے گی کہ فیصلہ پی ڈی ایم کے حق میں آئے تو سوموٹو حلال اور فیصلہ پی ڈی ایم کے خلاف آئے تو سوموٹو حرام۔

اسلام آباد:(ویب ڈیسک) پاکستان بار کونسل نے کہا ہے کہ موجودہ صورتحال پریشان کن ہے، ججز کے درمیان اختلاف ادارے کیلئے اچھا نہیں۔
پاکستان بار کونسل کی جانب سے جاری اعلامیہ میں کہا گیا ہے کہ خواہش ہے کہ فل کورٹ اجلاس بلایا جائے، فل کورٹ اجلاس میں تمام اندرونی مسائل کو حل کیا جائے۔
اعلامیہ کے مطابق تمام سیاسی مقدمات میں تنقید سے بچنے کیلئے فل کورٹ تشکیل دی جائے، موجودہ سیاسی صورتحال میں پاکستان بار کونسل آل پارٹیز کانفرنس بلانے کیلئے تیار ہے۔