اسلام آباد: (ویب ڈیسک) 35 اراکین کو ڈی نوٹیفائی کئے جانے کے بعد قومی اسمبلی کے ایوان میں دلچسپ تبدیلی دیکھنے میں آئی ہے، ایوان کا ایک حصہ خالی ہو گیا۔
ایوان اس وقت 342 میں سے 296 اراکین پر مشتمل ہے جن میں سے 81 اراکین کے استعفے تاحال زیر التواء ہیں،11 نشستیں خالی جن میں سے 7 پر عمران خان کی جیت کا نوٹیفکیشن جاری نہیں ہو سکا، میانوالی کی عمران خان کی سیٹ سے انہیں نا اہل قرار دیا گیا۔
شکور شاد اور محمد میاں سومرو کی نشستیں بھی خالی، جہاں عدالتی حکم امتناعی کی وجہ سے الیکشن نہیں ہوا، پی ٹی آئی کے 3 منتخب اراکین نے حلف ہی نہیں اٹھایا، عملی طور پر ایوان کے موجودہ اراکین کی تعداد 212 ہے۔
حکومتی اراکین کی تعداد 181 ہے، اپوزیشن میں مسلم لیگ (ق) کے 2، جی ڈی اے کے 3 اور بلوچستان عوامی پارٹی کی زبیدہ جلال اور جماعت اسلامی کے عبدالاکبر چترالی شامل ہیں، آفیشل اعداد و شمار کے مطابق پی ٹی آئی منحرفین 20 ہیں، 4 ایم این اے ایسے جنہوں نے استعفی دیا اور نہ ہی ایوان میں حاضر ہو رہے ہیں۔

لاہور: (ویب ڈیسک) پاکستان تحریک انصاف کے چیئرمین و سابق وزیرا عظم عمران خان کے زیر صدارت الیکشن کی تیاریوں کے سلسلہ میں تحریک انصاف کا اجلاس ہوا، پارٹی رہنماؤں نے تیاریوں بارے بریفنگ دی۔
عمران خان کے زیرصدارت اجلاس میں تمام تنظیموں نے ڈور ٹو ڈور مہم کے حوالے سے چئیرمین کو بریف کیا، عمران خان کی جانب سے انتخابات کی تیاریوں پر اطمینان کا اظہار کیا گیا، انہوں نے جلد از جلد بلاک کوڈ لیول پر تنظیمیں مکمل کرنے کی بھی ہدایت کر دی۔
چیئرمین تحریک انصاف کا کہنا تھا کہ نے کہا ہے کہ کیئر ٹیکر وزیراعلیٰ کے لیے ن لیگ کی جانب سے دئیے گئے نام ان کی غیر سنجیدگی کا اظہار ہے، نگران حکومت کا کام صاف شفاف انتخابات کرانا ہے، الیکشن کی تاریخ میں کسی قسم کی تاخیر برداشت نہیں کی جائے گی۔
عمران خان نے کہا کہ ہم نے نگران حکومت کے لیے ایسے نام دئیے جن پر کوئی بھی اعتراض نہیں اٹھا سکتا اور سب کو قابل قبول ہوں گے۔

اسلام آباد: (ویب ڈیسک) امیر جماعت اسلامی سراج الحق نے کہا ہے کہ پیپلز پارٹی ہمارے حق پر شب خون نہ مارے، اگر پیپلز پارٹی ہمارا حق نہیں دیتی تو احتجاج سمیت بہت سارے آپشن موجود ہیں۔
امیر جماعت اسلامی نے کہا کہ اگر پیپلز پارٹی حقائق کو تسلیم کرے گی تو ویل کم کریں گے، کراچی کے مسائل کوئی ایک جماعت حل نہیں کر سکتی، سب سٹیک ہولڈرز کو بیٹھنا ہو گا، پیپلز پارٹی جمہوری رویہ اپنائے تو پھر بات چیت اور مستقبل کے حوالے سے مشاورت بھی ہو گی۔
سراج الحق نے کہا کہ آصف زرداری جماعت اسلامی کےمینڈیٹ کو تسلیم کرے، ابھی ہم نے پیپلز پارٹی، پی ٹی آئی کا ساتھ دینے کا فیصلہ نہیں کیا، جماعت اسلامی سب کو ساتھ چلانے کی صلاحیت رکھتی ہے، پی ٹی آئی کے موقف کا تو پتا نہیں چلتا۔
انہوں نے کہا کہ ہم تو پہلے دن سے کہہ رہے ہیں الیکشن سے پہلے ریفارمز ہونی چاہئیں، اگر اسی کنڈیشن میں الیکشن ہوا تو پھر جھگڑے اور سارا نظام ختم ہو جائے گا، اس وقت رولز آف گیم نہیں ہے۔
امیرجماعت اسلامی نے کہا کہ پاکستان کو کرپشن فری ملک بنائیں گے، جمعہ کو یوم تشکر کے طور پر منائیں گے، جماعت اسلامی کو ووٹ دینے پر کراچی کے لوگوں کا شکریہ ادا کرتا ہوں، حافظ نعیم الرحمان اور ان کی ٹیم نے بہت جدوجہد کی۔
سراج الحق کا کہنا تھا کہ پیپلز پارٹی کہتی ہے میئران کا ہونا چاہئے، کراچی کے عوام نے جماعت اسلامی پر اعتماد کا اظہار کیا، ہمارے مینڈیٹ کو تسلیم کیا جائے، کراچی کا میئر جماعت اسلامی کا ہونا چاہئے۔

لاہور: (ویب ڈیسک) وزیر اعلیٰ چودھری پرویزالہٰی کی قیادت میں پنجاب حکومت نے تاریخ ساز اقدام اٹھاتے ہوئے صوبے میں نجی سود کے کاروبار پر پابندی کا قانون نافذ العمل کر دیا۔
چودھری پرویز الہٰی نے ”دی پنجاب پروہیبشن آف انٹرسٹ آن پرائیویٹ لونز ایکٹ 2022“ (The Punjab Prohibation of Interest Loans Act) کا گزٹ نوٹیفکیشن جاری کر دیا جس کے بعد پنجاب بھر میں نجی سود کا کاروبار کرنے پر پابندی عائد کر دی گئی ہے۔
وزیر اعلیٰ پنجاب نے گفتگو کرتے ہوئے کہا کہ سود ایک لعنت ہے اور دین اسلام میں اسے اللہ کے خلاف جنگ قرار دیا گیا ہے، نجی سود کے حوالے سے پابندی کا قانون دین کی خدمت ہے، اللہ اور اللہ کے رسولؐ کے احکامات کی تعمیل کر کے سرخرو ہوئے ہیں، سود کا کاروبار کرنے والوں کو روز قیامت کالے منہ کے ساتھ اٹھایا جائے گا، ہم نیک نیتی سے دین کا کام کر رہے ہیں اور آئندہ بھی کرتے رہیں گے۔
چودھری پرویز الہٰی نے مزید کہا کہ صوبہ بھر میں کوئی بھی نجی سود کے حوالے سے لین دین نہیں کر سکے گا، نجی سود کا کاروبار کرنے والوں کو قانون کی گرفت میں لایا جائے گا، لین دین کرنے والوں کو 10 سال قید اور 5 لاکھ روپے جرمانہ ہوگا، قانون نافذ ہونے کے بعد ماضی میں نجی طور پر سود کی مد میں رقم لینے والا شخص اب صرف اصل رقم ہی واپس کرے گا۔
وزیر اعلیٰ پنجاب کا کہنا تھا کہ اصل رقم کے علاوہ نجی سود کی مد میں اضافی رقم مانگنے پر متعلقہ شخص کے خلاف مقدمہ درج ہو سکے گا، نجی سود کا کاروبار کرنے والوں کے خلاف کوئی بھی شہری تھانے جا کر ایف آئی آر درج کرا سکے گا، پابندی کا قانون نافذ ہونے کے بعد کئی گھر اجڑنے سے محفوظ رہیں گے۔

کراچی: (ویب ڈیسک) رہنما تحریک انصاف خرم شیرزمان نے کہا ہے کہ ہمارے ووٹرز کا حق چھینا جا رہا ہے، جیئں گے مریں گے، جب تک فارم گیارہ کے مطابق رزلٹ نہیں ملےگا واپس نہیں جائیں گے۔
رہنما پی ٹی آئی کا کہنا تھا کہ ہماری 45 شکایات کو سنا جائے، ہم نے کونسا قانون توڑا تھا جو وہاں پر غنڈے بھیجے گئے، ہم فارم گیارہ کے مطابق رزلٹ مانگ رہے ہیں، ہمارا رزلٹ تبدیل کیا جا رہا ہے۔
انہوں نے کہا کہ سندھ حکومت اپنا قبلہ درست کر لے، ڈی سی، ڈی آر او جواب دینے کو تیار نہیں، ڈی سی، ڈی آر او پر بہت پریشر ڈالا جا رہا ہے۔
خرم شیر زمان نے کہا کہ میرے اپنےحلقے میں چیئرمین جیتے تھے اگلے دن نتائج میں ہار گئے، ان کو کوئی شرم نہیں آرہی، اپنی مرضی کے رزلٹ نکال رہے ہیں، انہوں نے کہا کہ جیئں گے مریں گے، جب تک فارم گیارہ کے مطابق رزلٹ نہیں ملےگا واپس نہیں جائیں گے۔
پی ٹی آئی رہنما کا کہنا تھا کہ انہوں نے کیا دودھ کی نہریں بہا دیں جو انہوں نےالیکشن جیت لیا، کراچی والے کوئی پاگل نہیں جو پیپلز پارٹی کو ووٹ دیں۔

کراچی: (ویب ڈیسک) پاکستان پیپلزپارٹی سندھ کے صدر نثار کھوڑو نے کہا ہے کہ حافظ نعیم الرحمان کو سنجیدہ شخص سمجھتا ہوں، عمران خان کی طرح ضد نہ کرے اور نہ اس کی زبان بولیں۔
انہوں نے پریس کانفرنس سے خطاب کرتے ہوئے کہا کہ بلدیاتی الیکشن کے حوالے سے عوام نے جو فیصلہ دیا وہ سب کے سامنے ہے، پیپلزپارٹی نے حیدرآباد میں کلین سوئپ کیا اور کراچی میں دیگر جماعتوں سے زیادہ ووٹ لیے ہیں۔
پی پی سندھ کے صدر نے کہا کہ جماعت اسلامی کو چاہیے پیپلزپارٹی کی اکثریت کو مانے، حافظ نعیم الرحمان عمران خان کی طرح ضد نہ کریں اور کراچی کو بہتر کرنا ہے تو اس کی زبان بھی نہ بولیں۔
نثار کھوڑو نے کہا کہ بلدیاتی الیکشن میں کسی کو سادہ اکثریت حاصل نہیں، جماعت اسلامی نے اعتراض کیا کہ رزلٹ دیرسے دیے گئے، حافظ نعیم کا یہ کہنا کہ سوسال میں بھی پیپلزپارٹی کراچی سے نہیں جیت سکتی، ایسی باتیں کرنا جمہوریت نہیں ہے۔
انہوں نے کہا کہ پہلے یہ کہتے تھے کہ پیپلزپارٹی الیکشن سے بھاگ رہی ہے، جب پیپلزپارٹی نے سبقت لے لی توانہیں اعتراض ہے۔
پی پی سندھ کے صدر نثار کھوڑو نے پریس کانفرنس سے خطاب کرتے ہوئے کہا کہ پیپلزپارٹی نے ایم کیوایم کو بلدیاتی انتخابات کا بائیکاٹ نہ کرنے کا مشورہ دیا تھا، ایم کیوایم والے کافی وقت کے بعد ایک ساتھ ہوئے ہیں۔

کراچی: (ویب ڈیسک) صدر مملکت عارف علوی کا کہنا ہے کہ اسٹیبلشمنٹ کے سیاست میں مداخلت نہ کرنے کے ارادے کو سراہتے ہیں۔
تاجر رہنماؤں سے گفتگو میں عارف علوی نے کہا کہ سیاسی جماعتیں فوج کی عدم مداخلت کے موقع سے فائدہ اٹھائیں، مسائل کے حل کیلئے جمہوری طریقہ اپنائیں۔
صدر عارف علوی نے کہا کہ عوامی مینڈیٹ کی حامل حکومت ہی عوام کو مشکل فیصلوں پر رضامند کرسکتی ہے۔
خیال رہے کہ چیئرمین تحریک انصاف عمران خان نے اپنے ایک انٹرویو میں کہا ہے کہ ان کی نئے آرمی چیف جنرل عاصم منیر کے ساتھ کوئی ریلیشن شپ نہیں ہے۔
برطانوی نشریاتی ادارے کو انٹرویو دیتے ہوئے عمران خان کا کہنا تھا آج تک کون سا سیاسی رہنما آیا ہے جو اپنی حکومت گرا دیتا ہے؟ صاف اور شفاف الیکشن کیلئے ہم نے اپنی دو حکومتیں گرائی ہیں، پیشگوئی ہے جو کچھ بھی ہو حکومت اپریل میں الیکشن کرانے پر مجبور ہو جائے گی۔

اسلام آباد: (ویب ڈیسک) سپریم کورٹ نے پاکستان تحریک انصاف (پی ٹی آئی) کے دور حکومت میں قومی احتساب بیورو (نیب) آرڈیننس سے بری اور مستفید ہونے والوں کی تفصیلات طلب کرلیں۔
سپریم کورٹ میں نیب ترامیم کے خلاف چیئرمین پی ٹی آئی عمران خان کی درخواست پر سماعت چیف جسٹس کی سربراہی میں3 رکنی خصوصی بینچ نےکی۔
وفاقی حکومت کے وکیل مخدوم علی خان نےکہا کہ عدالت نے آبزرویشن دی کہ 386 کیسز میں سے کتنے اراکین پارلیمنٹ کے تھے؟ تاہم عدالت یہ بھی پوچھ سکتی تھی کہ تحریک انصاف کے ساڑھے تین سالہ دور میں 5 نیب آرڈیننس لائےگئے، ان آرڈیننسز کے تحت کتنے نیب ریفرنس واپس اور افراد بری ہوئے۔
مخدوم علی خان نےکہا کہ عدالت یہ بھی پوچھےکہ تحریک انصاف کے آرڈیننسز سے بری ہونے والے ملزمان میں کون کون شامل ہے؟
ان کا کہنا تھا کہ نیب قانون میں حالیہ ترامیم پرانے قانون کا ہی تسلسل ہے، عدالت خود کو 386 نیب کیسز تک محدود نہ رکھے۔
جسٹس منصور علی شاہ نےکہا کہ ایسا کہنا درست نہیں کہ نیب کیسز سے بری ہونے والے صاف شفاف ہوکرگھر چلے جاتے ہیں، یہ تاثر غلط ہےکہ نیب ختم ہو جانے سے قانون کی گرفت بھی ختم ہو جائےگی۔
جسٹس اعجازالاحسن نےکہا کہ تحریک انصاف کا موقف ہےکہ نیب کیسز میں جرم ثابت کرنےکا معیار ہی بدل دیا گیا ہے، سوال یہ بھی اہم ہےکہ نیب کیسز میں سزائیں ہونےکے بعد حالیہ ترامیم کا اطلاق ماضی سےکیسے ہوسکتا ہے،اگر احتساب عدالت جرم سے بری کر دے تو ملزم گھر ہی جائےگا۔