اسلام آباد: (ویب ڈیسک) پاکستان تحریک انصاف کے سینئر رہنما و سابق وفاقی وزیر فواد چودھری نے کہا ہے کہ ہم قومی اسمبلی میں واپس نہیں جا رہے، عمران خان کو گرفتار کرنے کی کوشش ہو رہی ہے۔
پی ٹی آئی رہنما نے میڈیا سے گفتگو میں کہا کہ اپوزیشن لیڈر و دیگرعہدے لینے کے لیے سپیکر حاضری لگانے کا کہیں گے تو لگا لیں گے، ہماری طرف سے حکومت ستمبر، اکتوبر میں الیکشن کرا لے، اعتراض نہیں۔
انہوں نے کہا کہ پارٹی چیئرمین عمران خان کی اسٹیبلشمنٹ کے ساتھ تلخیاں، اعظم سواتی، شہباز گل واقعہ کے بعد پیدا ہوئیں، جو لیگی کارکن پارٹی چھوڑنا چاہیں گے انہیں سپورٹ کریں گے۔
فواد چودھری کا کہنا تھا کہ مفتاح اسماعیل، شاہد خاقان عباسی کا ہمارے ساتھ کوئی رابطہ نہیں، عمران خان کو گرفتار کرنے کی کوشش ہو رہی ہے، پرویزالہیٰ کو پنجاب میں پی ٹی آئی کی صدارت دینے کا فیصلہ نہیں ہوا، آئندہ انتخابات کے بعد پرویز الہیٰ کو وزیراعلیٰ پنجاب بنانے کا فیصلہ نہیں ہوا۔
سابق وفاقی وزیر کا کہنا تھا کہ 2018 کے الیکشن کے بعد پنجاب میں وزیراعلیٰ کے امیدواروں کی بہت گروپنگ تھی، علیم خان اور جہانگیر ترین وزیر اعلیٰ بننے کے امیدوار تھے، الیکشن جب بھی ہوں گے ہم اکثریت سےجیتیں گے۔
فواد چودھری کا کہنا تھا کہ امریکا سے تعلقات خراب نہیں کرنا چاہتے، حسین حقانی عمران خان کےخلاف لابنگ کر رہے تھے۔

لاہور: (ویب ڈیسک) نگران وزیر اعلیٰ پنجاب کے سلسلہ میں اپوزیشن لیڈر حمزہ شہباز شریف نے پارلیمانی کمیٹی کے لیے تین افراد کے ناموں پر مشتمل خط سپیکر پنجاب اسمبلی کو لکھ دیا۔
حمزہ شہباز شریف کی طرف سے لکھے گئے خط کے مطابق ملک احمد خان، سید حسن مرتضیٰ، ملک ندیم کامران پارلیمانی کمیٹی کا حصہ ہوں گے۔
واضح رہے کہ اس سے قبل حکومتی اتحاد کی جانب سے پارلیمانی کمیٹی کے لئے میاں اسلم اقبال، راجہ بشارت اور ہاشم جواں بخت کے نام پہلے ہی سپیکر کو بھجوا دیے گئے ہیں۔

اسلام آباد: (ویب ڈیسک) صدر مملکت ڈاکٹر عارف علوی اور وزیر اعظم شہباز شریف نے بلوچستان میں دہشتگردوں کے حملے میں 4 سکیورٹی اہلکاروں کی شہادت کی شدید مذمت کی ہے۔
ڈاکٹر عارف علوی نے اپنے مذمتی بیان میں کہا کہ پنجگور میں سکیورٹی فورسز پر دہشت گرد حملے کی شدید مذمت کرتا ہوں اور سکیورٹی فورسز کے 4 اہلکاروں کی شہادت پر گہرا دکھ ہے، حملے سے دہشتگردی کے خلاف قوم کے غیر متزلزل عزم کو نقصان نہیں پہنچ سکتا۔
صدر مملکت نے شہداء کی خدمات اور وطن کیلئے عظیم قربانی پر خراج عقیدت اور بہادری پر اُنہیں سلام پیش کیا، اس کے علاوہ انہوں نے شہداء کے بلند درجات کی دعا کی اور ان کے لواحقین سے ہمدردی کا اظہار کیا۔
سماجی رابطے کی ویب سائٹ ٹوئٹر پر اپنے مذمت بیان میں وزیر اعظم شہباز شریف نے کہا کہ بلوچستان میں پاکستان ایران سرحد پر دہشت گردی کے نتیجے میں 4 سکیورٹی اہلکاروں کی شہادت پر شدید مذمت کرتا ہوں۔
وزیراعظم نے مزید کہا قوم فرض کی ادائیگی میں شہید سکیورٹی اہلکاروں کی قربانیوں کو خراج عقیدت پیش کرتی ہے، ہم امید کرتے ہیں کہ ایران اس بات کو یقینی بنائے گا کہ اس کی سرزمین سرحد پار حملوں کیلئے استعمال نہ ہو۔

لاہور: (ویب ڈیسک) وزیر اعلیٰ پنجاب چودھری پرویزالہٰی سے راجہ بشارت اور میاں اسلم اقبال نے ملاقات کی اس دوران نگران وزیراعلیٰ کے تقرر، سیاسی صورتحال اور سپیکر پنجاب اسمبلی کی سربراہی میں کمیٹی کے اجلاس کے حوالے سے بھی تبادلہ خیال کیا گیا۔
وزیر اعلیٰ چودھری پرویز الہٰی نے اس موقع پر گفتگو کرتے ہوئے کہا کہ ہم نے غیر جانبدار شخصیات کے نام نگران وزیر اعلیٰ کیلئے پیش کئے، اپوزیشن نے جانبدار شخصیات کے نام دے کر مذاق کیا ہے، انہوں نے یہاں بھی سیاست چمکانے کی کوشش کی، اپوزیشن نگران وزیراعلیٰ کے حوالے سے جو چاہتی ہے وہ خواب پورا نہیں ہوگا۔
انہوں نے امید ظاہر کرتے ہوئے کہا کہ سپیکر پنجاب اسمبلی کی سربراہی میں کمیٹی نگران وزیراعلیٰ کے حوالے سے کسی نتیجے پر پہنچ جائے گی، راجہ بشارت، میاں اسلم اقبال اور ہاشم جواں کھلے دل کے ساتھ مذاکرات کریں گے، ہماری کوشش ہو گی کہ اتفاق رائے جلد ہو، انشاء اللہ نگران وزیراعلیٰ وہ آئے گا جس پر کوئی انگلی نہ اٹھا سکے۔

کراچی: (ویب ڈیسک) الیکشن کمیشن نے کراچی کے علاقے کیماڑی میں ڈسٹرکٹ ریٹرنگ آفیسر کے آفس کے باہر ہنگامہ آرائی کا نوٹس لے لیا۔
ذرائع کے مطابق الیکشن کمیشن آف پاکستان نے چیف سیکرٹری سندھ سے واقعے میں ملوث افراد کے خلاف سخت کارروائی کرنے کی ہدایت کر دی۔
واضح رہے کراچی کے علاقے کیماڑی میں بلدیاتی الیکشن میں دھاندلی کے خلاف پی ٹی آئی کی جانب سے احتجاج کیا گیا جہاں ان کا پیپلز پارٹی کے کارکنوں سے آمنا سامنا ہو گیا۔
احتجاج تصادم میں بدلنے کے بعد دونوں جماعتوں کے کارکنوں کی جانب سے ایک دوسرے پر پتھراؤ کیا گیا۔

کوئٹہ: (ویب ڈیسک) وزیراعلیٰ بلوچستان عبدالقدوس بزنجو نے انکشاف کیا ہےکہ صوبےکا مالی بحران سنگین ہوگیا ہے، صوبے کے پاس سرکاری ملازمین کی تنخواہ کے لیے پیسے نہیں ہیں۔
ایک بیان میں عبدالقدوس بزنجو نے وفاق سے فوری طور پر صوبےکا قومی مالیاتی کمیشن (این ایف سی) ایوارڈ کا حصہ جاری کرنےکا مطالبہ کیا ہے۔
وزیراعلیٰ بلوچستان کا کہنا ہےکہ پیسے نہ ہونے سے صوبےکے ترقیاتی کام ٹھپ ہوکر رہ گئے ہیں، شدید سردی میں سیلاب متاثرین بحالی کے منتظر ہیں، صوبے کو اس کا حصہ مل جائے تو اپنے سیلاب متاثرین کو خود سنبھال سکتے ہیں۔
عبدالقدوس بزنجو کا کہنا ہےکہ وزیراعظم ان کی بات سمجھ رہے ہیں لیکن متعلقہ محکمے معاملےکو سنجیدہ نہیں لے رہے، وزیراعظم سے اپیل ہےکہ متعلقہ محکموں کے ساتھ کوئٹہ آئیں اور مالی بحران کا خود جائزہ لیں۔

کراچی: (ویب ڈیسک) پاکستان انٹرنیشنل ایئرلائن (پی آئی اے) کے آپریشنل بیڑے میں مزید دو طیارے شامل ہوگئے، گزشتہ روز نئے ائیربس 320 نے پہلی کمرشل پرواز پی کے 309 کے حیثیت سے اسلام آباد تا کراچی بھری جبکہ 7 مہینے سے لانگ گراونڈنگ کا شکار بوئنگ 777 طیارہ بھی آپریشن میں شامل ہوگیا۔
مشکل معاشی حالات کے باوجود حکومت پی آئی اے کی ترقی کیلئے سرگرم ہے،اسی تناظر میں جہازوں کی تعداد میں اضافہ جاری ہے، گزشتہ 24 گھنٹوں کے دوران پی آئی اے کے آپریشنل بیڑے میں 2 طیاروں کا اضافہ ہوا، پی آئی اے کے گزشتہ دنوں آنے والے نئے ائیربس 320 طیارہ بھی تمام کوائف مکمل کرنے کے بعد شیڈول میں شامل ہوگیا۔
ترجمان پی آئی اے کا کہنا ہے کہ گزشتہ روز نئے ائیربس 320 نے پہلی کمرشل پرواز پی کے 309 کے حیثیت سے اسلام آباد تا کراچی بھری جبکہ 7 مہینے سے لانگ گراؤنڈنگ کا شکار بوئنگ 777 طیارہ بھی آپریشن میں شامل ہوگیا۔
طیارے نے کئی ماہ بعد پہلی پرواز بدھ کی صبح پی کے 300 کی حیثیت سے آپریٹ کی جس کہ بعد وہ جدہ روانہ ہوگیا، گزشتہ چندہ ماہ کے دوران یہ دوسرا بوئنگ 777 ہے جو آپریشن میں واپس آیا۔
اس سلسلے کا تیسرا طیارہ بھی فعالی کے آخری مراحل میں ہے اور اگلے چند ہفتوں میں وہ بھی آپریشنل ہوجائے گا، اس عمل سے پی آئی اے کے 14 ائیربس اور 10 بوئنگ 777 سمیت کل 25 طیارے شیڈول کا حصہ ہوں گے، طیاروں کی فعالی سے پی آئی اے کا شیڈول ہموار ہوجائے گا اور نیٹ ورک کو وسیع کرنے میں بھی مدد ملے گی۔
ترجمان کے مطابق جہازوں کی فعالی خصوصی طور پر پرزہ جات کا حصول موجودہ زرمبادلہ کے حالات کے تناظر میں ایک پیچیدہ عمل تھا، اپنے محدود وسائل سے جہازوں کی فعالی اور بیڑے میں آپریشنل طیاروں کا اضافہ ایک اہم سنگ میل ہے۔
ترجمان نے کہا کہ کوویڈ کے بعد پی آئی اے کے فعال طیاروں کی یہ سب سے بڑی تعداد ہے، وفاقی وزیر ایوایشن خواجہ سعد رفیق کی ذاتی دلچسپی اور حکومت پاکستان کے خصوصی تعاون کے باعث طیاروں میں اضافے کا عمل مکمل ہورہا ہے، ہوابازی کی صنعت مکمل طور پر بحالی کی طرف گامزن ہے اور بڑھتی ہوئی مانگ کیلئے طیاروں کی تعداد میں اضافہ ناگزیر ہے۔

لاہور: (ویب ڈیسک) وفاقی وزیر ہوابازی و ریلوے خواجہ سعد رفیق نے ریلوے ٹریک پر انجینئرنگ رکاوٹیں ہٹانے کے لیے ایکشن پلان طلب کر لیا۔
وزیر ریلوے خواجہ سعد رفیق کے زیر صدارت وزارت ریلوے میں اعلیٰ سطح کا اجلاس ہوا، اجلاس میں ریلوے کے پانچ سالہ بزنس پلان کا بھی جائزہ لیا گیا، بزنس پلان کو سپریم کورٹ آف پاکستان میں پیش کیا جائے گا۔
سیکرٹری ریلوے ظفر زمان رانجھا آج سرکاری ملازمت سے ریٹائر ہو گئے جس پر وزیر ریلوے نے ظفر زمان رانجھا سیکرٹری اورچیئرمین ریلوے کی شاندار خدمات کو سراہا۔
وزرات ریلوے کے مطابق اجلاس میں گوادر میں پاکستان ریلوے کے دفتر کے قیام کے حوالے سے پیش رفت پر بھی بات چیت ہوئی، حکام نے وزیر ریلوے کو بتایا کہ انجینئرنگ رکاوٹیں ہٹانے سے سروس کی فراہمی میں تاخیر ہوتی ہے، جس پر خواجہ سعد رفیق نے ایکشن پلان طلب کر لیا۔

لاہور: (ویب ڈیسک) صدر پاکستان تحریک انصاف سینٹرل پنجاب ڈاکٹر یاسمین راشد اور سینئر رہنما حماد اظہر نے پارٹی رہنما عارف خان کو ڈسٹرکٹ صدر نارووال مقرر کر دیا۔
پاکستان تحریک انصاف کی طرف سے نئی تقرریوں کا نوٹیفکیشن جاری کر دیا گیا، نوٹیفکیشن کے مطابق سینئر نائب صدر طارق انیس چودھری اور ندیم ناصر چودھری ہوں گے۔
نوٹیفکیشن کے مطابق چودھری سجاد مہیس کو ڈسٹرکٹ جنرل سیکرٹری مقرر کر دیا گیا، پی ٹی آئی کی طرف سے تقرریوں کا باقاعدہ نوٹیفکیشن جاری کرتے ہوئے عہدیداروں کو مبارکباد پیش کی گئی ہے۔

پشاور: (ویب ڈیسک) وزیر اعلیٰ خیبر پختونخوا محمود خان نے کہا ہے کہ اکرم درانی چور ٹولے کا ممبر ہے، انہیں اپنی برادری کے ساتھ بیٹھنا ہی زیب دیتا ہے۔
اپوزیشن لیڈر خیبرپختونخوا کے بیان پر ردعمل میں وزیر اعلیٰ محمود خان نے کہا کہ امپورٹڈ حکمرانوں نے ملکی معیشت کا دیوالیہ نکال دیا ہے، اکرم درانی کو شرم و حیا کے پانی سے اپنے ضمیر کو دھونا چاہئے۔
انہوں نے کہا کہ اکرم درانی مذہبی جماعت کا ممبر ہوتے ہوئے چوروں کی حمایت میں اپنا ضمیر بیچ رہے ہیں، اسمبلی تحلیل کا فیصلہ ہم نے خود کیا ہے، چور ٹولہ الیکشن سے بھاگ رہا ہے، عوام ان کا مکروہ چہرہ دیکھ چکے ہیں۔
وزیر اعلیٰ خیبرپختونخوا محمود خان نے مزید کہا کہ خیبر پختونخوا میں پاکستان تحریک انصاف نے کارکردگی کی بنیاد پر دوبارہ حکومت قائم کی، عام انتخابات میں دو تہائی اکثریت سے حکومت قائم کریں گے۔

لاہور: (ویب ڈیسک) لاہور ہائیکورٹ نے پنجاب حکومت کو غیر مسلموں کے طلاق سرٹیفکیٹ سے متعلق 90 روز میں رولز بنانے کا حکم دے دیا۔
جسٹس طارق سلیم شیخ نے غیر مسلم خاتون شمائلہ شریف کی طلاق کے بعد والد کے نام سے شناختی کارڈ کے اجراء کی درخواست پر 7 صفحات پر مشتمل فیصلہ جاری کر دیا۔
درخواست گزار نے عدالت میں استدعا کی تھی کہ یونین کونسل غیر مسلموں کو طلاق سرٹیفکیٹ جاری نہیں کرتی، نادرا سرٹیفکیٹ کے بغیر شناختی کارڈ میں تبدیلی نہیں کرتا، جس پر جسٹس طارق سلیم شیخ نے ریمارکس میں کہا کہ مسیحی برادری کی جانب سے یونین کونسلز کے سرٹیفکیٹ جاری نہ ہونےکی شکایات آ رہی ہیں۔
جسٹس طارق سلیم شیخ نے فیصلہ جاری کرتے ہوئے کہا کہ پنجاب لوکل گورنمنٹ ایکٹ کے تحت رولز کا اجراء ضروری ہے، رولز بنائے جانے تک نادرا رجسٹریشن پالیسی کے تحت سہولت فراہم کرے، عدالت نے درخواست گزار کو شناختی کارڈ کیلئے دوبارہ نادرا سے رجوع کرنے کی ہدایت کر دی۔