نیودہلی : (ویب ڈیسک) بھارت چین کو پیچھے چھوڑتے ہوئے رواں برس دنیا کی سب سے بڑی آبادی والا ملک بن جائے گا۔
غیر ملکی میڈیا رپورٹس کے مطابق ماہرین کا کہنا ہے کہ آبادی بڑھنے کے ساتھ بھارت کو معیشت اور بیروزگاری کے مسائل بھی درپیش ہونگے ، ماہرین کا اس سلسلے میں کہنا ہے کہ بھارت اس وقت ایک ٹائم بم پر بیٹھا ہوا ہے، اگر ملازمتوں کے مواقع پیدا نہ کیے گئے تو بھارت میں سماجی بدامنی پیدا ہوگی ۔
چین میں سال 2022 میں 60 برس بعد پہلی بار آبادی میں کمی رپورٹ ہوئی ہے ، چین کی آبادی میں کمی کے بعد بھارت کی آبادی آئندہ آنیوالےچند ماہ میں دنیا میں سب سے زیادہ بڑھ جانے کا امکان ہے ۔
امریکی میڈیاکا کہنا ہے کہ ایک ارب چالیس کروڑ سے زائد آبادی کے ساتھ چین اور بھارت کو اقتصادی مضمرات کا سامنا کرنا پڑے گا۔
اس حوالے سے تجزیہ کار کہتے ہیں کہ بھارت بڑھتی ہوئی آبادی کے ساتھ لاکھوں نوجوانوں کیلئے روزگار کے مواقع پیدا نہیں کر رہا، اگر بھارتی پالیسی سازوں نے روزگار کے ذرائع نہ بڑھائے تو رواں دہائی میں بھارت کی متوقع ایک ارب سے زیادہ لیبر فورس بھارت کی ترقی کے بجائے بھارت کے لیے بوجھ بن کر رہ جائے گی ۔

لندن: (ویب ڈیسک) غیرملکی میڈیا کی جانب سے بھارتی وزیراعظم نریندرمودی پر 2اقساط پرمبنی سلسلہ وار سیریز کا اجرا کیا گیا ہے ۔
غیرملکی میڈیا کے مطابق سیریز کا نام ’انڈیا، دی مودی کوئسچن‘ رکھا گیا ہے ، بھارتی وزیراعظم پر بنائی جانیوالی اس سیریزمیں گجرات کےقصائی مودی کی اصل حقیقت کا کھوج لگانےکی کوشش کی گئی ہے سیریزمیں مقبوضہ کشمیر، گجرات میں بھارتی مسلمانوں کے قتل عام ، ہندوانتہا پسندی اور دیگر عوامل کا بھی جائزہ لیا گیا ہے ۔
غیرملکی میڈیا کے مطابق مودی دنیا کی بڑی جمہوریت کےرہنما اوردوبار منتخب ہونیوالے وزیراعظم اورطاقتور شخص ہیں اور مغرب انہیں چین کےخلاف مضبوط مہرہ سمجھتا ہے ۔
غیرملکی میڈیا کے مطابق سیریز میں مودی حکومت کے دور میں مسلمانوں سےناروا سلوک کےالزامات اور ان کے پس پردہ حقائق کی تحقیقات کرے گی جبکہ مودی کی سیاست پرمختلف سوالات کی پس پردہ حقائق جاننےکی بھی کوشش کی گئی ہے۔
غیرملکی میڈیا کے مطابق سیریزکا مقصد اقلیتوں سےسلوک ، بھارتی مسلمانوں کےقتل عام اور مودی کا ہندوانتہا پسند تنظیم سےتعلق اوربی جےپی میں ابھرنےکاجائزہ لینا بھی شامل ہے ۔
غیرملکی میڈیا کے مطابق دو اقساط پر مبنی اس سیریز میں گجرات کی ریاست کا وزیراعلیٰ بننا اور 2002 کےفسادات کی حقیقت کو جاننے سمیت ہزاروں افراد کے قتل اور متنازع نکات کو جاننے کی کوشش کی جائے گی ۔
غیرملکی میڈیا کی اس سیریز پربی جے پی کے حامی بہت سیخ پا ہیں اور سوشل میڈیا پرسخت ردعمل کا اظہار کیا جارہا ہے اور صارفین کی جانب سے لفظی حملے جاری ہیں ۔

بانجول : (ویب ڈیسک) گیمبیا کے نائب صدر بدارا علیو جوف مختصر علالت کے بعد بھارت میں انتقال کر گئے، جوف 2016 کےبعد صدر بیرو کے ماتحت خدمات انجام دینے والے چوتھے نائب تھے۔
غیر ملکی خبر رساں ادارے کے مطابق 65 سالہ جوف کو 2022 میں مغربی افریقی ملک کا نائب صدر مقرر کیا گیا تھا، وہ اس سے قبل 2017 سے 2022 تک وزیر تعلیم کے طور پر خدمات انجام دے چکے ہیں۔
گیمبیا کے صدر اڈاما بارو کا بدھ کو سماجی رابطے کی ویب سائٹ ٹوئٹر پر جاری کئے گئے اپنے ایک پیغام میں کہنا تھا کہ ’’ ساتھیو میں بھاری دل کے ساتھ اپنے نائب صدر، عزت مآب، بدارا علیو جوف کے انتقال کا اعلان کرتا ہوں، یہ افسوسناک واقعہ بھارت میں مختصر علالت کے بعد پیش آیا۔ اللہ انہیں جنت الفردوس نصیب کرے ‘‘ ۔
رپورٹس کے مطابق نائب صدر طبی علاج کے لیے تقریباً تین ہفتے قبل گیمبیا سے روانہ ہوئے تھے اور سفر سے پہلے کئی مہینوں تک انہیں عوام میں نہیں دیکھا گیا۔
آنجہانی نائب صدر نے پہلے گیمبیا کی سول سروس میں اور بعد میں ورلڈ بینک میں بطور ایجوکیشن سپیشلسٹ برائے مغربی اور وسطی افریقہ کام کیا، وہاں اپنے تجربے کو اعلیٰ تعلیم، تحقیق، سائنس اور ٹیکنالوجی کے وزیر کے طور پر منتقل کیا۔

کیف : (ویب ڈیسک) یوکرین کے صدر ولادیمیر زیلنسکی نے دارالحکومت کیف میں ہیلی کاپٹر حادثے میں 14 افراد کی ہلاکت کے بعد کہا ہے کہ جنگ کے وقت کوئی حادثہ نہیں ہوتا۔
غیر ملکی خبر رساں ادارے کے مطابق ہیلی کاپٹر حادثے پر یوکرین نے روسی مداخلت کا دعویٰ نہیں کیا لیکن زیلنسکی نے ڈیووس میں ورلڈ اکنامک فورم کو بتایا کہ یہ سانحہ جنگ کا نتیجہ تھا جس کا درد ناقابل بیان ہے۔
دوسری جانب ایس بی یو اسٹیٹ سیکیورٹی سروس نے کہا کہ وہ حادثے کی کئی ممکنہ وجوہات جاننے کی کوشش کر رہا ہے، جس میں تخریب کاری کے ساتھ ساتھ تکنیکی خرابی یا پرواز کے قواعد کی خلاف ورزی بھی شامل ہے۔
خیال رہے کہ گزشتہ روز یوکرین کے دارالحکومت کیف میں ہیلی کاپٹر گرنے سے وزیر داخلہ ، نائب وزیر داخلہ ، وزارت داخلہ کی اعلیٰ قیادت سمیت 14 افراد ہلاک ہو گئے تھے۔
یوکرین کے صدارتی دفتر کے نائب سربراہ کا کہنا تھا کہ وزیر داخلہ جنگ زدہ علاقوں کے فضائی دورے پر تھے کہ ہیلی کاپٹر کو حادثہ پیش آیا۔