لاہور: (ویب ڈیسک) لاہور ہائی کورٹ نے ایف آئی اے کو پاکستان تحریک انصاف کے رہنما شہباز گل کو گرفتار کرنے سے روک دیا۔
پی ٹی آئی رہنما شہباز گل کی جانب سے حفاظتی ضمانت کیلئے لاہور ہائی کورٹ میں جمع کروائی گئی درخواست میں استدعا کی گئی تھی کہ اسلام آباد جانا ہے خدشہ ہے کہ ایف آئی اے گرفتار کر لے گی، حفاظتی ضمانت منظور کی جائے۔
جس کے بعد لاہور ہائی کورٹ کے جسٹس طارق سلیم شیخ نے شہباز گل کو فوری پیش ہونے کا حکم دیتے ہوئے پی ٹی آئی رہنما کی 24 جنوری تک حفاظتی ضمانت منظور کر لی اور 50 ہزار روپے کے ضمانتی مچلکے جمع کروانے کی ہدایت کی۔
عدالت نے ایف آئی اے کو شہباز گل کے خلاف درج مقدمات کی کاپیاں فراہم کرنے کی ہدایت دیتے ہوئے ریمارکس میں کہا کہ پی ٹی آئی رہنما 24 جنوری تک متعلقہ عدالت سے رجوع کر سکتے ہیں، واضح رہے شہباز گل کو اداروں کیخلاف بیان بازی کرنے پر کیسز کا سامنا ہے۔

اسلام آباد: (ویب ڈیسک) چیئرمین پاکستان تحریک انصاف عمران خان سے سینیٹ میں اپوزیشن لیڈر ڈاکٹر شہزاد وسیم نے ملاقات کی۔
ملاقات کے دوران ملک کی مجموعی سیاسی صورتحال اور پارلیمانی امور پر تبادلہ خیال ہوا، ڈاکٹر شہزاد وسیم نے سابق وزیر اعظم عمران خان کو سینیٹ سے متعلق امور پر بریفنگ دی، چیئرمین پی ٹی آئی نے سینیٹ میں اپوزیشن لیڈر کو پارلیمانی امور سے متعلق ضروری ہدایات بھی جاری کیں۔
واضح رہے عمران خان کی جانب سے وزیر اعظم شہباز شریف کیخلاف اعتماد کے ووٹ کی کارروائی شروع کرنے کا اعلان کیا گیا ہے جس کے بعد پی ڈی ایم جماعتوں میں ہلچل دیکھنے میں آئی ہے اس حوالے سے حکومت نے پی ٹی آئی کے زیر التواء 35 ارکان کے استعفے منظور کیے ہیں۔

اسلام آباد: (ویب ڈیسک) پریذائیڈنگ افسران کی جانب سے تیار فارم 11 میں کئی طرح کی خامیاں دیکھنے میں آئیں، فافن نے سندھ بلدیاتی انتخابات کے دوسرے مرحلے کے حوالے سے رپورٹ جاری کر دی۔
فافن کی رپورٹ کے مطابق موصول فارم 11 پر پولنگ سٹیشنز کا نام، رجسٹرڈ مرد اور خواتین ووٹرز کی الگ الگ تعداد درج نہ تھی، اس کے علاوہ پریذائیڈنگ افسران کے دستخط سمیت اہم معلومات بھی درج نہیں کی گئی تھیں، دھاندلی کے الزامات کے باوجود کراچی ڈویژن کے عبوری نتائج دو دن کے اندرموصول ہو گئے تھے۔
رپورٹ میں کہا گیا کہ حیدر آباد ڈویژن کے مجموعی نتائج کا ابھی بھی انتظار ہے، الیکشن کمیشن کے نوٹیفکیشن کے مطابق مجموعی انتخابی نتائج کی تیاری کیلئے 4 دن مختص کیے گئے تھے، غیر یقینی صورتحال کے باوجود ٹھٹھہ ڈویژن اور ملیر کے اضلاع میں ووٹرز کی ایک نمایاں تعداد نے ووٹ کاسٹ کیا۔
کراچی، حیدر آباد اور کیماڑی کے اضلاع میں ووٹر ٹرن آؤٹ نسبتاً کم رہا، حیدرآباد میں 40، کراچی میں ملیر کے علاوہ ٹرن آؤٹ 20 فیصد سے بھی کم رہا، انتخابات کے پہلے مرحلے کے مقابلے میں حالیہ ووٹنگ کا عمل زیادہ منظم رہا، پولنگ سٹیشنوں پر تلخ کلامی کے 14 واقعات رپورٹ ہوئے۔

اسلام آباد: (ویب ڈیسک) سال 2023 میں پولیو کا پہلا ماحولیاتی نمونہ مثبت آگیا، پنجاب کے صوبائی دارالحکومت لاہور کے ماحولیاتی نمونہ میں پولیو وائرس کی تصدیق ہوئی ہے۔
وزارت صحت کے ترجمان کے مطابق رواں برس لاہور کے ماحولیاتی نمونہ میں پہلا وائرس پایا گیا ہے جس سے لاہور میں پولیو وائرس کا خطرہ برقرار ہے۔
وزیر صحت عبدالقادر پٹیل نے کہا ہے کہ سال کی پہلی قومی مہم کامیابی سے جاری ہے، حکومت انسداد پولیو مہم کی کامیابی کے لئے پُرعزم ہے، والدین کے تعاون سے مطلوبہ ہدف حاصل کر لیں گے۔

کراچی: (ویب ڈیسک) سینیٹ کی سندھ میں خالی نشست پر ضمنی انتخاب کے سلسلہ میں پیپلز پارٹی کے نثار کھوڑو کے علاوہ کوئی امیدوار نہیں، پیپلز پارٹی کے امیدوار کی بلامقابلہ کامیابی کا نو ٹیفکیشن جاری ہونے کا امکان ہے۔
سینیٹ نشست کے لیے پیپلز پارٹی کے امیدواروں کے علاوہ کسی نے کاغذات نامزدگی جمع نہیں کرائے تھے، پیپلز پارٹی کے3 امیدواروں نے کاغذات نامزدگی جمع کرائے جن میں نثارکھوڑو ،عاجز دھامرہ اور سرفراز راجڑ شامل تھے۔
عاجز دھامرہ پہلے ہی کاغذات نامزدگی واپس لے چکے تھے، آج سرفراز راجڑ نے بھی کاغذات واپس لے لیے۔
اس موقع پر پاکستان پیپلز پارٹی کے رہنما نثار کھوڑو نے کہا ہے کہ سینیٹ کا ٹکٹ دینے پر پارٹی قیادت کا مشکور ہوں، انہوں نے کہا کہ کراچی میں پیپلز پارٹی کو مینڈیٹ ملا ہے، اسے سب کو تسلیم کرنا چاہیے، پیپلز پارٹی نے ہمیشہ سب کے مینڈیٹ کا احترام کیا ہے، پیپلز پارٹی کے کراچی سے اب بھی پانچ ایم این ایز ہیں۔
واضح رہے کہ سپریم کورٹ کے فیصل واوڈا کیس سے متعلق فیصلہ کے بعد سینیٹ کی نشست خالی ہوگئی تھی۔

لاہور: (ویب ڈیسک) محکمہ موسمیات اسلام آباد نے ملک کے بالائی علاقوں میں بارش اور پہاڑوں پر برفباری کی پیشگوئی کر دی، 21 جنوری سے مغربی ہواؤں کا سلسلہ بالائی علاقوں کو لپیٹ میں لے گا۔
محکمہ موسمیات اسلام آباد کے مطابق خطہ پوٹھوہار سمیت بالائی خیبر پختونخوا، کشمیر اور گلگت بلتستان میں بارش کا امکان ہے، لاہور، سیالکوٹ، گجرات، ساہیوال سمیت پنجاب کے مختلف حصوں میں بھی بارش ہو سکتی ہے۔
بتایا گیا ہے کہ مری، گلیات، کشمیر، خیبرپختونخوا، گلگت بلتستان میں پہاڑوں پر درمیانی سے شدید برفباری متوقع ہے، شدید برفباری سے سڑکیں بند اور گاڑیوں کی آمد ورفت میں خلل کا امکان ظاہر کیا جا رہا ہے۔
محکمہ موسمیات کے مطابق بارش کا سلسلہ 21 جنوری سے 25 جنوری تک جاری رہے گا، بارش و برفباری کے بعد درجہ حرارت میں نمایاں کمی ہو گی۔
دوسری جانب وادی نیلم میں 4 روز کے وقفے کے بعد دوبارہ برفباری شروع ہو گئی، جس سے سردی کی شدت میں اضافہ ہو گیا، شدید سردی کی وجہ سے عوام شدید مشکلات کا شکار ہیں، محکمہ موسمیات کی جانب سے اگلے 4 دن وادی نیلم میں برفباری جاری رہنے کا امکان ظاہر کیا گیا ہے۔

اسلام آباد: (ویب ڈیسک) سپیکر قومی اسمبلی راجہ پرویز اشرف نے کہا ہے کہ تحریک انصاف کا وفد مجھ سے ملنے آیا، جو لوگ آئے یا جنہوں نے میڈیا پر آکر استعفے سے متعلق کہا اور مجھے اطمینان دلایا، میں نے مطمئن ہو کر ایسے ارکان کے استعفے منظور کر لیے۔
راجہ پرویز اشرف نے میڈیا سے گفتگو کرتے ہوئے کہا کہ جس جس نے مجھے اطمینان کرایا ان کے استعفے منظور کیے، مجھ سے بہت سے پی ٹی آئی ارکان نے رابطہ کر کے کہا ہے وہ ابھی سوچ رہے ہیں، جب استعفے منظور کرتا ہوں تو بھی شور مچ جاتا ہے جب نہیں کرتا تو بھی شور مچ جاتا ہے۔
سپیکر قومی اسمبلی سے سوال کیا گیا کہ عمران خان نے واپسی کا عندیہ دیا تو آپ نے استعفے منظور کر لیے، جس کے جواب میں راجہ پرویز اشرف نے کہا ایسی بات نہیں ہے، جب پی ٹی آئی وفد آیا تو منظوری کا عمل شروع ہوچکا تھا، میں اب بھی چاہتا ہوں جن کے استعفے منظور نہیں ہوئے اسمبلی میں آئیں۔

اسلام آباد: (ویب ڈیسک) الیکشن کمیشن آف پاکستان نے پاکستان تحریک انصاف کے چیئرمین و سابق وزیر اعظم عمران خان کی 7 حلقوں سے کامیابی کا نوٹیفکیشن جاری کر دیا۔
نوٹیفکیشن کے مطابق چیئرمین پی ٹی آئی عمران خان این اے 22، 24، 31 اور این اے 45 کرم سے کامیاب قرار پائے ہیں۔
عمران خان کی این اے 108 فیصل آباد، این اے 118 ننکانہ صاحب اور این اے 239 کراچی سے کامیابی کا نوٹیفکیشن بھی جاری کر دیا گیا ہے، الیکشن کمیشن نے آج ہی کامیابی کا نوٹیفکیشن جاری کرنے کا فیصلہ دیا تھا۔