کوئٹہ: (ویب ڈیسک) ریکوڈک منصوبے پرکام کرنے والی کمپنی بیرک گولڈکارپوریشن نے منصوبےسے متعلق بلوچستان حکومت کو پہلی ادائیگی کردی۔
بیرک گولڈکارپوریشن کی جانب سے جاری اعلامیےکے مطابق بلوچستان حکومت کو نئی شراکت داری کے فریم ورک کے تحت تین ملین ڈالرکی ادائیگی کی گئی ہے۔
ریکوڈک پاکستان کےکنٹری منیجر علی رند نے سیکرٹری معدنیات کو 3 ملین ڈالرکا چیک دیا۔
خیال رہے کہ گزشتہ ماہ ہی وفاقی کابینہ نے ریکوڈک منصوبے کی حتمی ڈیل پر دستخط کرنےکی باضابطہ منظوری دی تھی۔
بیرک گولڈ کارپوریشن کے سربراہ کا کہنا تھا کہ ریکوڈک سے پہلی کمرشل پیداوار 2028 میں شروع ہوگی اور ریکوڈک کے ذخائرکی مدت 40 سال ہوگی۔
ان کا کہنا تھاکہ ریکوڈک منصوبے میں ساڑھے 7ہزار لوگوں کو روزگار ملے گا اور منصوبے سے 4 ہزار طویل المدتی نوکریاں پیدا ہوں گی، کمرشل پیداوار شروع ہونے پربلوچستان کو سالانہ 50 ملین ڈالرز تک رائلٹی ملےگی۔

لاہور: (ویب ڈیسک) اسلام آباد کی ڈسٹرکٹ اینڈ سیشن کورٹ نے اسامہ ستی قتل کیس کا فیصلہ محفوظ کر لیا جو 6 فروری کو سنایا جائے گا۔
ایڈیشنل سیشن جج زیبا چودھری نے اسامہ ستی کیس کے ٹرائل میں حتمی دلائل سنے، کیس میں افتخار احمد، محمد مصطفیٰ، سعید احمد، شکیل احمد اور مدثر مختار نامزد ملزمان ہیں۔
سماعت کے دوران ملزمان کے وکیل راجہ رضوان عباسی اور پراسیکیوٹر رانا حسن عباس پیش ہوئے، مقدمے میں انسداد دہشت گردی ڈیپارٹمنٹ کے پولیس کے اہلکار نامزد کیے گئے۔
واضح رہے 22 سالہ نوجوان اسامہ ستی کو 2 جنوری 2021 کی رات اپنے دوست کو شمس کالونی چھوڑنے کے بعد واپسی کے دوران سری نگر ہائی وے پر اے ٹی ایس پولیس کے اہلکاروں نے اسامہ کی گاڑی کو روکنے کی کوشش پر اندھا دھند فائرنگ کر کے جان سے مار دیا تھا۔
واقعے کے بعد پولیس نے موقف اختیار کیا تھا کہ کالے شیشوں والی مشکوک گاڑی کو روکنے کی کوشش کی تو ڈرائیور نے گاڑی نہ روکی، جی ٹین تک گاڑی کا تعاقب کیا اور نہ رکنے پر گاڑی کے ٹائروں میں فائر کئے، بد قسمتی سے فائر گاڑی کے ڈرائیور کو لگ گئے۔
واقعے کا آئی جی اسلام آباد کی جانب سے نوٹس لینے کے بعد 5 پولیس اہلکاروں کو حراست میں لے لیا گیا تھا، اسامہ ستی سیکٹر جی 13 کا رہائشی اور طالب علم تھا، اس کے والد تاجر ہیں۔

ایبٹ آباد: (ویب ڈیسک) ایبٹ آباد شہراور گردو نواح میں مسلسل بارش جاری ہے جبکہ نتھیا گلی، گلیات اور ٹھنڈیانی میں برفباری کا سلسلہ تھم گیا۔
پہاڑی علاقوں میں رابطہ سڑکیں بند ہونے سے اشیاء خور و نوش کی ترسیل میں مسائل اور سردی کی شدت میں اضافہ ہو گیا، گلیات کی رابطہ سڑکیں بھی بند ہیں، مقامی آبادی کو کافی مشکلات کا سامنا ہے۔
گلیات میں درجہ حرارت منفی 3 ریکارڈ کیا گیا، ضلعی انتظامیہ سیاحوں کو سہولیات دینے میں ناکام ہے۔

اسلام آباد: (ویب ڈیسک) اوگرا کی جانب سے افسران کو سرکاری گاڑیاں انتہائی کم قیمت پراستعمال کرنے کا انکشاف ہوا ہے۔
سینیٹ اجلاس میں اوگرا کی جانب سے تحریری جواب داخل کیا گیا کہ اوگرا پول میں موجود گاڑیاں ضرورت پڑنے پر افسروں کو فراہم کی جاتی ہیں، افسران فی کلومیٹر 10 روپے پر سرکاری گاڑیاں استعمال کرتے ہیں، اوگرا چیئرمین اور ممبران کے لیے سرکاری گاڑی کا ریٹ 3 روپے فی کلو میٹر ہے۔
سینیٹر دنیش کمار نے کہا کہ یہ فیصلہ کابینہ ڈویژن نے 1980 میں کیا تھا، انہوں نے سستے ریٹ پر گاڑیاں فراہم کرنے پر اعتراض کرتے ہوئے کہا کہ یہ کیا اصول ہے کہ افسران تین اور دس روپے فی کلومیٹر گاڑی استعمال کرتے ہیں۔
دنیش کمار کا مزید کہنا تھا کہ اتنی کم قیمت میں گاڑی استعمال کرنے پر پٹرول بھی سرکار فراہم کرتی ہے۔
اس حوالے سے وزیر مملکت قانون کا کہنا تھا کہ یہ فیصلہ اوگرا نےخود نہیں کیا ، یہ حکومت کا فیصلہ ہے۔

پشاور: (ویب ڈیسک) کوہاٹ کے تاندہ ڈیم میں کشتی ڈوبنے کے واقعے میں جاں بحق ہونے والے طلباء کی تعداد 40 تک پہنچ گئی ہے۔
پولیس کے مطابق ریسکیو آپریشن بدستور جاری ہے اور مبینہ طور پر زیر آب دو طلباء کی لاشوں کو تلاش کیا جا رہا ہے، ریسکیو آپریشن کی تمام تر کارروائی کی نگرانی ڈی پی او کوہاٹ عبدالرؤف بابر قیصرانی خود کر رہے ہیں۔
مہتمم مدرسہ شاہد نور نے بتایا کہ انہوں نے خود کشتی میں 50 بچوں کو ترتیب سے بٹھایا تھا جس میں انکا ایک بیٹا اور چھ بھانجے بھی موجود تھے۔ شیید ہونے والوں میں میرا بیٹا محمد طلحہٰ اور میرے بھانجے بھی شامل ہیں۔
واضح رہے کہ اتوار 29 جنوری کو کوہاٹ کے تاندہ ڈیم میں کشتی الٹنے سے طلباء ڈوب گئے تھے جن کی تلاش کے لیے ریسکیو آپریشن جاری ہے۔
خیبر پختونخوا کی نگراں حکومت نے کشتی ڈوبنے کے واقعے کا نوٹس لیا تھا۔ نگراں صوبائی وزیر خوشدل خان نے واقع کی انکوائری کا حکم دیتے ہوئے کوہاٹ انتظامیہ کو واقع کی رپورٹ پیش کرنے کی ہدایت کی تھی۔

سکھر: (ویب ڈیسک) صوبائی وزیر سندھ ناصر حسین شاہ نے کہا ہے کہ وفاقی حکومت سابق حکومت کی بچھائی ہوئی معاشی مائنز کا سامنا کر رہی ہے، ملک ڈیفالٹ ہونے کا تاثر غلط ہے۔
میڈیا سے گفتگو کرتے ہوئے صوبائی وزیر کا کہنا تھا کہ سندھ حکومت پورے صوبے میں بہتر پرفارم کرنے کی کوشش میں مصروف ہے، اسی سلسلے میں کراچی کے بعد سکھر میں 1122 ریسکیو شروع کر رہے ہیں۔
ناصر حسین شاہ نے کہا کہ ملک میں مشکل حالات ضرور ہیں مگر موجودہ حکومت مشکل فیصلے کر کے ملک کو معاشی مشکلات سے نکالنے کی کوشش کر رہی ہے، ملک کی بہتری کیلئے سندھ حکومت ہمیشہ آگے آگے رہی ہے۔
انہوں نے کہا کہ ہم نے ماضی میں نااہل وزیر اعظم تک کو کہا کہ سپورٹ میں ہیں مل کر کام کریں مگر انہوں نے کوئی کام نہیں کیا، سیلابی صورتحال میں بھی یہ غلط افواہیں پھیلاتے رہے تاکہ ہمیں بیرون ممالک سے سپورٹ نہ ملے۔
صوبائی وزیر کا کہنا تھا کہ پشاور دہشت گردی کے واقعے پر بہت افسوس اور رنج ہے، پہلے حملے امام بارگاہ اور مساجد پر ہوتے تھے اس میں تو تمام مسالک کے لوگ تھے، اس سے ثابت ہوتا ہے کہ دہشت گرد اسلام دشمن ہیں، کے پی میں پی ٹی آئی حکومت کے تسلسل کے باعث ایسے تشویشناک حالات ہیں۔
ناصر حسین شاہ نے کہا کہ مہنگائی میں مزید اضافہ ہوسکتا ہے مگر امید ہے کہ آگے جا کے بہتری آئے گی، عوام کو ریلیف ملے گا، کچے کے علاقوں میں ٹارگٹڈ آپریشن کیا جا رہا ہے، رینجرز اور پاک فوج سے بھی مدد مانگی گئی ہے، کچے میں جرائم پیشہ افراد کے پاس جدید ہتھیار ہیں، حیران کن بات ہے کہ وہ ہتھیار ان کے پاس پہنچے کیسے؟؟۔

اسلام آباد: (ویب ڈیسک) سیکرٹری کابینہ ڈویژن احمد نواز سکھیرا ریٹائر ہو گئے، احمد نواز سکھیرا پاکستان ایڈمنسٹریٹریٹو سروس کے 22 ویں گریڈ کے آفیسر تھے۔
احمد نواز سکھیرا گزشتہ 3 سال سے بطور کابینہ سیکرٹری فرائض سر انجام دے رہے تھے، انہوں نے 38 سال تقریباً 23 حکومتوں میں خدمات سرانجام دیں، احمد نواز سکھیرا کو حال ہی میں نگران وزیر اعلیٰ کے لئے بھی نامزد کیا گیا تھا۔
احمد نواز سکھیرا اپنے کیریئر میں 9 سال تک مختلف وزارتوں میں وفاقی سیکرٹری رہے، ان کو ہلال پاکستان کا قومی اعزاز دیا گیا۔

لاہور: (ویب ڈیسک) نگران وزیر اعلیٰ پنجاب محسن رضا نقوی نے سابق وزیر اعلیٰ چودھری پرویز الہٰی کے کیمپ آفس کو ڈی نوٹیفائی کر دیا۔
سرکاری خرچ پر چلنے کی وجہ سے نگران وزیر اعلیٰ پنجاب محسن رضا نقوی نے کیمپ آفس کو بند کیا، سابق وزیر اعلیٰ پنجاب پرویز الہٰی نے ڈیوس روڈ پر پارٹی دفتر کو کیمپ آفس قرار دیا تھا۔
نگران وزیر اعلیٰ محسن رضا نقوی کے حکم کے بعد ایڈیشنل چیف سیکرٹری پنجاب نے سابق وزیر اعلیٰ چودھری پرویز الہٰی کے کیمپ آفس کو ڈی سیل کرنے کا نوٹیفکیشن بھی جاری کر دیا۔