لاہور: (ویب ڈیسک) پنجاب اسمبلی کی خاتون رکن سیدہ زہرا نقوی نے وزیراعلیٰ پنجاب چوہدری پرویز الہٰی کو اعتمادکا ووٹ نہ دینے کا اعلان کیا ہے۔
مجلس وحدت مسلمین (ایم ڈبلیو ایم) کی رہنما سیدہ زہرا نقوی 2018 میں خواتین کی مخصوص نشست پر پاکستان تحریک انصاف (پی ٹی آئی) کی جانب سے رکن پنجاب اسمبلی منتخب ہوئی تھیں۔
ترجمان ایم ڈبلیو ایم مظاہر شگری کے مطابق مجلس وحدت مسلمین کو وزیراعلیٰ پرویز الہٰی کے بعض اقدامات پر شدید تحفظات ہیں، وزیر اعلیٰ کو اعتمادکا ووٹ نہ دینے کا فیصلہ پارٹی قیادت کی ہدایت کی روشنی میں کیا گیا ہے۔
ترجمان کا کہنا تھا کہ پرویز الہٰی کو اعتماد کا ووٹ نہ دینےکا فیصلہ ایم ڈبلیوایم پولیٹیکل کونسل نےمشاورت کے بعدکیا ہے۔

اسلام آباد: (ویب ڈیسک) الیکشن کمیشن آف پاکستان (ای سی پی) نے سالانہ مالی گوشواروں کی تفصیلات جمع نہ کرانے والے پارلیمنٹرینز کی تفصیلات جاری کر دیں۔
ای سی پی کی جاری تفصیلات کے مطابق وفاقی وزیرمذہبی امور مفتی عبدالشکور، سابق وزیراعظم شاہد خاقان عباسی بھی گوشوارے جمع نہ کرانیوالوں میں شامل ہیں، چیئرمین کشمیر کمیٹی مخدوم زادہ سید باسط سلطان بخاری اورسید خورشید شاہ نے بھی مالی گوشوارے جمع نہیں کرائے۔
وفاقی وزیر آغا حسن بلوچ، وفاقی وزیر شاہ زین بگٹی، قاسم خان سوری، سردار محمد اختر مینگل نے بھی مالی گوشوارے جمع نہیں کرائے، وفاقی وزیر ساجد حسین طوری، رہنما پی ٹی آئی فواد چودھری، شفقت محمود، علی نواز اعوان سمیت دیگر نے مالی گوشوارے جمع نہیں کرائے۔
گوشوارے جمع نہ کرانیوالوں میں مسلم لیگ ن کے رہنما اور وفاقی وزیر خواجہ آصف، احسن اقبال، اسد عمر، اسد قیصر، پی ٹی آئی رہنما شاہ محمود قریشی، عمر ایوب بھی شامل، سردار ایاز صادق، محسن شاہنواز رانجھا نے بھی مالی گوشوارے جمع نہیں کرائے۔
پی پی رکن اسمبلی سید علی موسیٰ گیلانی، جی ڈی اے کی ڈاکٹر فہمیدہ مرزا، سربراہ ایم کیو ایم پاکستان ڈاکٹر خالد مقبول صدیقی کی جانب سے بھی مالی گوشوارے جمع نہیں کرائے گئے، سینیٹر مصدق ملک، اعظم نذیر تارڑ نے بھی مالی گوشواروں کی تفصیل نہیں دی۔
الیکشن کمیشن آف پاکستان کے مطابق سینیٹر مولا بخش چانڈیو، تاج حیدر، پی ٹی آئی سینیٹر محسن عزیز، اعظم سواتی نے بھی مالی گوشوارے جمع نہیں کرائے۔
الیکشن کمیشن آف پاکستان نے پارلیمنٹرینز و اراکین صوبائی اسمبلی کو مالی گوشواروں کی تفصیلات جمع کرانے کیلئے 15 جنوری تک مہلت دے دی۔
الیکشن کمیشن کی جانب سے جاری اعلامیے کے مطابق 15 جنوری تک تفصیلات نہ جمع کرانے والوں کی رکنیت معطل کر دی جائے گی۔

لاہور: (ویب ڈیسک) وزیراعلیٰ پنجاب چودھری پرویزالٰہی نے اوکاڑہ میں اغواء کے بعد کمسن بچے کے قتل کے واقعہ کا سخت نوٹس لیتے ہوئے آر پی او ساہیوال سے رپورٹ طلب کرلی۔
وزیراعلیٰ پنجاب نے افسوسناک واقعہ میں ملوث گرفتار ملزم کے خلاف سخت قانونی کارروائی کا حکم دیتے ہوئے کہا کہ معصوم بچے کے قتل میں ملوث ملزم قانون کے مطابق سخت سزا کا مستحق ہے۔
انہوں نے کہا کہ بچے کے لواحقین کو انصاف کی فراہمی میں کوئی کسر اٹھا نہ رکھی جائے۔
وزیراعلیٰ چودھری پرویزالٰہی نے معصوم بچے کے لواحقین سے دلی ہمدردی اور افسوس کا اظہار کیا ہے اور انصاف کی فراہمی کی یقین دہانی کرائی ہے۔

لاہور: (ویب ڈیسک) مسلم لیگ ق کے رہنما مونس الہیٰ نے وزیر داخلہ رانا ثنااللہ کو مخاطب کرتے ہوئے کہا ہے کہ جوکرنا ہے کر لیں ،ہم عمران خان کیساتھ کھڑے ہیں۔
ایف آئی اے کی جانب سے تحقیقات پر ردعمل دیتے ہوئے انہوں نے کہا کہ رانا صاحب یہ وہی کیس ہے جو ہائیکورٹ نے خارج کر دیا ہے، جب ہم اپوزیشن میں تھے تب بھی آپ لوگوں سے نہیں ڈرے۔
واضح رہے کہ وفاقی تحقیقاتی ادارے نے مونس الٰہی کے مبینہ فرنٹ مینوں کے خلاف انکوائری شروع کردی ہے۔
ذرائع کے مطابق ایف آئی اے نے مسلم لیگ ق کے رہنما اور سابق وفاقی وزیر مونس الٰہی کے مبینہ فرنٹ مینوں پنجاب اسمبلی کے نائب قاصد قیصر، ارم امین اور ارشد اقبال کے خلاف انکوائری کا آغاز کردیا ہے۔
تینوں افراد کے خلاف انکوائری کا آغاز اُن کے اکاؤنٹس میں مشکوک ٹرانزیکشنز کی بنیاد پر کیا گیا ہے۔

لاہور: (ویب ڈیسک) مسلم لیگ ن کی خواتین ارکان کے تحفظات کے معاملے پر وزیر اعظم شہباز شریف نے پارٹی کی سینئر قیادت کو خواتین ایم پی ایز کے تحفظات دور کرنے کی ہدایت کر دی۔
ذرائع کے مطابق وزیر اعظم شہباز شریف نے کہا کہ ہے کہ سینئر قائدین فوری طور پر خواتین ارکان سے ملاقاتیں کریں، کسی خاتون رکن کے تحفظات ہیں تو انہیں فوری ختم کیا جائے، شہباز شریف نے رانا ثناء اللہ اور سعد رفیق کی سربراہی میں 2 رکنی کمیٹی بھی تشکیل دے دی۔
پارٹی صدر کا کہنا تھا کہ مستقبل کے لائحہ عمل کے بارے میں خواتین ارکان کو اعتماد میں لیا جائے، ن لیگ کی پنجاب میں حکومت آنے پر انہیں مزید ترجیح دی جائے گی، ذرائع کے مطابق رانا ثناءاللہ اور سعد رفیق کل سے خواتین ارکان سے ملاقاتیں شروع کریں گے۔

لاہور: (ویب ڈیسک) چیئرمین پی ٹی آئی عمران خان نے پارٹی ترجمانوں کو ہدایت کی ہے کہ عوام کو حکومت کی ناکامیوں سے متعلق آگاہی دی جائے۔
اپنے زیر صدارت پارٹی ترجمانوں کے اجلاس میں عمران خان نے حکومت کیخلاف پارٹی بیانیے کو مذید موثر بنانے کی ہدایت کی ہے۔
انہوں نے کہا ہے کہ تباہ حال معیشت اور مہنگائی کے پس پردہ حقائق عام تک پہنچائے جائیں اور انسانی حقوق کی پامالیوں سے متعلق موثر آواز بلند کی جائے۔
عمران خان نے ہدایت کی کہ ملک بھر میں ہونے والی مہنگائی ریلیوں میں عوام کو متحرک کیا جائے۔
اس کے علاوہ اجلاس میں عمران خان نے سندھ میں پیپلز پارٹی کی ناکام پالیسیوں اور بیڈ گورننس کو میڈیا پر لانے کی بھی ہدایت کی ہے۔
ان کا کہنا تھا کہ عوام کو بتائیں حکومت نے کس طرح این آر او ٹو سے فائدہ لیا ہے۔

لاہور: (ویب ڈیسک) وزیراعلیٰ پنجاب پرویز الہی نے کہا ہے کہ اللہ نے ابھی کیسے وزیراعلیٰ بنا دیا، خود نہیں پتا چلا۔
ایک تقریب سے خطاب میں انہوں نے کہا کہ پنجاب اسمبلی میں پہلی بار ہوا کہ مسلم لیگ ن کے غنڈے داخل ہوئے، بھاگنے والے ڈپٹی اسپیکر کے حکم پر پولیس ایوان میں داخل ہوئی، یہ تاریخ میں بد نما داغ ہے جو اسمبلی میں ہوا۔
پنجاب اسمبلی کی نئی عمارت کا افتتاح کرتے ہوئے انہوں نے کہا کہ وزیراعلی بنا تو خیال آیا کہ اسمبلی میں جگہ کم ہے نئی بلڈنگ بنائی جائے۔
انہوں نے کہا کہ اسپیکر چیمبر میں 800 افراد کےلیے گنجائش ہے،نئی عمارت میں 400گاڑیوں کی پارکنگ رکھی گئی ہے۔

لاہور: (ویب ڈیسک) مسلم لیگ (ن) نے اسپیکر سبطین خان اور ڈپٹی اسپیکر پنجاب اسمبلی واثق قیوم کے خلاف تحریک عدم اعتماد واپس لے لی۔
اس حوالے سے ذرائع نے بتایا کہ نمبر پورے نہ ہونے پر ن لیگ نے سبکی سے بچنے کے لیے تحریک عدم اعتماد واپس لی جبکہ سابق صدر آصف علی زرداری اور ن لیگ کی لاکھ کوششوں کے باوجود پی ٹی آئی اور ق لیگ کے ارکان توڑے نہ جاسکے۔
ذرائع کے مطابق اراکین پنجاب اسمبلی توڑنے میں ناکامی پر حکمت عملی کے تبدیلی کے نام پر اسپیکر اور ڈپٹی اسپیکر کے خلاف تحریک عدم اعتماد واپس لی کیونکہ پنجاب اسمبلی میں پاکستان تحریک انصاف کے اتحاد کو واضع برتری حاصل ہے۔

پشاور: (ویب ڈیسک) امیر جماعت اسلامی پاکستان سراج الحق نے کہا ہے کہ مرکزی اور صوبائی حکومتوں کے اقدامات کی وجہ سے صوبہ خیبرپختونخوا غیر محفوظ ہوچکا ہے۔
المرکز الاسلامی پشاور میں صوبائی ذمہ داران کے اجلاس سے خطاب کرتے ہوئے انہوں نے کہا کہ بدامنی کی شدید لہر ہے۔ لوگوں کی جان و مال محفوظ نہیں۔اس سب کی ذمہ دار وفاقی اور صوبائی حکومتیں ہیں، ان کی آپس کی چپقلش کی وجہ سے ترقی کا پہیہ جام ہوگیا ہے۔
سراج الحق کا کہنا تھا کہ قبائلی عوام میں احساس محرومی بڑھ رہا ہے۔ معاشی صورتحال بد سے بدتر ہورہی ہے۔مہنگائی میں مسلسل اضافہ ہورہا ہے۔روزمرہ کی اشیاء خورد و نوش کی قیمتوں میں مسلسل اضافہ ہورہاہے ، آٹا، چینی، دال کی قیمتوں میں آئے دن اضافے سے عوام عاجز آچکے ہیں۔آئی ایم ایف اور سودی پالیسیوں نے ملک کو دیوالیہ ہونے کے دہانے پر لا کھڑا کیا۔
انہوں نے مزید کہا کہ حکومت اورقانون نفاذ کرنے والے ادارے عوام کے جان و مال کے تحفظ میں عملاً ناکام ہوچکے ہیں۔ملک کی معیشت تباہی کے دھانے پر کھڑی ہے مہنگائی نے غریب عوام کا جینا دوبھر کردیا۔