انقرہ: (ویب ڈیسک) وزیراعظم شہباز شریف نے کہا ہے کہ ترک کمپنیوں کے ساتھ پاکستان میں برے رویئے پرمعذرت کرتا ہوں۔
وزیراعظم نے ترکی پاکستان بزنس فورم سے خطاب کرتے ہوئے کہا کہ پاکستان اورترکی کے درمیان تاریخی تعلقات ہیں، طیب اردوان ایک ویژنری لیڈرہیں، ترکی نے طیب اردوان کی قیادت میں زبردست ترقی کی ہے، آج ترکی کی برآمدات270ارب ڈالرسے بڑھ گئی ہیں، ترکی نے زندگی کے ہرشعبے میں بے پناہ ترقی کی ہے۔ پاکستان اورترکی کے درمیان تاریخی برادرانہ تعلقات ہیں، ترک قوم کبھی اپنے دوستوں کونہیں بھولتی۔ ترکی نے ہمیشہ مشکل وقت میں پاکستان کا ساتھ دیا۔ ترکی کے ساتھ دوطرفہ تعلقات اورتجارت کوبڑھانا چاہتے ہیں۔
انہوں نے کہا کہ ترک کمپنیوں کے ساتھ پاکستان میں برے رویئے پرمعذرت کرتا ہوں، پاکستان اورترکی کی دوستی لازوال ہے، جب وزیراعلیٰ پنجاب تھا ترک کمپنیوں کے ساتھ شفاف طریقے سے معاہدے کیے گئے تھے۔ کسی سیاسی بلیم گیم میں نہیں پڑنا چاہتا، گارنٹی دیتا ہوں پاکستان میں سرمایہ کاری کریں ہرممکن سہولیات دیں گے، ترک سرمایہ کاروں کا پاکستان میں خیرمقدم کریں گے، ترک سرمایہ کاروں کا ریڈ کارپٹ استقبال کریں گے، ترک سرمایہ کارپاکستان کواپنا دوسرا گھرسمجھیں، ترکی کا دشمن پاکستان کا دشمن ہوگا۔ ترک سرمایہ کاروں کوپاکستان میں انویسٹمنٹ کی دعوت دیتا ہوں۔
اس سے قبل ترک میڈیا کو انٹرویو میں وزیراعظم شہباز شریف نے ترکی کے ساتھ دوطرفہ تجارت کو مستحکم کرنے کے لیے کام کرنے کی یقین دہانی کراوانے کے ساتھ ساتھ اپنے ملک کو خود انحصاری اور سیاسی طور پر مستحکم بنانے کا عزم ظاہر کیا ۔ جہاں اسلام آباد امریکہ کے ساتھ تعلقات کو گہرا اور وسیع کرنا چاہتا ہے، وہیں اس کی توجہ چین پاکستان اقتصادی راہداری کے تحت ملک کے بنیادی ڈھانچے کی تعمیر پر بھی ہے۔
ایک سوال کے جواب میں انہوں نے کہا کہ پاکستان اور ترکی کے تعلقات مثالی ہیں۔ یہ تاریخی تعلقات مشترکہ مذہبی، ثقافتی اور لسانی روابط پر مضبوطی سے قائم ہیں اور دونوں طرف سے سیاسی تبدیلیوں سے بالاتر ہیں۔ اس سال دونوں ممالک سفارتی تعلقات کے قیام کی 75ویں سالگرہ منا رہے ہیں۔ ان ساڑھے سات دہائیوں میں دونوں فریق ہر طرح کی تبدیلیوں کے مقابلے میں ہمیشہ ایک دوسرے کے شانہ بشانہ کھڑے رہے ہیں۔ پاکستان اور ترکی بنیادی قومی مفاد کے تمام مسائل پر ایک دوسرے کی حمایت کرتے ہیں چاہے وہ جموں و کشمیر ہو یا شمالی قبرص۔ میں اس موقع پر ترکی کا شکریہ ادا کرنا چاہوں گا، خاص طور پر جموں اور کشمیر کے تنازع پر اصولی حمایت کے لیے۔ پاکستان اور ترکی دونوں علاقائی اور بین الاقوامی مسائل پر ایک جیسے خیالات رکھتے ہیں اور دوطرفہ، علاقائی اور کثیر جہتی فورمز پر قریبی تعاون سے لطف اندوز ہوتے ہیں۔ لوگوں سے عوام اور ثقافتی روابط مزید فروغ پا رہے ہیں ۔ اب ہم اقتصادی تعاون پر توجہ دے رہے ہیں۔ دو طرفہ تجارت کی موجودہ سطح اب بھی ہمارے تعلقات کی بہترین حالت کا صحیح عکاس نہیں ہے۔ یہ ایک ایسا شعبہ ہے جہاں دونوں ممالک کے لیے بے پناہ مواقع موجود ہیں۔ اپنے دورے کے دوران، میں ترکی کی نمایاں کاروباری کمپنیوں کے سربراہان سے ملاقات کر رہا ہوں تاکہ وہ پاکستان میں توانائی، انفراسٹرکچر، ای کامرس، میونسپل ایگرو بیسڈ انڈسٹری اور آئی ٹی کے شعبوں وغیرہ میں پاکستان میں موجود بے پناہ مواقع سے استفادہ حاصل کر سکیں ۔ 22 کڑور سے زیادہ آبادی کے حامل ملک پاکستان اپنے سرمایہ کاروں کو ایک مضبوط اور بڑی صارف مارکیٹ پیش کرتا ہے جس میں متوسط طبقے کی مسلسل بڑھ رہا ہے ۔ پاکستان میں سرمایہ کاروں کے لیے منافع بخش سرمایہ کاری کے بے شمار مواقع موجود ہیں۔
پاک امریکا تعلقات سے متعلق پوچھے گئے سوال کے جواب میں انہوں نے کہا کہ پاکستان اور امریکا کے درمیان باہمی دلچسپی کے مختلف شعبوں میں دیرینہ اور وسیع البنیاد تعلقات ہیں۔ ہمیں یقین ہے ہماری مسلسل تعمیری مصروفیات خطے میں امن، سلامتی اور ترقی کو فروغ دے سکتی ہیں۔ ہم امریکہ کے ساتھ اپنے تعلقات کو مزید گہرا اور وسیع کرنا چاہتے ہیں، جو پاکستان کی سب سے بڑی برآمدی منڈی ، ایف ڈی آئی اور ترسیلات زر کا ایک بڑا ذریعہ ہے۔ ان تعلقات کے کمرشل ، تجارتی اور سرمایہ کاری کے پہلوؤں کو مزید وسعت دینے کے بہترین مواقع موجود ہیں ۔ پاکستان نے موسمیاتی تبدیلی، صحت، توانائی، تجارت اور سرمایہ کاری سمیت مختلف شعبوں میں امریکا کے ساتھ مذاکرات شروع کیے ہیں جو ہمارے دوطرفہ تعلقات کو مضبوط بنانے میں اہم کردار ادا کر رہے ہیں۔ کچھ امریکی کمپنیاں پاکستان میں بہت اچھا کام کر رہی ہیں۔ ہم بڑی امریکی کمپنیوں کو دعوت دیتے ہیں کہ وہ پاکستان کی منافع بخش مارکیٹ میں سرمایہ کاری کریں اور تجارتی تعلقات کو بہتر بنائیں، خاص طور پر آئی ٹی کے شعبے میں۔ اس سال ہم امریکہ اور پاکستان کے درمیان سفارتی تعلقات کے قیام کے 75 سال مکمل ہونے کی سالگرہ منا رہے ہیں
چین سے متعلق سوال کے جواب میں انہوں نے کہا کہ پاکستان چین کے صدر شی جن پنگ کے وژن کے طور پر بیلٹ اینڈ روڈ انیشی ایٹو کے عملی رابطے ، معالی تعاون ،تجارت میں سہولت ، پالیسی مشاورت اور عوام کی سطح پر رابطوں کے بی آر آئی کے 5 نکات کی مکمل حمایت کرتا ہے۔ سی پیک اعلیٰ معیار کی ترقی کے ایک نئے دور میں داخل ہو رہا ہےاور اس سے بیلٹ اینڈروڈ تعاون کے ذریعے پاکستا ن کو صنعتی اوراقتصادی طورپر جدید بنانے کا عمل تیز ہو گا۔ اس مشترکہ مقصد کی کامیابی کے لئے اس بات کی ضرورت ہے کہ پاکستان اورچین سی پیک کے تحت بنیادی ڈھانچے کی ترقی کے عمل کوبرقرار رکھیں۔ اقتصادی سرگرمیوں میں اضافے کے ساتھ ساتھ مسلسل پالیسی ، حمایت کے ذریعے کاروباری ماحول کو مل کر بہتر بنایا جا نا چاہیے۔ ہم ریلوے ایم ایل ون پرپیشرفت کے لئے چین کے ساتھ مل کر کام کریں گے۔ یہ منصوبہ پاکستا ن کے کثیر الجہتی علاقائی رابطے کے ماڈل وژن اور بعض دیگر بڑے منصوبوں کے لئے تزویراتی اہمیت کا حامل منصوبہ ہے۔ سی پیک کے تحت پاکستان میں سڑکوں اور توانائی کے بنیادی ڈھانچے میں چین کی سرمایہ کاری سے بجلی کی قلت پر قابو پانے ، پیداواری مراکز کو منڈیوں سے ملانے میں مدد ملی ہے۔ ہزاروں مقامی افراد کےلئے روزگار کے مواقع پیداہوئے ہیں اور علاقائی رابطے کو فروغ ملا ہے۔ سی پیک کا ایک اہم محور پاکستان کی صنعتی ترقی ہے، سی پیک کے تحت خصوصی اقتصادی زونز پر کام جاری ہے۔ ہم اہم صنعتی شعبوں میں غیر ملکی سرمایہ کاری کے لئے مراعات دے رہے ہیں۔ پاکستان ریلوے کے بنیادی ڈھانچے کی بہتری اور گوادر پورٹ سے مکمل استفادے سمیت سی پیک کے اعلیٰ معیار کی ترقی کے حصول کے لئے پرعزم ہے۔
ایک اور سوال کے جواب میں شہباز شریف نے کہا کہ جیسا کہ پاکستان اپنی جیو اسٹریٹجی سے جیو اکنامکس کی طرف گامزن ہے، ہم خاص طور پر خطے کے اندر کنیکٹیویٹی، اجتماعی ترقی اور خوشحالی کی بنیاد پر شراکت داری قائم کرنا چاہتے ہیں۔ پاکستان اور بھارت کو باہمی ف،مفید تجارت سے بہت کچھ حاصل کرنا ہے۔ تاہم، 5 اگست 2019 کے بھارتی غیر قانونی اور یکطرفہ اقدامات کے بعد، پاکستان نے اصولی موقف اپنایا اور دو طرفہ سرگرمیوں کو محدود کر دیا ۔ یہ فیصلہ ایک غیر منصفانہ اور جارحانہ پالیسی کے ذریعے محصور کشمیریوں کو ان کے بنیادی حقوق سے محروم کرنے کے قابل مذمت بھارتی منصوبے کی پاکستان کی واضح مذمت کی عکاسی کرتا ہے۔ جب کہ ہم ان معاشی منافع سے بخوبی واقف ہیں جو ہندوستان کے ساتھ ایک صحت مند تجارتی سرگرمی سے حاصل کیے جا سکتے ہیں۔ تاہم کشمیری عوام پر جاری مظالم، مقبوضہ علاقے (IIOJK) کے آبادیاتی ڈھانچے کو تبدیل کرنے کی کوششوں اور کشمیریوں کے حق خودارادیت سے بھارت کی مسلسل انکار کے تناظر میں، اس پیش رفت کا تصور کرنا مشکل ہے۔ تعلقات کو معمول پر لانے کے لیے، ہندوستان کو 5 اگست 2019 کے اپنے اقدامات پر نظرثانی کرنی چاہیے، اور اپنے غیر قانونی قبضے کو برقرار رکھنے کے لیے مقبوضہ علاقے میں مزید تقسیم، انتشار اور آبادیاتی تبدیلیوں کی کوشش نہیں کرنی چاہیے۔ باہمی فائدہ مند تجارت سے زیادہ سے زیادہ فائدہ حاصل کرنے کے لیے، بات چیت اور مشغولیت کے لیے سازگار ماحول پیدا کرنے کی ذمہ داری ہندوستان پر عائد ہوتی ہے۔
کالعدم تحریک طالبان پاکستان سے متعلق پوچھے گئے سوال کے جواب میں وزیراعظم نے کہا کہ کابل کے موجودہ حکام نے بارہا ہمیں اور عالمی برادری کو یقین دہانی کرائی ہے کہ وہ اپنی سرزمین کسی ملک کے خلاف استعمال نہیں ہونے دیں گے۔ انہوں نے تمام دہشت گرد تنظیموں کے خلاف سخت کارروائی کرنے اور اپنی سرزمین سے تمام محفوظ پناہ گاہوں کو ختم کرنے کا عہد بھی کیا ہے۔ باقی عالمی برادری کی طرح ہم توقع کرتے ہیں کہ کابل کے موجودہ حکام ان وعدوں پر قائم رہیں گے جو انہوں نے کیے ہیں۔ ہم دہشت گردی کی لعنت کو شکست دینے اور خطے اور اپنے ملک میں امن و استحکام کے حصول کو یقینی بنانے کے لیے تمام راستے اپنائیں گے۔
Monthly Archives: May 2022
بالی وڈ کے معروف گلوکار ’کے کے‘ چل بسے
کولکتہ: (ویب ڈیسک) بھارت کے نامور گلوکار کرشنا کمار کناتھ المعروف کے کے حرکت قلب بند ہوجانے کے باعث چل بسے۔
رپورٹس کے مطابق 53 سالہ گلوکار کو کولکتہ میں لائیو کنسرٹ کے بعد دل کا دورہ پڑا جس پر انہیں مقامی نجی اسپتال لے جایا گیا تاہم وہ جانبر نہ ہوسکے۔
رپورٹس کا کہنا ہے کہ دل کا دورہ پڑنے سے قبل انہوں نے کنسرٹ میں لائیو پرفارم کیا اور اس دوران مکمل صحت مند تھے۔
کے کے کا پہلا البم ’پل‘ 1999 میں آیا تھا اور پھر انہوں نے پیچھے مڑ کر نہیں دیکھا اور ایک کے بعد ایک سپرہٹ گانے گائے۔
ان کے سپرہٹ گانوں میں فلم ’ہم دل دے چکے صنم‘ کا گیت تڑپ تڑپ، دس بہانے اور تونے ماری انٹریاں شامل ہیں۔ گلوکار ’کے کے‘ کے گائے گئے گیت شاہ رخ خان، سلمان خان اور دیگر ادکاروں پر فلمائے گئے ہیں۔
ہندی فلموں کے علاوہ دیگر مقامی زبانوں میں بھی گانے گائے ہیں اور کئی ایوارڈز اپنے نام کیے ہیں۔
وہ فونز جن پر چند ماہ بعد واٹس ایپ چلنا بند ہوجائے گا!!
لاہور: (ویب ڈیسک) پیغام رسانی کی دنیا کی سب سے بڑی ایپلی کیشن واٹس ایپ آئے روز اپنے صارفین کی سہولت کو مد نظر رکھتے ہوئے اپنے فیچرز میں اضافہ یا تبدیلی کرتی رہتی ہے، اسی تناظر میں چند ماہ کے بعد مخصوص آئی فونز پر واٹس ایپ چلنا بند ہوجائے گا۔
میٹا کی زیرملکیتی ایپلی کیشن کی جانب سے اعلان کیا گیا ہے کہ 24 اکتوبر 2022 سے آئی او ایس 10 اور آئی او ایس 11 کے لیے واٹس ایپ سپورٹ ختم کردی جائے گی، اس سپورٹ ختم ہونے سے آئی فون 5 اور آئی فون 5 سی پر واٹس ایپ کو استعمال کرنا ممکن نہیں ہوگا۔
خیال رہے کہ یہ بات یاد رہے کہ ایپل نے بھی کچھ عرصے قبل آئی فون 5 اور 5 سی کے لیے سپورٹ ختم کردی تھی یعنی ان ڈیوائسز کے لیے اب سافٹ ویئر یا سیکیورٹی اپ ڈیٹس دستیاب نہیں۔
ابھی بھی زیادہ تر آئی فونز میں آئی او ایس 12 یا اس کے بعد کے ورژن موجود ہے مگر ایسے پرانے فونز کی تعداد بھی کافی ہے جس میں پرانے آپریٹنگ سسٹم کو استعمال کیا جارہا ہے، دیگر پرانے آئی فونز استعمال کرنے والے صارفین کو واٹس ایپ استعمال کرنے کے لیے آئی او ایس 12 یا اس کے بعد کے آپریٹنگ سسٹم کو اپ ڈیٹ کرنا ہوگا تاکہ وہ میسجنگ ایپ کو استعمال کرسکیں۔
آئی او ایس 10 اور 11 پر کام کرنے والے صارفین کو واٹس ایپ کی جانب سے ایک پیغام بھیجا جائے گا جس میں لکھا ہوگا کہ وہ اپنی ڈیوائسز کو آئی او ایس کے نئے ورژن پر اپ ڈیٹ کرلیں۔
صارفین آئی فون سیٹنگز میں جائیں اور وہاں جنرل اور پھر سافٹ ویئر اپ ڈیٹ پر کلک کرکے آئی او ایس کے نئے ورژن کو انسٹال کرلیں (اگر ممکن ہو تو)۔
اس پیغام میں مزید بتایا جائے گا کہ واٹس ایپ کی جانب سے آئی او ایس 10 اور 11 پر کام کرنے والی ڈیوائسز کے لیے سپورٹ 24 اکتوبر 2022 کے بعد ختم کردی جائے گی۔
وفاقی وزیر خزانہ نے بجٹ میں سبسڈیز واپس لینے اور ٹیکسز میں اضافے کا عندیہ دیدیا
اسلام آباد: (ویب ڈیسک) وفاقی وزیر خزانہ مفتاح اسماعیل نے بجٹ میں سبسڈیز واپس لینے اور ٹیکسز میں اضافے کا عندیہ دے دیا ہے۔
انہوں نے یہ عندیہ امریکی نشریاتی ادارے کو خصوصی انٹرویو دیتے ہوئے دیا ہے۔
پاکستان مسلم لیگ (ن) سے تعلق رکھنے والے وفاقی وزیر خزانہ مفتاح اسماعیل نے خصوصی انٹرویو کے دوران واضح طور پر کہا کہ آئی ایم ایف کی نظریں بجٹ پر ہیں، اس کے بعد معاہدہ متوقع ہے۔
ایک سوال کے جواب میں انہوں نے اعتراف کیا کہ گزشتہ حکومت نے تیل کے لیے روس سےرابطہ کیا تھا تاہم ان کا کہنا تھا کہ پابندیاں عائد ہونے کی وجہ سے روس نے گزشتہ حکومت کو جواب نہیں دیا تھا۔
مفتاح اسماعیل نے کہا کہ ہم نے گندم کے لیے یوکرین اورروس سے رابطہ کیا ہے، دونوں ممالک میں سے جو بھی گندم فراہم کرے گا ہم خرید لیں گے۔
وفاقی وزیر خزانہ کا کہنا تھا کہ پابندیوں کے باعث روس سے تیل خریدنا مشکل ہو گا۔ انہوں نے کہا کہ بجٹ میں سبسڈیز واپس لینے اورٹیکسز میں کچھ اضافے کا امکان ہے۔
مفتاح اسماعیل نے انٹرویو دیتے ہوئے الزام عائد کیا کہ عمران خان نے ہمیں پھنسانے کے لیے سبسڈیز کا اعلان کیا تھا۔
حکومت کا پٹرولیم مصنوعات کی قیمتیں برقرار رکھنے کا اعلان
اسلام آباد: (ویب ڈیسک) حکومت نے پٹرولیم مصنوعات کی قیمتیں برقرار رکھنے کا اعلان کردیا ہے۔
وفاقی وزارت خزانہ نے پٹرولیم مصنوعات کی قیمتوں سے متعلق نوٹیفیکیشن جاری کردیا ہے۔
جاری کردہ نوٹیفکیشن کے مطابق پٹرول کی قیمت 179 روپے 86 پیسے، ہائی سپیڈ ڈیزل کی قیمت 174 روپے 15 پیسے فی لٹر، مٹی کے تیل کی فی لٹر قیمت 155 روپے 56 پیسے جبکہ لائٹ ڈیزل کی قیمت 148 روپے 31 پیسے فی لٹر برقرار ہے۔
کراچی کے علاقے بلدیہ سے انسانی ہڈیاں برآمد
کراچی: (ویب ڈیسک) شہر قائد کے علاقے بلدیہ سے انسانی ہڈیاں برآمد ہوئی ہیں۔
پولیس حکام کا کہنا ہے کہ تمام ہڈیوں کا ڈی این اے ٹیسٹ کروایا جائے گا، انسانی ہڈیاں پلاٹ پر تعمیرات کے لئے کی گئی کھدائی کے دوران برآمد ہوئیں۔
ایس ایس پی کیماڑی نے کہا کہ ملنے والی ہڈیوں سے بظاہر لگتا ہے کافی پہلے دفن کیا گیا، بظاہر ہڈیاں ایک بچے اور دو بڑوں کی ہیں، ڈی این اے ٹیسٹ سے جنس، عمر اور وجہ موت کا تعین ہوسکے گا۔
ہوائی جہاز سے شادی کی خواہشمند 23 سالہ لڑکی
ڈورٹمنڈ: (ویب ڈیسک) 23 سالہ جرمنی کی رہائشی سارہ روڈو کا کہنا ہے کہ وہ طیاروں کی طرف جنسی کشش محسوس کرتی ہیں اور ایک اپنے ہی ایک کھلونے طیارے سے شادی کرنا چاہتی ہیں۔
روڈو کا اپنے انٹرویو میں کہنا تھا کہ اس کا پسندیدہ طیارہ بوئنگ 737 ہے، جس پر وہ جتنی بار ہو سکے پرواز کرتی ہے۔ اس کے پاس گھر میں ہوائی جہاز کے 50 سے زیادہ ریپلیکا ماڈلز موجود ہیں اور ہوسکتا ہے کہ وہ ان میں سے ایک سے شادی کر لے۔
روڈو اپنے پسندیدہ ہوائی جہاز کے ماڈل کو “ڈکی” کہتی ہیں اور اسے اپنا بوائے فرینڈ مانتی ہیں۔
روڈو خود کو Objectum Sexual کے طور پر شناخت کرتی ہیں، یعنی وہ بے جان اشیاء کی طرف جنسی طور پر راغب ہیں۔ وہ ماضی میں ایک ٹرین کے عشق میں بھی گرفتار ہوچکی ہیں۔
جب ان سے پوچھا گیا کہ طیارے میں انہیں خصوصی طور پر کیا اچھا لگتا ہے تو ان کا کہنا تھا کہ مجھے سب کچھ پسند ہے لیکن خاص طور پر ہوائی جہاز کا ’چہرہ‘، اُس کے پر اور انجن مجھے ’پُرکشش‘ لگتے ہیں۔
جب عامر خان نے لڑکی کے ٹھکرانے پر اپنا سر منڈوایا
ممبئی: (ویب ڈیسک) بالی وڈ کے سپر اسٹار عامر خان نے چار دہائیوں پر محیط اپنے اداکاری کے کیریئر میں بے شمار بہترین کردار نبھائیں ہیں۔
یادوں کی بارات اور مدہوش میں بطور چائلڈ اداکار نظر آنے کے بعد عامر خان نے 1984 کی فلم ہولی سے بطور نوجوان باضابطہ طور پر اپنے فلمی کیریئر کا آغاز کیا۔
بھارتی میڈیا رپورٹس کے مطابق عامر خان اپنی پہلی فلم ہولی میں ایک منفرد ہیر اسٹائل( بالکل چھوٹے بال) میں نظر آئے تھے تاہم بعد میں انہوں نے ایک انٹرویو میں انکشاف کیا تھا کہ وہ ہیر اسٹائل فلم کیلئے نہیں بلکہ میں نے ایک لڑکی کی جانب سے ٹھکرائے جانے پر اپنا سر منڈوایا تھا۔
رپورٹس کے مطابق عامر خان نے ایک پرانے انٹرویو میں اعتراف کیا تھا کہ وہ ‘انتہائی اعلیٰ درجے کے عاشق’ ہیں کیونکہ انہوں نے ایک بار لڑکی کی طرف سے ٹھکرنے پر اپنا سر منڈوالیا تھا جس کے بعد فلم کے ہدایتکار بھی مجھے دیکھ کر حیران ہوگئے تھے۔
ان کا کہنا تھا کہ لوگوں کا خیال تھا کہ میں یہ نے یہ ہیر اسٹائل فلم کیلئے رکھا لیکن دراصل جس سے میں پیار کرتا تھا اس کے چھوڑ جانے پر وہ میرا بچکانہ ردعمل تھا۔
اس کے علاوہ انٹرویو میں عامر نے یہ بھی انکشاف کیا کہ انہوں نے اپنی سابقہ بیوی رینا دتہ کو اپنے خون سے خط لکھا تھا اور یہی وجہ تھی کہ وہ شادی کیلئے راضی ہوئی تھیں۔
واضح رہے کہ عامر خان اپنی نئی فلم لال سنگھ چڈھا میں کرینہ کپور کے ہمراہ اداکاری کرتے نظر آئیں گے۔
وزیراعظم کی مداخلت پر8 ترک کمپنیوں کیساتھ پاکستانی حکام کے بیشتر تنازعات نمٹا دیےگئے
اسلام آباد: (ویب ڈیسک) وزیراعظم شہباز شریف کی مداخلت پر ترکی کی 8 کمپنیوں کے ساتھ پاکستانی حکام کے اکثر تنازعات نمٹا دیےگئے۔
وزیراعظم نے دیگر تنازعات بھی جلد نمٹانے کی ہدایت کی ہے، یہ مقدمات ترکی کی سرمایہ کار کمپنیوں کے پاکستان میں مسائل، ٹیکس رعایتوں اور مختلف سطح پر زیر التوا مقدمات سے متعلق تھے۔
ذرائع کے مطابق ترک کمپنیوں کے پاکستانی حکام کے ساتھ بقیہ تنازعات وزیراعظم شہباز شریف کی ہدایت پر تیز رفتاری کے ساتھ نمٹائےجارہے ہیں۔
خراب کوالٹی کا تیل لانے پر طالبان نے 12 ایرانی ٹینکروں کو واپس بھیج دیا
نمروز: (ویب ڈیسک) طالبان نے خراب کوالٹی کا تیل افغانستان میں لانے پر 12 ایرانی آئل ٹینکرز کو ملک میں داخل ہونے سے روک دیا۔
افغان میڈیا نے طالبان کے سیکیورٹی حکام کے حوالے سے بتایا کہ ایران سے درآمد کیے گئے تیل کے 12 ٹرکوں میں ناقص معیار کا تیل موجود پایا گیا اور انہیں واپس ایران بھیج دیا گیا۔
صوبہ نمروز کے طالبان گورنر، صوبائی پولیس چیف، نیشنل ڈائریکٹوریٹ آف سیکورٹی کے نمائندے، کسٹمز اور محکمہ نارم اینڈ سٹینڈرڈ کے حکام کی موجودگی میں طالبان چیف آف پولیس آفس میں کرائم کنٹرول کے ڈائریکٹر قاری عبدالرحیم حذیفہ نے بتایا کہ نارم اینڈ اسٹینڈرڈ ڈپارٹمنٹ کی لیبارٹری میں جانچ کے بعد ایران سے درآمد کیے گئے 500,000 لیٹر آئل کے 12 ٹینکروں میں خراب کوالٹی کا تیل پایا گیا جس کے بعد ٹینکروں کو واپس ایران بھیج دیا گیا۔
واضح رہے کہ اس سے قبل طالبان کے نائب وزیر اعظم ملا عبدالغنی برادر کی زیر صدارت اقتصادی کمیشن کے اجلاس میں فیصلہ کیا گیا تھا کہ مذکورہ بالا ٹیم خراب کوالٹی کے پیٹرولیم اور گیس مصنوعات کی نشاندہی کرنے اور ان کی درآمد پر پابندی عائد کرنے کی ذمہ دار ہوگی۔
دوسری جانب صوبہ نمروز کے متعدد مقامی لوگوں نے طالبان کے اس اقدام کو سراہا ہے اور کہا ہے کہ ناقص معیار کا تیل فضائی آلودگی میں معاون اور شہریوں کیلئے سنگین مسائل کا باعث بن رہا ہے۔
متحدہ عرب امارات اور اسرائیل کے درمیان ’فری ٹریڈ‘ کا معاہدہ طے پاگیا
دبئی: (ویب ڈیسک) اسرائیل اور متحدہ عرب امارات نے آزاد تجارتی معاہدے پر دستخط کر دیئے جو کسی بھی عرب ملک کے ساتھ اسرائیل کا پہلا بڑا تجارتی معاہدہ ہے۔
عالمی خبر رساں ادارے کے مطابق اسرائیل اور متحدہ عرب امارات کے درمیان تجارت کو فروغ دینے کے لیے فری ٹریڈ ڈیل طے پاگئی جس پر دونوں ممالک کے حکام نے دبئی میں دستخط کردیئے۔ یہ معاہدہ مہینوں پر مشتمل مذاکرات کے بعد طے پایا۔
ایک تقریب میں آزاد تجارت کے معاہدے پر دستخط کی تصدیق متحدہ عرب امارات میں اسرائیل کے سفیر عامر ہائیک نے اپنی ٹوئٹ میں بھی کی۔ وہ پہلے ہی اس معاہدے کو خطے میں تجارتی فروغ کا سنگ میل قرار دے چکے ہیں۔
اسی طرح اسرائیل میں متحدہ عرب امارات کے سفیر محمد الخجا نے کہا کہ یہ معاہدہ ایک بے مثال کامیابی ہے۔ دونوں ممالک کے تاجروں کو مارکیٹوں تک کم ٹیرف میں تیز تر رسائی ملے گی جس سے دوطرفہ تجارت میں اضافہ ہوگا۔
اسی طرح امارات-اسرائیل بزنس کونسل کے صدر ڈوریئن باراک نے کہا کہ تجارتی معاہدے میں ٹیکس کی شرح، درآمدات اور دانشورانہ املاک کی وضاحت کی گئی ہے، جس سے مزید اسرائیلی کمپنیوں کو متحدہ عرب امارات بالخصوص دبئی میں دفاتر قائم کرنے کی ترغیب ملے گی۔
واضح رہے کہ امریکا کی ثالثی میں 2020 کو متحدہ عرب امارات نے اسرائیل کے ساتھ سفارتی اور تجارتی تعلقات بحال کرلیے تھے اور دونوں ممالک کے درمیان دوطرفہ تجارت میں اضافہ ہوا ہے۔
وزیراعظم ریلیف پروگرام، آٹے اور چینی کی قیمت میں کمی
اسلام آباد: (ویب ڈیسک) وزیراعظم شہباز شریف کے غریبوں کے لیے بڑے پیمانے پر ریلیف پروگرام کے اعلان کے بعد آٹے اور چینی کی قیمت میں کمی کر دی گئی ہے۔
حکومتی ترجمان کے مطابق 20 کلو آٹے کے تھیلے کی قیمت 950 روپے سے کم کر کے 800 روپے کر دی گئی ہے، مارکیٹ میں آٹے کے 20 کلو تھیلے کی قیمت 1250 روپے سے زائد ہے،
ترجمان کا کہنا تھا کہ چینی کی قیمت میں بھی کمی کر دی گئی ہے، چینی کی قیمت 85 روپے سے کم کر کے 70 روپے فی کلو کی گئی ہے، حکومت گھی پر بھی فی کلو 100 روپے سبسڈی دے رہی ہے، چاول اور دالوں پر 15 سے 20 روپے فی کلو رعایت دی جا رہی ہے، یہ تاریخی ریلیف پیکج سابق حکومت کے ریلیف سے 50 فیصد زائد ہے۔
سیاستدانوں کے تمام میگا کیسزکی نگرانی کیلئے مانیٹرنگ جج ہونا چاہیے: عمران خان
لاہور: (ویب ڈیسک) پاکستان تحریک انصاف (پی ٹی آئی) کے چیئر مین اور سابق وزیراعظم عمران خان نے کہا ہے کہ سیاستدانوں کے تمام میگا کیسزکی نگرانی کیلئے مانیٹرنگ جج ہونا چاہیے۔
سماجی رابطے کی ویب سائٹ ٹویٹر پر سلسلہ وار ٹویٹس میں انہوں نے لکھا کہ نیب قانون میں ترمیم بنیادی طور پر این آراو ہے نیب قانون میں ترمیم پاکستان میں اینٹی کرپشن مہم کوتباہ کرےگی۔ سابق وزیراعظم اور مسلم لیگ ن کے قائد نوازشریف، وزیراعظم شہباز شریف اور سابق صدر اور پاکستان پیپلز پارٹی کے شریک چیئر مین آصف زرداری کیخلاف کیسز بند کیے جائیں گے نیب قانون میں ترمیم سے میگا کرپشن کا نیا دور شروع ہو جائے گا۔
ٹویٹ میں عمران خان نے کہا کہ سیاستدانوں کے تمام میگا کیسزکی نگرانی کیلئے مانیٹرنگ جج ہونا چاہیے، منصفانہ ٹرائل کو یقینی بنانے کے لیے سپریم کورٹ کو ازخود نوٹس لینا چاہیے۔ 5 ماہ گزر چکے اور ایف آئی اے فردجرم عائد کرنے میں ناکام رہی ہے پتہ چلتا ہے کس طرح بڑے چور نظام کا استحصال اور ہیرا پھیری کرتے ہیں، کرائم منسٹر دوستانہ استغاثہ کے ذریعے ریکارڈ میں ردوبدل کر رہے ہیں۔
سابق وزیراعظم نے کہا کہ کرائم منسٹر اپنے اور خاندان کے کیسز میں مداخلت کر رہے ہیں ایف آئی اے نے وزیر کرائم کے کہنے پر ضمنی ریفرنس کاچالان واپس لیا، ایف آئی اے وزیر کرائم کےکہنے پر کیس کو مکمل طور پر تباہ کر رہا ہے۔
