چیئرمین پیپلز پارٹی بلاول بھٹو نے کہا کہ کراچی میں بھارت جیسی صورتحال ہوئی تو وزیراعظم اور ان کے وزرا ذمہ دار ہوں گے۔

کراچی میں پریس کانفرنس کرتے ہوئے انہوں نے کہا کہ وفاقی حکومت کورونا سمیت عوام کی صحت اور زندگی پر بھی سیاست کرنا چاہتی ہے۔

بلاول بھٹو نے کہا کہ کراچی میں کورونا کیسز کی مثبت شرح 30 فیصد سے زائد ہو گئی ہے۔ کورونا کی نئی قسم کے پھیلاؤ کی شرح بہت زیادہ ہے۔

ان کا کہنا تھا کہ اس صورتحال میں سندھ کی مدد کرنے کے بجائے ہمارا مذاق اڑایا جارہا ہے۔ وفاقی حکومت کو پتہ تھا کہ کورونا کیسز میں اضافہ کے باعث سندھ حکومت کو سخت فیصلے کرنے پڑیں گے۔

بلاول بھٹو زرداری نے ایک بار پھر حکومت پر آزاد کشمیر الیکشن میں دھاندلی کے الزامات لگاتے ہوئے کہا کہ کشمیر کے انتخابات میں وفاقی وزیر نے پیسے بانٹے، ماضی میں کبھی کشمیر کی تاریخ میں بھی اس طرح کی دھاندلی نہیں ہوئی۔

انہوں نے کہا کہ خان صاحب کی حکومت میرے جیالوں کو پکڑے یہ برداشت نہیں کریں گے، نہ ماضی میں پیپلزپارٹی نے سیاسی انتقام برداشت کیا نہ آج کرے گی۔

ان کا کہنا تھا کہ حکومت نے آزاد کشمیر میں علما کی نشست کے لیے سابق طالبان نمائندے کو نامزد کیا، اس فیصلے سے دنیا میں بہت غلط تاثر جائے گا۔ پاکستان پیپلزپارٹی حکومت کے اس فیصلے کی مذمت کرتی ہے۔

گورنر سندھ عمران اسماعیل نے صوبے میں ایس او پیز پر عمل نہ ہونا وزیراعلیٰ اور ان کی ٹیم کی ناکامی قرار دیتے ہوئےکہا ہےکہ بندش کے فیصلے میں سندھ حکومت نے وفاق کو  آن بورڈ نہیں لیا۔

کراچی میں پریس کانفرنس کرتے ہوئے گورنر سندھ کا کہنا تھا کہ سپریم کورٹ کا فیصلہ ہے کہ صوبہ اکیلے فیصلہ نہیں کرسکتا، ہم مکمل کرفیو کی طرح کے لاک ڈاؤن کے خلاف ہیں۔

 عمران اسماعیل کا کہنا تھا کہ وزیر اعلیٰ سندھ ایڈمنسٹریٹر ہیں ، انہیں جیسی مدد چاہیے ہم حاضر ہیں،  آپ بلاکر بات کریں ہم پر بھروسہ کریں ہم ساتھ دینے کو تیار ہیں۔

ان کا کہنا تھا کہ ہم ایک مہذب قوم ہیں، آپ ایسے کیسے فوری مارکیٹیں بندکرسکتے ہیں؟

اوگرا نے اگست کیلئے ایل پی جی کی قیمت میں اضافہ کردیا ہے۔

تفصیلات کے مطابق ایل پی جی کی قیمت میں 9 روپے 53 پیسے فی کلو گرام اضافہ ہو گیا ہے۔

ذرائع کے مطابق ایل پی جی کا 11.8 کلو کا گھریلو سلنڈر 112 روپے 50 پیسے مہنگا ہوگیا ہے۔

واضح رہے کہ جولائی میں ایل پی جی کا گھریلو سلنڈر 1889 روپے 57 پیسے کا تھا۔

31اگست کے بعد بغیر ویکسین تنخواہ بند،ریسٹورنٹس پرصرف ہوم ڈلیوری کی اجازت،وبا نہ رکی تو 5دن میں ہسپتالوں کی گنجائش ختم، صرف چند شعبے بند کررہے ہیں :مراد شاہ، کابینہ اجلاس ملتوی ، مزید 86اموات،4537نئے مریض، مثبت کیسز کی شرح 7.79فیصد،سکردو36.47،کراچی میں 25فیصد،ڈیلٹا وائرس سے 4ماہ تا8سال کے بچے بھی متاثر، لاہور میں نئی قسم کی تشخیص

کراچی ، لاہور، اسلام آباد (سٹی رپورٹر، خصوصی نامہ نگار،نیوز رپورٹر، اپنے سٹاف رپورٹر سے ،اپنے سیاسی رپورٹر سے ،ایجوکیشن رپورٹر)ملک میں کورونا کے وار تیز ،مزید 86افراد دم توڑ گئے جبکہ 4537نئے مریض سامنے آگئے ، سندھ حکومت نے آج سے لاک ڈائون کا فیصلہ کرتے ہوئے 8اگست تک سرکاری دفاتر ، مارکیٹیں ، پبلک ٹرانسپورٹ بند ،امتحانات ملتوی کردئیے ، ڈبل سواری پر پابندی لگادی گئی،سٹاک ایکسچینج ،بینک، تندور،پٹرول پمپ ، کریانہ اور میڈیکل سٹور کھلے رہیں گے ،پنجاب حکومت نے راولپنڈی کے 7علاقوں میں 6اگست تک سمارٹ لاک ڈائون لگادیا، وزیراعلیٰ مراد علی شاہ کی زیرصدارت ٹاسک فورس کے اجلاس میں سندھ میں لاک ڈائون کا فیصلہ کیا گیا، اجلاس میں اپوزیشن کے ارکان اور کاروباری شخصیات کو بھی مدعو کیا گیا، وزیراعلیٰ نے کہا سب کواعتماد میں لینا چاہتا ہوں، بعد ازاں پریس کانفرنس کرتے ہوئے مراد علی شاہ نے کہا ٹاسک فورس نے مشکل مگر سودمند فیصلے کیے ، گزشتہ سال مکمل لاک ڈائون کا فائدہ ہواتھا،ٹاسک فورس فیصلوں کی وجہ سے نقصان کم ہوا،تیسری لہر میں یہاں صورتحال بہتر تھی مگر شمالی علاقہ جات اورلاہور میں نقصان ہوا تھا، لاہور میں کرفیو جیسے اقدامات کیے گئے ،تب کسی نے آواز نہیں اٹھائی، انہوں نے کہا اب ڈیلٹا ویرینٹ 100فیصد تک ہوگیا ہے ، وائرس کے پھیلائو کو نہ روکا گیا تو اگلے پانچ روز میں ہسپتالوں میں گنجائش ختم ہوجائے گی،مکمل لاک ڈاؤن نہیں کر رہے ، مخصوص شعبے بند کررہے ہیں، اسدعمر اور فیصل سلطان سے بات کی اور انہیں فیصلوں پر اعتماد میں لیا ہے کہ لاک ڈائون کو کامیاب کرنے میں ہماری مدد کریں، 9اگست کو ہم پابندیاں ہٹانے کی پوزیشن میں ہونگے ، اگر شہریوں نے مدد کی تو بہتر نتائج آئیں گے ،لاک ڈائون کے دوران ویکسی نیشن جاری رہے گی، صرف ویکسی نیشن کیلئے چھوٹی ٹرانسپورٹ کھلے گی،ریٹیل کاروبار بند رکھناہو گا،سندھ کابینہ کا منگل کے روز ہونے والا اجلاس ملتوی کررہے ہیں، سندھ اسمبلی کا اجلاس مکمل آن لائن کرنے کیلئے بات چیت کررہے ہیں،ہمیں تھوڑی بہت قربانی دینی ہوگی،ہم نے فیصلے ڈاکٹرز کے مشورے پر کیے ،طبی ماہرین نے کہاکہ اگر بروقت فیصلے نہ کیے تو آخرمیں فرنٹ لائن کو نقصان ہوگا۔سندھ حکومت کے جاری نوٹیفکیشن کے مطابق پابندیوں کا اطلاق آج سے 8اگست تک ہوگا،سرکاری ،نجی دفاتر، تعلیمی ادارے اورکوچنگ سینٹرز بند رہیں گے ، ڈبل سواری پر پابندی ہوگی،مچھلی ، گوشت ،سبزی، دودھ، کریانہ سٹورزصبح 6سے شام 6 بجے تک کھلیں گے ، بیکری ،تنور ، فروٹ کے ٹھیلے ، ہسپتال، لیبارٹریز ، میڈیکل سٹورز اورپٹرول پمپس کھلے رہیں گے ، بجلی،گیس فراہم کرنے والے ادارے ،واٹر سپلائی اور موبائل کمپنیوں کو کم سٹاف کیساتھ خدمات فراہم کرنے کی اجازت ہوگی ، سٹاک ایکسچینج اوربینکس محدود سٹاف کے ساتھ کام کر سکیں گے ،فلاحی ادارے ، میڈیا پرسن، ہاکرز خدمات جاری رکھیں گے ،نماز جنازہ کیلئے کم سے کم افراد شریک ہونگے ،متعلقہ ایس ایچ او سے اجازت لینا لازمی ہوگی ، سڑکوں پر شہریوں کے ویکسی نیشن سرٹیفکیٹ چیک ہوں گے ، 31 اگست کے بعد ویکسین نہ لگوانے والوں کو تنخواہ نہیں ملے گی،ریسٹورنٹس میں صرف ہوم ڈلیوری ہوگی ،عملے کیلئے ویکسین لازمی ہے ، بین الصوبائی، انٹرسٹی اور انٹراسٹی پبلک ٹرانسپورٹ بند ہوگی،سماجی، مذہبی ، سیاسی اجتماعات پر پابندی ہوگی،کھیلوں کی سرگرمیاں معطل رہیں گی، غیر ضروری گھر سے نکلنے پر پابندی ہوگی،کار میں دو سے زائد افراد سفر نہیں کرسکیں گے ،تمام یونیورسٹیز کو 8 اگست تک بند کردیا گیا ،امتحانات بھی 8 اگست تک ملتوی کردئیے گئے ،صرف قانون نافذ کرنے والے ،صحت اورضروری سروسز فراہم کرنے والے ادارے کھلیں گے ،55سال سے زائد عمر کے ملازمین کے دفاتر آنے پرپابندی ہوگی، عبادت کے مقامات میں مختصر نمازیوں کے ساتھ نمازی لائے جائیں جس میں سماجی فاصلہ برقرار رکھا جائے ، اسی ٹرانسپورٹ کو روڈ پر چلنے کی اجازت دی جائے گی جس کی کلیئرنس متعلقہ ڈپٹی کمشنرز اور ایس ایس پیز دیں گے ،مسافر سماجی فاصلہ رکھتے ہوئے سفر کریں گے ، برآمدی صنعتوں کو کھلا رکھا جائے گا۔ادھر وفاقی وزیر برائے ترقی و منصوبہ بندی اسد عمر کی زیر صدارت این سی او سی کا اجلاس ہوا،اجلاس کے بعد ٹویٹ میں کہا گیا کہ فورم نے کراچی میں کورونا وائرس کے پھیلا ئوکا تفصیلی جائزہ لیا ہے اور اس وائرس کے بڑھتے ہوئے پھیلا ئو کے رجحان سے نمٹنے کیلئے حکومت سندھ کی ہر ممکن مدد کرنے کا فیصلہ کیا ہے ، وفاقی حکومت سندھ حکومت کیلئے امدادی اقدامات کر رہی ہے جس میں آکسیجن کی سہولیات والے بستر ، وینٹی لیٹرز کے علاوہ آکسیجن کی دستیابی،قانون نافذ کرنے والے اداروں کی تعیناتی سمیت ایس او پیز اور احتیاطی تدابیر کے نفاذ کے لئے مصروف عمل ہے ،سندھ حکومت کے ترجمان مرتضیٰ وہا ب نے کہا این سی اوسی کوبائی پاس کرنے والی بات درست نہیں، لاک ڈاؤن کے فیصلے کواین سی اوسی کے ساتھ شیئرکیاگیا،رمضان کے دوران لاہورمیں سخت لاک ڈاؤن کیاگیاتھا، ہم نے اس وقت کوئی اعتراض نہیں کیاتھا، زمینی حقائق سامنے رکھتے ہوئے فیصلہ کیاہے ، ادھر آزاد کشمیر حکومت نے سیاحوں کو آزادکشمیر داخلے کی مشروط اجازت دیدی، صرف کوروناویکسین سرٹیفکیٹ کے حامل 18 تا 60 سال کے افراد آزادکشمیر میں داخل ہوسکتے ہیں ،پنجاب حکومت نے راولپنڈی میں مثبت کیسز کی شرح 12فیصد تک پہنچنے پر 7علاقوں میں سمارٹ لاک ڈائون کے احکامات جاری کردئیے ،6اگست تک پابندیاں نافذ رہیں گی،محکمہ ہائیر ایجوکیشن نے بھی 2اگست سے تعلیمی ادارے کھولنے کا نوٹیفکیشن جاری کردیا،اساتذہ کیلئے ویکسین لازمی قرار دی گئی ہے ۔قراقرم انٹرنیشنل یونیورسٹی مزید ایک ہفتہ بند رکھنے کا فیصلہ کیا گیا ہے جبکہ سول ایوی ایشن اتھارٹی نے کل یکم اگست سے کورونا ویکسین کے بغیر اندرون ملک سفر پر پابندی کانوٹیفکیشن جاری کردیا،ادھر این سی او سی کے مطابق ملک میں مصدقہ کیسز کی تعداد 10لاکھ 24ہزار 861ہوگئی، جن میں 9لاکھ 38ہزار 843صحت یاب ہوگئے ، 23ہزار 295اموات ہوئیں، 3ہزار 117مریضوں کی حالت تشویشناک بتائی گئی ہے ، گزشتہ روز ملک بھر میں کورونا کے مثبت کیسز کی شرح 7.79 فیصد ،سکردو 36.47فیصد،کراچی میں 25فیصد رہی،کراچی میں ڈیلٹا وائرس سے چار ماہ کے بچے سمیت 8 سال تک کے بچے بھی شکار بن گئے ،لاہور میں 9 ، پنجاب میں 24اموت ہوئیں،شہر میں کورونا کی بھارتی قسم ڈیلٹا کے بعد نئی قسم کیلیفورنیا ایپسیلون وائرس کے 5کیسز کی تشخیص ہوئی ہے ، لاہور میں پنجاب بھر سے مشتبہ 23نمونے بھیجے گئے تھے ، گزشتہ روز ایک دن میں کورونا ویکسی نیشن کا ریکارڈ ٹوٹ گیا،24گھنٹے میں ریکارڈ 8 لاکھ 67226 افراد کی ویکسی نیشن کی گئی۔

حکومت نے اسپاٹ مارکیٹ سے مہنگی مائع قدرتی گیس (ایل این جی) کی خریداری کو ‘نسبتاً کم بُرا فیصلہ’ قرار دیتے ہوئے کہا ہے کہ کوئی بھی بین الاقوامی اشیا کی مارکیٹ کے بارے میں پیشگوئی کرکے اسے شکست نہیں دے سکتا۔

ڈان اخبار کی رپورٹ کے مطابق پیٹرولیم ڈویژن سے جاری اعلامیے میں کہا گیا کہ پاکستان ایل این جی لمیٹڈ (پی ایل ایل) بورڈ ستمبر 2021 کے لیے 4 ایل این جی ‘اسپاٹ’ ٹینڈر 15 ڈالر فی ایم ایم بی ٹی یو پر قبول کرنے پر مجبور ہوا، دوسری صورت میں متبادل ایندھن (یعنی فرنس آئل) جو کہ اس سے بھی زیادہ مہنگا ہے، اس سے ستمبر میں بجلی کی قیمتوں میں کم از کم 20 فیصد تک اضافہ ہوتا۔

ستمبر میں پی ایل ایل کی جانب سے قبول کردہ 4 اسپاٹ ایل این جی کی ترسیل کے لیے بولیاں 15.2 سے 15.5 ڈالر فی ایم ایم بی ٹی یو کے درمیان تھیں جو کہ 2015 میں ایل این جی کی درآمد کے آغاز کے بعد سے سب سے زیادہ ہے۔

دلچسپ بات یہ ہے کہ ستمبر اور اکتوبر کے لیے تقریباً 8 بولیاں منسوخ کر دی گئیں جن میں قطر سے 13.79 سے 13.99 ڈالر فی ایم ایم بی ٹی یو شامل تھیں جبکہ دیگر بولیاں 16 ڈالر تک پہنچ گئی تھیں۔

15.5 ڈالر فی ایم ایم بی ٹی یو کی بولی ایکس شپ کے لیے تھی، اختتامی ڈسٹری بیوشن نیٹ ورک پر فروخت کی قیمت 20 ڈالر فی ایم ایم بی ٹی یو سے زیادہ ہوگی۔

پیٹرولیم ڈویژن نے زائد قیمتوں کے حق میں جواز پیش کیا کہ حال ہی میں ’اسپاٹ‘ ایل این جی کی قیمت 15 ڈالر فی ایم ایم بی ٹی یو سے زیادہ ہو چکی ہے جس کی متعدد وجوہات ہیں، جن میں پاپوا نیو گنی میں ایکسون کی پیداوار میں تخفیف اور طلب سے متعلقہ عوامل مثلاً چین اور جاپان میں گرم موسم کی وجہ سے طلب میں اضافہ ہے۔

ڈویژن نے وضاحت دی کہ پاکستان کی ماہانہ ایل این جی کی تقریباً ایک تہائی خریداری ’اسپاٹ‘ کی بنیاد پر ہوتی ہے اور بقیہ دو تہائی طویل مدتی معاہدے کی بنیاد پر ہوتی ہے جو کہ بنیادی طور پر ایل این جی درآمد کرنے والے ممالک کی عالمی اوسط کے مطابق ہوتی ہے۔

وزارت نے دعویٰ کیا کہ آر ایل این جی کی قلت کی وجہ سے حکومت گرمیوں میں بجلی کی مانگ کو پورا کرنے کے لیے ڈیزل جلانے پر مجبور ہوئی اور اس کے نتیجے میں ستمبر میں بجلی کی لاگت تقربیاً 50 فیصد زیادہ رہی۔

پیٹرولیم ڈویژن نے کہا کہ ’یہ ان دو برائیوں میں سے کم ہے‘۔

انہوں نے مزید کہا کہ اگر سسٹم میں وافر مقدار میں آر ایل این جی نہ ہوتی تو صنعتی شعبے کے لیے جبری گیس لوڈشیڈنگ کی ’موزوں وقت پر قیمت‘ کا بھی حساب دینا پڑتا۔

وزارت پیٹرولیم کے مطابق خام تیل کی قیمتیں فی بیرل 75 ڈالر ہیں جبکہ درآمد شدہ کوئلے کی قیمت میں بھی رواں برس جنوری سے تقریباً 45 فیصد اضافہ ہوا ہے۔

انہوں نے کہا کہ اس سے ظاہر ہوا کہ بین الاقوامی سطح پر طلب اور محدود سپلائی عوامل کی وجہ سے زیادہ تر توانائی سے متعلقہ اشیا کی قیمتیں بڑھی ہیں کیونکہ معیشتیں کووڈ 19 کے بعد کھلتی ہیں۔

وزارت توانائی نے کہا کہ کوئی بھی بین الاقوامی اشیا کی مارکیٹ کے بارے میں پیشگوئی کرکے اسے شکست نہیں دے سکتا اور اسپاٹ خریداری کے وقت (یعنی پہلے یا بعد میں) اور اصل کے درمیان کوئی ثبوت پر مبنی ارتباط نہیں تھا۔

انہوں نے کہا کہ ایل این جی کی قیمت طلب و رسد کے عوامل کی وجہ سے وقتاً فوقتاً مختلف (اوپر اور نیچے) ہوتی ہے۔

وزارت نے کہا کہ پاکستان 100 فیصد طویل مدتی معاہدے کی خریداری کا انتخاب کر سکتا ہے۔

علاوہ ازیں آئل اینڈ گیس ریگولیٹری اتھارٹی (اوگرا) نے کہا کہ پائپ لائن کی تعمیر اور آپریشن کے لائسنس جاری کر کے ایک آخری سنگ میل حاصل کیا ہے۔

انہوں نے بتایا کہ اینرگاس ٹرمینل (پرائیویٹ) لمیٹڈ اور تعبیر انرجی (پرائیویٹ) کو ایل این جی سپلائی چین کے لیے لائسنس جاری کیے گئے۔

انڈس واٹر کمشنر سید مہر علی شاہ نے کہا ہے کہ بھارت سے پانی کے معاملات پر کوئی ڈیڈ لاک نہیں۔

 سید مہر علی شاہکا کہنا تھاکہ دونوں ملکوں کے درمیان برف پگھل گئی ہے اور اب بھارت سے پانی کے معاملات پر کوئی ڈیڈ لاک نہیں۔

انہوں نے بتایا کہ بھارتی انڈس حکام اب سندھ طاس معاہدے کے تحت چل رہے ہیں اور  بھارت پاکستان کے ساتھ پانی کے معاملات پر بات چیت کررہا ہے۔

ان کا کہنا تھاکہ بھارتی وفد جلد پاکستان کا دورہ کرے گا۔

راولپنڈی:  آرمی چیف جنرل قمر جاوید باجوہ نے کہا ہے کہ افغانستان میں امن ہماری دلی خواہش ہے۔ دشمنوں کو امن عمل متاثر کرنے کی اجازت نہیں دیں گے۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ نے یہ بات افغان میڈیا کے وفد سے ملاقات کے موقع پر کہی۔ ان کا کہنا تھا کہ پاکستان اور افغانستان کا امن ایک دوسرے سے وابستہ ہے۔

آرمی چیف جنرل قمر جاوید باجوہ نے کہا کہ میڈیا کی ذمہ داری ہے کہ وہ امن دشمنوں کی نشاندہی کرکے انھیں شکست دے۔ پاک افغان یوتھ فورم سے باہمی رابطوں کو فروغ ملے گا۔

آئی ایس پی آر کے مطابق آرمی چیف نے کہا کہ پاکستان اور افغانستان کے نوجوان خطے کا مستقبل ہیں۔ افغانستان میں پائیدار امن سے خطے میں ترقی ہوگی۔ پاک افغان بارڈر سیکورٹی دونوں ممالک کے بہترین مفاد میں ہے۔

افغان صحافیوں نے تبادلہ خیال کا موقع دینے پر آرمی چیف سے اظہار تشکر کرتے ہوئے کہا کہ افغان عوام کے لیے پاکستان کی مخلصی اور کاوشوں پر شکر گزار ہیں۔ پاکستان کا افغان مہاجرین کی میزبانی اور امن عمل میں کردار قابل قدر ہے۔