لاہور (ویب ڈیسک ) گرمیوں کا آغاز ہوگیا ہے اور تربوز آج کل عام دستیاب پھل ہے جو پیاس کی شدت کو ختم کردیتا ہے درحقیقت صرف اس کی تصویر بھی ٹھنڈک فراہم کرسکتی ہے اور گرمیوں کی خاص سوغات ہے جو کچھ مہینے کے لیے ہی دستیاب ہوتی ہے۔

یہ نہ صرف گرمی سے لڑنے والا پھل ہے بلکہ یہ جسم کو وٹامن اے، بی اور سی کے ساتھ پوٹاشیم، لائیکو پین اور دیگر فائدہ مند اجزا بھی فراہم کرتا ہے۔

متعدد افراد اسے شوق سے کھاتے ہیں مگر کیا آپ کو اس کے صحت پر مرتب ہونے والے اثرات کا علم ہے؟

اگر نہیں تو درج ذیل فوائد اس پھل کے لیے آپ کی محبت مزید بڑھا دیں گے۔

نظام ہاضمہ میں مددگار
تربوز میں پانی کی مقدار بہت زیادہ ہوتی ہے جو کہ نظام ہاضمہ کو بہتر بنانے میں مدد دیتی ہے، اس کے علاوہ تربوز میں موجود فائبر بھی ہاضمے کی کارکردگی بڑھاتا ہے جبکہ قبض کی روک تھام کرتا ہے۔

حاملہ خواتین کے لیے فائدہ مند
تربوز کھانے سے سینے میں جلن کی شکایت کم ہوتی ہے، یہ مسئلہ دوران حمل کافی عام ہوتا ہے جبکہ اس میں موجود منرلز حمل کی تیسری سہ ماہی کے دوران مسلز کی تکلیف سے بچانے میں مددگار ثابت ہوسکتے ہیں۔

دمہ کی روک تھام
تربوز میں موجود اینٹی آکسائیڈنٹ لائیکوپین جسم کو نزلہ زکام اور فلو سے لڑنے میں مدد دیتا ہے جبکہ یہ بچوں میں دمہ کی علامات کو بھی کم کرنے کے لیے فائدہ مند ثابت ہوسکتا ہے۔

ذیابیطس کو کنٹرول کرنے میں مددگار
تربوز میں گلیسمیک انڈیکس زیادہ ہوتا ہے مگر گلیسمک لوڈ کم ہوتا ہے اور اسی لیے ذیابیطس کے مریض اسے محدود مقدار میں کھاسکتے ہیں۔ درحقیقت تربوز اس کا جوس ذیابیطس کے مریضوں کے لیے فائدہ مند ہوتا ہے تاہم اس کا استعمال ڈاکٹر کے مشورے سے ہی کرنا چاہئے۔

خلیات کو نقصان سے بچاتا ہے
تربوز لائیکوپین سے بھرپور پھل ہے جو کہ خلیات کو امراض قلب سے پہنچنے والے نقصان سے تحفظ فراہم کرتا ہے، یہ اینٹی آکسائیڈنٹ جسم میں گردش کرنے والے مضر فری ریڈیکلز سے لڑتا ہے اور خلیات کا دفاع کرتا ہے۔

ہیٹ اسٹروک سے بھی بچائے
پانی کی زیادہ مقدار ہونے کے باعث یہ پھل ہیٹ اسٹروک سے بھی بچاتا ہے، یہ ان چند پھلوں میں سے ایک ہے جو پیاس کو بجھاتا ہے جبکہ گرمی سے جلن کے احساس پر قابو پانے میں بھی مدد دیتا ہے۔

جسمانی توانائی بڑھائے
تربوز وٹامن بی کے حصول کا اچھا ذریعہ ہے جو کہ جسم میں توانائی کی فراہمی کا ذمہ دار ہوتا ہے، اس میں کیلوریز کم ہوتی ہیں مگر توانائی زیادہ، جو دن بھر جسمانی طور پر متحرک رکھنے میں مدد دیتا ہے۔ اس میں موجود پوٹاشیم دن بھر کی مصروفیات کے باوجود تھکاوٹ کے احساس کو دور رکھتا ہے۔

شریانوں اور ہڈیوں کی صحت
تربوز میں موجود لائیکو پین خون کی شریانوں کی صحت کے لیے بہت اہم ہے جبکہ یہ ہڈیوں کی صحت کو بھی بہتر بنا ہے۔ تربوز کا زیادہ استعمال خون کی شریانوں کے افعال کو بہتر بناتا ہے کیونکہ اس سے دوران خون بہتر ہوتا ہے جبکہ بلڈ پریشر کی سطح معمول پر آتی ہے۔ لائیکو پین سے آکسی ڈیٹیو اسٹریس بھی کم ہوتا ہے جبکہ ہڈیوں کی کمزوری کا باعث بنتا ہے، اسی طرح تربوز میں پوٹاشیم بھی ہوتا ہے جو کہ جسم میں کیلشیئم کی سطح برقرار رکھنے میں مدد دیتا ہے جو کہ مضبوط ہڈیوں کے لیے ضروری جز ہے۔

جسمانی چربی میں کمی
تربوز میں موجود سٹرولائن خلیات میں چربی کے اجتماع کی شرح کم کرتا ہے، سٹرولائن ایسا امینو ایسڈ ہے جو کہ جسم میں جاکر آرجنین میں تبدیل ہوجاتا ہے جو کہ گردوں کے لیے فائدہ مند ہوتا ہے۔ سٹرولائن فیٹ سیلز میں ایسی سرگرمیوں کو روکتا ہے جو کہ جسم پر چربی چڑحنے کا باعث بنتے ہیں جس سے توند سے نجات بھی ممکن ہوتی ہے۔

لاہور( ویب ڈیسک ) چہرے اور آنکھوں کے نیچے جھریوں ہوجانا بڑھتی عمر کا حصہ ہوتا ہے تاہم اب لگتا ہے کہ یہ ماضی کا قصہ بننے والا ہے۔جی ہاں طبی ماہرین نے اس میکنزم کو شناخت کرلیا ہے جو جلد کی عمر بڑھانے میں کردار ادا کرتا ہے۔جاپانی سائنسدانوں کے مطابق ایک اہم پروٹین کمپا?نڈ عمر بڑھنے سے جلد پر مرتب ہونے والے اثرات کو روکنے میں مددگار ثابت ہوسکتا ہے اور اس مقصد کے لیے 2 ادویات بھی مستقبل قریب میں تیار کی جائیں گی۔ٹوکیو میڈیکل اینڈ ڈینٹل اسکول کی تحقیق میں بتایا گیا کہ یہ ادویات ایک مخصوص پروٹین کی سطح بڑھانے میں مدد دیں گی جو کہ نوجوانی میں جلد کے خلیات میں پایا جاتا ہے مگر عمر بڑھنے کے ساتھ کم ہونے لگتا ہے۔

اس پروٹین کی سطح کم ہونے سے جلد جھریوں کی شکار ہوتی ہے جبکہ اس کی لچک کم ہوجاتی ہے۔

یہ پروٹین جسے سی او ایل 17 اے 1 کا نام دیا گیا ہے، سورج سے ہونے والے نقصان سے بچانے میں بھی مدد دیتا ہے۔

محققین نے چوہوں اور انسانی جلد کے ٹشوز پر اس دریافت کو آزما کر کامیابی حاصل کی۔

انہوں نے بتایا کہ اس طریقہ کار سے جلد کو نمایاں حد تک بہتر کیا جاسکتا ہے جس سے جلد پر چھایا بڑھاپا کم ہوسکتا ہے۔

تاہم ان کا کہنا تھا کہ اس حوالے سے ابھی مزید تحقیق کی ضرورت ہے کہ اس طریقہ کار کے دیگر ٹشوز پر کیا اثرات مرتب ہوتے ہیں اور دیگر اعضا پر عمر کے اثرات کو کس طرح ریورس کرنا ممکن ہے۔

سان فرانسسو (ویب ڈیسک ) ای کامرس کی ممتاز کمپنی ایمیزون نے ایک عرصے کی افواہوں کے بعد خلا میں براڈ بینڈ انٹرنیٹ کے لیے ہزاروں مصنوعی سیارچے بھیجنے کا اعلان کردیا ہے۔جمعرات کو ایمیزون کمپنی نے باضابطہ طور پر اعلان کیا ہے کہ اس ضمن میں 3000 سے زائد سیٹلائٹ زمین کے نچلے مدار میں روانہ کئے جائیں گے۔ اس منصوبے کو ’پروجیکٹ کائپر‘ کا نام دیا گیا ہے جس کے تحت دنیا بھر میں برق رفتار انٹرنیٹ فراہم کیا جائے گا۔اس منصوبے کا مقصد دنیا کے محروم اور پسماندہ علاقوں تک انٹرنیٹ کی سہولیات پہنچانا ہے اور ایمیزون کے مطابق سیٹلائٹ اس کا بہترین حل پیش کرسکتےہیں۔ واضح رہے کہ ایمیزون نے اقوامِ متحدہ کےتحت انٹرنیشنل ٹیلی کمیونکیشن یونین میں پروجیکٹ کائپر کی تفصیلات بھی جمع کراچکی ہیں۔ تاہم ایمیزون کو اس ضمن میں ایلون مسک کی راکٹ کمپنی اسپیس ایکس اور ایئربس کی قائم کردہ ون ویب کمپنی کی جانب سے شدید مسابقت کا سامنا ہے اور مزید ہوگا۔ دو ماہ قبل ون ویب اپنے چھ سیٹلائٹ پہلے ہی خلا میں بھیج چکی ہے۔اس کے علاوہ لیوسیٹ اور کینیڈا کی ٹیلی سیٹ نے بھی اسی طرح کے منصوبے کے لیے اپنی انقلابی اختراعات پیش کی ہیں اور انہوں نے روایتی سیٹلائٹ کی بجائے چھوٹے چھوٹے ہزاروں سیٹلائٹ کا منصوبہ بنایا ہے جو لیزر اور کمپیوٹر چپ ٹیکنالوجی کے تحت ایسا ہی کام انجام دیں گے۔

لندن (ویب ڈیسک ) دنیا بھر میں لاکھوں مریض ایسے ہیں جن کی ٹانگوں کے نچلے حصے کی گہرائی میں موجود رگوں میں خون کے سخت لوتھڑے بن جاتے ہیں اس ضمن میں ماہرین نے ایک ٹوکری نما آلے سے اس لوتھڑے کو نکال باہر کرنے کا انتہائی کامیاب تجربہ کیا ہے۔55 سالہ خاتون جیکی فیلڈ ایک عرصے سے اپنی ٹانگ کے نچلے حصے کی رگ میں خون کے لوتھڑے بننے سے پریشان تھیں لیکن رگ پنڈلی کے گوشت کی گہرائی کے اندر تھی۔ آپریشن کے لیے ماہرین نے سینٹ تھامس ہسپتال میں خاتون کی شریان میں اینجیو پلاسٹی جیسا ایک تار داخل کیا جس میں جالی کی ایک چھوٹی باسکٹ بنی ہوئی تھی جس نے برمے (ڈرل) کی طرح دائروں میں گھوم کر لوتھڑے کو جذب کرلیا۔اس تجربے کے کامیابی کے بعد ایسے لاکھوں مریضوں کے علاج کی راہ کھلی ہے جو ’تھرمبوسِس‘ یا خون کے لوتھڑے بننے سے سخت تکلیف میں مبتلا ہوتے ہیں۔ اس میں ٹانگیں سوجن کی شکار ہوتی ہیں اور شدید تکلیف ہوتی ہے۔ مریض چلنے پھرنے سے معذور ہوجاتا ہے اور بسا اوقات اندر شدید زخم بھی بن جاتا ہے۔ بسا اوقات یہ کیفیت سانس لینے کے عمل کو بھی شدید متاثر کرتی ہے۔یہ آلہ ایک کمپنی ویٹیکس میڈیکل نے تیار کیا ہے۔ یہ تار کے ذریعے خون کے لوتھڑے کے مقام پر جاتا ہے اور ٹوکری لوتھڑے سے قبل دونوں دیواروں تک پھیل جاتی ہے اور ایک خاص انداز سے لوتھڑے کو کھینچ کر اپنے اندر جمع کرلیتی ہے۔ یہ طریقہ رگوں کی دیواروں سے چپکے ہوئے خوف ناک لوتھڑوں کو بھی نکال باہر کرتا ہے اور اس کےلیے کسی خاص دوا کی ضرورت بھی نہیں رہتی۔

لاہور( ویب ڈیسک ) عمر کے ساتھ جسمانی وزن میں اضافہ قدرتی ہوتا ہے اور کوئی بری بات بھی نہیں۔

تاہم اگر یہ اضافہ بہت زیادہ ہو تو پھر ضرور پریشان ہونا چاہئے کیونکہ موٹاپا متعدد امراض جیسے ذیابیطس، کینسر، امراض قلب، بلڈ پریشر اور ایسے ہی متعدد جان لیوا امراض کا خطرہ بڑھانے والا سب سے بڑا عنصر ہے۔

اور یہ کہنے کی ضرورت نہیں کہ پیٹ کے ارگرد کی یہ اضافی چربی گھلانا آسان نہیں ہوتا مگر اس سے چھٹکارے کے لیے کوئی جادوئی گولی تو موجود نہیں۔

مگر کچھ ایسی غذائیں ضرورت ہیں جو اس چربی کو تیزی سے گھلانے میں مدد دے سکتی ہیں۔

اور اب موسم گرم ہورہا ہے، جس دوران کھیروں کا استعمال بڑھ جاتا ہے جو کہ گرمی کے احساس کو دور رکھنے میں مدد دیتے ہیں۔

یہ مزیدار سوغات جسم سے زہریلے مواد کے اخراج کے ساتھ ساتھ سکون بھی پہنچاتی ہے جبکہ اس میں موجود پوٹاشیم اور میگنیشم ہائی بلڈ پریشر کو کنٹرول کرتے ہیں۔

مگر اس کے ساتھ ساتھ یہ جسمانی وزن میں کمی لانے میں بھی مدد دینے والی سوغات ہے، بس اس سے بننے والے ایک مشروب کے استعمال کو عادت بنانا ہوگا۔

اجزا
ایک میڈیم کھیرا

سلاد پتہ کی 2 ڈنٹھل (سرے کاٹ دیں)

ایک سیب

طریقہ کار
ایک جوسر میں کھیرے، سلاد پتے اور سیب کو ڈال کر بلینڈ کرلیں۔

اس مشروب کو گلاس میں ڈالیں اور پی لیں۔

سیب اور سلاد پتہ جسمانی وزن میں کمی کے ساتھ توند کی چربی گھلانے میں مدد دیتے ہیں جبکہ اس مشروب میں پانی اور فائبر کی مقدار پیٹ کو دیر تک بھرے رکھنے میں مدد دے گی۔