سریندرنگر (نیٹ نیوز) بھارتی وزیراعظم نریندرمودی نے پاکستان کو دہشت گردی کا ایکسپورٹر قراردیتے ہوئے کہا کہ کانگریس کی حکومتوں کے دوران دہشت گرد ہندوستان میں حملے کرکے وہاں چھپ جاتے تھے اوروہ جوہری حملے کی دھمکی دے کرانہیں بچا لیتا تھا، مگران کی حکومت نے ا س کی پرواہ کئے بغیرسرجیکل اسٹرائک اورفضائی حملے جیسی کارروائی کی۔نریندرمودی نے اپنی آبائی ریاست گجرات کے سریندرنگرمیں ایک انتخابی ریلی سے خطاب کرتے ہوئے کہا کہ آج دنیا بھرمیں ہندوستان کا ڈنکا بج رہا ہے۔ لوگوں نے30 سال بعد پہلی بار ان کی مکمل اکثریت کی مضبوط حکومت بنائی جس کی وجہ سے وہ ملک کی مضبوطی سے خدمت کرسکے۔ مسئلہ کشمیر، دراندازوں اورنکسل کے خلاف ٹھوس قدم اٹھائے۔انہوں نے کہا کہ ‘ایک اپنا پڑوسی ملک ٹیررزم ایکسپورٹ کرنےکا کام کرتا ہے۔ یہ اس کا ایک ہی کام ہے۔ پہلے پاکستان سے دہشت گرد آ کر ہندوستان میں حملے کرکے واپس بھاگ جاتے تھے اورپاکستان ہندوستان کوڈراتا تھا کہ اگرکارروائی کی گئی، تواس کے پاس جوہری ہتھیار ہے جس کا وہ بٹن دبا دے گا۔ میں نے اس دھمکی کی پرواہ نہیں کرتے ہوئے کہا کہ جا دبا دو۔ پہلے ہمارے لوگ دنیا بھرمیں روتے تھے۔ اب پاکستان رونے جاتا ہے۔

واشنگٹن (آن لائن) پاکستان کا نام امریکا کیلئے خطرہ قرار دیے جانے والے ممالک کی فہرست سے نکال دیا گیا۔غیر ملکی خبر رساں ادارے کے مطابق کونسل آن فارن ریلیشنز نے پاکستان کا نام امریکا کیلئے خطرہ قرار دیئے جانےوالے ممالک کی فہرست سے نکال دیا ہے۔ امریکی تھنک ٹینک کونسل آن فارن ریلیشنز نے پاکستان کا نام امریکا کیلئے خطرہ قرار دیئے جانے والے ممالک کی فہرست میں ڈالا تھا۔دو ہزار انیس پہلا سال ہے کہ پاکستان کا نام امریکا کیلئے خطرناک ممالک کی فہرست میں نہیں ڈالا گیا ہے۔ کونسل آن فارن ریلیشنز تھنک ٹینک کا خیال ہے کہ پاکستان اب امریکا کیلئے خطرہ نہیں رہا۔ واضح رہے کہ دہشت گردی کی نام نہاد جنگ میں ہم امریکا کے اتحادی ہونے کے باوجود بھی اس لسٹ سے اپنا نام نہ نکلوا سکے جس لسٹ میں ان ممالک کے نام درج ہیں کہ جن سے امریکا یا امریکیوں کو خطرہ ہے۔ایسا تاریخ میں پہلی بار ہوا ہے کہ امریکی کونسل آن فارن ریلیشنز تھنک ٹینک نے پاکستان کا نام اس لسٹ سے نکال دیا ہے۔افغانستان کی جنگ سے لے کر طالبان کے ساتھ محاذ تک ہر موقع پر پاکستان امریکہ کے شانہ بہ شانہ کھڑا رہا ہے اور دہشت گردی کی اس جنگ میں لاکھوں پاکستانیوں کی جان قربان ہونے کے علاوہ مالی طور پر بھی پاکستان کہیں پیچھے چلا گیا۔ یہی نہیں بلکہ امریکا کی اس جنگ میں ساتھ دینے کے بدلے دہشت گردی کا رخ پاکستان کی طرف ہو گیا اور اس حوالے سے بھی پاکستان کو خاصے نقصان کا سامنا کرناپڑ ا کہ عالمی سطح پر پاکستان کا نام دہشت گرد ملک کے طور پر لیا جانے لگا۔امریکا نے دہشت گردی کی جنگ میں اتحادی ہونے کے باوجود پاکستانیوں پر دبا? ڈالے رکھا اور اس کا شمار اس ملک کے طور پر کیا جس سے امریکیوں کو خطرہ تھا۔

سرینگر+جموں(اے این این )بھارتی الیکشن کا دوسرا مرحلہ (آج) ،حریت کا نفرنس کی ہڑتال اور بائیکاٹ کی اپیل،وادی میں سکیورٹی سخت،فوج الرٹ،سرینگر اوراودھمپورنشستوں کیلئے میدان سج گیا ، 25امیدوار میدان میں دونوں نشستوں پر ڈاکٹر فاروق عبداللہ اور بھارت مرکزی وزیر ڈاکٹر جتیندر سنگھ نمایاں امیدوار ہیں ۔تفصیلات کے مطابق بھارت کے پارلیمانی انتخابات کے دوسرے مرحلے میں18اپریل کو سرینگر اور اودہمپورپارلیمانی نشستوں کیلئے منگل کو انتخابی مہم کا اختتام ہوا۔وسطی کشمیر کی نشست پر13امیدوار جبکہ اودہمپور نشست پر 12امیدواروں کے درمیان مقابلہ ہے۔ان دونوں نشستوں پر ڈاکٹر فاروق عبداللہ اور بھارت مرکزی وزیر ڈاکٹر جتیندر سنگھ نمایاں امیدوار ہیں۔ اس نشست پر نیشنل کانفرنس کے ڈاکٹر فاروق عبداللہ ، پی ڈی پی کے آغا محسن ،پیپلز کانفرنس کے عرفان انصاری،بی جے پی کے خالد جہانگیر اور عوامی اتحاد پارٹی کے ایڈوکیٹ بلال سلطان سمیت دیگر13امیدوار میدان میں ہیں۔ الیکشن حکام کے مطابق سرینگر ضلع میں46جلسے منعقد ہوئے،جس دوران انتخابی مہم مجموعی طور پر خوشگوار رہی۔ ذرائع نے بتایا کہ اس دوران انتخابی ضابطہ اخلاق کی خلاف ورزی کی16 شکایتیں بھی موصول ہوئیں،جن میں سے9شکایتوں پرکارروائی بھی عمل میں لائی گئی۔ سرینگر پارلیمانی نشست پر2017کے ضمنی انتخابات کے دوران7.2فیصد ووٹ ڈالے گئے تھے،جبکہ اس دوران9انسانی جانیں بھی تلف ہوئیں تھی،اور بیسوں زخمی ہوئے تھے۔اس دوران خانصاحب علاقے میں ایک نوجوان فاروق احمد ڈار کو فوجی آفسر نے گاڑی کے آگے باندھا تھا،اور سنگبازی سے بچنے کیلئے اپنا راستہ ہموار کیا تھا۔ سرینگر پارلیمانی نشست پر12لاکھ90ہزار318رائے دہندگان کو ووٹ ڈالنے کا حق حاصل ہے،جن کیلئے1716پولنگ مراکز کا قیام عمل میں لایا گیا ہے۔وسطی کشمیر کی نشست سے نقل مکانی کرنے والے ووٹروں کیلئے جموں میں21اور ادھمپور و دہلی میں ایک،ایک پولنگ مرکز کا قیام بھی عمل میں لایا گیا ہے۔جغرافیائی طور پر سب سے طویل اودھمپور۔ ڈوڈہ حلقہ6 اضلاع کشتواڑ، ڈوڈہ، رام بن،ریاسی، اودھمپوراورکٹھوعہ جبکہ17اسمبلی نشستوںکشتواڑ، اندروال، ڈوڈہ، بھدرواہ، رام بن، بانہال، اودھمپور، رام نگر، چنینی، کٹھوعہ، ہیرا نگر، بنی، بسوہلی، بلاور، ریاسی، گول ارناس اور گلاب گڑھ پر مشتمل ہے ۔اس حلقہ میں رائے دہندگان کی کل تعداد16لاکھ85ہزار779ہے جن میں سے 8لاکھ 76ہزار319مرد جبکہ 7لاکھ،89 ہزاراور105خواتین ووٹر ہیں ۔اودھمپور۔ڈوڈہ حلقہ سے بی جے پی ڈاکٹر جتیندر سنگھ، کانگریس کے وکرم ادتیہ سنگھ، ڈوگرہ سوابھی مان سنگٹھن کے چوہدری لعل سنگھ اور پنتھرز پارٹی کے چیئرمین ہرش دیو سنگھ سمیت 12امیدوار میدان میں ہیں۔اس اہم نشست پر2014کے انتخابات میں بی جے پی امیدوار ڈاکٹر جتیندر سنگھ نے کامیابی حاصل کی تھی۔واضح رہے کہ 2014کے انتخابات میں 14لاکھ 69ہزار72رائے دہندگان میں سے 10لاکھ، 42 ہزاراور375ووٹروںنے حصہ لیا اور مجموعی طور پر پولنگ کی شرح 70.95فیصد رہی ۔اس الیکشن میں جتیندر سنگھ نے 4لاکھ، 87ہزاراور369ووٹ لیتے ہوئے کانگریس کے غلام نبی آزاد کو ہرایاتھا ۔آزاد کو اس الیکشن میں 4لاکھ،26ہزاراور393ووٹ ملے تھے ۔دلچسپ امر ہے کہ 2009سے 2014تک کانگریس کی طرف سے اس نشست پر ممبر پارلیمنٹ رہنے والے چوہدری لعل سنگھ نے آزاد کے حق میں مہم نہیںچلائی اور انہوںنے انتخابات کے بعد بی جے پی میں شمولیت کرلی تھی تاہم اس مرتبہ وہ خود اپنی جماعت سے بی جے پی اور کانگریس کے خلاف الیکشن لڑ رہے ہیں ۔اودھمپور حلقہ کانگریس کا گڑ رہاہے اور اس پر بی جے پی کی طرف سے پہلے چمن لعل گپتا اور پھر 2014میں جتیندر سنگھ کامیاب ہوئے ہیں ۔ اس حلقہ کیلئے حکام کی طرف سے 2ہزار710پولنگ مراکز قائم کئے گئے ہیں ۔دریں اثناءکل جماعتی حریت کانفرنس کے چیئر مین سید علی گیلانی نے(آج) 18اپریل کو انتخابات کا بائیکاٹ اور بڈگام، گاندربل اور سرینگر اضلاع میں مکمل اور ہمہ گیر ہڑتال کرنے کی اپیل دہراتے ہوئے کہا ہے کہ ایک طرف کشمیریوں کا قتل عام جاری ہے، آزادی پسند لیڈران،کارکنان اور سینکڑوں نوجوانوں کو بلا جواز قید کیا گیا ہے ، ریاست کو اقتصادی طور مفلوج بنانے کے لیے آئے روز تاناشاہی فرمان جاری کئے جاتے ہیں اور یہاں کی مسلم آبادی کو اقلیت میں تبدیل کرنے کے لیے عدالتوں کو استعمال کیا جاتا ہے اور دوسری طرف بھارتی حکمران الیکشن سے لوگوں سے اس ظلم وجبر اور بربریت کی تائید حاصل کرنا ہے۔ انہوں نے کہا کہ ہندنواز تنظیمیں اور ان کے افراد کو عام لوگوں کے جینے مرنے سے کوئی مطلب نہیں ہے اور وہ ہر صورت میں الیکشن ڈرامے میں کامیابی حاصل کرکے بھارت کے فوجی قبضے کو مضبوط تر بنانے کا کارنامہ انجام دینے کے لیے ایک دوسرے سے سبقت لینا چاہتے ہیں۔گیلانی نے کہا کہ یہ لوگوں کی آزمائش کا موقعہ ہے کہ وہ 2017کے سرینگر پارلیمانی انتخابات کی طرح غیرت کا مظاہرہ کرتے ہوئے مکمل بائیکاٹ کریں۔ادھربھارتی ریاست تامل ناڈو میں لوک سبھا کے حلقے تھینی میں الیکشن کمیشن کی نگرانی ٹیم، اور محکمہ انکم ٹیکس کے مشترکہ چھاپے میں ایک دکان سے ووٹرز کی تقسیم کے لیے رکھے گئے ایک کروڑ 48 لاکھ بھارتی روپے برآمد کرلیے۔مذکورہ دکان کو مبینہ طور پر تامل ناڈو کی ایک سیاسی جماعت (اے ایم ایم کے) کا ہمدرد چلاتا تھا۔ چھاپے کے دوران اس کارروائی پر اعتراض کرنے والے سیاسی جماعت کے ہمدردوں کو منتشر کرنے کے لیے اہلکاروں کو ہوائی فائر بھی کرنے پڑے۔سینئر عہدیدار کے مطابق فائرنگ سے کوئی زخمی نہیں ہوا اور سیاسی جماعت کے 4 کارکنان کو اس سے تعلق کے شبے میں گرفتار بھی کیا گیا۔ٹیم نے عمارت میں نقد رقم چھپائے جانے کی اطلاع ملنے پر چھاپہ مارا تاہم دکان کا مالک موقع سے فرار ہونے میں کامیاب ہوگیا۔