اسلام آباد (آئی این پی)عمران خان نے کہا کہ کراچی کو اٹھائے بغیر پاکستان کی ترقی کا خواب شرمندہ تعبیر نہیں ہوسکتا، عبدالرشید گوڈیل کی آمد سے کراچی میں تحریک انصاف کو تقویت ملی ہے، آئندہ انتخابات میں تحریک انصاف کراچی میں پہلے سے کئی گنا بہتر کارکردگی دکھائے گی، تحریک انصاف کراچی واحد اکثریتی نمائندہ جماعت بن کر ابھرے گی۔ اتوار کو کراچی سے تحریک انصاف کو بڑی کامیابی متحدہ قومی موومنٹ کے سینئر رہنما اور سابق رکن قومی اسمبلی عبدالرشید گوڈیل تحریک انصاف میں شامل ہوگئے، انہوں نے چیئرمین تحریک انصاف سے بنی گالہ میں ملاقات کے دوران اپنی شمولیت کا اعلان کیا، اس موقع پر سینئر مرکزی رہنما جہانگیر ترین اور زلفی بخاری بھی موجود تھے ، عبدالرشید گوڈیل نے تحریک انصاف کے منشور اور قیادت پر مکمل اعتماد کا اظہار کرتے ہوئے شمولیت کا باضابطہ اعلان کیا، چیئرمین تحریک انصاف نے عبدالرشید گوڈیل کی شمولیت کا خیر مقدم کیا، اور کہا کہ عبدالرشید گوڈیل کی پارٹی میں شمولیت باعث مسرت ہے، کراچی میں تحریک انصاف کی صف بندی میں محنت کررہے ہیں، عمران خان نے کہا کہ کراچی کو اٹھائے بغیر پاکستان کی ترقی کا خواب شرمندہ تعبیر نہیں ہوسکتا، عبدالرشید گوڈیل کی آمد سے کراچی میں تحریک انصاف کو تقویت ملی ہے، آئندہ انتخابات میں تحریک انصاف کراچی میں پہلے سے کئی گنا بہتر کارکردگی دکھائے گی، تحریک انصاف کراچی واحد اکثریتی نمائندہ جماعت بن کر ابھرے گی۔

اسلام آباد (خبر نگار خصوصی) الیکشن کمیشن آف پاکستان نے عام انتخابات میں حصہ لینے والے امیدواروں کے کاغذات نامزدگی کی جانچ پڑتال کیلئے سنٹرل سکروٹی سیل قائم کردیا، سکرونٹی سیل نادرا، ایف بی آر، اسٹیٹ بنک اور دیگر اداروں کے ساتھ رابطے کرکے امیدواروں کی سکرونٹی کرے گا، امیدواروں کی دوہری شہریت، قرضہ معافی، نادہندگی اور انکم ٹیکس سے متعلق معلومات بھی حاصل کرے گا، الیکشن کمیشن کے ذرائع کے مطابق عام انتخابات 2018میں حصہ لینے والے امیدواروں کے کاغذات نامزدگی کی سکرونٹی کیلئے مرکزی سطح پر خصوصی سیل قائم کردیا گیا ہے۔یہ سکروٹی سیل 4ٹیموں پر مشتمل ہوگا جس میں الیکشن کمیشن، نادرا، ایف بی آر، اسٹیٹ بنک، ایف آئی اے اور نیب سمیت دیگر متعلقہ اداروں سے تعلق رکھنے والے 36کے قریب ممبران ہونگے، سکرونٹی سیل با ضابطہ طور پر آج سے کام شروع کریگا سکرونٹی سیل ریٹرننگ افسران اور متعلقہ اداروں کے درمیان کو آرڈیینشن کریگا اور دو شفٹوں میں 24گھنٹے کام کریگا ذرائع کے مطابق سکرونٹی سیل امیدواروں کی آرٹیکل 62، 63کے مطابق جانچ پڑتال کو یقینی بنانے میں مدد دے گا اسی طرح سکرونٹی سیل نادرا، ایف آئی اے نیب، ایف بی آر، اسٹیٹ بنک سے رابطے کریگا اور دوسری شہریت کے حامل قرضے حاصل کرنے والے ، ڈیفالٹر اور انکم ٹیکس کی معلومات اکھٹی کریگا ذرائع کے مطابق سکرونٹی سیل کے انچارج سیکرٹری الیکشن کمیشن ہونگے۔

لاہور  (آئی اےن پی، مانیٹرنگ ڈیسک) چیف جسٹس پاکستان میاں ثاقب نثار کا 56 کمپنیز کیس میں سابق وزیراعلی شہبازشر یف پر شدید برہمی کا اظہار کرتے ہوئے کہا ہے کہ پیسوں کی واپسی کے ذمہ دار شہباز شریف ہیں۔ چیف جسٹس نے شہباز شریف کو طلب کرتے ہوئے کہا کہ ان کے کردار کے بغیر تو یہاں مکھی بھی نہیں اڑتی۔ چیف جسٹس نے نیب کو 6 کمپنیوں کے سی ای اوز کی جائیداد کا تخمینہ لگانے کا حکم دیتے ہوئے کہا کہ پتا کریں کہ یہ افسران کتنی پراپرٹی کے مالک ہیں تاکہ قوم کا پیسہ واپس لوٹایا جاسکے۔ اس پر اربن پلاننگ اینڈ منیجنگ کمپنی کے سربراہ نے عدالت میں کہا کہ میں خود کشی کر لوں گا تو چیف جسٹس نے کہا کہ آپ کی اس دھمکی سے عدالت اپنا فیصلہ نہیں بدلے گی، جس کمپنی کا سربراہ قوم کا پیسہ نہ لوٹا سکا اس کو جیل ہو گی۔

اسلام آباد (مانیٹرنگ ڈیسک) سربراہ عوامی مسلم لیگ شیخ رشید نے کہا ہے کہ الیکشن لڑنے کیلئے پاکستان کی شہریت ہونا لازمی نہیں۔ کاغذات نامزدگی فارم بڑا سوچ سمجھ کر بنایا گیا ہے۔ چیف جسٹس نے بھی کہا ہے کہ 25 جولائی کو عام انتخابات ہونے چاہیں۔ الیکشن سے پہلے اصل مسئلہ حلقوں کا ہے۔ نجی ٹی وی پروگرام میں گفتگو کرتے ہوئے انہوں نے کہا کہ ایسے لوگ اعتراضات کر رہے ہیں جو 5 ویںنمبر کے کونسلر ہیں۔ حلقہ بندیاں کالعدم ہونے سے امیدواروں کیلئے مشکلات ہیں، مجھے معلوم ہی نہیں کہ اب میرا حلقہ کہاں تک ہے۔ الیکشن میں ایک ماہ کی تاخیر سے قیامت نہیں آجائے گی۔ الیکشن میں15 سے 20 دن تاخیر ہوجائے تو مسائل حل ہوسکتے ہیں۔ الیکشن میں تاخیر کا حکم سپریم کورٹ دے سکتی ہے۔ انہوں نے مزید کہا کہ پولیس افسران مرضی کے ہونگے تو 2، 3 ڈاکے انکے لیے بڑی بات نہیں۔ انہوں نے کہا کہ پاکستان میں مذہبی جماعتیں اسلام کے نہیں اسلام آباد کے ساتھ ہیں۔ ختم نبوت کی شق پر بھی سب سے پہلے میں نے آواز اٹھائی۔ انہوں نے کہا کہ پیپلزپارٹی پھر نواز شریف کی طرف جارہی ہے۔ 20 سے 25 فیصد پی پی نواز بیانیے کو سپورٹ کر رہی ہے۔ نواز شریف چاہتے ہیں کہ انکو سزا ہوجاتی ہے تو تحریک ہے اور انکو ووٹ ملے۔ میں نواز شریف کا سیاسی مستقبل نہیں دیکھ رہا، وہ عید کے فوری بعد الیکشن چاہتے ہیں تاکہ جیل جانے کا سیاسی فائدہ مل سکے۔ پی پی سمجھ رہی ہے کہ سارا جنوبی پنجاب تحریک انصاف کی طرف چلا گیا ہے۔ میں عمران خان کی مخلوط حکومت دیکھ رہا ہوں۔ اگر عمران خان کی ہوا چل گئی تو اکیلا ہی حکومت بنالے گا۔ ریحام خان کی کتاب سے عمران کو کوئی فرق نہیں پڑے گا۔ الیکشن میں اصل مقابلہ عمران و نواز کا ہے۔ ضروری نہیں کہ آصف زرداری کے ساتھ چلا جائے۔ بلاول کے ساتھ بھی چلا جاسکتا ہے۔ پی ٹی آئی میں اختلاف کی باتیں لوگوں کیلئے تکلیف کا باعث ہیں۔ جسٹس ثاقب نثار اسوقت حقیقی مرکزی کھلاڑی ہیں۔ انہوں نے کہا کہ میں نواز شریف، شہباز شریف، مریم نواز و شاہد خاقان عباسی کو جیل دیکھ رہا ہوں۔ چودھری نثار اس بار آزاد الیکشن لڑیں گے۔ ان کیلئے بغیر ایڈمنسٹریشن کے یہ الیکشن مشکل ہوگا۔ چودھری نثارکے لیے راستہ صاف ہے مدمقابل نواز، شہباز وخاقان جیل جا رہے ہیں۔ 5، 6 دنوں میں ایل این جی کا کیس لگ جائے گا۔ اسوقت سٹیبلشمنٹ کا سب سے مضبوط آدمی شاہد خاقان ہے۔ شہباز شریف فوج کو استعمال کرنے میں بہت سمارٹ ہیں۔ ایل این جی پر شاہد خاقان نے مناظرے کا چیلنج دیا تھا، دعوت دیتا ہوں ٹی وی پر مناظرہ کرلیں۔ انہوں نے کہا کہ اسمبلی ختم ہوگئی، ماہرین قانون کہتے ہیں میری نا اہلی کا مسئلہ بھی ختم ہوگیا۔ سپریم کورٹ کا میرے حوالے سے جو بھی فیصلہ ہوگا قبول ہے۔ انکا کہنا تھا کہ دھرنے کے دوران شہباز شریف سے دوبارہ رابطہ کیا تھا۔ مجھے یقین ہے الیکشن کے بعد میرا بہترین دور شروع ہوگا۔ انہوں نے کہا مریم نواز کو کبھی سنجیدہ نہیں دیکھا ہمیشہ جذباتی فیصلے کیے۔ نواز شریف جیسے لوگوں کو سیاست میں نہیں ہونا چاہیے۔ 40 سال عوام کا پیسہ لوٹ کر کھایا۔

لاہور(آئی این پی ) پاکستان مسلم لیگ ن کے قائد اور سابق وزیراعظم نواز شریف کی صاحبزادی مریم نواز نے الیکشن 2018میں اپنے والد نواز شریف کے آبائی حلقے سے الیکشن لڑنے کا فیصلہ کرلیا ہے نجی ٹی وی کے مطابق سابق وزیراعظم نواز شریف نے جب اس حلقہ سے پہلی بار الیکشن لڑا تھا تویہ این اے 96کہلاتا تھا بعدازاں یہ حلقہ این اے 120 بن گیا اور موجودہ نئی حلقہ بندیوں کے بعد یہ حلقہ این اے 125 بن گیا ہے ن لیگی ذرائع کے مطابق مریم نواز کو اس حلقے سے الیکشن لڑنے کی اجازت ان کے والد نواز شریف نے دیدی ہے جبکہ یہ بھی بتایاگیا ہے کہ مریم نواز اسی حلقے سے صوبائی اسمبلی کی نشست پی پی 149 سے الیکشن لڑیں گی واضح رہے کہ نواز شریف کی عدالت سے نااہلی کے بعد 17 ستمبر کو ہونے والے ضمنی الیکشن میں بیگم کلثوم نے اسی حلقے سے کامیابی حاصل کی تھی جبکہ مریم نواز نے بہترین انداز میں انتخابی مہم چلاتے ہوئے اپنی والدہ بیگم کلثوم کو بڑے مارجن سے کامیابی دلوائی تھی۔