اسلام آباد‘ جنیوا (این این آئی) جنیوا میں پاکستان مخالف اشتہاری مہم پر سوئٹزر لینڈ کے سفیر تھامس کولی کو دفتر خارجہ طلب کر کے پاکستان نے اپنا احتجاج ریکارڈ کراتے ہوئے احتجاجی مراسلہ انہیں دیا اور کہا ہے کہ اشتہاری مہم پاکستانی سالمیت اور خود مختاری پر حملہ ہے جو کہ عالمی قوانین کی شدید خلاف ورزی ہے۔ پیر کو دفترخارجہ نے سوئٹزر لینڈ کے پاکستان میں نامزد سفیر تھامس کولی کو طلب کر کے جنیوا میں ہونے والی پاکستان مخالف اشتہاری مہم پر شدید احتجاج کیا ہے۔ دفترخارجہ نے کہا کہ پاکستان کے خلاف سوئٹزرلینڈ کی سرزمین کا استعمال عالمی قوانین کی خلاف ورزی ہے۔ سوئٹزر لینڈ کسی خود مختار ملک کے خلاف اپنی سرزمین استعمال نہ ہونے دے۔ دوسری جانب سوئٹزرلینڈ کے شہر جنیوا میں پاکستان مخالف اشتہاری مہم کو پاکستان کی سالمیت و خودمختاری پر حملہ قرار دیتے ہوئے اقوام متحدہ میں پاکستان کے مستقل مندوب فرخ عامل نے سوئس ہم منصب کو مراسلہ بھیج کر اپنے خدشات سے آگاہ کیا۔ سوئس حکام کو بھجوائے گئے اپنے مراسلے میں فرخ عامل نے کہا کہ بلوچستان پاکستان کا سب سے بڑا صوبہ ہے جسے پارلیمان کے دونوں ایوانوں میں نمائندگی حاصل ہے جبکہ سوئٹزرلینڈ میں ’آزاد بلوچستان‘ کا نعرہ پاکستان کی سالمیت و خود مختاری پر حملہ ہے۔ جنیوا میں جگہ جگہ اشتہاروں اور بسوں پر جاری اشتہاری مہم پر تشویش کا اظہار کرتے ہوئے پاکستانی سفیر نے اپنے مراسلے میں سوئس حکومت سے شدید احتجاج کیا اور اس میں ملوث افراد کے خلاف کارروائی کا مطالبہ کیا تھا۔ احتجاجی مراسلے کے مطابق ’پاکستان کے خلاف سوئس سرزمین کا استعمال تشویش کا باعث ہے جبکہ کالعدم بلوچ لبریشن آرمی ایک دہشت گرد تنظیم ہے۔ مراسلے میں کہا گیا کہ برطانیہ اور امریکہ میں بی ایل اے کے کئی نمائندے دہشت گرد قرار دئیے جا چکے ہیں اور یہ کالعدم دہشت گرد تنظیم ¾ بلوچستان میں سکیورٹی فورسز اور معصوم شہریوں پر حملوں میں ملوث ہے۔ پاکستانی سفیر نے مو¿قف اختیار کیا کہ کالعدم بی ایل اے کے دہشت گرد بچوں، خواتین، مسیحی برادری اور شیعہ آبادی کے قاتل ہیں اور دہشت گردوں کی جانب سے سوئس سرزمین کا استعمال ناقابل قبول ہے۔ پاکستانی سفیر کے بھیجے گئے احتجاجی مراسلے کے مطابق اقوام متحدہ کا دفتر رکھنے والے پرامن شہر جنیوا میں دہشت گرد سرگرمیاں تشویش کا باعث ہیں جبکہ کالعدم بلوچ لبریشن آرمی کے دہشت گردوں نے پاکستان مخالف پروپیگنڈا کے لیے جنیوا کا استعمال کیا۔ اپنے مراسلے میں انہوں نے کہا کہ اقوام متحدہ ہیڈکوارٹرز کے سامنے پاکستان دشمن عزائم کا ہونا انتہائی تشویشناک ہے لہذا سوئٹزرلینڈ حکومت پوری قوت اور سنجیدگی سے ان اشتہاروں کے معاملے سے نمٹے ¾جنیوا شہر کے حکام کو کالعدم بی ایل اے کے دہشت گردوں کے بارے میں آگاہ کیا جائے اور اس معاملے کی تحقیقات کر کے آئندہ ایسا ہونے سے روکا جائے۔ مراسلے میں کہا گیا کہ کالعدم بی ایل اے کے دہشت گردوں اور اشتہاری کمپنی کے خلاف قانونی کارروائی کرتے ہوئے پاکستان کے مستقل مشن اور سفارت کاروں کو بھی تحفظ فراہم کیا جائے۔

اسلام آباد(مانیٹرنگ ڈیسک) چیئرمین تحریک انصاف عمران خان نے کہا ہے کہ این اے120 میں عوام کا فیصلہ سامنے آیا ہے، تمام تر حکومتی اختیارات اور مسائل کے استعمال کے باوجود ن لیگ کا30 فیصد ووٹ کم ہونا بتاتا ہے کہ اس پارٹی میں بڑا ڈینٹ پڑچکا ہے، آرٹیکل62.63 مجھ پر لگانا ناممکن ہے، اگلا الیکشن تحریک انصاف جیتے گی، ضمنی الیکشن میں اخلاقی فتح عدالت کی ہوئی ہے، خصوصی انٹرویو دیتے ہوئے انہوں نے کہا کہ ن لیگ نے اتنا زور جنرل الیکشن میں نہیں لگایا جتنا ضمنی الیکشن میں لگایا گیا، وزیر مشیر حلقہ میں کمپین کرتے رہے جبکہ ہمارے ارکان اسمبلی کو بھی وہاں جانے سے روکا گیا، ن لیگ اور الطاف کی ایم کیو ایم میں کوئی فرق نہیں ہے، تمام تر حربے استعمال کرنے کے باوجود ن لیگ کا ووٹرز نے انکا ساتھ نہ دیا، کیونکہ باشعور طبقہ ان کی عدلیہ مخالف مہم کے خلاف ہے، ن لیگ تو کرپشن کو جائز سمجھتی ہے، قومیں جنگ میں ہار کر تو دوبارہ کھڑی ہوسکتی ہیں لیکن اخلاقیات تباہ ہوجائیں تو نہیں بچ سکتیں، صادق اور امین ہونا تو لیڈر شپ کیلئے ضروری ہے کیونکہ عوام کا پیسہ کسی کرپٹ کو نہیں سونپا جاسکتا، حدیبیہ کیس میں ہر چیز واضح ہے، شریف فیملی منی لانڈرنگ میں ملوث رہی، عمران خان نے کہا کہ تسلیم کرتا ہوں کہ ہم ضمنی الیکشن میں مزید ووٹ حاصل کرسکتے تھے، لیکن ہم نے کمپین شروع کرنے میں تاخیر کردی، یاسمین راشد ووٹرز کو داد دیتا ہوں جنہوں نے بڑی استقامت سے مقابلہ کیا، شریف خاندان اور ن لیگ کی سوچ یہ ہے کہ فوج مدد نہ کرے تو اسے اپنے خلاف سمجھتے ہیں،2013ءالیکشن میں فوج نے ان کی مدد کی، این اے120 الیکشن میں3 یونین کونسلز کو چیک کررہے ہیں، باقی الیکشن میں دھاندلی نہیں ہوئی، دھرنے اور سوشل میڈیا نے عوامی شعور کو بڑھایا ہے، اگلے الیکشن میں جیت ہماری ہوگی، آج سندھ حیدر آباد میں جلسہ ہے تبدیلی کیا آئی لوگ خود دیکھیں گے، ن لیگ کے گڑھ میں ان کا30 فیصد ووٹ کم ہوا ہے، باقی سارے ملک میں ان کا ووٹ مزید کم ہوگا، لیگی رہنما مجھ سے رابطے میں ہیں، تاہم وہ ان کی انتقامی کارروائیوں سے ڈرتے ہیں، کیونکہ ن لیگ سیاسی پارٹی نہیں بلکہ ایک مافیا ہے، چودھری نثار سے کوئی رابطہ نہیں ہے، تاہم ان کو داد دونگا کہ یہ تو کہا کہ مریم نواز کی قابلیت کیا ہے، چودھری نثار سے رابطہ نہیں ہے بلکہ ان پر دھرنے کے دوران شیلنگ کرانے پر آج بھی غصہ ہے۔ انہوں نے کہا کہ آرٹیکل62/63 کا اطلاق مجھ پر نہیں ہوسکتا، جو شخص باہر سے پیسے کما کر پاکستان لاتا ہے اسے کیسے نااہل قرار دیا جاسکتا ہے، الیکشن کمیشن میں آج پارٹی کی تمام فارن فنڈنگ کی تفصیل جمع کرادی ہے،40 ہزار لوگوں کے نام دیئے ہیں، الیکشن کمیشن غیر جانبدار نہیں ہے، اگر ہائیکورٹ نے مجھے ریلیف نہ دیا اور الیکشن کمیشن پیش ہونے کا کہا تو پیش ہوجاو¿ں گا، الیکشن کمیشن ن لیگ کا طفیلی بنا ہوا ہے، ضمنی الیکشن میں ترقیاتی کام ہوئے، وزیر کمپین کرتے نظر نہیں آتے لیکن عمران خان کی بڑی تکلیف ہے اور اس کے وارنٹ جاری ہورہے ہیں، عمران خان نے کہا کہ کرپشن کی بات ہو اور زرداری کا نام نہ آئے ایسا کیسے ہوسکتا ہے، نواز شریف اور زرداری نے کرپشن کیلئے ادارے تباہ کردیئے، ملک کے ساتھ جو سلوک کیا وہ کوئی دشمن بھی نہیں کرسکتا، ان دونوں نے انتقامی کارروائیوں کیلئے پولیس کے نظام کو تباہ کردیا، پیسہ بنانے کیلئے ادارے تباہ کردیئے، ریگولیٹری اداروں کو تباہ کردیا۔