سپریم کورٹ آف پاکستان نے چیئرمین پی ٹی آئی عمران خان کو عدالت میں پیش ہونے کا موقع فراہم کردیا۔

عدالت عظمیٰ نے نیب ترامیم کیس کی 31 اکتوبر کی سماعت کا تحریری حکمنامہ جاری کردیا جس میں کہا گیا ہے کہ عمران خان نیب ترامیم میں مرکزی درخواست گزار ہیں، عدالت تمام فریقین کو نوٹسز جاری کرتی ہے۔

عدالتی حکمنامے میں کہا گیا کہ حکم کی نقل اڈیالہ جیل میں چیئرمین پی ٹی آئی کو پہنچائی جائے، کیس کی سماعت سپریم کورٹ پریکٹس اینڈ پروسیجر کے فیصلے سے مشروط ہے۔

اٹارنی جنرل او رتمام صوبائی ایڈووکیٹ جنرلز کو بھی نوٹس جاری کردیے گئے ہیں، جب کہ چیئرمین پی ٹی آئی کو نوٹس جیل سپرنٹنڈنٹ کے ذریعے بھیجا جائے گا۔

واضح رہے کہ چیف جسٹس آف پاکستان جسٹس قاضی فائز عیسیٰ کی سربراہی میں 5 رکنی لارجر بینچ نے 31 اکتوبر کو نیب ترامیم کیس کی سماعت کی تھی۔

سپریم کورٹ نے نیب ترامیم فیصلے کے خلاف وفاقی حکومت کی انٹرا کورٹ اپیل پر سماعت کرتے ہوئے نیب عدالتوں کو زیرسماعت مقدمات کے حتمی فیصلے سے روک دیا۔

عدالت نے اپیلوں کی نقول چیئرمین پی ٹی آئی کو جیل میں فراہم کرنے کا حکم دیتے ہوئے سماعت پریکٹس اینڈ پروسیجر کیس کا تفصیلی فیصلہ آنے کے بعد تک ملتوی کردی تھی۔

پاکستان ڈیموکریٹک مومنٹ (پی ڈی ایم) حکومت کے اتحادی سردار اختر مینگل کی جانب سے کئی اہم انکشافات اور اعتراف سامنے آگئے۔ ڈان نیوز کو دیئے ایک انٹرویو میں بلوچستان نیشنل پارٹی مینگل کے سربراہ سردار اختر مینگل نے کہا کہ جنرل باجوہ کی مدد کے بغیر نہ تحریک عدم اعتماد ممکن تھی اور نہ ہی پی ڈی ایم کی حکومت بن سکتی تھی کیوں کہ اگر جنرل باجوہ نہ چاہتے اور اگر ان کے عمران خان کے ساتھ اختلافات نہ ہوتے تو ہم کبی بھی ان کے خلاف تحریک عدم اعتماد نہیں لا سکتے تھے اور اگر اس وقت کے آرمی چیف کی مدد نہ ہوتی تو شاید یہ پی ڈی ایم حکومت کبھی بھی نہیں بنتی۔
انہوں نے کہا کہ پی ڈی ایم حکومت نے ملٹری قیادت سے وعدہ کیا کہ ان سولہ مہینوں میں عوام کی ہمدردیاں حاصل کرنی ہیں اورٹارگٹ تھا کہ پی ٹی آئی کو بلڈوز کرنا ہے لیکن ہم ان دونوں منصوبوں میں بری طرح ناکام ہو گئے، پی ڈی ایم حکومت کا ٹارگٹ تھا کہ ہم پی ٹی آئی کا ووٹر بلڈوز کر کے سارا ووٹر اپنی طرف کر لیں گے لیکن ایسا نہیں کر سکے بلکہ جو نفرت ہم پی ٹی آئی کیخلاف پیدا کرنا چاہتے تھے وہ بھی ہمارے کھاتے میں آ گئی کیوں کہ ان سولہ مہینوں میں پی ڈی ایم حکومت کچھ بھی ڈیلیور نہیں کر پائی، پی ڈی ایم سیاستدانوں نے اپنے اپنے کیسز ختم کرائے، نیب قوانین میں ترامیم کیں اور الیکشن ریفارمز کے نام پر وہ ریفارمز کیں جو ہمارے حق میں بہتر تھیں، پی ڈی ایم حکومت نے اسمبلی کے فلور پر ایک دن میں 56 بل پاس کیے لیکن انہوں نے ہمارا ایک بل بھی پاس نہیں کیا، وہ ہمارے ووٹوں کی خاطر ہمیں واپس بلاتے ہیں اور جب کام ہو جاتا ہے تو وہ ہم سے جان چھڑانا چاہتے ہیں۔

سردار اختر مینگل نے کہا کہ جب میں پی ڈی ایم سے اتحاد کے لیے شہباز شریف سے ملا تو انہوں نے اس وقت کے وزیر اعظم سے کہا چوں کہ اب وہ معاہدہ کر چکے ہیں تو انہیں ماضی کی طرح بلوچستان کو اسٹیبلشمنٹ کے رحم و کرم پر نہیں چھوڑنا چاہیے لیکن شہباز شریف نے ہمیں لپیٹ کر اسٹیبلشمنٹ کی جیبوں میں ڈال دیا۔

راولپنڈی: پاک فوج نے پاکستان ائیرفورس ٹریننگ ائیربیس میانوالی پر دہشتگردوں کا حملہ ناکام بنادیا اور کلیئرنس آپریشن میں تمام 9 دہشتگردوں کو ہلاک کردیا۔

پاک فوج کے شعبہ تعلقات عامہ (آئی ایس پی آر) کے مطابق دہشتگردوں نے میانوالی ٹریننگ ائیربیس پر آج علی الصبح حملے کی کوشش کی جس پر پاک فوج نے دہشتگردوں کو منہ توڑ جواب دیا۔

آئی ایس پی آر کے مطابق دہشتگردوں کے حملے پر پاک فوج نے بر وقت اور مؤثر کارروائی کرتے ہوئے پاکستان ائیرفورس ٹریننگ ائیربیس میانوالی پر حملہ ناکام بنایا۔

آئی ایس پی آر کا کہنا ہےکہ پاک فوج کی بروقت کارروائی کے نتیجے میں 3دہشتگرد مارے گئے۔

پسنی سے اورماڑہ جانے والی سکیورٹی فورسز کی گاڑیوں پر دہشتگردوں کا حملہ، 14 جوان شہید

آئی ایس پی آر کے مطابق پہلے سے گراؤنڈ کیے گئے 3 طیاروں اور فیول باوزر کو نقصان پہنچا جب کہ جوانوں نے اثاثوں کی حفاظت کو یقینی بنایا۔

آئی ایس پی آر نے بتایا کہ مشترکہ کلیئرنگ اور کومبنگ آپریشن مکمل کرلیا ہے اور اس دوران تمام 9 دہشتگردوں کو ہلاک کردیا گیا ہے جب کہ ائیر بیس پر ناکام حملے کے بعد محلقہ علاقوں میں کسی بھی ممکنہ خطرے کے پیش نظر کلیئر نس آپریشن کیا گیا۔

آئی ایس پی آر کا کہنا ہےکہ حملے میں پی اے ایف کے فنکشنل آپریشنل اثاثوں میں سے کسی کو کوئی نقصان نہیں پہنچا، دہشتگردوں کے ناکام حملے میں 3 گراؤنڈ کیے گئے طیاروں کو معمولی نقصان پہنچا اور تینوں طیارے نان آپریشنل تھے۔

آئی ایس پی آر نے مزید کہا کہ آپریشن کا فوری، پیشہ ورانہ اختتام امن دشمنوں کے لیے یاد دہانی ہے کہ پاکستان کی مسلح افواج چوکس رہتی ہیں، پاکستان کی مسلح افواج کسی بھی خطرے سے وطن کا دفاع کرنے کی پوری صلاحیت رکھتی ہیں۔

واضح رہے کہ گزشتہ روز بلوچستان کے علاقے پسنی سے اورماڑہ جانے والی سکیورٹی فورسز کی گاڑیوں پر دہشتگردوں کے حملے میں 14 فوجی جوان شہید ہوگئے۔