اینٹی کرپشن پنجاب نے سابق وفاقی وزیر فواد چوہدری کو بھائی اور کزن سمیت سرکاری زمینوں پرقبضوں کے الزام میں طلب کرلیا ہے۔

شہری سے نوکری کے عوض 50 لاکھ روپے رشوت کے الزام میں گرفتار سابق وفاقی وزیر فواد چوہدری پر اب سرکاری زمینوں پر قبضوں کا بھی انکشاف ہوا ہے، اور اینٹی کرپشن نے انہیں بھائی سمیت آج طلب کرلیا ہے۔

اینٹی کرپشن کے مطابق فواد چوہدری پر بھائیوں اورکزن کے ساتھ مل کر سرکاری زمینوں پرقبضوں کا الزام ہے، جس پر اینٹی کرپشن اسٹیبلشمنٹ نے انہیں آج 11 بجے طلبی کا نوٹس جاری کیا تھا۔

اینٹی کرپشن راولپنڈی کی جانب سے فواد چوہدری، بھائی فرازچوہدری اور کزن فوق شیرباز کو طلبی کا نوٹس جاری کیا گیا، جس میں کہا گیا کہ فوادچوہدری پر بھائی اور کزن کے ساتھ مل کر سرکاری زمینوں پر قبضوں کا الزام ہے، جس کی انکوائری کرنی ہے۔ تینوں ملزمان 11 بجے اینٹی کرپشن راولپنڈی آفس پیش ہوں۔

واضح رہے کہ سابق وفاقی وزیر فواد چوہدری کو ہفتہ 4 نومبر کی صبح اسلام آباد میں ان کی رہائش گاہ سے گرفتار کیا گیا تھا، جس کی تصدیق ان کے بھائی فیصل چوہدری اور ان کی اہلیہ حبا فواد نے کی۔

فواد چوہدری کی اہلیہ اور بھائی فیصل چوہدری نے ان کی گرفتاری کی تصدیق کرتے ہوئے بتایا کہ فواد چوہدری صبح ناشتہ کررہے تھے کہ اسلام آباد پولیس کے ہمراہ سادہ کپڑوں میں کچھ لوگ آئے اور انہیں لیکر نامعلوم مقام پر لے گئے۔

گزشتہ روز اسلام آباد پولیس سابق وفاقی وزیر فواد چوہدری کو منہ پر کپڑا ڈال کر اسلام آباد کچہری لائی اور عدالت کے سامنے پیش کیا۔

اسلام آباد پولیس نے عدالت سے فواد چوہدری کی 5 روزہ جسمانی ریمانڈ کی استدعا کی اور بتایا کہ فواد چوہدری کو ظہیر نامی شخص کی جانب سے درج ایف آئی آر میں گرفتار کیا گیا۔

پولیس نے عدالت میں ایف آئی آر بھی پڑھ کر سنائی، جس میں بتایا گیا کہ فواد چوہدری نے شہری ظہیر سے 50 لاکھ روپے بطور رشوت لیے تھے اور نوکری کا وعدہ کیا تھا تاہم پیسے لے کر انہوں نے اسے نوکری نہیں دی اور جب شہری نے اپنے پیسے واپس لینے کا تقاضا کیا، تو فواد چوہدری کی جانب سے اسے جان سے مارنے کی دھمکی دی گئی۔

فواد چوہدری دو روزہ جسمانی ریماڈ پر پولیس کے حوالے

فواد چوہدری نے عدالت سے استدعا کی کہ مجھے میرے وکلاء سے ملنے دیا جائے، جس پر جج عباس شاہ نے انہیں وکلا سے ملنے کی اجازت دے دی۔

فواد چوہدری نے عدالت کو بتایا کہ میرے پھیھپڑوں کا مسئلہ ہے، مجھے ڈاکٹر تک رسائی دی جائے، مجھے بچوں سے ملنے کے لیے رسائی دی جائے۔

سابق وفاقی وزیر نے کہا کہ ظہیر نامی شخص اتنا سست ہے کہ عدالت بھی نہیں آسکے۔

عدالت نے فواد چوہدری کو 2 روزہ ریمانڈ پر پولیس کے حوالے کر دیا۔

سری لنکا کے وزیر کھیل روشن رانا سنگھے نے ورلڈ کپ میں بھارت کے ہاتھوں شرمناک شکست کے بعد قومی کرکٹ بورڈ کو برطرف کر دیا۔

واضح رہے کہ رانا سنگھے کے سری لنکا کرکٹ کے ساتھ کئی ماہ سے تنازعات چل رہے ہیں جو ملک کی سب سے امیر ترین کھیلوں کی تنظیم ہے۔

وزیر کھیل روشن رانا سنگھے نے سری لنکا کرکٹ کے لیے عبوری کمیٹی تشکیل دے دی ہے۔ 1996 کا ورلڈ کپ جیتنے والے کپتان ارجنا رانا ٹنگا کو نئے عبوری بورڈ کا چیئرمین مقرر کیا گیا ہے۔

نئے سات رکنی پینل میں سپریم کورٹ کے ایک ریٹائرڈ جج اور بورڈ کے ایک سابق صدر بھی شامل ہیں۔

یہ اقدام بورڈ کے دوسرے سب سے بڑے افسر سکریٹری موہن ڈی سلوا کے استعفیٰ دینے کے ایک دن بعد سامنے آیا ہے۔

گزشتہ ہفتے ورلڈ کپ میں میزبان بھارت کے ہاتھوں سری لنکا کی 302 رنز کی شکست کے بعد رانا سنگھے نے کھلے عام پورے بورڈ سے استعفے کا مطالبہ کیا تھا۔

سری لنکا کی ٹیم جمعرات کو ممبئی میں بھارت کے 358 رنز کے ہدف کا تعاقب کرتے ہوئے 55 رنز پر آؤٹ ہو گئی تھی جو ورلڈ کپ کی تاریخ کا چوتھا سب سے کم اسکور ہے۔

اس شکست کے بعد سری لنکن عوام میں غم و غصے کی لہر دوڑ گئی تھی۔ وزیر کھیل کا کہنا تھا کہ سری لنکن کرکٹ حکام کو عہدے پر رہنے کا کوئی اخلاقی حق نہیں ہے۔انہیں رضاکارانہ طور پر استعفیٰ دے دینا چاہیے۔

سری لنکا اور بنگلہ دیش کے درمیان ورلڈ کپ کا اگلا میچ پیر کو کھیلا جائے گا اور ورلڈ کپ کے فائنل 4 میں جگہ بنانے کیلئے سری لنکن ٹیم کو کسی معجزے کی ضرورت ہوگی۔

رانا سنگھے نے انٹرنیشنل کرکٹ کونسل (آئی سی سی) کے تمام ارکان کو خط لکھ کر اس کھیل میں سیاسی مداخلت کے خلاف قوانین بنائے ہیں۔

سری لنکن میڈیا کو جاری کردہ خطوط میں رانا سنگھے نے کہا کہ سری لنکن کرکٹ کھلاڑیوں کے انضباطی معاملات، انتظامی بدعنوانی، مالی بدسلوکی اور میچ فکسنگ کے الزامات کی شکایات سے گھرا ہوا ہے۔

آئی سی سی نے سیاسی مداخلت سمجھ کر گزشتہ ماہ بورڈ میں مبینہ بدعنوانی کی تحقیقات کے لیے مقرر کردہ تین رکنی پینل کو واپس لینے پر مجبور کیا تھا۔

رانا سنگھے کے حالیہ اقدام پر آئی سی سی کی جانب سے فوری طور پر کوئی رد عمل سامنے نہیں آیا ہے۔

واضح رہے کہ ماضی میں مضبوط ترین ٹیم سمجھی جانے والی سری لنکا نے 1996 کے بعد سے ورلڈ کپ نہیں جیتا ہے اور رانا سنگھے نے معیار کی خرابی کے لئے بورڈ کو مورد الزام ٹھہرایا ہے۔

بورڈ کے نئے عبوری چیئرمین کے بھائی اور کابینہ کے ایک اور وزیر پرسنا راناٹنگا نے اگست میں پارلیمنٹ کو بتایا تھا کہ 1996 کی فتح ہماری کرکٹ کے لیے سب سے بڑی لعنت تھی۔

انہوں نے کہا کہ 1996 کے بعد کرکٹ بورڈ کے پاس پیسہ آنا شروع ہوا اور اس کے ساتھ وہ لوگ بھی آئے جو چوری کرنا چاہتے تھے۔

اتوار کی شام بلغاریہ کے ایک وسیع وعریض علاقے میں پہلی بار ارورا بوریلس، جسے عام طور پر شمالی روشنیوں کے نام سے جانا جاتا ہے، کےآسمان پر حیرت انگیز ’سُرخ‘ ڈسپلے کی تصاویر اور ویڈیوز تیزی سے سوشل میڈیا پر وائرل ہوگئیں۔

میٹیو بلقان کی رپورٹ کے مطابق سرخ ارورا سب سے پہلے بلغاریہ کے شمال مشرقی حصے میں نمودار ہوا اور اس کے بعد ملک کے تقریبا تمام کونوں میں پھیل گیا۔

سوشل میڈیا پلیٹ فارمز پر کچھ لوگوں نے بلغاریہ میں خون آلود آسمان کی تصاویر کو ”تباہ کن“ اور ”خوفناک“ قرار دیا۔ دوسروں نے اس مسحور کن رجحان کا تجربہ کرنے پر اپنے جوش و خروش کا اظہار کیا۔

اطلاعات کے مطابق شمالی روشنیاں رومانیہ، ہنگری، جمہوریہ چیک اور یوکرین میں بھی دیکھی گئیں۔ پولینڈ اور سلوواکیا کی تصاویر بھی ہیں۔ ہفتے کی رات برطانیہ میں بھی چمکدار سبز اور سرخ ارورا دیکھے گئے۔

رواں سال کے اوائل میں ارورا بوریلس کو پہلی بار بھارتی علاقے لداخ میں دیکھا گیا تھا،جو سائنس دانوں اور اسکائی گیزر کیلئے یکساں طور پر سنسنی کا باعث بنیں۔

ارورا بوریلس عام طور پر جغرافیائی طوفانوں کے دوران ظاہر ہوتا ہے۔ یہ آسمانی عجائبات زمین کے مقناطیسی میدان میں خلل کا نتیجہ ہیں ، جس کی وجہ سے اونچے اور نچلے طول بلد دونوں پر گھنٹوں چمکدار ارورا پیدا ہوتے ہیں۔

اگرچہ شمالی روشنیاں عام طور پر زمین کے مقناطیسی شمالی اور جنوبی قطبوں کے قریب دیکھی جاتی ہیں ، جہاں انہیں ارورا آسٹریلس کہا جاتا ہے ، لیکن وہ کبھی کبھار زیادہ معتدل علاقوں میں اپنی موجودگی ظاہرکرسکتی ہیں۔

یہ رجحان سورج سے نکلنے والے شمسی ہوا کے ذرات کے تعامل سے پیدا ہوتا ہے ، جن میں سے کچھ زمین تک پہنچنے سے پہلے لاکھوں میل کا سفر کرتے ہیں، زمین کا مقناطیسی میدان ان ذرات کو قطبی علاقوں کی طرف رہنمائی کرتا ہے۔

ارورا کے انوکھے رنگ وں کا انحصار مخصوص گیس کے مالیکیولز پرہوتا ہے جن کا یہ ذرات فضا میں سامنا کرتے ہیں اورتعامل ہوتے ہیں۔ آکسیجن کے اخراج سے خاص سبز روشنی پیدا ہوتی ہے ، جبکہ نائٹروجن کے ساتھ تصادم کے نتیجے میں آسمان کو روشن کرنے والی سرخ چمک پیدا ہوتی ہے۔

اسلام آباد: آفیشل سیکریٹ ایکٹ کی خصوصی عدالت نے چیئرمین پی ٹی آئی کی بیٹوں سے بات نہ کرانے پر سپرنٹنڈنٹ اڈیالہ جیل کو نوٹس جاری کردیا۔

چیئرمین پی ٹی آئی کے وکیل شیراز رانجھا نے عمران خان کی بیٹوں سے فون پر بات نہ کرانے پر آفیشل سیکریٹ ایکٹ کی خصوصی عدالت میں توہین عدالت کی درخواست دائر کی جس میں مؤقف اختیار کیا گیا کہ عدالتی احکامات کے باوجود سپرنٹنڈنٹ اڈیالہ جیل نے چیئرمین پی ٹی آئی کی بیٹوں سے بات نہیں کرائی اور ایس پی جیل نے عدالتی احکامات پرعملدرآمد نہیں کیا۔

درخواست میں استدعا کی گئی کہ عدالتی احکامات پرعمل نہ کرنے پر سپرنٹنڈنٹ اڈیالہ جیل کے خلاف توہین عدالت کی کارروائی شروع کی جائے اور جیل حکام کو چیئرمین پی ٹی آئی کی بیٹوں سے بات کرانے کے حکم پرعملدرآمد کا حکم دیاجائے۔

آفیشل سیکریٹ ایکٹ کی خصوصی عدالت کے جج ابو الحسنات نے چیئرمین پی ٹی آئی کی درخواست پر سماعت کی اور سپرنٹنڈنٹ اڈیالہ جیل کو نوٹس جاری کرتے ہوئے 8 نومبر تک جواب طلب کرلیا۔

ھارت میں ایک شوہر نے بیوی کو  بغیر  اجازت بھنویں بنوانے پر طلاق دے دی۔

بھارتی میڈیا کے مطابق جوڑے کا تعلق  بھارتی ریاست اترپردیش کے شہر کانپور سے ہے، غیر معمولی واقعہ اس وقت منظر عام پر آیا جب خاتون نے اپنی طلاق کے حوالے سے پولیس کو آگاہ کیا۔

بتایا جارہا ہے کہ خاتون گل سائبہ کا شوہر سعودی عرب میں ملازمت کرتا ہے جس کی شادی محمد سالم سے گزشتہ سال کے آغاز میں ہوئی تھی۔

میڈیا رپورٹس کے مطابق خاتون نے پولیس کو شکایت درج کرواتے ہوئے بتایا کہ اس کا شوہر رواں سال اگست میں سعودی عرب چلا گیا تھا جس کے بعد ان کے سسرال والوں نے انہیں جہیز کیلئے ہراساں کرنا شروع کردیا دوسری جانب اس کے شوہر پرانے خیالات کے ہیں اور وہ اس کے فیشن کرنے پر اکثر اعتراض کرتے  رہتے تھے۔

خاتون نے بتایا کہ کچھ روز قبل  وہ اپنے شوہر سے ویڈیو کال پر بات کررہی تھیں کہ ان کے شوہر نے بغیر اجازت بھنویں بنانے پر اعتراض کیا اور کہا کہ بغیر پوچھے کیوں بنوائی ہیں؟ اب میں تمہیں طلاق دے رہا ہوں اس کے بعد شو ہر  نے  ویڈیو کال پر ہی تین بار طلاق دے دی۔

پولیس کے مطابق خاتون کی شکایت پر شوہر سمیت ساس اور مزید 5 سسرالیوں کیخلاف ایف آئی آر درج کروالی گئی ہے۔

گزری جمعرات اورجمعہ کا دن پاکستان کے لیے اس طرح اچھااور پرامیدتھا کہ سپریم کورٹ کے چیف جسٹس جناب قاضی فائز عیسیٰ نے سیاسی بے یقینی اورعدم استحکام کے راستے میں ایک بڑا اسپیڈ بریکر بناتے ہوئے ملک میں عام انتخابات کی تاریخ طے کروادی۔میں اسی موضوع پر لکھنے کا ارادہ کرچکا تھا کہ اس اہم لیکن سادہ سے کام کوہر مسئلے کی طرح غیراہم اور مشکل بنانے والوں کے ارادے خاک میں ملانے پرقاضی صاحب کا شکریہ ادا کروں ۔دل تو یہ بھی تھا کہ قاضی صاحب سے درخواست کروں کہ بڑے بڑے اداروں میں تشریف فرمااپنی چھوٹی چھوٹی خواہشات اور سوچوں کے غلام بننے واے بڑے بڑے عہدیداروں کو بھی کسی کٹہرے میں کھڑاکریں تاکہ ہرالیکشن پر اسی طرح شک کی تہہ چڑھانے کی کوشش کرنے والے بھی عبرت بنیں۔حیران ہوں کہ آئین کی کتاب میں واضح طورپردرج الفاظ ان کو پڑھنے میں مسئلہ کیوں ہوجاتا ہے ۔ان کی نظروں پراپنی انا اور مفادات کی پٹی کیوں بندھ جاتی ہے ۔چیف صاحب نے بھی خیر حکمت سے ہی کام لیا کہ چیف الیکشن کمشنر جو خود کو اتنا بڑا سمجھ بیٹھے تھے کہ اپنے بنیادی فرض کو پوراکرنے سے ہی انکاری تھے ان کی انا کا بُت توڑتے ہوئے انہیں ایوان صدربھیج دیا اور صدر مملکت جنہوں نے عمران خان کی ایڈوائس پراسمبلی تحلیل کرنے کا اختیار جو ان کے پاس تھا ہی نہیں وہ فوری استعمال کرلیا لیکن الیکشن کی تاریخ دینے کا اختیار جو صرف انہی کا تھا اس کواستعمال نہ کرکے ملک میں ایک نئے بحران کی بنیاد رکھ دی، اس صدر کو بھی ان کے آئینی فرائض کی یاددہانی کروادی۔چیف صاحب نے 8فروری کو الیکشن پتھرپر لکیر قراردے کر اس ملک کو ایک مسئلے سے نجات دلائی ۔ظاہر ہے پاکستان میں کوئی اچھا کام ہو اورملک دشمن قوتوں کو یہ کام اچھا لگے ایسا تو ہونہیں سکتا اس لیے عین اس وقت جب چیف جسٹس ملک میں عام انتخابات کے کیس کا حکم نامہ لکھوارہے تھے پاکستان کے امن دشمن بھی وارکی تیاریوں میں مصروف تھے۔
گزشتہ دودنوں میں دہشت گردی کے چار واقعات ہوگئے ۔مجھے لگا جیسا میں آٹھ دس سال پیچھے چلا گیا ہوں۔سپریم کورٹ کے فیصلے کے وقت خبر آئی کہ ڈیرہ اسماعیل خان کی تحصیل ٹانک میں پولیس کی گاڑی کو بم سے نشانہ بنایاگیا ہے جس میں اہلکاروں سمیت پانچ افراد شہید ہوگئے ہیں۔ابھی یہ خبر ہی گرم تھی کہ اس سے بھی بڑی اور منحوس گھڑی ہمارے تعاقب میں تھی۔بلوچستان میں گوادر کے علاقے اورماڑامیں دہشتگردوں نے پاک فوج کے ایک کانوائے پر حملہ کردیا ۔اس تباہ کن حملے میں چودہ جوان شہادت کا جام پی گئے۔یہ سن کر خون کھولا،آنکھوں اور دل سے خون کے ہی آنسونکلے۔سمجھ نہیں آرہی کہ آخرایسی کونسی غلطی ہے جس کو ہم سدھارہی نہیں پارہے اور اس وقت دہشت گردی کا دوبارہ سر اٹھانا کس وجہ سے ہے ۔ ایسے واقعات بہت کم ہوگئے تھے، مکمل ختم کبھی بھی نہیں تھے لیکن جمعہ کے دن یہ دو بڑے واقعات ہی کم نہیں تھے کہ ہفتہ کی صبح ایک ایسے واقعے کے ساتھ طلوع ہوئی کہ دماغ ماؤف ہوگیا۔پاکستان ایئرفورس کے میانوالی بیس پرحملہ ہواجس کو سکیورٹی فورسز نے ناکام بناتے ہوئے تمام حملہ آور دہشتگردوں کوہلاک کردیا ۔یہ حملے ہمیں یاددلانے کے لیے کافی ہیں کہ ہمارادشمن ابھی مکمل ناکام نہیں ہوا اور ہماری دہشت گردی کے خلاف جنگ جاری ہے۔
ہماری کوششوں یا حکمت عملی میں کچھ تو کمی رہی ہوگی کہ یہ ناسورمکمل جڑسے نہیں اکھاڑپارہے۔یہ جولائی 2016کی بات ہے جب داعش عراق اور شام کو نابود کرکے باہرپاؤں پھیلا رہی تھی۔ہم تو پہلے ہی طالبان کے عذاب میں تھے لیکن یہ خطہ چونکہ تخریب کاری کو قبول کرنے کے لیے انتہائی زرخیز واقع ہوا ہے اورہم مذہب کے نام پرنفرت کے کام کاٹھیکہ بڑی جلدی پکڑلیتے ہیں تو داعش کوکچھ ہمدردبھارت اوربنگلہ دیش میں بھی مل گئے۔یکم جولائی 2016کوڈھاکا کے ڈپلومیٹک علاقے میں واقع ایک بیکری پرحملہ ہوگیا جس میں عام طورپرغیرملکی سفارتکاروں کے اہلخانہ کھانے پینے آتے تھے۔اس کیفے پرپانچ نوجوانوں نے رات ساڑھے آٹھ بجے حملہ کیا۔داخلے کے وقت جو سامنے آیا اس کو گولی ماردی ۔اس طرح ان پانچ دہشت گردوں نے بیس کے قریب غیرملکی مارڈالے اور باقی بچ رہنے والے لوگوں کو یرغمال بنالیا۔بنگلہ دیش کی پولیس نے کوشش کی لیکن ناکام رہی۔اس کے بعد انسداد دہشت گردی فورسز نے بھی کوشش کی لیکن مزاحمت سے زیادہ یرغمالیوں کے مارے جانے کے خدشے کی وجہ سے آپریشن کامیاب نہ ہوا۔پوری رات اسی آپریشن کی تیاری اور کوشش میں گزر گئی۔بنگلہ دیش ہل کررہ گیا۔اتنے بڑے حملے کی وجہ کسی کو سمجھ نہیں آرہی تھی لیکن داعش نے اس حملے کی ذمہ داری قبول کرلی۔
بنگلہ دیش کی فوج نے صبح کے وقت آپریشن کیا۔یرغمالی رہاہوئے اورتمام پانچ نوجوان دہشت گردہلاک کردیے گئے۔ہم تو یہاں ایسے حملوں کے عادی بن چکے تھے لیکن بنگلہ دیش کی تاریخ کا یہ سب سے بڑااور پہلا ایسا حملہ تھا ۔یہ پانچوں نوجوان بنگلہ دیشی تھے ۔حملے کے خلاف پورے ملک میں ایسی فضا بنی کہ ان حملہ آوروں کے اہلخانہ نے علیٰ لاعلان ان کی لاشیں وصول کرنے سے انکار کردیا۔علامتی طورپران پانچوں کو لاوارث اور اجنبی قراردے کر دفن کیا گیا۔اس کے بعد پورے ملک کے قانون نافذکرنے والے ادارے اس کیس میں لگ گئے۔ان دہشتگردوں سے رابطے اور ان کے سہولتکاروں کوتلاش کرکے آٹھ لوگوں پرفرد جرم عائد کی گئی۔ عدالت نے آٹھ میں سے سات کو پھانسی کی سزاسنائی۔پورے ملک میں کسی نے ان سے ہمدردی دکھانے کی جرات نہیں کی۔کسی نے ان کو اپنے بچے یابھٹکے ہوئے لوگ کہہ کر ان کے کام کا جواز تلاش کرنے کی ہمت نہ کی۔وہ دن گیا اورآج کا آیابنگلہ دیش میں داعش یا کسی اورعالمی دہشت گرد تنظیم کو ملازمت کے لیے کوئی جوان ملا نہ بوڑھا۔
ایک ہم ہیں کہ ریاست نے غیرقانونی طورپرمقیم افغان باشندوں سے درخواست کی کہ وہ اپنے وطن واپس چلے جائیں لیکن اس پر بھی ہمارے کچھ دانشوروں کو تکلیف ہونا شروع ہوگئی ۔یہاں لوگوں کوانسانی حقوق یاد آگئے ۔بھائی چارہ جوش مارنے لگا۔یہ لوگ جو افغانیوں کی واپسی کو انسانی المیوں سے جوڑرہے ہیں جو ان کی شان میں کالم لکھ رہے ہیں کوئی ان سے پوچھے کہ ہم نے افغانستان کے امن کے لیے کیا کچھ نہیں کیا۔طالبان کی حکومت کی واپسی کی راہیں ہموارکرکے ان کو دیں۔ ان کے آنے اور امریکا کے نکل جانے کو غلامی کی زنجیریں توڑنا تک کہہ دیا لیکن بدلے میں کیا مانگا؟ یہی نا کہ تحریک طالبان پاکستان کوافغانستان میں پناہ دینا بندکریں۔اپنی سرزمین کو ہمارے خلاف استعمال کرنے سے روکیں۔یہ دونوں کام تو ویسے ہی ہماری خودمختاری کے خلاف ہیں ۔
ہم دہشت گردی کے خلاف طویل ترین جنگ لڑچکے ۔ہمارے اسی ہزار سے زائد شہری اس جنگ میں اپنی جانیں دے چکے ہیں۔ہماری مسلح افواج کے افسر اور جوانوں کی بڑی تعداداپنا خون دے چکی ہے۔جنگ کی وجہ بننے والے افغانستان سے امریکا کوواپس گئے دوسال ہوگئے ہیں۔ افغانستان میں طالبان کی حکومت بن چکی ہے پھر اس دہشت گردی کا جواز کیا ہے؟ہمارے قانون نافذکرنے والے اداروں اورسویلینز کی قربانیاں ناقابل فراموش ہیں ۔دہشت گردی کے چلتے نہ ہماری معیشت ٹریک پرآسکتی ہے نہ ہماری سیاست اور نہ ہی ہمارا معاشرہ اس ہیجان سے باہر آسکتا ہے اس لیے پاکستان کو بچانے کے لیے ہم سب کو یکسو ہوکراپنے سکیورٹی کے اداروں کے ساتھ تعاون اور شانہ بشانہ کھڑے ہوکر مزید کوششوں کی ضرورت ہے۔صرف دہشتگردوں کو ہی نہیں بلکہ اپنے معاشرے میں کسی بھی وجہ سے ان دہشت گردوں کے ہمدردوں کا خاتمہ بھی اتنا ہی ضروری ہے۔ اگر ہندوستان اورافغانستان کے عناصریہ حرکتیں کررہے ہیں تو ان کومکمل بے نقاب کرکے ان کے یہاں موجود سہولتکاروں کو عبرت کی مثالیں بنانے تک ہم اس گرداب سے باہر نہیں نکل سکیں گے۔