استحکام پاکستان پارٹی (آئی پی پی) کے صدر علیم خان نے کہا ہے کہ پی ٹی آئی کا لیڈر کسی سے مخلص نہیں تھا، جو کہتا تھا سب کو رلاؤں گا ، آج خود رو رہا ہے۔ کیا اس وقت ان کی آنکھوں پر پٹی بندھی تھی، جب تجوری میں پیسے آرہے تھے۔
ٹیکسلا میں تقریب سے خطاب میں علیم خان نے نام لیے بغیر چیئرمین پی ٹی آئی کو نشانے پر رکھا۔ ان کا کہنا تھا کہ جو کہتا تھا سب کو رلاؤں گا ، آج خود رو رہا ہے، کیا تحریک انصاف کے دور میں نیا پاکستان فرح گوگی بنارہی تھیں۔
ان کا مزید کہنا تھا کہ وہ لیڈر اپنی اولاد سے بھی مخلص نہیں تھا، بطور وزیراعظم انہوں نے اپنے بچوں کو آنے سے منع کیا، ساڑھے 3 سال ان کے بچے ان سے نہیں ملے، ساڑھے 3 سال اپنے بچوں کی شکل نہیں دیکھی، لیکن جب برا وقت آیا تو انہیں اپنے بچے یاد آگئے۔
علیم خان کا مزید کہنا تھا کہ جو شخص اپنی اولاد کا نہیں وہ ہمارا کیا بنے گا، اسے جب موقع ملا اس نے اپنی کارروائی کی، ہم نے کبھی خواتین پر سیاست نہیں کی۔ میری بیٹی کیخلاف مقدمات بنائےگئے اور جہانگیر ترین کے اہلخانہ کےخلاف پرچے کرائےگئے۔
انھوں نے کہا کہ جو کہتا تھا سب کو رلاؤں گا ، آج خود رو رہا ہے، جیل میں جاکر دیسی مرغی مانگی جارہی ہے، چیئرمین پی ٹی آئی اسی جیل میں ہے جہاں لوگوں کو بھیجتا تھا، لوگوں کو رلانے والا خود رو رہا ہے، یہ اللہ کا نظام ہے۔
صدر آئی پی پی نے الزام عائد کیا کہ وہ لیڈر ہمیں مدینہ کی ریاست کا سمجھاتا تھا مگر ان کے گھر کی تجوری میں پیسے آرہے تھے، فرح گوگی اور عثمان بزدار پیسے اکٹھے کر کے دے رہے تھے ، کیا اس وقت ان کی آنکھوں پر پٹی بندھی تھی، کیا ایسا کوئی گھر ہوسکتا ہے جس کی تجوری میں پیسے آرہے ہوں اور سربراہ کو پتا نہ ہو۔
انھوں نے کہا کہ پی ٹی آئی کیلئے جو محنت کرسکتے تھے ہم نے کی، پی ٹی آئی کا لیڈر کسی کےساتھ بھی مخلص نہیں تھا۔
انھوں نے کہا کہ میں اور جہانگیرترین 2011 سے ساتھ ہیں، نیا پاکستان بنانے کی ایک سوچ اور نظریہ تھا۔ ہمارے لیے جوممکن تھا اس میں ایک فیصد بھی کمی نہیں چھوڑی۔
ان کا کہنا تھا کہ 80 ارب روپے میں پشاور جنگلہ بس بنائی گئی، جنگلہ بس منصوبے کے پیچھے مال تھا، جو منصوبہ پنجاب میں ایک سال میں مکمل ہوا وہ کے پی میں 6 سال میں مکمل ہوا، بلین ٹری سونامی میں 10 لاکھ پودے بھی نہیں لگے، بعد میں کہتے پودے بکریاں کھا گئیں۔
عبدالعلیم خان کا کہنا تھا کہ وقت آئے گا اس ملک کو آگے لے کر جائیں گے، مایوس نہ ہوں، پاکستان جیسا ملک دنیا میں نہیں، پاکستان جیسا روزگار دنیا میں نہیں، ہمیں صرف قیادت نہیں ملی، جہانگیر ترین کی صورت میں ہمیں قیادت مل گئی ہے، چیئرمین پی ٹی آئی جہانگیر ترین سے کام نہ لے سکے، یہ ملک کی زراعت میں بہتری لا سکتے ہیں، چیئرمین پی ٹی آئی کو اپنا مال بنانے اور تجوریاں بھرنے کی پڑی تھی۔
انہوں نے کہا کہ غلام سرور خان کے پارٹی میں آنے سے ہمیں بڑا حوصلہ ملا، آنے والے دنوں میں بہت سے مخلص دوست آئی پی پی میں شامل ہوں گے۔
