اسلام آباد: عالمی مالیاتی ادارے کی جانب سے درآمدات کی آڑ میں منی لانڈرنگ اور مشکوک ٹرانزکشنز پر سخت پالیسی بنانے کا مطالبہ سامنے آگیا۔

تفصیلات کے مطابق پاکستان اور آئی ایم ایف کے درمیان 71 کروڑ ڈالر کی اگلی قسط کیلئے مذاکرات کا آج چھٹا روز ہے جس میں آج بھی آئی ایم ایف کا ایک نیا مطالبہ سامنے آیا ہے۔

ذرائع نے بتایا کہ اینٹی منی لانڈنگ اور مشکوک ٹرانزکشنز پر اسٹیٹ بینک اور ایف بی آر حکام کے آئی ایم ایف مشن سے مذاکرات ہوئے اور ایف بی آر نے ٹیکس کرائم پر ستمبر تک رپورٹ اور آئی ایم ایف مشن کو بریفنگ بھی دی۔

ایف بی آر نے بریفنگ میں بتایا کہ منی لانڈرنگ میں ملوث ہونے پر ملوث عناصر کے اکاؤنٹس بلاک، سخت سزائیں اور کڑی نگرانی کی جاتی ہے۔

آئی ایم ایف نے مطالبہ کیا ہے کہ ایف بی آر اور اسٹیٹ بینک ٹیکس کرائم اور مشکوک ٹرانزکشنز کیلئے واضح پالیسی بنائے، آئندہ بجٹ میں مشکوک ٹرانزکشنز کیلئے مزید سخت سزائیں فنانس بل میں منظور کرائی جائیں اور مشکوک ٹرانزکشنز میں اگر منی لانڈرنگ کے عناصر ہیں تو قوانین پر سختی سے عملدرآمد کو یقینی بنایا جائے۔

لاہور میں اسموگ لاک ڈاؤن کے دوران کھلنے والی تمام دکانیں پولیس کی جانب سے بن کرا دی گئی ہیں۔

گزشتہ روز اسموگ کی بگڑتی صورتحال کے باعث لاہور سمیت پنجاب کے 8 اضلاع میں اسمارٹ لاک ڈاؤن کا نفاذ ہوا تاہم نگراں حکومت نے جمعرات اور جمعے کے لیے مارکیٹس کھولنے کی اجازت دی تھی۔

محکمہ پرائمری ہیلتھ کئیر پنجاب نے دو دن کے لیے مارکیٹس کھولنے کی اجازت دینے سے متعلق ترمیمی نوٹیفکیشن بھی جاری کیا تھا جس کے مطابق شاپنگ مالز سمیت مارکیٹس ہفتے اور اتوار کو بند رہیں گی جب کہ دو روز شاپنگ مالز، مارکیٹس، ریسٹورنٹ، سینما اور جمنیزیم بھی معمول کے مطابق کھلیں گے۔

نوٹیفکیشن میں مزید بتایا گیا تھا کہ فیصلےکا اطلاق لاہور، ننکانہ صاحب، شیخوپورہ، قصور، گوجرانوالا، نارووال، حافظ آباد اور سیالکوٹ پر ہوگا۔

ایک اور نوٹیفکیشن کے مطابق نگراں صوبائی حکومت نے میڈیکل و پرچون اسٹورز، تندور، بیکری، سمیت سبزیوں کی دکانوں کو مستثنیٰ قرار دیا تھا۔

تاہم حکومت کی جانب سے جزوی لاک ڈاؤن میں تبدیلی کرنے اور میڈیکل، ایشیائے ضروریہ کی دکانوں لاک ڈاؤن سے مستثنیٰ قرار دیے جانے کے باوجود پولیس نے آج زبردستی مال روڈ سمیت لاہور بھر کی دکانیں بند کرادی ہیں۔

اس ضمن میں تاجر رہنماؤں کا کہنا ہے کہ ہم سے ہفتہ اور اتوار کو دکانیں بند کرنے کا کہا گیا تھا مگر پولیس نے آج ہی آکر دکانیں بند کرائی ہیں۔

چیئرمین پی ٹی آئی اور سابق وزیرخارجہ شاہ محمود قریشی کے خلاف سائفر کیس کی سماعت میں استغاثہ کے تین گواہوں کے بیانات قلمبند نہ ہوسکے۔

آفیشل سیکریٹ ایکٹ سے متعلق سائفر کیس کی سماعت خصوصی عدالت کے جج ابوالحسنات ذوالقرنین نے اڈیالہ جیل میں کی، چیئرمین پی ٹی آئی اورشاہ محمود قریشی کو عدالت کے سامنے پیش کیا گیا۔

سائفر کیس میں عدالت نے دونوں ملزمان چیئرمین پی ٹی آئی اور شاہ محمود قریشی کی فیملیز کے پانچ پانچ ممبران کو سماعت سننے کی اجازت دے دی۔

شاہ محمود قریشی کی اہلیہ اور بیٹی نے پہلی بار جیل عدالت کی کارروائی دیکھی جبکہ آئندہ تاریخ پر چیئرمین پی ٹی آئی کی فیملی ممبران بھی کمرہ عدالت آئیں گے۔

چیئرمین پی ٹی آئی کی بیٹوں سے بات کرانے سے متعلق عدالت نے سپرنٹنڈنٹ جیل کو بلا کر حکم دیا کہ ہفتے میں ایک دن چیئرمین پی ٹی آئی سے بچوں کی گفتگو کرائی جائے۔

سائفر کیس کی سماعت کے دوران لاہور سے وکلاء صفائی عدالت پیش نہ ہو سکے جبکہ استغاثہ کے 3 گواہوں کے بیانات بھی قلمبند نہ ہوسکے، عدالت نے سائفر کیس کی سماعت 14 نومبر تک ملتوی کرتے ہوئے آئندہ سماعت پر مزید 3 گواہ طلب کر لیے۔

سماعت کا احوال

قبل ازیں ایف آئی اے پراسیکیوٹر ذوالفقار نقوی، شاہ خاور، رضوان عباسی عدالت میں پیش ہوئے جبکہ چیئرمین پی ٹی آئی کی جانب سے سلمان صفدر، علی گوہر، عمیرنیازی اڈیالہ جیل پہنچے تھے۔

شاہ محمود قریشی کی اہلیہ اور بیٹی بھی آج کی سماعت کے دوران اڈیالہ جیل میں موجود تھیں، سابق وزیر خارجہ کی جانب سے بیرسٹر تیمور ملک اور فائزہ شاہ عدالت میں پیش ہوئی تھیں۔

مہربانو قریشی

اڈیالہ جیل جاتے ہوئے شاہ محمود قریشی کی بیٹی مہربانو قریشی کا میڈیا سے گفتگو کرتے ہوئے کہنا تھا کہ امید ہے آج ہمیں سماعت میں شامل ہونے کی اجازت مل جائے، اس حوالے سے ہم نے ہائیکورٹ سے درخواست کی تھی ، لہٰذا امید ہے آج جج صاحب اجازت دیں گے اسی لئے ہم آئے ہیں۔

واضح رہے کہ گزشتہ سماعت پر وزرات خارجہ کے 3 گواہوں کے بیانات قلمبند کیئے گئے تھے، سابق وزیراعظم اور شاہ محمود قریشی کے وکلاء نے سرکاری گواہان پر جرح مکمل کی تھی۔