کراچی: نگراں وفاقی وزیر ثقافت جمال شاہ نے کہا ہے کہ پاکستان میں کم ازکم 4 ہزار سینما گھر ہونے چاہئیں اور موجودہ سینما ہاوسز تک عام آدمی کی رسائی نہیں ہے۔

نیشنل اکیڈمی آف پرفارمنگ آرٹس (ناپا) کے دورے کے موقع پر میڈیا سے گفتگو میں جمال شاہ کا کہنا تھا کہ مسلسل زبوں حالی کے بعد اب ملک بھرمیں سینما گھروں کی تعداد صرف 150 رہ گئی۔

انہوں نے کہا کہ سینما صرف تفریح نہیں ہے بلکہ ایسی طاقت ہے جس کے ذریعے معاشرے کو فنکار ایک پیغام دے سکتے ہیں۔

ان کا کہنا تھا کہ فردوس جمال سمیت دیگر کچھ علیل فنکاروں کے لیے حکومتی سطح پر کاوشیں کی گئی ہیں مگر وہ اس حکومتی وظیفے کو ٹھیک نہیں سمجھتے اور ان کے خیال میں فن کی خدمت کرنے والے افراد کے لیے ایسا کوئی طریقہ وضع ہونا چاہیے جو انھیں باعزت روزگار کی شکل میں ملتا رہے۔

جمال شاہ کا کہنا تھا کہ ثقافتی ورثے کا درجہ رکھنے والی عمارتوں کے تحفظ کے لیے مل کر کوششیں کرنا ہوں گی۔

قبل ازیں نگراں وفاقی وزیر نے بانی پاکستان کے مزار پر حاضری دی اور کہا کہ قائد کی جدوجہد کی شناخت کروانا ہمارا فرض ہے۔

 اسلام آباد: صدر مملکت ڈاکٹر عارف علوی نے اپنے فلسطینی ہم منصب سے ٹیلیفونک رابطہ کرکے غزہ میں اسرائیلی مظالم کی مذمت کی ہے۔ 

ڈاکٹر عارف علوی نے کہا کہ وحشیانہ اقدامات کے نتیجے میں خواتین، بچوں، شعبہ صحت، صحافیوں اور اقوام متحدہ کے امدادی کارکنوں سمیت ہزاروں فلسطینی جاں بحق ہوئے ہیں۔

صدرمملکت نے کہا کہ غزہ کی موجودہ صورتحال اسرائیل کی دہائیوں کی نسلی تفریق اور غیر منصفانہ پالیسیوں کا ردعمل ہے، مسلمانوں کی نسل کشی اور انہیں اپنے علاقوں سے بے دخل کرنے پر اسرائیل کی مذمت کرتے ہیں۔

صدر عارف علوی نے غزہ کے عوام کے خلاف اسرائیل کی قاتلانہ مہم روکنے کیلئے عالمی برادری کی جانب سے عدم کارروائی پر افسوس کا اظہار کیا۔ ڈاکٹر عارف علوی نے کہا کہ پاکستان اقوام متحدہ کی سلامتی کونسل کی متعلقہ قراردادوں کے مطابق مسئلہ فلسطین کے حل کیلئے فلسطین کی حمایت جاری رکھے گا۔

صدر مملکت ڈاکٹر عارف علوی نے کہا کہ عالمی برادری فوری جنگ بندی، غزہ تک انسانی ہمدردی کی بنیاد پر راہداری کھولنے کیلئے اقدامات لے، عالمی برادری فلسطینیوں کی اپنے وطن سے مزید بے دخلی روکنے، سلامتی کونسل کی قراردادوں کے مطابق مسئلہ فلسطین کے مستقل حل کیلئے کوششیں کرے۔

انہوں نے کہا کہ اگر دو ریاستی حل اسرائیل کیلئے قابل قبول نہیں تو پھر ایک ریاستی حل ہی واحد راستہ رہ جاتا ہے، ایک ریاست میں یہودی، مسلمان اور عیسائیوں کی اچھی خاصی تعداد مساوی سیاسی حقوق کے ساتھ رہ سکتی ہے۔

علاوہ ازیں فلسطینی صدر محمود عباس نے کہا کہ اسرائیل غزہ میں نسل کشی کر رہا ہے۔ فلسطینی صدر نے انسانی امداد کی فراہمی کو یقینی بنانے کے لیے غزہ کے لیے راہداری کھولنے کا بھی مطالبہ کیا۔

انہوں نے کہا کہ غزہ کے لوگوں کے لیے خوراک، ادویات اور بجلی دستیاب نہیں ہے۔ فلسطینی صدر محمود عباس نے فلسطین کی حمایت اور انسانی امداد بھیجنے پر پاکستان کا شکریہ ادا کیا۔

 کراچی: پیپلز پارٹی کے چیئرمین بلاول بھٹو زرداری نے کہا ہے کہ ’’سابق آرمی چیف قمر جاوید باجوہ نے پی ٹی آئی چیئرمین عمران خان کے خلاف تحریک عدم اعتماد سے 2 دن قبل ہمیں بلایا تھا اور عدم اعتماد واپس لینے کا کہا گیا‘‘

کراچی میں میڈیا سے بات کرتے ہوئے انہوں نے کہا کہ ’’ہمیں ان کا پیغام آیا تھا کہ عدم اعتماد کے معاملے پر ہم نیوٹرل ہیں‘‘۔

بلاول بھٹو زرداری نے کہا کہ جو لوگ باغی ہوتے ہیں ان کو الیکشن میں قیمت چکانی پڑتی ہے، ایک مخصوص پارٹی کا وہی حال ہوگا جو 2008 میں ہوا تھا، ہرالیکشن میں کنگز پارٹیز کسی نا کسی صورت میں واپس آجاتی ہیں۔

انہوں نے کہا کہ ایم کیو ایم اور ن لیگ کے اتحاد کا فائدہ پیپلزپارٹی کو ہوگا، مولانا فضل الرحمان کے ساتھ بھی الیکشن لڑ سکتے ہیں اور ان کے بغیر بھی، پسندیدہ بیوروکریٹ کیلئے پنجاب کے سیاستدانوں نے نعرے لگوائے تھے۔

بلاول بھٹو زرداری نے کہا کہ بلدیاتی انتخابات کی طرح عام انتخابات بھی پی پی جیتے گی، 8 فروری کو صرف پی پی کو عوامی ووٹ ملے گا۔

شہبازشریف نے بلوچستان کے سینئر سیاستدان نوابزادہ لشکری رئیسانی کو مسلم لیگ ن میں شمولیت کی دعوت دی ہے، اور کہا ہے کہ بلوچستان سمیت تمام سیاسی قوتوں کو ساتھ لے کر چلنا چاہتے ہیں۔

سابق وزیراعظم اور مسلم لیگ (ن) کے صدر شہباز شریف سے بلوچستان کے سینئر سیاستدان نوابزادہ لشکری خان رئیسانی نے ملاقات کی، اس موقع پر میر ہمایوں کرد اور دیگر رہنما بھی شریک تھے، شہباز شریف نے رہنماؤں کا استقبال کیا۔

ملاقات میں ملک کی مجموعی صورتحال پر غور کیا گیا اور شہبازشریف نے لشکری رئیسانی کو ن لیگ میں شمولیت کی دعوت دی۔

لشکری رئیسانی نے مینار پاکستان پر کامیاب جلسے پر شہباز شریف کو مبارک دی اور کہا کہ مشاورت کے بعد مسلم لیگ ن میں شمولیت کے فیصلے سے آگاہ کروں گا۔

اس موقع پر شہباز شریف کا کہنا تھا کہ بلوچستان کی ترقی پاکستان کی ترقی ہے، اس صوبے کی ترقی اور عوام کو حقوق کی فراہمی نواز شریف کا ہمیشہ کلیدی ایجنڈا رہا ہے، میں نے 16 ماہ کے دوران بطور وزیراعظم بلوچستان کے سب سے زیادہ دورے کئے۔

سابق وزیراعظم کا کہنا تھا کہ گوادر، سی پیک اور ترقی کا عمل بلوچستان کے لئے گیم چینجر ثابت ہوگا، بلوچستان میں دانش سکول کی بنیاد رکھ دی ہے، نوجوانوں کو تعلیم دینا اور ہنرمند بنانا ترقی کے عمل کا حصہ ہے، اللہ تعالیٰ نے دوبارہ موقع دیا تو بلوچستان کو ترقی کے عمل میں تاریخی حصہ دیں گے، بلوچستان سمیت تمام سیاسی قوتوں کو ساتھ لے کر چلنا چاہتے ہیں۔

الیکشن کمیشن نے کہا ہے کہ ارکان قومی و صوبائی اسمبلی اپنے شریک حیات و زیر کفالت بچوں کے اثاثوں، واجبات کے گوشوارے 31 دسمبر تک جمع کرادیں، یکم جنوری تک مطلوبہ گوشوارے جمع نہ کرانے والوں کے نام شائع کریں گے۔

الیکشن کمیشن نے بیان جاری کیا ہے کہ اراکین صوبائی و صوبائی اسمبلی کے اثاثوں اور واجبات کے مالی سال 2022-23 کے گوشوارے جمع کرانے کی حتمی تاریخ 31 دسمبر ہے، ارکان اپنے شریک حیات و زیر کفالت بچوں کے اثاثوں، واجبات کے گوشوارے جمع کرادیں۔

الیکشن کمیشن کا کہنا ہے کہ یکم جنوری تک مطلوبہ گوشوارے جمع نہ کرانے والوں کے نام شائع کئے جائیں گے، اور 15 جنوری تک گوشوارے جمع نہ کرانے والے ارکان کی رکنیت معطل کر دی جائے گی۔

الیکشن کمیشن کے مطابق گوشواروں میں کسی قسم کی غلط معلومات فراہم کرنے والے رکن اسمبلی کیخلاف کارروائی ہوگی۔

نگراں وزیراطلاعات مرتضی سولنگی کا کہنا ہے کہ انتخابات کا انعقاد الیکشن کمیشن کاکام ہے، نگراں حکومت کا جھکاؤ کسی جماعت کی طرف بھی نہیں ہے۔

اسلام آباد میں میڈیا سے بات کرتے ہوئے نگراں وزیراطلاعات مرتضیٰ سولنگی کا کہنا تھا کہ انتخابات کا انعقاد الیکشن کمیشن کاکام اور انتخابی عمل کو شفاف بنانا نگراں حکومت کی ذمہ داری ہے۔

مرتضیٰ سولنگی نے کہا کہ نگراں حکومت کا جھکاؤ کسی جماعت کی طرف بھی نہیں ہے، نگراں حکومت کسی پارٹی یا امیدوارکی حمایت یا مخالفت نہ کرے۔

وزیراطلاعات کا کہنا تھا کہ صحافی کا کام خبر دینا ہے کسی پارٹی کی طرف داری نہیں، جان محمد مہر کے ملزمان کو کیفر کردار تک پہنچائیں گے، نگراں حکومت صحافیوں کے حقوق کا تحفظ یقینی بنائے گی۔