نئی دہلی: ہندوستانی ہیکرز مختلف ممالک پر جاسوسی اور دہشتگردی کی مد میں سائبر حملے کر چکے ہیں۔

ہندوستانی ہیکرز سائبر حملوں سے دوسرے ممالک کی حساس معلومات کو اپنے مذموم ارادوں کے لئے استعمال کرتا ہے۔ کینیڈا اور فلسطین کے اکاؤنٹس پر بھی ہندوستانی ہیکرز سائبر حملوں میں ملوث رہ چکے ہیں۔

اکتوبر 2023 کو سابق بحریہ کے افسران کو قطر میں اسرائیل کے لئے جاسوسی کے الزام میں سزائے موت دی گئی تھی۔ 26 اکتوبر کو ہندوستانی ہیکر گروپ نے سابق بحریہ کے افسران کی سزا کے فیصلے کے بعد سائبر حملے سے جوابی کارروائی کی دھمکی جاری کی۔

ہندوستانی ہیکرز نے بحریہ کے سابق افسران کی سزائے موت کا بدلہ لینے کے لیے قطر پر سائبر حملے شروع کر دیئے۔ انڈین فورس نے تصدیق کی تھی قطر کے سرکاری پورٹل پر ہندوستان کا سائبر حملہ دو گھنٹے تک جاری رہا۔

7 نومبر 2023 کو ہندوستان نے اپنی سابقہ ​​وارننگ کو پورا کرتے ہوئے قطر پر کئی سائبر حملوں کو انجام دینے کا دعویٰ کیا۔ قطر نے ہندوستانی ہیکرز پر اپنی غیر مجاز سرور تک رسائی، لیک کریڈینشل ڈیٹا، ویب سائٹس کو خراب کرنے جیسے حملوں کا بھی الزام لگایا۔

ہندوستانی ہیکرز نے قطر کے سی سی ٹی وی کیمرہ ویب سرورز کی بھی خلاف ورزی کی۔ ہیکرز کے گروپ انڈین سائبر فورس نے قطر کے اہم سرکاری ای کامرس سسٹمز پر ایک جدید ترین سائبر حملہ بھی کیا اور قطر کی اہم تنظیموں کے ڈیٹا کو لیک کیا۔ پرو انڈیا گروپ کے ہیکرز نے قطر کی ایک شاپنگ ویب سائٹ کو ہیک کیا۔

اس سے قبل اسی ہیکر گروپ نے کینیڈا کی سرکاری ویب سائٹس اور فلسطینی ویب سائٹس کو نشانہ بنانے کا بھی دعویٰ کیا تھا۔ ہندوستانی ہیکرز گروپ کا ہدف کینیڈا کی ویب سائٹس پر ہردیپ سنگھ نجار کے قتل پر کینیڈین وزیر اعظم جسٹن ٹروڈو کے تبصرے کا جواب دینا تھا۔

اسرائیل اور حماس جنگ کے آغاز کے بعد ہندوستانی ہیکرز گروپ نے حماس کی ویب سائٹ ہیک کرنے کا دعویٰ کیا۔

کیا دوسرے ملک کے قوانین کی دھجیاں اڑاتے ہندوستانی ہیکرز اور منفی پروپیگنڈا پھیلانے والے سوشل میڈیا اکاؤنٹس پر بین الاقوامی قوانین کے تحت مکمل پابندی نہیں عائد ہونی چاہئے؟ ہندوستانی ہیکرز انتہائی غیر قانونی عمل سرانجام دے رہے ہیں کیا اب ان کو روکنے کا وقت نہیں؟۔

ریاض:نگران وزیراعظم انوارالحق کاکڑ کے دورہ سعودی عرب کے دوران کویت کے ولی عہد شیخ مشعل الاحمد الجابر الصباح سے ملاقات ہوئی، دونوں رہنماؤں نے مقبوضہ فلسطین میں جاری تنازع پر تبادلہ خیال کیا۔

ملاقات میں غزہ میں جاری اسرائیلی جارحیت اور محاصرے پر تشویش کا اظہار کیا گیا، شہریوں کے بنیادی حقوق، انفراسٹرکچر کی تباہی اور بھاری جانی نقصان پر گہری تشویش کا اظہار کیا گیا، دونوں رہنماؤں نے جنگ بندی، محاصرے کے خاتمے اور انسانی امداد کی فراہمی کی فوری ضرورت پر زور دیا۔

وزیراعظم نے اسرائیل کے ناجائز قبضے سے آزادی کے لئے فلسطین کے لئے پاکستان کے دیرینہ اصولی مؤقف کا اعادہ کیا، وزیراعظم نے اقوام متحدہ اور او آئی سی کی قراردادوں کے مطابق دو ریاستی حل کیلئے پاکستان کی مسلسل حمایت کا ذکر کیا، دونوں رہنماؤں نے دوطرفہ تعلقات بالخصوص اقتصادی اور سرمایہ کاری کے شعبوں پر بھی تبادلہ خیال کیا۔

وزیراعظم نے کویتی ولی عہد کو خصوصی سرمایہ کاری کونسل سے متعلق آگاہ کیا، نگران وزیراعظم انوار الحق کاکڑ نے کویت کے ولی عہد کو پاکستان میں سرمایہ کاری کی دعوت دی، ولی عہد نے پیغام کویت کے متعلقہ حکام تک پہنچانے کا وعدہ کیا۔

کویت کے ولی عہد نے کویت کی ترقی میں پاکستانی تارکین وطن کے کردار کو بھی سراہا۔

اسلام آباد / پشاور: شمالی وزیرستان میں اتمانزئی جرگہ نے پولیو جیسی مہلک بیماری کے تدارک کے لیے پاک فوج اور حکومت کے ساتھ ملکر مہم چلانے کا اعلان کر دیا۔

پاک فوج، خیبر پختونخوا حکومت کے ساتھ ملکر اپنے وسائل بروئے کار لاتے ہوئے شمالی وزیرستان سمیت دیگر ضم شدہ اضلاع میں پولیو وائرس مکمل خاتمے کے لیے کام کر رہی ہے۔

اتمانزئی جرگہ، شمالی وزیرستان کے معتبر اور سینیئر مشران پر مشتمل ایک علاقائی کمیٹی ہے۔ جرگے کے اعلان سے شمالی وزیرستان میں آنے والی نسلوں کو پولیو جیسے مہلک مرض سے بچایا جا سکے گا۔
اتمانزئی جرگہ نے یہ بھی کہا کہ آئندہ بھی علاقے کے لوگ پاک فوج کے شانہ بشانہ کھڑے ہو کر خوشحالی اور ترقی میں حصہ لیں گے۔

اتمانزئی جرگہ نے سیکیورٹی فورسز اور حکومتی اداروں کا مقامی لوگوں میں اس حوالے سے شعور اجاگر کرنے اور پولیو آگاہی مہم میں مثبت کردار ادا کرنے پہ بھی شکریہ ادا کیا۔

پولیو سے پاک وزیرستان ہی خوشحال پاکستان کی ضمانت ہے۔

اسلام آباد: ورلڈ بینک کی جانب سے اسپانسر کیے جانے والے6.7 ارب ڈالر مالیت کے نصف سے زائد وفاقی منصوبوں پر پیش رفت غیر تسلی بخش ہے جب کہ ورلڈ بینک نے اپنی رپورٹ میں ان منصوبوں پر شدید تحفظات کا اظہار کرتے ہوئے منصوبوں پر پیش رفت کو غیر تسلی بخش قرار دے دیا ہے۔

ورلڈ بینک نے وزارت معاشی امور کے ساتھ مل کر 6.7 ارب ڈالر کے20 منصوبوں کا جائزہ لیا ہے، حکام کے مطابق جائزے میں انکشاف ہوا ہے کہ صرف 2.9 ارب ڈالر کے منصوبے ٹریک پر پائے گئے ہیں،3.4 ارب ڈالر کے منصوبوں پر پیش رفت جزوی طور پر اطمینان بخش پائی گئی ہے جبکہ 453 ملین ڈالر کے منصوبوں کو مسائل کا شکار قرار دیا گیا ہے۔

سب سے زیادہ بے قاعدگیاں واپڈا کے محکمے میں پائی گئی ہیں، جس پر دہائیوں سے ریٹائرڈ جرنیل حکمرانی کر رہے ہیں، اس کے علاوہ نیشنل ٹرانسمیشن اینڈ ڈسپیچ کمپنی، ایف بی آر، وزارت منصوبہ بندی، وزارت خزانہ اور اسٹیٹ بینک سے متعلق منصوبے بھی مسائل کا شکار ہیں، جس کی وجہ سے ان منصوبوں سے حاصل ہونے والے فوائد میں تاخیر ہوئی ہے۔

جائزہ رپورٹ کے مطابق پاکستان نے رواں سال جولائی میں بلوچستان میں سیلات متاثرین کی بحالی کیلیے ورلڈ بینک سے 213 ملین ڈالر کا قرضہ لیا تھا، لیکن تاحال پراجیکٹ منیجمنٹ یونٹ غیر فعال ہے اور فنڈز وصولی کیلیے کوئی بینک اکاؤنٹ بھی نہیں کھولا گیا ہے، جس کی وجہ سے ابھی تک ورلڈ بینک سے ایک پائی بھی وصول نہیں کی جاسکی ہے۔

پاکستان نے2019 میں ٹیکس نیٹ بڑھانے کیلیے ورلڈ بینک سے400 ملین ڈالر کا قرضہ لیا تھا، لیکن منصوبے پر عمل نہ کیا جاسکا اور ایک بار پھر دونوں فریق منصوبے کو ری اسٹرکچر کر رہے ہیں،137 ارب ڈالر کا اسٹیٹ بینک کا فنانشل انکلوژن اینڈ انفراسٹرکچر پراجیکٹ جس کو دسمبر 2022 میں مکمل ہونا تھا، دو بار توسیع حاصل کرچکا ہے۔

اسی طرح پبلک فنانشل منیجمنٹ اینڈ اکاؤنٹیبلیٹی کا 380 ملین ڈالر کا منصوبہ دو بار توسیع کے بعد لیپس ہوچکا ہے، 340 ملین ڈالر کی نیشنل ہیلتھ سپورٹ پروگرام کی اسکیم سست روی کا شکار ہے، مہاجرین کی دیکھ بھال کیلیے ادارہ جاتی صلاحیتوں کو بڑھانے کیلیے 50 ملین ڈالر کا جاری منصوبہ بھی دستاویزاتی معاملات کی وجہ سے سست روی کا شکار ہے۔

اسی طرح ایجوکیشن سیکٹر میں کووڈ 19 کے اثرات سے نمٹنے کا 200 ملین ڈالر کا منصوبہ، 460 ملین ڈالر کا خیبرپاس اکنامک کوریڈور کا منصوبہ، تربیلا ہائیڈرو پاور پراجیکٹس کی صلاحیت بڑھانے کا 1.1 ارب ڈالر کا منصوبہ، 390 ملین ڈالر کی ٹنل فائیو اسکیم، 588 ملین ڈالر کا داسو ہائیڈرو پاور پراجیکٹ، نیشنل ٹرانسمیشن اینڈ ڈسپیچ کے 425 ملین ڈالر کے منصوبے سمیت متعد ایسے منصوبے ہیں جو مختلف وجوہات کی بنا پر تعطل کا شکار ہیں۔