پشاوری قہوہ اور ڈرائی فروٹ سردی کی اہم سوغات ہیں تاہم اس مرتبہ مہنگائی کی وجہ سے غریب اور متوسط طبقے کو شاید قہوے پر ہی گزارا کرنا پڑے گا۔ گزشتہ سال 6000 روپے فی کلو ملنے والا چلغوزہ 10 سے 12 ہزار روپے فی کلو تک پہنچ گیا ہے۔

پشاور میں ہر سال سردی آتے ہی ڈرائی فروٹ کی مانگ بڑھ جاتی ہے، تاہم اس سال حالات کچھ مختلف ہیں۔ اس بار ڈرائی فروٹ غریب اور متوسط طبقے کی استطاعت سے باہر ہوچکا ہے۔

ڈرائی فروٹ میں اگر بات کریں چلغوزے کی تو عام آدمی اس کے بارے میں سوچ بھی نہیں سکتا۔ چلغوزے کی فی کلو قیمت 12ہزار روپے تک پہنچنے پر دکانداروں کا کہنا ہے کہ پیداوار کم ہونے کے باعث چلغوزہ مہنگا ہوا۔

عام شہری کہتے ہیں مہنگائی کے اس دور میں چلغوزہ تو دور کی بات وہ چنا اور مونگ پھلی بھی مشکل سے کھا سکتے ہیں۔

پشاور: جمعیت علما اسلام کے سربراہ فضل الرحمان نے کہا ہے کہ پاکستان کلمے کے نام پر حاصل کیا گیا مگر ہم نے نظریاتی وطن کا حق ادا نہیں کیا، ہمیں پرانی لکیروں کو مٹا کر نئے مستقبل کیلیے راستہ بنانا ہوگا.

پشاور میں جے یو آئی کے شمولیتی جلسے سے خطاب کرتے ہوئے فضل الرحمان نے کہا کہ صوبے میں آئندہ جے یو آئی اکثریت حاصل کرے گی، آج کے جلسے سے ثابت کردیا کہ اگلی حکومت ہماری ہوگی۔

انہوں نے کہا کہ پاکستان کیلیے لاکھوں لوگوں نے قربانیاں دیں اب ہمیں وطن میں انقلاب کی نئی راہیں تلاش کرنا ہوں گی، ہمیں عالمی سازشوں کیخلاف ڈٹنا ہوگا، آج ہماری فوج کو بلیک میل کیا جارہا ہے۔

انہوں نے کہا کہ پاکستان کو معاشی بحران کا شکار کرنا حادثہ کی بنیاد نہیں اتنی معاشی تباہی حادثاتی طور پر نہیں ہوتی بلکہ اس کے پیچھے کشمیر تقسیم کرنے اور اسرائیل کو قبول کرنے کا منصوبہ تیار تھا، خیبر پختونخوا میں ایک حکومت بنائی گئی اس صوبے کی روایت اور اسلامی اقدار کو نقصان پہنچایا، پاکستان کی موجودہ صورت حال کے ذمہ دار صرف عمران خان نہیں بلکہ پراجیکٹ لانچ کرنے والے قمر باجوہ اور فیض حمید بھی ہیں۔

انہوں نے کہا کہ جو اس ملک اور صوبے کے مجرم ہیں ان کو یہ صوبے حوالے کیا جارہا ہے، ہم سے بھی ہاتھ ملانے کی بات کی گئی لیکن ہم نے صاف انکار کردیا، قبائل کے ساتھ کیے جانے والے وعدے پورے ہونے چاہیں۔

فضل الرحمان نے کہا کہ ’تمھارے مطالبے پر فوج بے قبائل میں آپریشن کیا اور انھیں بے گھر کیا گیا، ہمیں معلوم ہے تمھیں کہاں سے ہدایات ملتی پیں، افغانستان سے احترام کا تعلق ہے ہم نے جذباتی فیصلے نہیں کرنے، ہر طرف سے پاکستان پر دباؤ ہے اسرائیل کو تسلیم کرانا ہے‘۔

دریں اثنا جلسے کے دوران اے این پی سے سابق ڈسٹرکٹ ناظم حاجی عمر خان اور سابق بلدیاتی نمائندوں نے جے یو آئی میں شمولیت کا اعلان کیا۔

 کراچی: بینک دولت پاکستان کے گورنر جمیل احمد نے جمعہ کو کراچی میں منعقدہ تقریب میں اسٹیٹ بینک کا اسٹریٹجک پلان برائے 2023ء تا 2028ء’’ایس بی پی وژن 2028ء‘‘ جاری کردیا۔

’’اسٹیٹ بینک وژن 2028ء‘‘ اسٹیٹ بینک ایکٹ میں ترمیم کے بعد جاری کیا جانے والا پہلا منصوبہ ہے۔ اس میں مرکزی بینک کا نصب العین، مشن اور اگلے پانچ سال کے لیے متعین کلیدی اہداف بتائے گئے ہیں۔ اسٹریٹجک پلان اہم متعلقہ فریقوں کے ساتھ ایک مشاورتی اور جامع عمل کے ذریعے تیار کیا گیا ہے۔

اس موقع پر خطاب کرتے ہوئے اسٹیٹ بینک کے گورنر نے کہا کہ ’’اسٹیٹ بینک وژن 2028ء‘‘ اسٹیٹ بینک کے اس عزم کا اظہار ہے کہ قیمتوں کا استحکام اورمالی استحکام حاصل کیا جائے گا اور ملک کی پائیدار اقتصادی ترقی میں حصہ لیا جائے گا۔

جمیل احمد نے مزید کہا کہ پلان کی تیاری کے دوران جن امور کو مدِنظر رکھا گیا ہے ان میں معیشت اور مالی استحکام کو درپیش ابھرتے ہوئے خطرات بشمول ماحولیاتی تبدیلی ، تیزرفتار ڈیجیٹل اختراعات اور رکاوٹیں، اور سائبر سیکیورٹی کے بڑھتے ہوئے خطرات بھی شامل ہیں۔

گورنر اسٹیٹ بینک نے بتایا کہ  ’’ایس بی پی وژن 2028ء‘‘ میں 6 اہم اسٹریٹجک مقاصد کا احاطہ کیا گیا ہے، جن میں مہنگائی کو وسط مدتی ہدف کی حد میں رکھنا، اور مالی نظام کی کارکردگی، اثرانگیزی، شفافیت اور استحکام بڑھانا، مالی خدمات تک شمولیتی اور پائیدار رسائی کو فروغ دینا، شریعت سے ہم آہنگ بینکاری نظام میں ڈھالنا، جدت پسندانہ اور شمولیت پر مبنی ڈیجیٹل مالی خدمات کا ایکوسسٹم تشکیل دینا، اور اسٹیٹ بینک کو ہائی ٹیک اور عوام پر مرتکز ادارے کا روپ دینا شامل ہیں۔

ان اسٹریٹجک مقاصد کو پانچ بنیادی موضوعات کے گرد تشکیل دیا گیا ہے، جن میں اسٹریٹجک ابلاغ، ماحولیاتی تبدیلی، ٹیکنالوجی میں جدت طرازی، تنوع اور شمولیت، اور پیداواریت اور مسابقت شامل ہیں۔

اسلام آباد: حالیہ ہفتے مہنگائی کی شرح میں 9.95 فیصد کا ریکارڈ اضافہ ہوا ہے جبکہ سالانہ بنیاد پر مہنگائی کی شرح بھی 41.90 فیصد کی ریکارڈ سطح پر پہنچ گئی۔

ایکسپریس نیوز کے مطابق حکومت کی جانب سے گیس کی قیمتوں میں اضافے کے اثرات مہنگائی میں بڑے پیمانے پر اضافے کی صورت ظاہر ہونا شروع ہوگئے، ملک میں مہنگائی کی شرح میں اضافے کا رجحان جاری ہے۔

حالیہ ہفتے کے دوران ہفتہ وار مہنگائی کی شرح میں 9.95 فیصد کا ریکارڈ اضافہ ہواہے جبکہ سالانہ بنیاد پر مہنگائی کی شرح بھی 41.90 فیصد کی ریکارڈ سطح پر پہنچ گئی، ملک میں مہنگائی سے سب سے زیادہ متاثر 22 ہزار 889روپے سے 29 ہزار 517 روپے ماہانہ کمانے والا طبقہ متاثر ہوا جس کے لیے مہنگائی کی شرح 45.84 فی صد رہی۔
وفاقی ادارہ شماریات کی جانب سے جاری کردہ مہنگائی کی ہفتہ وار رپورٹ کے مطابق حالیہ ہفتے میں 25 اشیاء ضروریہ کی قیمتوں میں اضافہ ہوا، 13 اشیاء کی قیمتوں میں کمی اور 13 کی قیمتیں مستحکم رہیں۔ رپورٹ کے مطابق حالیہ ہفتے مہنگی ہوئی اشیاء میں گیس سرفہرست ہے جس کی قیمتوں میں 480 فیصد کی شرح کے حساب سے سب سے زیادہ اضافہ ہوا۔

چائے کی پتی کی قیمتوں میں 8.88 فیصد، دال مسور کی قیمت میں 2.54 فیصد، چکن کی قیمت میں 3.99فیصد، لہسن کی قیمت میں 3.09 فیصد، نمک کی قیمت میں2.93 فیصد، آٹے کی قیمت میں 2.64 فیصد، ایل پی جی کی قیمت میں2.03 فیصد جبکہ آلو کی قیمتوں میں2 فیصد اضافہ ہوا۔

رپورٹ کے مطابق حالیہ ہفتے جن13 اشیاء کی قیمتوں میں کمی واقع ہوئی ان میں سے بجلی کی قیمتوں میں16.06 فیصد، ٹماٹر کی قیمتوں میں11.16 فیصد، چینی کی قیمتوں میں4.24 فیصد، ڈیزل کی قیمت میں2.15 فیصد، پٹرول کی قیمت میں0.73 فیصد، پیاز کی قیمت میں1.49 فیصد، ویجیٹیبل گھی کی قیمت میں1.39 فیصد، کوکنگ آئل کی قیمت میں 0.65 فیصد جبکہ گڑ کی قیمت میں0.27 فیصد کمی واقع ہوئی ہے۔

اعداد و شمار میں بتایا گیا ہے کہ حالیہ ہفتے کے دوران حساس قیمتوں کے اعشاریہ کے لحاظ سے سالانہ بنیادوں پر 17 ہزار 732روپے ماہانہ تک آمدنی رکھنے والے طبقے کیلئے مہنگائی کی شرح میں 35.72 فیصد، 17 ہزار 733روپے سے 22 ہزار 888روپے ماہانہ تک آمدنی رکھنے والے طبقے کیلئے مہنگائی کی شرح میں40.81فیصد، 22 ہزار 889روپے سے 29 ہزار 517 روپے ماہانہ تک آمدنی رکھنے والے طبقے کیلئے مہنگائی کی شرح میں 45.84فیصد رہی۔

اسی طرح 29 ہزار 518روپے سے 44ہزار 175 روپے ماہانہ تک آمدنی رکھنے والے طبقے کیلئے مہنگائی کی شرح 42.94فیصد رہی جبکہ 44 ہزار 176روپے ماہانہ سے زائد آمدنی رکھنے والے طبقے کیلئے مہنگائی کی شرح 39.67 فیصدرہی ہے۔

کراچی: خواجہ سراؤں نے کراچی میں ’’مورت مارچ‘‘ میں اپنے مطالبات پیش کرنے کا فیصلہ کرلیا۔ 

کراچی پریس کلب میں خواجہ سراؤں کی نمائندگی کرنے والی بندیا رانا، ڈاکٹر میرب اعوان اور  شہزادی رائے نے مشترکہ پریس کانفرنس کی۔ خواجہ سراؤں کی جانب سے 19 نومبر کو کراچی میں فرئیر ہال میں ’’مورت مارچ‘‘ منعقد ہوگا۔ جس وہ اپنے مطالبات پیش کریں گے۔

دوران پریس کانفرنس شرکا نے کہا کہ ہمیں خاندانی وراثت میں حصہ نہیں ملتا اگر کوئی خواجہ سرا مانگیں تو اس کو مبینہ طور پر خاندان کے لوگ قاتل کردیتے ہیں، نادرا ہمارے ایکس شناختی کارڈ جاری نہیں کررہا ہے اس لیے اپنے حقوق کے لیے ہر فورم پرآواز بلند کریں گے۔

شہزادی رائے کا کہنا تھا کہ غیرت کے نام پر بہت سارے خواجہ سرا قتل کر دیے جاتے ہیں، ہم اس ڈر سے جائیداد میں حصہ نہیں مانگتے، ہماری شناخت کا حق ہم سے چھینا جا رہا ہے جبکہ ہمیں سرکاری ملازمتیں نہیں دی جاتی، سرکار کو چاہیے ایسی پالیسیز کو یکسر ختم کریں۔

انہوں نے کہا کہ حکومت سندھ سے مطالبہ ہے کہ کوٹے کا اعلان تو کر دیا لیکن عمل کون کریگا ایک خواجہ سرا کو بھی سرکاری ملازمت نہیں دی گئی، کوئی بھی مالک مکان ہمیں گھر نہیں دیتا اور اگر دے تو بہت مہنگا دیتا ہے۔

اس موقع پر بندیا رانا کا کہنا تھا کہ نادرا نے ایکس کارڈ بنانا روک دیے، جس کے پاس شناختی کارڈ نہیں ہوگا اس کے پاس پاکستانی شہریت نہیں ہوگی۔ ڈاکٹر میرب نے کہا کہ19 نومبر تین بجے سے چھ بجے تک فریئیر ہال میں مورت مارچ کیا جا رہا ہے،اس سال دوسرا مورت مارچ نکال رہے ہیں۔

انہوں نے کہا کہ اپنے مطالبات مورت مارچ میں رکھیں گے، خواجہ سرا آج بھی ناچ گانا کر کے اپنا گزارہ کرتے ہیں، آنے والے پڑھے لکھے خواجہ سرا کو نوکریاں دی جائیں۔