بھارتی فلم پروڈیوسرشیلجا کیجریوال پاکستانی فنکاروں کی حمایت میں سامنے آگئیں، انہوں نے امید ظاہر کی کہ پاکستان اور بھارت کے درمیان شوبز تعلقات جلد بحال ہوں گے۔
بھارتی میڈیا کو دیے گئے ایک انٹرویو میں انہوں نے اس حوالے سے اظہارِ خیال کرتے ہوئے کہا کہ وہ مستقبل میں پاکستانی اداکاروں کواپنی تخلیق کردہ فلموں میں ضرور کاسٹ کریں گی۔
بھارتی فلمساز کہا کہنا ہے کہ وہ پاکستانی اداکار فواد خان کو بالی ووڈ اداکارہ تبو اور حمزہ علی عباسی کو ودیا بالن کے ساتھ کاسٹ کرنے کا ارادہ رکھتی ہیں۔
انہوں نے انٹرویو میں پاکستان اور بھارت کے درمیان جاری تنازعات پر اپنی رائے دیتے ہوئے کہا کہ ’ہماری حکومت کو ایسے قوانین بنانے کی ضرورت ہے کہ اگر دونوں ممالک کے درمیان سیاسی کشیدگی پیدا ہو تو اُس سے دونوں ممالک کے فنکار، فلمیں اور ڈرامے متاثر نہیں ہونے چاہئیں‘۔
شیلجا کیجریوال نے مزید کہا کہ ’پاک بھارت فنکاروں، فلمسازوں اور موسیقاروں نے جب بھی ملکر کام کیا ہے تو اُنہیں عالمی سطح پر خوب پذیرائی ملی ہے، اس سے دونوں ممالک کو ہی فائدہ ہوتا ہے‘۔
شیلجا کیجریوال کے مطابق دونوں ممالک کے عوام بھی فنکاروں کو ایک ساتھ کام کرتا دیکھنا چاہتے ہیں، ہم ایک ساتھ ملکر بہت کچھ کرسکتے ہیں، بہت سی کامیابیاں حاصل کرسکتے ہیں۔
اُنہوں نے اپنے انٹرویو میں ایک حیران کن انکشاف کرتے ہوئے کہا کہ ’وہ ”زی فائیو: زندگی“ کے پلیٹ فارم سے پاک بھارت کے کئی مشترکہ پراجیکٹس پر کام کررہی ہیں، وہ چاہتی ہیں کہ اپنے منصوبے میں ماہرہ خان کو شاہ رخ خان کے علاوہ کسی دوسرے بھارتی اداکار کے ساتھ کاسٹ کیا جائے‘۔
بھارتی فلمساز کے مطابق پاکستان کے سینما گھروں میں بھی بھارتی فلموں کی ریلیز کو یقینی بنانا چاہئے۔
ان کے مطابق اس سے نہ صرف بھارت کو فائدہ ہوگا بلکہ بھارت میں پاکستانی فنکاروں کے کام کرنے کے مواقع بھی روشن ہوں گے۔
