سپریم کورٹ نے ریمارکس دیئے کہ عمران خان کے خلاف ایف آئی آر میں کچھ دفعات میں سزائے موت اور عمر قید ہے۔ عدالت نے عمران خان کی ضمانت اور اسلام آباد ہائی کورٹ کے فیصلے کے خلاف درخواستوں پر سماعت غیر معینہ مدت تک ملتوی کردی۔

سپریم کورٹ میں چئیرمین پی ٹی آئی کی سائفر کیس میں ضمانت کی درخواست پر سماعت ہوئی، جسٹس سردار طارق مسعود کی سربراہی میں 3 رکنی بینچ نے سماعت کی، جسٹس یحییٰ آفریدی اور جسٹس عائشہ اے ملک بھی بنیچ کا حصہ ہیں۔

چئیرمین پی ٹی آئی کے وکیل بیرسٹر سلمان صفدر روسٹرم پر آئے اور عمران خان کے خلاف درج ایف آئی آر پڑھ کر سنا دی۔

جسٹس سردار طارق مسعود نے وکیل سے استفسار کیا کہ یہ معاملہ کب کا ہے۔ جس پر وکیل سلمان صفدر نے بتایا کہ یہ معاملہ 2022 کا ہے۔

جسٹس سردار طارق مسعود نے ریمارکس دیئے کہ اس پر آپ نے پورا سال ہی لگا دیا ہے، ایف آئی آر میں کچھ دفعات میں سزائے موت اور عمر قید ہے۔

بغیر نوٹس پیش ہونے پر عدالت نے تفتیشی افسر پر برہمی کا اظہار کرتے ہوئے ریمارکس دیے کہ آپ کو کس نے بلایا ہے، پیچھے جا کر بیٹھ جائیں۔

وکیل سلمان صفدر نے چیئرمین پی ٹی آئی پر لگے الزامات پڑھ کر سنائے، اور کہا کہ الزام ہے کہ چیئرمین پی ٹی آئی نے سائفر کو غلط رنگ دینے کا کہا، اور انہوں نے ریاست کو نقصان پہنچایا۔

جسٹس سردار طارق مسعود نے استفسار کیا کہ شریک ملزمان کے کردار کا تعین ہوا۔ جس پر وکیل سلمان صفدر نے بتایا کہ اسد عمر کو چھوڑ دیا گیا ہے، جب کہ اعظم خان کو گواہ بنا دیا گیا ہے۔

جسٹس یحییٰ آفریدی نے کہا کہ پہلے کیس پر کہا گیا تھا کہ اعظم خان ملزم ہیں۔

وکیل سلمان صفدر نے کہا کہ چیئرمین پی ٹی آئی کو انتقام کا نشانہ بنایا جا رہا ہے، ماتحت عدالت کے سامنے کئی گھنٹے دلائل دئیے۔

جسٹس سردار طارق نے ریمارکس دیے کہ آپ مقدمات کو سیاسی طور پر چلائیں گے تو یہی ہوگا، کس نے کہا تھا کہ اخراج مقدمہ اور ضمانت کو ایک ساتھ چلائیں۔

جسٹس عائشہ ملک نے استفسار کیا کہ آپ کے کیس لے مرکزی گراونڈزکیا ہیں۔ جس پر وکیل سلمان صفدر نے کہا کہ ہمارا کیس یہ ہے کہ کیس بنتا ہی نہیں ہے۔ لگائی گئی دفعات جاسوسی جیسے جرائم پرلگتی ہیں، کہیں نہیں بتایا گیا کہ کہاں جاسوسی ہوئی، یا دشمن ملک کو فائدہ پہنچا۔

جسٹس سردارطارق نے ریمارکس دیئے کہ وہ کہہ رہے ہیں آپ نے سائفر کا کوڈ کمپرومائز کر دیا۔

جسٹس یحیٰی آفریدی نے استفسار کیا کہ سائفرایک سیکرٹ دستاویز تھا، یا نہیں۔

وکیل سلمان صفدر نے جواب دیا کہ سائفر ڈی کلاسیفائی ہونے کے بعد سیکرٹ دستاویز نہیں تھا۔

جسٹس یحییٰ نے دوبارہ استفسار کیا کہ ڈی کلاسیفائی ہونے سے پہلے کیا سائفر کو ملزم نے دکھایا۔ جس پر وکیل سلمان صفدر نے کہا کہ اس دوران سائفر کسی کو نہیں دکھایا گیا۔

عدالت نے آج کا حکم نامہ لکھوانا شروع کردیا اور درخواست ضمانت پر تمام فریقین وفاق ایف آئی اے، اور شکایت کنندہ کو بھی نوٹس جاری کردیا، عدالت نے کیس کی سماعت غیر معینہ مدت کیلٸے ملتوی کردی۔

برطانیہ اور یورپ کی الیکٹرک بیٹری کی صنعت خام مال، یا مکمل بیٹریوں پر انحصار کرتی ہے جو چین اور دیگر ایشیائی ممالک سے حاصل کی جاتی ہیں، تاہم اب ایسا نہیں ہوگا،۔

یورپ کی واحد بڑی گھریلو برقی بیٹری بنانے والی کمپنی نارتھ وولٹ نے کہا ہے کہ اس نے کم قیمت، زیادہ پائیدار بیٹری بنائی ہے جو بجلی ذخیرہ کرنے کے لیے تیار کی گئی ہے جس میں لیتھیم، نکل، گریفائٹ اور کوبالٹ کا استعمال نہیں ہوتا۔

نارتھ وولٹ کا کہنا ہے کہ اس کی نئی بیٹری، جس کی توانائی کی کثافت 160 واٹ گھنٹے فی کلوگرام سے زیادہ ہے، بجلی ذخیرہ کرنے والے پلانٹس کے لیے ڈیزائن کی گئی ہے لیکن مستقبل میں اسے الیکٹرک گاڑیوں، جیسے دو پہیوں والے اسکوٹرز میں استعمال کیا جا سکتا ہے۔

سویڈش ڈویلپر کے مطابق ، پروٹو ٹائپ بیٹری سویڈن کے شہر وسٹراس میں کمپنی کی لیبارٹریوں میں تیار کی گئی ہے جسے آئندہ سالصارفین کے سامنے لایا جائے گا۔ کمپنی نے ابھی یہ فیصلہ نہیں کیا ہے کہ بڑی مقدار میں بیٹری کہاں تیار کی جائے گی۔

صنعتی پیمانے پر بیٹریوں میں بجلی ذخیرہ کرنا قومی بجلی گرڈوں کو کاربن سے پاک کرنے کے لئے اہم سمجھا جاتا ہے۔ بیٹری منصوبے ہوا اور شمسی پینل سے توانائی ذخیرہ کرتے ہیں جو اس وقت استعمال کیے جاسکتے ہیں جب ہوا چلتی ہے یا سورج چمک نہیں رہا ہوتا ہے۔

نارتھ وولٹ نے 2021 کے آخر میں شمالی سویڈن کے ایک پلانٹ میں اپنا پہلا لیتھیم آئن بیٹری سیل تیار کیا تھا۔

کمپنی کے مطابق نئی بیٹری کی توانائی کی کثافت زیادہ تر لیتھیئم کے مساوی سے کم تھی لیکن اس کا مقصد لاگت کو کم رکھتے ہوئے نئی مصنوعات میں استعمال ہوگا۔ یہ بیٹری ہائی سوڈیم پروشیا وائٹ کیتھوڈ اور ہارڈ کاربن اناودی پر مبنی ہے جو زیادہ درجہ حرارت پر متبادل کے مقابلے میں زیادہ محفوظ ہے۔

نتیجتاً کمپنی مشرق وسطیٰ، بھارت اور افریقہ جیسی مارکیٹوں کو نشانہ بنا رہی ہے۔

واضح رہے کہ ارکان پارلیمنٹ طویل عرصے سے اہم معدنیات کے لیے چین کے نایاب وسائل پر انحصار پر تشویش کا اظہار کرتے رہے ہیں کیونکہ اینگلو چین تعلقات خراب ہو رہے ہیں اور کار سازی کی صنعت تیزی سے الیکٹرک گاڑیوں کی طرف بڑھ رہی ہے۔

ریاض: سعودی عرب نے ایک لاکھ 79 ہزار پاکستانی زائرین حج کے معاہدے کی منظوری دے دی۔

سعودی فرمانروا شاہ سلمان بن عبدالعزیز کی زیر صدارت سعودی کابینہ کا اجلاس ہوا۔ سعودی کابینہ نے پاکستانی حج وعمرہ زائرین کے لیے انتظامات کے معاہدے کی منظوری دے دی۔ حج 2024 کے لیے پاکستان سے عازمین حج کا کوٹہ ایک لاکھ 79 ہزار 210 رکھا گیا ہے۔

گزشتہ برس بھی پاکستان کے لیے حج کوٹہ میں عازمین کی تعداد بھی ایک لاکھ 79 ہزار تھی تاہم کورونا وبا کے اثرات اورمہنگائی کے باعث حج درخواستوں کی تعداد کم رہی تھی۔حکومت پاکستان کی جانب سے جاری کی گئی حج پالیسی کے مطابق 2024 کے لیے حج پیکج 10 لاکھ 75 ہزار روپے کا ہوگا جو گزشتہ سال کے مقابلے میں ایک لاکھ روپے کم ہے۔

اسلام آباد: بلوچ طلبہ جبری گمشدگی سے متعلق کمیشن کی سفارشات پر عملد رآمد کیس میں اسلام آباد ہائی کورٹ نے وزیراعظم کو آئندہ سماعت پر طلب کرلیا۔

دوران سماعت عدالت نے وزرا کی قائم کردہ کمیٹی کی رپورٹ پر عدم اطمینان کا اظہار کرتے ہوئے ایڈیشنل اٹارنی جنرل منور اقبال دوگل کو عدالت طلب کرلیا۔

جسٹس محسن اختر کیانی نے کیس کی سماعت کی ، جس میں اسسٹنٹ اٹارنی جنرل عثمان گھمن نے وزرا کمیٹی کے اجلاس کی ایک صفحے پر مشتمل 6 نکات کی رپورٹ پیش کی، جس پر جسٹس محسن اختر کیانی نے برہمی کا اظہار کرتے ہوئے رپورٹ کی کاپی واپس کردی۔

جسٹس محسن اختر کیانی نے ریمارکس دیے کہ اس رپورٹ پر اس عدالت کے لیے یہ شرم کا مقام ہے ۔ وزیر اعظم اور وزیر داخلہ بلوچستان سے تعلق رکھتے ہیں۔ وزیراعظم اور وزیر داخلہ کو احساس ہونا چاہیے تھا کہ یہ بلوچ طلبہ کا معاملہ ہے ۔ بلوچ لاپتہ طلبہ کی جانب سے ایڈووکیٹ ایمان مزاری عدالت کے سامنے پیش ہوئیں۔

بعد ازاں وقفے کے بعد سماعت دوبارہ شروع ہوئی، جس میں اسلام آباد ہائی کورٹ نے آئندہ سماعت پر وزیر اعظم کو طلب کر لیا۔ اس موقع پر ایڈیشنل اٹارنی جنرل نے وزیراعظم اور وزرا کو طلب نہ کرنے کی استدعا کی، جس پر جسٹس محسن اختر کیانی نے ریمارکس دیے کہ اس میں ایسی کوئی بات نہیں ۔ سب مذاق بنایا جا رہا ہے ۔ اس سے بڑھ کر اور کیا توہین ہوگی اس ملک کے لوگوں کے ساتھ جب لوگ لاپتا ہورہے ہیں ۔

عدالت نے استفسار کیا کہ وزارت دفاع سے کون ہے ؟، جس پر وزارت دفاع کے نمائندے عدالت میں پیش ہوئے۔ عدالت نے ہدایت کی کہ وزیر دفاع کو کہیں اگلی سماعت پر پیش ہوں۔وزیر داخلہ کو کہیں وہ بھی پیش ہوں، کوئی فرق نہیں پڑتا ان کی پیشی سے ۔ یہ کوئی راکٹ سائنس نہیں ہے جن کو بلا رہے ہیں ۔ ہم اسلام آباد میں بیٹھ کر بلوچستان کے حقوق کی بات کر رہے ہیں ۔

جسٹس محسن اختر کیانی نے ریمارکس دیے کہ 7 روز کا وقت دیتا ہوں، عمل درآمد کریں ۔

عدالت نے بلوچ طلبہ کی عدم بازیابی پر وزیراعظم کو 29 نومبر کو ذاتی حیثیت میں طلب کرتے ہوئے کہا کہ وزیر دفاع، وزیر داخلہ ، سیکرٹری دفاع ، سیکرٹری داخلہ بھی پیش ہوں ۔اسلام آباد ہائی کورٹ نے کہا کہ کمیشن کی شفارشات کے مطابق 55 لاپتا بلوچ طلبہ پیش کریں نہیں تو وزیر اعظم پیش ہوں ۔

دوران سماعت ایڈووکیٹ ایمان مزاری نے کہا کہ عدالت کی توجہ ایک معاملے کی طرف دلانا چاہتی ہوں۔ انہوں نے کہا کہ یہاں کیس زیر التوا ہونے کے دوران بھی بلوچ لاپتا ہوئے ہیں ۔

واضح رہے کہ وفاق نے 3 وزرا کی کمیٹی تشکیل دے رکھی ہے۔ اسلام آباد ہائیکورٹ نے وفاقی حکومت کی کمیٹی سے ایک ہفتے میں رپورٹ طلب کر رکھی تھی ۔