پاکستان پیپلز پارٹی کے رہنما تاج حیدر اور سابق وزیراعلیٰ سندھ مراد علی شاہ نے مسلم لیگ (ن) کے قائد نواز شریف کے دعوے پر رد عمل دیا ہے۔

پیپلزپارٹی کے رہنما تاج حیدر نے نواز شریف کے دعوے پر ردعمل دیتے ہوئے کہا کہ تھر کول کے حوالے سے نوازشریف کا دعویٰ سن کر تعجب ہوا، نواز شریف غلط بیانی سے کام لے رہے ہیں۔

تاج حیدر کا کہنا تھا کہ تھر کول منصوبے کی پہلی سمری پر میرے دستخط ہیں، تھرکول کا سنگ بنیاد محترمہ بینظیر بھٹو شہید نے رکھا تھا، تھر کول سے بجلی کی پیداوار بینظیر بھٹو شہید کا خواب تھا۔

رہنما پیپلز پارٹی کا مزید کہنا تھا کہ تھر کول منصوبے پر وفاق کا ایک روپیہ بھی خرچ نہیں ہوا، تھرکول منصوبے کی کامیابی آصف زرداری کے مرہون منت ہے، نواز شریف صاحب صاحب تھر کول سے دور رہیں تو بہتر ہے۔

نواز شریف نے تھرکول کے بارے میں جو کہا وہ حقیقت نہیں، مراد علی شاہ

نواز شریف کے بیان پر رد عمل دیتے ہوئے سابق وزیراعلیٰ سندھ مراد علی شاہ کا کہنا تھا کہ نواز شریف نے تھر کول کے بارے میں جو کہا وہ حقیقت پر مبنی نہیں، تھر کا کوئلہ 1991 میں دریافت ہوا تھا، تھرکوئلہ دریافت ہوئے تیس بتیس سال ہوگئے، نواز شریف 50 سال سے پتہ نہیں کہاں سن رہے تھے۔

مراد علی شاہ کا کہنا تھا کہ سندھ کول اتھارٹی نے 1995 میں 10 ہزار 560 میگاواٹ کے پاورپلانٹس کے ایم اویو پر دستخط کیے، 1995 میں محترمہ بے نظیر بھٹو نے تھرکول منصوبے کا افتتاح کیا، نواز شریف کی حکومت نے تھر منصوبے پر کام بالکل بند کرادیا تھا۔

ان کا مزید کہنا تھا کہ تھر منصوبے پر جوغیرملکی سرمایہ کار کام کر رہے تھے وہ ملک سے چلےگئے، 2008 میں جب پیپلزپارٹی کی حکومت آئی تو دوبارہ غیرملکی سرمایہ کار سے رابطہ کیا، بدقسمتی سے غیرملکی سرمایہ کار نے کہا کہ اب ہم پاکستان میں کام نہیں کریں گے۔

سابق وزیراعلیٰ سندھ نے کہا کہ اس کے بعد سندھ حکومت نے اپنی کول مائننگ کمپنی بنائی، سندھ حکومت کی کوششوں اور چین کے پریشر سے وفاقی حکومت نے سندھ سے بات کرنی شروع کی، وفاق نے سندھ حکومت کو 2015 یا 2016 میں گارنٹی دی۔

پیپلز پارٹی کے رہنما نے کہا کہ 2013 کے الیکشن کے بعد بدقسمتی سے نواز شریف حکومت نے منصوبے پرکام سست کیا، تھرکول میں 4 پاور پلانٹس لگ چکے، 3 کا افتتاح بلاول بھٹو زرداری نے کیا، چوتھے پاور پلانٹس کا افتتاح سابق وزیراعظم شہباز شریف کے دور میں ہوا، 1997 سے 2008 تک تھر کول منصوبے پرکوئی کام نہیں ہوا تھا۔

مراد علی شاہ کا مزید کہنا تھا کہ اس لیول پر حقیقت پر مبنی بات کرنی چاہیئے ورنہ ساکھ خراب ہوتی ہے، میرا یہی مشورہ ہےکہ جہاں کریڈٹ ہو وہاں لیں، یہاں کریڈٹ نہ ہونے کے برابر ہے۔

خیال رہے کہ آج مری میں کارکنوں سے خطاب کرتے ہوئے نواز شریف کا کہنا تھا کہ ہم نے اپنے دور میں بجلی کے متعدد منصوبے لگا کر لوڈشیڈنگ کا خاتمہ کیا، میں جھوٹ نہیں بولتا، پہلی بار ہم سندھ میں کوئلے کے ذخائر کو استعمال میں لائے، کوئلہ ملکی پیداوار ہے، ہزاروں میگا واٹ بجلی بنائی جاسکتی ہے، ہمارے دور کے بعد کس قسم کا دور تھا، ملک کا کلچر تباہ ہوگیا، تباہی پھیر دی۔

نواز شریف کا کہنا تھا کہ ہم بہت باتیں سنتے تھےکہ سندھ میں کوئلے کی کانیں ہیں لیکن کوئلے کی ان کانوں پر کام کسی نے نہیں کیا تھا، پہلی بار ہم نے سندھ میں کوئلےکے ذخائر کو استعمال کرکے بجلی پیدا کی۔

الیکشن کمیشن نے عام انتخابات 2024 کے لئے پی ٹی آئی کا انتخابی نشان بلا برقرار رکھا ہے جبکہ پی ٹی آئی کے ترجمان بیرسٹر گوہر کا کہنا ہے کہ چیئرمین پی ٹی آئی الیکشن لڑیں گے۔

الیکشن کمیشن نے پی ٹی آئی انٹرا پارٹی انتخابات سے متعلق محفوظ فیصلہ سنادیا اور پی ٹی آئی کو عام انتخابات میں بلے کا انتخابی نشان برقرار رکھا گیا ہے۔

ممبر نثار درانی کی سربراہی میں پانچ رکنی کمیشن نے محفوظ فیصلہ سنایا۔

فیصلے میں کہا گیا ہے کہ 20 دن کے اندر دوبارہ الیکشن کروائے جائیں اور الیکشن کے بعد 7 دن میں رپورٹ جمع کروائیں۔

فیصلہ الیکشن کمیشن کی آفیسر صائمہ جنجوعہ نے پڑھ کر سنایا، الیکشن کمیشن نے پی ٹی آئی انٹرا پارٹی الیکشن سے متعلق 13 ستمبر کو فیصلہ محفوظ کیا تھا۔ انٹرا پارٹی انتخابات سے متعلق الیکشن کمیشن نے پی ٹی آئی کو نوٹس جاری کیا تھا۔

پی ٹی آئی انٹراپارٹی انتخابات کاتحریری فیصلہ جاری

تحریری فیصلہ 12صفحات پرمشتمل ہے، جس میں کہا گیا ہے کہ پارٹی آئین کے مطابق تمام پارٹی عہدیداران 4 سال کیلئے منتخب ہوں گے، پی ٹی آئی کےعہدیداران کی مدت 13 جون2021 کو ختم ہوئی، الیکشن کمیشن نے قانون کے مطابق نوٹس جاری کیا۔

فیصلے کے بعد جیو نیوز سے بات کرتے ہوئے تحریک انصاف کے ترجمان بیرسٹر گوہر کا کہنا تھا کہ بلے کا نشان ہمارے پاس رہے گا، الیکشن کمیشن نے انصاف کے تقاضے پورے نہیں کیے، اور ایک خاص مقصد کیلئے اس میں تاخیر کی، آرڈر کو ہم مناسب فورم پر چیلنج کریں گے۔

ترجمان پی ٹی آئی کا کہنا تھا کہ چیئرمین کی ہدایات کے مطابق وہ الیکشن لڑسکتے ہیں اور لڑیں گے، انہیں کوئی مائنس نہیں کرسکتا، وہ ہمارے چیئرمین تھے، ہیں اور رہیں گے۔

بیرسٹر گوہر نے کہا کہ الیکشن ایکٹ کے مطابق آرٹیکل 62 اور 63 کے مطابق نااہل الیکشن نہیں لڑسکتا، عمران خان کی ایسی کوئی نااہلی نہیں کہ وہ الیکشن میں حصہ نہ لے سکیں، انہیں صرف ایک کیس میں سزا ہوئی تھی، اور اسے بھی ہائیکورٹ نے کالعدم قرار دے دیا ہے۔

تحریک انصاف کا الیکشن کمیشن کے فیصلے پر رد عمل

پاکستان تحریک انصاف (پی ٹی آئی) کا الیکشن کمیشن کے انٹرا پارٹی انتخابات کالعدم قرار دینے کے فیصلے پر ردعمل سامنے آیا ہے۔

سماجی رابطے کی ویب سائٹ ایکس (ٹوئٹر) پر جاری بیان میں تحریک انصاف کے ترجمان نے کہا کہ الیکشن کمیشن آف پاکستان کا فیصلہ ادارے کے مسلسل متعصبانہ رویے کے تناظر میں توقعات کےعین مطابق ثابت ہوا، فیصلے نے چیئرمین پی ٹی آئی کو انتخابات سے باہر رکھنے کی ریاستی سازش ایک بار پھر بے نقاب کردی۔

ترجمان پی ٹی آئی نے کہا کہ فیصلے کا جائزہ لینے کے بعد آئینی اور سیاسی راستوں سے اس کے خلاف بھرپور چارہ جوئی کی جائے گی، الیکشن کمیشن کے آج کے فیصلے میں انصاف کے تقاضوں کو صریحاً نہیں کیا گیا، تحریک انصاف کو بھجوائے گئے نوٹس میں کمیشن کی جانب سے انٹرا پارٹی انتخابات کے غیرآئینی ہونے کے حوالے سے کوئی اعتراض نہیں اٹھایا گیا تھا۔

تحریک انصاف کے ترجمان نے مزید کہا کہ الیکشن کمیشن نے بارہا درخواستوں کے باوجود انٹرا پارٹی انتخاب کے معاملے کو ایک مخصوص مقصد کے تحت بلاجواز التوا کا شکار کیے رکھا، تحریک انصاف کی چیف الیکشن کمیشنر سے ہونے والی 2 ملاقاتوں میں پارٹی کو آئینی حقوق کے تحفظ کی یقین دہانی کروائی گئی مگر فیصلہ اس کے برعکس ثابت ہوا، الیکشن کمیشن کے فیصلے کی روشنی میں ”بلا“ تحریک انصاف کا انتخابی نشان تھا، ہے اور ”بلے“ کا نشان بیلٹ پیپر پر آئندہ بھی رہے گا۔

ترجمان پی ٹی آئی کا یہ بھی کہنا تھا کہ عمران خان چئیرمین پی ٹی آئی تھے ، چئیرمین پی ٹی آئی ہیں اور انشاء اللہ تاحیات چئیرمین پی ٹی آئی رہیں گے، مخالفین کے عمران خان کو مائنس کرنے یا تحریک انصاف سے ”بلے“ کا نشان واپس لینے کے عزائم کبھی پورے نہیں ہوں گے، الیکشن کمیشن فیصلے کو مناسب فورم پر چیلنج کیا جائے گا جو کہ تحریک انصاف کا قانونی حق ہے۔

ترجمان تحریک انصاف نے کہا کہ انٹرا پارٹی انتخابات کے حوالے سے چئیرمین عمران خان کی ہدایات کی روشنی میں کور کمیٹی آئندہ لائحہ عمل طے کرے گی، تحریک انصاف کا ہر عمل آئین و قانون کے مطابق ہے عدلیہ سے امید ہے کہ آئینی و قانونی تقاضوں کو ملحوظ خاطر رکھتے ہوئے اس فیصلے کے ہر پہلو کا جائزہ لیا جائے گا۔

گزشتہ روز رہنما پی ٹی آئی بیرسٹر علی ظفر کا کہنا تھا کہ انٹراپارٹی الیکشن ہوئے، الیکشن کمیشن میں ریکارڈ جمع کرایا گیا جس پر الیکشن کمیشن نے پارٹی کے حق میں فیصلہ سنایا مگر تحریری فیصلہ روک لیا۔

ان کا کہنا تھا کہ ہمیں خدشہ ہے کہ تحریری فیصلہ تبدیل نہ ہوجائے، البتہ ااگر الیکشن کمیشن نے کہا تو دوبارہ انٹرا پارٹی انتخابات کرا دیں گے۔