مانسہرہ:  پاکستان تحریک انصاف پارلیمنٹیرین (پی ٹی آئی پی) کے سربراہ پرویز خٹک نے کہا ہے کہ حالات بہت خراب ہیں اور نگران حکومت کے پاس کوئی پالیسی نہیں ہے، اللہ خیر کرے۔

مانسہرہ میں جلسہ عام سے خطاب میں سابق وفاقی وزیر دفاع پرویز خٹک نے کہا کہ میں جھوٹے وعدے نہیں کرتا، میں جو کام نہیں کر سکتا تو واضح جواب دیتا ہوں، اور جو کام کر سکتا ہوں اس کا وعدہ کرتا ہوں۔

انہوں نے مزید کہا کہ میں وزارت چھوڑ کر اس لیے گیا کہ تبدیلی آئے گی لیکن چیئرمین پی ٹی آئی کے سامنے منتخب لوگوں کی اہمیت نہیں ہے، ان کے سامنے نان منتخب لوگوں کی اہمیت تھی اور باہر سے آنے والے لوگوں کی اہمیت تھی، انہوں نے ملک کا بیڑا غرق کیا۔

 نیشنل الیکٹرک پاور ریگولیٹری اتھارٹی (نیپرا) نے بجلی صارفین کےلیے بجلی مزید مہنگی کردی۔

نیپرا نے بجلی ایک روپے 46 پیسے فی یونٹ مہنگی کردی اور بجلی کی قیمت میں اضافہ جولائی کی ماہانہ فیول ایڈجسٹمنٹ کی مد میں کیا گیا۔

نیپرا نے بجلی کی قیمت میں اضافے کا نوٹیفکیشن جاری کردیا جس میں کہا گیا ہے کہ بجلی کی قیمت میں اضافے کا اطلاق ستمبر کے بلوں میں ہوگا۔

نوٹیفکیشن کے مطابق اضافے کا اطلاق لائف لائن اور کے الیکٹرک صارفین پرنہیں ہوگا۔

خیال رہے کہ ملک میں عوام پہلے ہی بجلی کی بھاری بلوں کے خلاف سراپا احتجاج ہیں اور کئی شہروں میں شہریوں نے احتجاجاً بجلی کے بلز جلا دیے اور ادائیگی سے انکار کردیا ہے۔

کراچی:  پاکستان پیپلز پارٹی (پی پی پی) کے چیئرمین بلاول بھٹو نے کہا ہے کہ مولانا فضل الرحمان سینئر سیاستدان ہیں، ان کے بیانات کی تفصیل میں نہیں جانا چاہوں گا، پیپلز پارٹی 60 دن میں بھی الیکشن کروانے کیلئے تیار تھی اور اب 90 روز میں بھی تیار ہے۔

میڈیا سے گفتگو کرتے ہوئے چیئرمین پیپلز پارٹی بلاول بھٹو نے کہا کہ صدر زرداری نے ساڑھے 11 سال سزا کے بغیر جیل میں گزارے، جو آج جیل جا رہے ہیں ان کو ہم حوصلہ دے رہے ہیں کہ گھبرانا نہیں، ابھی آپ کی ٹریننگ چل رہی ہے، آپ کو ابھی سیاستدان بنایا جا رہا ہے۔

انہوں نے کہا کہ آرمی چیف کی تاجر برادری سے ملاقات کوئی نئی خبر نہیں، پہلے بھی ایسا چلتا رہا ہے، ملک کا سب سے کم عمر وزیر خارجہ رہا ہوں، پوری دنیا دیکھی، عوام کو مسائل سے نکالنے کیلئے جدوجہد کرنی چاہیے۔

بلاول بھٹو کا کہنا تھا کہ الیکشن کمیشن نے اپنی گزشتہ 4 سالہ کارکردگی عوام کے سامنے ثابت کی، ڈسکہ کے الیکشن میں الیکشن کمیشن نے دھاندلی پکڑی، الیکشن کمیشن آج بھی ہمیں صاف اور شفاف انتخابات کروا کے دے گا، ہماری پارٹی کے مطابق انتخابات 90 روز میں ہونے چاہئیں۔

چیئرمین پیپلز پارٹی نے کہا کہ پیپلز پارٹی نیب سے نہ ماضی میں ڈری نہ اب ڈرے گی، پیپلز پارٹی کا فوکس اپنے کام پر تھا کیسز پر نہیں، ہم کارکن سے لے کر قیادت تک عدالت کا سامنا کرنے کیلئے تیار ہیں، الیکشن کمیشن کو الیکشن کی تاریخ کا اعلان کرنا چاہیے، الیکشن کمیشن کو یہ بھی دیکھنا چاہیے ملک میں دوغلی پالیسی کیوں چل رہی ہے۔

سابق وزیر خارجہ کا مزید کہنا تھا کہ سندھ میں تمام افسران قابل ہیں، الیکشن کمیشن نے غیر آئینی و غیر قانونی اعلان کیا کہ ڈویلپمنٹ فنڈز کو روکا جائے، جو سیلاب متاثرین کی بحالی کیلئے کام چل رہا تھا اس کو روکا گیا، سیلاب متاثرین کی بحالی کیلئے جو کام روکا گیا اس کو بحال کیا جائے، سندھ کے ساتھ اور انتظامیہ کے ساتھ سوتیلا سلوک کیا جارہا ہے اس پر غور کرنا چاہیے۔

 جمعیت علماء اسلام کے سربراہ مولانا فضل الرحمان کا کہنا ہےکہ پیپلزپارٹی وعدے سے نہ پھرتی تو  اس وقت الیکشن ہوجاتے۔

لاہور میں صحافیوں سے گفتگو کرتے ہوئے مولانا فضل الرحمان کا کہنا تھا کہ پیپلزپارٹی آخری وقت میں آکر فیصلے سے پھرگئی تھی، ایم کیو ایم اور اختر مینگل سمیت دیگر نے اتفاق  رائے سے فوری الیکشن کرانےکا فیصلہ کیا تھا، پیپلزپارٹی نے آخری وقت میں تحریک  عدم اعتماد لانے پر زور دیا تھا۔

مولانا فضل الرحمان کا کہنا تھا کہ ملک میں انتخابات فروری کے آخر تک ہوں گے، جو حالات قبائلی علاقوں میں ہیں ان میں الیکشن مہم چلانا مشکل ہے۔

سربراہ جمعیت علماء اسلام کا کہنا تھا کہ جمہوری ممالک میں نگران حکومتوں کا تصور ہی نہیں ہے۔

ان کا مزید کہنا تھا کہ  پی ٹی آئی چیئرمین کو لانے والوں نے اعتراف کیا کہ ان کا ایجنڈا کچھ اور ہے، پی ٹی آئی کو اس لیے لایا گیا تھا کہ ملک کو معاشی طور پرکمزور کیا جائے۔

اسلام آباد:  نگران وفاقی وزیراطلاعات مرتضیٰ سولنگی نے سوشل میڈیا پر 5 ہزار روپےکے نوٹ کی بندش سے متعلق نوٹی فکیشن کو جعلی قرار دیا ہے۔

مرتضیٰ سولنگی نے ایکس پر سوشل میڈیا پر وائرل ہونے والا جعلی نوٹی فکیشن شیئر کیا ہے جس میں وزارت خزانہ کی جانب سے 5 ہزار روپے کے نوٹ کی بندش کا اعلان کیا گیا ہے۔

وزیراطلاعات نے لکھا کہ  5 ہزار روپے سے متعلق یہ نوٹی فکیشن جھوٹا ہے، حکومتِ پاکستان ایسے جھوٹے نوٹی فکیشن پھیلانے والوں کے خلاف سخت کارروائی کرےگی۔