اسلام آباد: (ویب ڈیسک) ترجمان دفتر خارجہ وزیر مملکت برائے امور خارجہ حنا ربانی کھر نے اقوام متحدہ انسانی حقوق کونسل میں پاکستان کی کارکردگی رپورٹ پیش کی۔
حنا ربانی کھر نے 2017 سے اب تک پاکستان میں بنیادی حقوق کے تحفظ کے اقدامات کو اجاگر کیا، انہوں نے بنیادی انسانی حقوق کے تحفظ اور پیش رفت پر پاکستان کے اقدامات کا ذکر کیا۔
ترجمان اقوام متحدہ انسانی حقوق کونسل نے بھی سماجی رابطے کی ویب سائٹ پر بیان جاری کر دیا، اقوام متحدہ یو پی آر 42 میں وزیر مملکت حنا ربانی کھر نے خطاب کیا۔
اس موقع پر حنا ربانی کھر نے بتایا کہ یو این ہیومن رائٹس کونسل پاکستان نےاقلیتوں کے مذہبی مقامات اور ترقی کیلئے اقلیتی ویلفیئر فنڈ قائم کیا ہے، کسی بھی 18 برس سے کم عمر فرد کی شادی اب ناممکن ہے۔

اسلام آباد: (ویب ڈیسک) پاکستان تحریک انصاف کے چیئر مین عمران خان نے بنی گالہ منتقل ہونے کا فیصلہ کر لیا۔
ذرائع نے بتایا ہے کہ عمران خان آئندہ چند روز میں بنی گالہ منتقل ہونگے۔ عمران خان کی اسلام آباد میں بنی گالہ رہائشگاہ کی سیکیورٹی بڑھانے کی تیاریاں جاری ہیں۔
ذرائع کے مطابق بنی گالہ میں عمران خان کے لیے دو خصوصی بلٹ پروف کمرے تیار کرلیے گیے ہیں۔ کمروں کی کھڑکیوں کو بلٹ پروف شیشوں سے تبدیل کردیا ہے، جبکہ نجی سیکیورٹی کمپنی کی مزید نفری بھی عمران خان کی رہائشگاہ پر تعینات کی جائے گی۔
عمران خان کی ٹانگ کا زخم مکمل طور پر ٹھیک ہونے میں مزید چند روز درکار ہیں۔ ٹانگ ٹھیک ہوتے ہی عمران خان زمان پارک لاہور سے بنی گالہ اسلام آباد منتقل ہو جائیں گے۔

پشاور: (ویب ڈیسک) عوامی نیشنل پارٹی (اے این پی) کے سربراہ اسفند یار ولی خان نے پشاور پولیس لائنز دھماکے کی مذمت کرتے ہوئے کہا ہے کہ مسجد کے اندر بے گناہ نمازیوں کو شہید کرنے والے انسان کہلانے کی لائق نہیں ہیں۔
انہوں نے جاری کردہ بیان میں کہا کہ پولیس لائنز جیسی جگہ تک خودکش حملہ آور کا پہنچنا بھی سوالیہ نشان ہے۔
اسفند یارولی خان نے کہا کہ 40 سال سے جاری دہشت گردی میں وقفہ آیا لیکن غلط پالیسیوں کی وجہ سے دہشت گرد پہلے سے زیادہ منظم ہوچکے ہیں۔
اے این پی کے سربراہ اسفند یار ولی خان نے کہا کہ خیبرپختونخوا پولیس ہمارا فخر ہے۔ انہوں نے شہدا کے درجات کی بلندی اور زخمیوں کی جلد صحتیابی کے لیے دعا کی ہے۔

اسلام آباد: (ویب ڈیسک) وزیراعظم شہباز شریف اور آرمی چیف جنرل عاصم منیر پشاور پہنچ گئے، انہوں نے ہسپتال جا کر دھماکے میں زخمی ہونے والوں کی عیادت کی۔
پشاور پولیس لائنز میں مبینہ خودکش حملہ کے بعد وزیراعظم شہباز شریف اور جنرل عاصم منیر پشاور پہنچے جہاں انہوں نے لیڈی ریڈنگ ہسپتال کا دورہ کیا اور پشاور پولیس لائنز کے زخمیوں کی عیادت کی۔
سماجی رابطے کی ویب سائٹ ٹوئٹر پر اپنے پیغام میں وفاقی وزیر اطلاعات مریم اورنگ زیب نے بتایا کہ وزیراعظم نے واقعے پر ہنگامی اجلاس اور تمام متعلقہ اداروں کے حکام کو طلب کیا۔
مریم اورنگ زیب کے مطابق امن و امان سے متعلق وزیراعظم کی زیر صدارت اجلاس دہشت گردی کے اندوہناک واقعہ کے محرکات پر غور کیا گیا، اجلاس میں واقعے پر ابتدائی تحقیقاتی رپورٹ پیش کی گئی۔
وزیراعظم شہباز شریف نے پولیس لائنز دھماکے پر ہنگامی اجلاس میں کہا ہے کہ پاکستان کے خلاف جنگ کرنے والوں کو صفحہ ہستی سے مٹا دیں گے، شہریوں کا ناحق خون بہانے والوں کو عبرت کا نشان بنانے کے عزم کا اظہار کیا۔
وزیراعظم شہباز شریف کو پولیس لائنز میں خود کش حملے کی سی سی ٹی وی فوٹیج بھی دکھائی گئی، شرکاء نے پولیس لائنز حملے میں شہید ہونے والوں کے لئے فاتحہ خوانی کی اور متاثرہ خاندانوں سے ہمدردی کا اظہار کرتے ہوئے زخمیوں کی جلد صحت یابی کی دعا کی۔

اسلام آباد: (ویب ڈیسک) چودھری شجاعت حسین کو پارٹی صدارت سے ہٹانے کے معاملہ پر الیکشن کمیشن محفوظ شدہ فیصلہ کل سنائے گا۔
پاکستان تحریک انصاف کے چیئرمین اور سابق وزیر اعظم عمران خان کو پارٹی چیئرمین شپ سے ہٹانے کے کیس کی سماعت بھی کل ہو گی، الیکشن کمیشن آف پاکستان نے کاز لسٹ جاری کر دی۔

قصور: (ویب ڈیسک) موٹرسائیکل پر سوار نامعلوم افراد نے فائرنگ کرکے وکیل کو قتل کردیا۔
قتل ہونیوالے وکیل کی شناخت اسلم جوئیہ کے نام سے ہوئی جو دفتر سے اپنی گاڑی پر گھر جارہا تھا، نامعلوم موٹرسائیکل سواروں نے فائرنگ کرکے قتل کردیا۔
افسوسناک واقعہ تھانہ صدر کی حدود میں پریس کلب روڈ پر پیش آیا، پولیس اور ریسکیو ٹیم اطلاع ملتے ہی موقع پر پہنچ گئی، نعش کو ہسپتال منتقل کردیا گیا جبکہ ملزمان کی تلاش شروع کردی گئی۔

مظفر آباد: (کوہ نورنیوز) آزاد کشمیر کے بلدیاتی انتخابات میں پیپلز پارٹی اور مسلم لیگ (ن) نے اتحاد کر لیا جس کیلئے دونوں پارٹیوں کے درمیان معاہدہ بھی طے پا گیا۔
مسلم لیگ (ن) کی طرف سے سابق وزراء بیرسٹر افتخار گیلانی، ڈاکٹر مصطفیٰ بشیر جبکہ پیپلز پارٹی کی طرف سے جاوید ایوب اور بازل نقوی نے معاہدے پر دستخط کئے، مجوزہ معاہدہ چیئرمین ، ڈپٹی چیئرمین، میئر، ڈپٹی میئر اور لیبر کونسلر کے امیدواروں کیلئے کیا گیا ہے۔
معاہدے کے مطابق مظفر آباد میں چیئرمین ضلع کونسل کیلئے پیپلز پارٹی کا امیدوار ہوگا جبکہ وائس چیئرمین مسلم لیگ (ن) کا ہوگا، پیپلز پارٹی حمایت کرے گی، ڈسٹرکٹ مظفر آباد میں کسان کونسلر پیپلز پارٹی کا ہوگا۔
معاہدے کے مطابق میونسپل کارپوریشن کیلئے میئر مسلم لیگ (ن) کا ہوگا، پیپلز پارٹی ڈپٹی میئر کیلئے امیدوار دے گی، لیبر کونسلر کیلئے مسلم لیگ (ن) اپنا امید وار نامزد کرے گی۔

پشاور:(ویب ڈیسک) وزیراعظم شہباز شریف نے پولیس لائنز پشاور کی مسجد میں خودکش دھماکے پر آئی جی خیبر پختونخوا (کے پی) پر برہمی کا اظہار کیا ہے۔
خیال رہےکہ پشاور پولیس لائنز کی مسجد میں خودکش دھماکے میں شہید ہونے والوں کی تعداد 44 ہوگئی ہےجب کہ 157 سے زائد افراد زخمی ہیں۔
دھماکےکے بعد وزیراعظم شہباز شریف اور آرمی چیف جنرل عاصم منیر پشاور پہنچے، انہوں نے لیڈی ریڈنگ اسپتال جا کر زخمیوں کی عیادت بھی کی۔
وزیراعظم شہباز شریف نے پولیس لائنز مسجد میں دھماکے پر سخت برہمی کا اظہارکیا اور آئی جی خیبر پختونخوا معظم جاہ انصاری سے استفسار کیا کہ خود کش حملہ آور کیسے پولیس لائنز میں داخل ہوگیا ؟ پولیس لائنز میں داخلےکا ایک ہی گیٹ ہے، حملہ آور کہاں سے آیا؟
آئی جی معظم جاہ انصاری نے بتایا کہ پولیس لائنز میں فیملی کوارٹرز بھی ہیں،کیا پتہ حملہ آورکہاں سے آیا اورکیسے داخل ہوگیا؟ ہوسکتا ہےکہ حملہ آور پہلے سے ہی اندر ہی رہ رہا ہو ، تحقیقات کر رہے ہیں کہ واقعہ کیسے پیش آیا اور حملہ آور کیسے داخل ہوا؟

لاہور: (ویب ڈیسک) اوکاڑہ قصور روڈ پر حادثہ میں 3 بچے جاں بحق جبکہ ایک نوجوان شدید زخمی ہو گیا۔
تفصیلات کے مطابق حادثہ کوسٹر کی موٹر سائیکل کو ٹکر کےباعث ہوا، حادثہ کے فوری بعد کوسٹر ڈرائیور موقع سے فرار ہو گیا۔
ریسکیو 1122 حکام کے مطابق زخمی اور جاں بحق ہونے والوں کو ہسپتال منتقل کر دیا گیا، پولیس نے قانونی کارروائی شروع کر دی۔

ماسکو: (ویب ڈیسک) وزیر خارجہ بلاول بھٹو زرداری نے روسی وزیر خارجہ سرگئی لاوروف سے ملاقات کی۔
ترجمان دفتر خارجہ کے مطابق ملاقات کے دوران بلاول بھٹو زرداری کی روسی وزیر خارجہ سرگئی لاوروف سے تعمیری بات چیت ہوئی، دونوں رہنماؤں نے تعلیم، معیشت، توانائی سمیت مختلف شعبوں میں تعاون کو مزید گہرا کرنے کیلئے اقدامات پر اتفاق کیا۔
دفتر خارجہ کے ترجمان کے مطابق ملاقات کے دوران افغانستان کی موجودہ صورتحال اور شنگھائی تعاون تنظیم سمیت علاقائی امور پر بھی تفصیلی تبادلہ خیال کیا گیا۔