لاہور: (ویب ڈیسک) پاکستان تحریک انصاف کے چیئرمین اور سابق وزیر اعظم عمران خان نے کہا ہے کہ پی ڈی ایم سرکار فیل ہو چکی، دو خاندانوں کی وجہ سے ملک ڈوب رہا ہے، کوئی بھی انہیں پیسے دینے کو تیار نہیں، اب تو سعودی عرب نےبھی انکار کر دیا۔
رول آف لا کانفرنس میں ویڈیو لنک کے ذریعے وکلا سےخطاب کرتے ہوئے عمران خان نے کہا کہ آئی ایم ایف اس وقت قرضہ دے گا جب ان کی شرائط مانی جائیں گی، پاکستان میں سری لنکا جیسی صورتحال زیادہ دورہ نہیں، حالات کی بہتری کا واحد راستہ صاف اور شفاف الیکشن ہیں۔
چیئرمین تحریک انصاف نے کہا کہ ملک کی تاریخ میں اتنا بڑا کرائسزنہیں آیا جو آچکا ہے، پاکستان دلدل میں پھنسا ہوا ہے، وکلا پاکستان کواس دلدل سےنکال سکتے ہیں، ایک آدمی نے سازش کر کے رجیم چینج کا فیصلہ کیا، ایک آدمی کے فیصلے کی وجہ سے حکومت گرائی گئی۔
عمران خان نے کہا کہ یہ حکومت فیل ہو چکی ہے، سعودی عرب نے بھی کہہ دیا ہے کہ اب پیسے نہیں دیں گے، انہوں نے 8 ماہ میں دنیا کے چکر لگا لیے ہیں، بلاول زرداری تو کبھی پاکستان میں ملتا ہی نہیں، ان کو کوئی بھی پیسے نہیں دے رہا، اب تو سعودی عرب نے بھی انکار کر دیا ہے۔
انہوں نے کہا کہ دوخاندانوں کے 30 سالہ اقتدار کی وجہ سے بھارت، بنگلا دیش آگے نکل گئے، دو خاندانوں کی دولت میں اضافہ ہوا لیکن پاکستان ڈوب رہا ہے، آج دنیا کہہ رہی ہے پاکستان کے حالات سری لنکا جیسے ہونے لگے ہیں، کوئی تصور بھی نہیں کر سکتا تھا آج ایل سیز کھولنے کے لیے پیسے نہیں۔
عمران خان کا کہنا تھا کہ قرضوں کا ڈیفالٹ رسک خطرناک سطح تک پہنچ گیا ہے، آئی ایم ایف شرائط ماننے سے بجلی، گیس، ڈیزل کی قیمتوں میں مزید اضافہ ہو گا، ملک میں بے روزگاری بڑھ رہی ہے اور فیکٹریاں بند ہو رہی ہیں، مسائل سےنکلنے کا ایک ہی راستہ رول آف لا ہے، ملک میں کمزور اور طاقت ور کے لیے ایک ہی قانون ہونا چاہیے۔
چیئرمین پی ٹی آئی نے کہا کہ اللہ کا حکم ہے اپنے نبیؐ کی زندگی سے سیکھو، مدینہ کی ریاست میں سب سے پہلے رول آف لا قائم کیا گیا تھا، ہمارے پیارے نبیؐ نے دنیا کی امامت کی تھی، پہلے انصاف ہوتا ہے پھر خوشحالی آتی ہے، نامور ڈاکوؤں پر اربوں روپے کے کیسز تھے انہیں سازش کے تحت اقتدار پر بٹھایا گیا، ان نامور ڈاکوؤں نے اپنے سارے کیسز معاف کرا لیے۔
انہوں نے کہا کہ دنیا کا کوئی ایک ملک بتا دیں جس نے ملک لوٹا ہو اور اسے این آر او دیا گیا ہو، ہماری حکومت میں انڈسٹریز، زراعت گروتھ کر رہی تھی، ہمارے دورمیں معیشت 6 فیصد پر گروتھ کر رہی تھی، 30 سال معیشت کو تباہ کرنے والے آج معیشت کیسے ٹھیک کر سکتے ہیں؟ پاکستان میں رول آف لا کی اسٹرگل ہے، طاقت ور کو قانون کے نیچے لانا ہو گا، جب تک لوگوں کو انصاف کے نظام پر اعتماد نہیں ہو گا تب تک خوشحالی نہیں آئے گی۔
عمران خان کا کہنا تھا کہ ہمارے دور میں ریکارڈ ایکسپورٹ ہو رہی تھی، ملک کو اس دلدل سے اوورسیز پاکستانی نکال سکتے ہیں، مسلم لیگ کے گزشتہ 5 برسوں میں ایکسپورٹ نہیں بڑھی تھی، قبضہ گروپس اوورسیز پاکستانیوں کے پلاٹس پر قبضہ کر لیتے ہیں وہ انویسٹمنٹ کیسے کریں گے؟ امریکا، یورپ، مڈل ایسٹ، سعودی عرب، دبئی میں کسی نے سنا ہے کہ وہاں قبضہ گروپ ہے؟
انہوں نے کہا کہ پاکستان میں سارے چور اوپر آکر بیٹھ گئے ہیں، انہوں نے اسمبلی میں ایسا قانون پاس کیا جس کی کوئی مثال نہیں ملتی، ایسی ترمیم کی ہے ایک ایک ڈاکو بچ گیا ہے، پہلے مشرف اور اب باجوہ نے این آر او ٹو دیا، ہم سب کو مل کر رول آف لا کے لیے جدوجہد کرنا ہو گی، یہ جہاد ہے ظلم اور ناانصافی کا مقابلہ کرنا جہاد ہے، سب سے بڑی پارٹی کا ہیڈ ہوں اپنی ایف آئی آر درج نہیں کرا سکا، عام آدمی کے ساتھ کیا سلوک ہو گا۔
عمران خان کا کہنا تھا کہ اعظم سواتی کو ایک سچی ٹویٹ کرنے پر تشدد کا نشانہ بنایا گیا، اعظم سواتی پر ظلم کیا گیا، کیا وہ اتنا بڑا فرعون تھا جس پر کوئی ٹویٹ نہیں کر سکتا، شہبازگل پر بھی تشدد کیا گیا، وکلا کمیونٹی کی ذمہ داری تھی اس معاملے پر پہلے اسٹینڈ لیتے، شہباز شریف کی ویڈیو بھارتی چینلز پر چل رہی ہے کہتا ہے سبق سیکھ لیا ہے ہندوستان سے دوستی کرنی چاہیے۔
چیئرمین پی ٹی آئی نے کہا کہ نریندر مودی نے کشمیریوں کا قتل کیا، کیا شہباز شریف کو کشمیریوں کی قربانیوں کی کوئی فکر نہیں، یہ دنیا سے پیسے مانگ رہے ہیں اپنے پیسے سارے باہر رکھے ہوئے ہیں، وکلا سے کہتا ہوں یہ سیاست نہیں ’انصاف کےلیے جہاد‘ ہے۔
اپنے خطاب میں انہوں نے مزید کہا کہ آزاد عدلیہ کے لیے پہلے جیل کاٹ چکا ہوں اب پھر آزاد عدلیہ کے لیے نکلا ہوں، اپنے اوپر حملے کے پلان بارے تین ماہ پہلے بتا دیا تھا، پولیس، سی ٹی ڈی نے جے آئی ٹی میں آنے سے انکار کر دیا، پولیس منتخب حکومت کی سننے کے بجائے طاقت ور لوگوں کی بات مان رہی ہے، جس نے عدالت میں کہا ایک شوٹر ہے، اس کا اپنا بیان تھا ایک چھت پر اور شوٹر تھا، عدالت میں جا کر اس نے بیان بدل لیا۔
عمران خان نے کہا کہ جے آئی ٹی کو ثبوتاژ کیا جا رہا ہے، جو کچھ کیا جا رہا ہے اب پورا یقین ہو گیا ہے تین بڑی طاقتور شخصیات نے ایسا کیا، اگر بچنا ہے تو ملک میں انصاف کا نظام لانا ہو گا، ظلم کا نظام چل سکتا مگر کفر کا نہیں، یہ پیسے لینے کے لیے سیلاب کو بھی بیچ رہے ہیں۔
انہوں نے کہا کہ بھکاریوں کی طرح پیسے مانگ مانگ کر آج اپنی عزت کھو بیٹھے ہیں، بھارت ہمیں کہہ رہا ہے پہلے دہشت گردی ختم کرو پھر بات ہو گی، اس سے زیادہ ذلت پہلے نہیں دیکھی۔

اسلام آباد: (ویب ڈیسک) وزیر ریلوے خواجہ سعد رفیق نے بلوچستان کے ضلع بولان کے علاقے پنیر میں ٹرین ٹریک پر دھماکے کی شدید مذمت کی ہے۔
اپنے ایک بیان میں وزیر ریلوے خواجہ سعد رفیق نے کہا کہ دہشتگردوں کے اس بزدلانہ اقدام پر سخت قانونی اور آہنی ہاتھوں سے نمٹا جائے گا۔
وزیر ریلوے کی جانب سے ریسکیو اور ریلیف آپریشن کی نگرانی کی جا رہی ہے جبکہ لاہور سے 3 اعلیٰ افسران پر مشتمل ٹیم بھی جائے حادثہ کی طرف روانہ کر دی گئی۔
وزیر ریلوے خواجہ سعد رفیق نے ہدایت کی ہے کہ مسافروں کو بحفاظت منزل مقصود پر پہنچایا جائے اور زخمیوں کو فوری طبی امداد فراہم کی جائے۔

اسلام آباد: (ویب ڈیسک) عوامی جمہوریہ چین کے قومی دن کے موقع پر اسلام آباد میں خصوصی تقریب کا انعقاد کیا گیا۔
تقریب میں وزیرمملکت فیصل کریم کنڈی نے پاکستان میں چینی سفارت کاروں کے ساتھ مل کر کیک کاٹا، تقریب میں چینی کمپنیوں، ذرائع ابلاغ کے نمائندگان اور شہریوں نے کثیر تعداد میں شرکت کی۔
اس موقع پر گفتگو کرتے ہوئے فیصل کریم کنڈی نے کہا کہ سی پیک سمیت دونوں ممالک کے دوستانہ تعلقات خوش آئند ہیں، پاک چین دوستی ہمالیہ سے بلند اور سمندر کی گہرائیوں سے گہری ہے۔

اسلام آباد: (ویب ڈیسک) وفاقی وزیر اطلاعات و نشریات مریم اورنگزیب نے کہا ہے کہ ملک کو پروجیکٹ عمران سے پاک کرنا اتحادی حکومت کی بڑی کامیابی ہے۔
وزیر اطلاعات و نشریات مریم اورنگزیب نے اپنے ایک بیان میں کہا ہے کہ اتحادی حکومت نے ملک کو سب سے بڑے غیرملکی ایجنٹ فتنے اور مافیا سے نجات دلائی ہے، پروجیکٹ عمران نے ملک کو معاشی دیوالیے کی طرف دھکیلا، آج ملک میں مہنگائی، معاشی تباہی اور سیاسی عدم استحکام اسی وجہ سے ہے۔
ان کا مزید کہنا تھا کہ 4 سال میں عمران پراجیکٹ نے ملک کا معاشی دیوالیہ نکالا اور نوجوان کو بے روزگار کیا، سخت شرائط والا آئی ایم ایف کا پروگرام پروجیکٹ عمران کا عوام کو دیا گیا تحفہ ہے۔
انہوں نے کہا کہ 4 سال تباہی مچا کر اور مہنگائی کا طوفان لا کر آج الیکشن الیکشن کی رٹ لگا کر کیا ہو گا، ملک پر 2018 میں مسلط ہونے والے الیکشن کی بات کر سکتے ہیں لیکن الیکشن لڑ نہیں سکتے۔

ڈیووس: (ویب ڈیسک) وزیر خارجہ بلاول بھٹو زرداری نے کہا ہے کہ کوئی بھی ملک چیلنجز سے تنہا نہیں نمٹ سکتا، اسے چیلنجز سے نمٹنے کے لیے تعاون درکار ہوتا ہے۔
ڈیووس میں ورلڈ اکنامک فورم کے دوران سکیورٹی اور کوآرڈینیشن کے موضوع پر سیشن کے دوران خطاب کرتے ہوئے وزیر خارجہ بلاول بھٹو زرداری کا کہنا تھا نیو ورلڈ آرڈر کی وجہ سے ایشیائی ممالک بالخصوص ترقی پزیر ممالک مشکلات کا شکار ہیں، تیسری دنیا کی معیشت دباؤ کا شکار ہے۔
وزیر خارجہ بلاول بھٹو کا کہنا تھا کہ پاکستان کو موسمیاتی تبدیلی سمیت مختلف چیلنجز کا سامنا ہے،کوئی بھی ملک چیلنجز سے تنہا نہیں نمٹ سکتا، اسے چیلنجز سے نمٹنے کے لیے دیگر ممالک کا تعاون درکار ہوتا ہے۔
بلاول بھٹو زرداری کا کہنا تھا کہ روس یوکرین تنازع کی وجہ سے دنیا بھر میں گیس کی قیمتیں بڑھیں، روس یوکرین جنگ کی وجہ سے انسانی تنازع نے جنم لیا، روس یوکرین جنگ کے دنیا پر منفی اثرات مرتب ہوئے۔
وزیر خارجہ کا کہنا تھا روس یوکرین جنگ کے حوالے سے پاکستان کا مؤقف بالکل واضح ہے، پاکستان خود سے کسی جنگ کے حق میں نہیں ہے، پاکستان روس یوکرین تنازع کے حل کا خواہاں ہے۔
انہوں نے کہا کہ یوکرین معاملے پر اقوام متحدہ کی قراردادوں پر عمل ہوتا ہے لیکن افسوس ہے مغرب کے لیے کشمیر پر اقوام متحدہ کی قراردادیں محض کاغذی رہ جاتی ہیں، کشمیری بھی آزادی کے لیے دنیا کی طرف دیکھ رہے ہیں۔

اسلام آباد: (ویب ڈیسک) پاکستان اور روس کے درمیان دستاویزات پر دستخط کی تقریب کا انعقاد، دونوں ممالک کے دوران کسٹمز امور سے متعلق تعاون بڑھانے اور ڈیٹا شیئرنگ کا معاہدہ طے پا گیا۔
اسلام آباد میں پاک روس بین الحکومتی کمیشن اجلاس کے بعد دستاویزات پر دستخط کی تقریب کا انعقاد کیا گیا، تقریب کے دوران دونوں ممالک کے درمیان کسٹمز امور سے متعلق تعاون بڑھانے اور ڈیٹا شیئرنگ کے معاہدہ پر دستخط کئے گئے۔
تقریب کے دوران ایف بی آر اور روس کے فیڈرل کسٹمز سروس کے درمیان ڈیٹا تبادلے کے معاہدے پر دستخط کئے گئے، ایم او یو کے تحت دونوں ممالک کسمٹز سے متعلق امور پر ایک دوسرے سے تعاون کریں گے۔
اس موقع پر روسی ویزر توانائی نکولے شلگی نووف کا کہنا تھا کہ کمیشن اجلاس کے انعقاد پر پاکستان کے مشکور ہیں، ڈیری کے شعبہ میں پاکستان کے ساتھ تعاون بڑھائیں گے، پاکستان میں برآمدی صنعت لگانے میں تعاون جاری رکھیں گے، معاہدوں سے دونوں ممالک کے تعلقات کو مزید فروغ ملے گا، پاکستان کے ساتھ مختصر اور طویل مدتی منصوبوں پر اتفاق ہوا ہے، پاکستان کے ساتھ روڈ ٹرانسپورٹ کو فروغ دیں گے، تیل اور گیس کے شعبے میں پاکستان کے ساتھ تعاون کریں گے۔
تقریب سے خطاب کرتے ہوئے وفاقی وزیر سردار ایاز صادق نے کہا کہ توانائی کے شعبے میں تعاون پر نمایاں پیش رفت ہوئی ہے، توانائی ،زراعت ، مالیات، تجارت ، سرمایہ کاری، کسٹم کے شعبوں پر اتفاق ہوا ہے، پاکستان اور روس کے درمیان گیس پائپ لائن منصوبے پر بھی غور کیا گیا۔
سردار ایاز صادق نے مزید کہا کہ روس کے ساتھ تعلقات بڑھانے کے لئے مزید معاہدے بھی کریں گے۔