کوئٹہ: (ویب ڈیسک) وزیراعلیٰ بلوچستان میر عبدالقدوس بزنجو نے کہا ہے کہ بلوچستان میں سرمایہ کاری کے وسیع مواقع موجود ہیں۔
وزیراعلیٰ بلوچستان سے جرمنی کے سفیر مسٹر ایلفرڈ گریناس نے ملاقات کی، ملاقات میں سرمایہ کاری کے فروغ اور باہمی دلچسپی کے مختلف امور پر بات چیت کی گئی۔
عبدالقدوس بزنجو نے کہا کہ جرمنی اور پاکستان کے درمیان مضبوط دوستانہ تعلقات ہیں، بلوچستان میں سرمایہ کاری کے وسیع مواقع موجود ہیں، اس موقع پر جرمن سفیر کو ریکوڈک منصوبے، گوادر پورٹ اور دیگر شعبوں میں سرمایہ کاری سے متعلق بریفنگ دی گئی۔
جرمن سفیر نے بلوچستان میں سرمایہ کاری کے مواقعوں میں دلچسپی کا اظہار کرتے ہوئے کہا کہ جرمن سرمایہ کاروں کو بلوچستان میں سرمایہ کاری کی جانب راغب کیا جائے گا۔ جرمنی کی حکومت بلوچستان میں ہنر مند افرادی قوت اور صحت کے شعبوں میں معاونت فراہم کرے گی۔

اسلام آباد: (ویب ڈیسک) وزیر اعظم شہباز شریف نے اخراجات اور بجٹ خسارہ کم کرنے کیلئے اقدامات کرتے ہوئے 15 رکنی قومی کفایت شعاری کمیٹی تشکیل دے دی۔
وزارت خزانہ نے قومی کفایت شعاری کمیٹی کی تشکیل کا نوٹیفکیشن جاری کر دیا، نوٹیفکیشن کے مطابق سابق پرنسپل سیکرٹری ناصر کھوسہ، وزیر مملکت خزانہ عائشہ غوث پاشا کمیٹی کے سربراہ ہوں گے۔
نوٹیفکیشن کے مطابق قومی کفایت شعاری کمیٹی کے ٹی او آرز بھی جاری کر دیئے گئے، کمیٹی سرکاری اخراجات میں کمی، مالی نظم و ضبط کی سفارشات پیش کرے گی، سرکاری وسائل کی بچت کے لیے اقدامات تجویز کیے جائیں گے، کمیٹی سرکاری اداروں کے نقصانات کا جائزہ لے کر اقدامات تجویز کرے گی۔
قومی کفایت شعاری کمیٹی 15 روز میں وزیراعظم کو اپنی سفارشات پیش کرے گی، چاروں صوبائی چیف سیکرٹریز قومی کفایت شعاری کمیٹی میں شامل ہوں گے، چیئرمین سی ڈی اے، سیکرٹریز خزانہ، کابینہ، پاور، ہاؤسنگ اینڈ ورکس بھی کمیٹی میں شامل ہوں گے۔
وزارت خزانہ کی جانب سے جاری نوٹیفکیشن کے مطابق معاشی ماہرین قیصر بنگالی، زبیر خان اور فرخ سلیم بھی قومی کفایت شعاری کمیٹی کا حصہ ہوں گے۔

اسلام آباد: (ویب ڈیسک) وفاقی وزیر خزانہ اسحاق ڈار نے ایف بی آر میں ریفارمز اینڈ ریسورس موبلائزیشن کمیشن کے افتتاح کے موقع پر کہا ہے کہ پائیدار اقتصادی ترقی کے حصول کے لئے ریونیو پالیسیوں میں اصلاحات ضروری ہیں۔
تقریب سے خطاب میں پاکستان مسلم لیگ (ن) کے سینئر رہنما اور وزیر خزانہ اسحاق ڈار نے کہا کہ موجودہ حکومت کو ورثہ میں کمزور معیشت ملی، معیشت کو درست سمت میں گامزن کرنے کے لئے پرعزم ہے۔
ان کا کہنا تھا کہ حکومت مختلف شعبوں میں اصلاحات متعارف کروانے کے لئے پرعزم ہے، کمیشن محصولات میں اضافے کے لئے اپنی پوری کوشش کرے۔

لاہور: (ویب ڈیسک) پی ٹی آئی کے چیئرمین اور سابق وزیر اعظم عمران خان کو پاکستان تحریک انصاف کا پیٹرن انچیف بنائے جانے پر غور کیا جا رہا ہے۔
پارٹی ذرائع کے مطابق صدارت سے ہٹائے جانے کے قانونی امکانات کاؤنٹر کرنے کیلئے تحریک انصاف نے جوابی پلان آف ایکشن تیار کر لیا۔ عمران خان نئےعہدے کے تحت بھی تمام تر اختیارات کے ساتھ پارٹی امور کی سربراہی جاری رکھ سکیں گے۔
پارٹی ذرائع کا کہنا ہے کہ سینئر قیادت نے عمران خان کے خلاف ہر حربہ ناکام بنانے کا فیصلہ کیا ہے، عمران خان کے خلاف ممکنہ اقدام کی صورت میں عہدہ بنایا جائے گا، نئے عہدے کے لیے پارٹی آئین میں تبدیلی ضروری نہیں ہوگی۔
واضح رہے کہ گزشتہ ہفتے جسٹس جواد حسن کی سربراہی میں سنگل بینچ نے عمران خان کو پارٹی چیئرمین کے عہدے سے ہٹانے کی الیکشن کمیشن کی درخواست کے خلاف چیف جسٹس کو لارجر بینچ تشکیل دینے کی سفارش کی تھی، جسٹس شاہد بلال حسن کی سربراہی میں لارجر بینچ تشکیل دیا گیا جس میں جسٹس شمس محمود مرزا، جسٹس شاہد کریم، جسٹس شہرام سرور چوہدری اور جسٹس جواد حسن شامل تھے۔
اس کیس میں سنگل بینچ نے پہلے ہی الیکشن کمیشن کو عمران خان کی جانب سے مالی اثاثے چھپانے اور حقیقت پر پردہ ڈالنے کے لیے جھوٹا بیان جمع کرانے پر حلقہ این اے 95 (میانوالی ون) سے نااہل ہونے کے بعد انہیں پی ٹی آئی چیئرمین کے عہدے سے ہٹانے کے خلاف کارروائی کرنے سے روک دیا تھا۔

اسلام آباد: (ویب ڈیسک) وزیراعظم شہباز شریف نے کہا ہے کہ شعبہ آئی ٹی میں اچھی سرما یہ کاری ہوسکتی ہے۔
وزیر اعظم شہباز شریف نے خلیج ٹائمز کو دیئے گئے انٹرویو میں کہا کہ پاکستان 220 ملین سے زائد آبادی کی مارکیٹ ہے اور متحدہ عرب امارات کے تاجر پاکستان میں میں موجود مواقع سے استفادہ کریں۔
انہوں نے کہا کہ سرمایہ کاروں کو مضبوط اور بڑی کنزیومر مارکیٹ پیش کرتے ہیں جبکہ توانائی، انفرا اسٹرکچر اور ای کامرس کے شعبے میں سرمایہ کاری کے بہترین مواقع ہیں۔
شہباز شریف نے کہا کہ ایگرو بیسڈ انڈسٹری میں بھی پاکستان میں سرمایہ کاری کے مواقع موجود ہیں اور شعبہ آئی ٹی میں اچھی سرمایہ کاری ہوسکتی ہے۔ وزیر اعظم شہباز شریف نے تمام شعبوں میں متحدہ عرب امارات کے تعاون کی تعریف کی۔

لاہور: (ویب ڈیسک) وفاقی وزیر منصوبہ بندی احسن اقبال نے کہا ہے کہ مسائل ‘کےٹو’ کے پہاڑ کی طرح ہمارے سامنے کھڑے ہیں، عمران خان کا ایجنڈا مسلسل انتشار اور بے یقینی پھیلانا ہے۔
وفاقی وزیر کا کہنا تھا کہ اسمبلی کی مدت پوری ہونے پر الیکشن ہوں گے، ہم نے حکومت سنبھالی تو خزانہ خالی تھا، موجودہ حکومت کو قومی جرگے کی حکومت کہتا ہوں، سوائے ایک ضدی شخص کے پورا پاکستان اس حکومت میں شامل ہے۔
احسن اقبال نے کہا کہ ہمیں معاشی اصلاحات کے راستے پر چلنا ہے، ہمیں اپنی ایکسپورٹ بڑھانا ہو گی، انہوں نے کہا کہ نواز شریف جلد پاکستان آئیں گے اور الیکشن کمپین کو لیڈ کریں گے، نواز شریف کو سزائیں جوڈیشل انجینئرنگ کر کے دی گئیں۔

لاہور: (ویب ڈیسک) نگران وزیراعلیٰ پنجاب کی تقرری کا معاملہ الیکشن کمیشن میں جانے پر اپوزیشن کی پارلیمانی پارٹی کے اراکین نے کہا ہے کہ ہمارے تجویز کردہ ناموں میں سے ہی نگران وزیراعلیٰ ہونا چاہیے، حکومت کے نام وزیراعلیٰ بنائے جانے کی اہلیت نہیں رکھتے۔
میڈیا سے گفتگو میں مسلم لیگ (ن) کے رہنما اور پارلیمانی پارٹی کے رکن ملک احمد خان نے کہا کہ بدقسمتی سے سیاسی طور پر معاملہ طے نہیں ہو سکا، سیاسی معاملات عدالت میں جانے کے حق میں نہیں ہوں، آئین میں لکھا ہے جو نام بھیجے گئے اس کے علاوہ نہیں جاسکتے۔
انہوں نے کہا کہ گزشتہ 4 سال پاکستان کے سیاہ ترین سال تھے، نیب نے ہمارے خلاف بے بنیاد کیسز بنائے، یہ اختیار الیکشن کمیشن کا ہے، اگر میری چوائس پوچھیں گے تو محسن نقوی کو نگران وزیراعلیٰ پنجاب بننا چاہیے، محسن نقوی سے زیادہ کریڈبل کون ہوگا۔
ملک احمد خان نے کہا کہ پرویز الہیٰ کو اپنی نامزد کردہ کمیٹی پراعتبار نہیں، پرویز الہیٰ نے پہلے ہی عدالت جانے کا بیان دے دیا، اس معاملے میں عدالت کا کوئی تعلق ہی نہیں ہے، جو انہوں نے دو نام دیے کیا وہ اہل ہیں۔
ان کا مزید کہنا تھا کہ احد چیمہ کے خلاف بے بنیاد کیس بنایا گیا، احد چیمہ نے شہباز شریف کی قیادت میں میٹرو، اورنج لائن ٹرین منصوبے کو پورا کر کے دکھایا، احد چیمہ بہترین انداز میں الیکشن کروا سکتے ہیں۔