لاہور: (ویب ڈیسک) ڈیفنس روڈ پر جھونپڑیوں میں آگ لگ گئی جس کے نتیجے میں بچوں سمیت 6افراد جھلس کر زخمی ہوگئے ۔
لاہور کے علاقے گجر کالونی ڈیفنس روڈ پر جھونپڑیوں میں آگ لگنے کا افسوس ناک واقعہ پیش آیا ، واقعے کی اطلاع ملتے ہی ریسکیو ٹیمیں موقع پر پہنچ گئیں ۔ آگ کے باعث 6 افراد جھلس کر زخمی ہوگئے ، زخمیوں کو طبی امداد کے لیے ہسپتال منتقل کردیا گیا ہے ۔
زخمی ہونے والوں میں ایک ہی خاندان کے پانچ افراد شامل ہیں جن میں ریحان،اللہ وسایا،عامر،ذہرہ اور ان کی والدہ مقبولہ بی بی شامل ہیں ۔
ریسکیو کی جانب سے جھونپڑیوں میں لگنے والی آگ پر قابو پالیا گیاہے ۔

لاہور: (ویب ڈیسک) رہنما پاکستان تحریک انصاف مسرت جمشید چیمہ نے کہا ہے کہ ایک طرف ملک دیوالیہ ہونے والا ہے دوسری طرف چیئرمین پر حملے کی تحقیقات کرنے والی JIT پر دباؤ ڈالا جا رہا ہے۔
سماجی رابطے کی ویب سائٹ ٹوئٹر پر اپنے بیان میں مسرت جمشید چیمہ کا کہنا تھا کہ جے آئی ٹی ممبران سے متنازعہ بیانات دلوائے جا رہے ہیں، ایسی حرکات ثابت کر رہی ہیں کہ اس سازش میں شریک لوگ کتنے طاقتور ہیں۔
پی ٹی آئی رہنما نے کہا کہ آج جمشید اقبال کی قیادت میں مہنگائی کے خلاف اور فوری الیکشن کے لیے NA121 میں احتجاجی ریلی نکالی جائے گی، ریلی کا آغاز صدر گول چکر سےہوگا اور جوڑے پل سے ہوتے ہوئے غازی آباد روڈ، مغلپورہ اور دھرم پورہ جائے گی۔

حیدرآباد: (ویب ڈیسک) صوبائی وزیر اطلاعات سندھ شرجیل انعام میمن کو صحت یابی کے بعد ہسپتال سے اپنے گھر کراچی منتقل کر دیا گیا۔
گزشتہ روز شرجیل انعام میمن کو دل کا دورہ پڑنے پر فوری طور پر دل کے ہسپتال این آئی سی وی ڈی لایا گیا تھا۔
شرجیل انعام میمن کے دل کی دو شریانیں بند تھیں جن کا فوری آپریشن کیا گیا تھا، دوران آپریشن دواسٹینٹس ڈالے گئے تھے، چوبیس گھنٹے ہسپتال میں رہنے کے بعد شرجیل انعام میمن کو کراچی منتقل کر دیا گیا ہے۔
صوبائی وزیر اطلاعات نے میڈیا سمیت اپنے ملازمین کو بھی کوریج سے روک دیا تھا۔

دادو: (ویب ڈیسک) سندھ کے سیاحتی مقام گورکھ ہل اسٹیشن پر تقریبا دوسال بعد ہلکی برفباری سے موسم دلفریب ہوگیا ۔
سندھ کا مری کہلائے جانے والا گورکھ ہل اسٹیشن دو سال بعد برف کی سفید چادر اوڑھے نظر آیا ہے ، برفباری سے جہاں سردی کی شدت میں اضافہ ہوا وہیں سیاحوں کی بڑی تعداد نے موسم کا لطف اٹھانے کیلئے اس علاقے کا رخ کیا ۔
انچارج گورکھ جمن جمالی کا اس حوالے سے کہنا ہے کہ اس مقام پر دوسال بعد برفباری ہوئی ہے اور سردی کی شدت میں اضافے کے ساتھ ساتھ درجہ حرارت منفی ریکارڈ کیا جارہا ہے۔
یہ ہل اسٹیشن دادو شہر سے 90 کلومیٹر کے فاصلے پر کھیرتھر رینج میں سطح سمندر سے 5,800 فٹ بلندی پر واقع ہے۔
دوسری جانب محکمہ موسمیات نے گلگت بلتستان اور بالائی خیبر پختونخوا کے پہاڑوں پر مزید برفباری کی پیش گوئی کی ہے ۔
محکمہ موسمیات کا کہنا ہے کہ ملک کے بیشتر میدانی علاقوں میں آج موسم سرد اور خشک رہے گا، بالائی خیبر پختونخوا،کشمیراور گلگت بلتستان میں گرج چمک کے ساتھ بارش کا امکان ہے ۔
مالم جبہ 06، مری 01انچ اورا سکردو میں ہلکی برفباری ریکارڈ کی گئی جبکہ کم سےکم درجہ حرارت لہہ منفی14، زیارت منفی11، استور، کالام منفی 09، گوپس میں منفی 08ڈگری سینٹی گریڈ رہا ، ہنزہ منفی 07، مالم جبہ، اسکردو منفی 06، قلات میں منفی 05 سینٹی گریڈ رہا کوئٹہ، بگروٹ منفی 04اور مری میں منفی 03ڈگری سینٹی گریڈ ریکارڈ کیا گیا۔

اسلام آباد: (ویب ڈیسک) قومی ادارہ صحت ( این آئی ایچ) نے کہا ہے کہ گزشتہ 24 گھنٹوں کے دوران ملک بھر میں 3 ہزار 726 کورونا ٹیسٹ کئے گئے ہیں۔
این آئی ایچ کی جانب سے جاری کردہ اعداد و شمار کے مطابق گزشتہ 24 گھنٹوں کے دوران 3 ہزار 726 کورونا ٹیسٹ کئے گئے جن میں سے 09 افراد کے کورونا ٹیسٹ مثبت آئے ہیں۔
اس طرح گزشتہ 24 گھنٹوں میں کئے گئے مثبت کورونا ٹیسٹ کی شرح 0.24 فیصد رہی ہے، مزید برآں اس دوران کورونا وائرس سے کوئی بھی مریض جاں بحق نہیں ہوا جبکہ 09 مریضوں کی حالت تشویشناک ہے۔

لاہور: (ویب ڈیسک) پنجاب کا نگران وزیر اعلیٰ کون؟ نامزدگی کا فیصلہ آج کیا جائے گا۔
نگران وزیراعلیٰ پنجاب کے لئے سپیکر پنجاب اسمبلی کی جانب سے بنائی گئی دو طرفہ پارلیمانی کمیٹی مقررہ وقت میں اتفاق رائے پر پہنچنے میں ناکام رہی جس کے بعد الیکشن کمیشن آج شام 6 بجے ہونے والے اجلاس میں نگران وزیر اعلیٰ پنجاب کا انتخاب کرے گا۔
ذرائع کا کہنا ہے کہ سربراہ الیکشن کمیشن سکندر سلطان راجا کی زیر صدارت ہونے والے اجلاس میں چیف الیکشن کمشنر اور کمیشن ارکان کے درمیان غیر رسمی بات چیت سے قبل اس معاملے کے بارے میں فیصلے پر اتفاق رائے کی راہ ہموار کی جائے گی۔
نگراں وزیر اعلیٰ کے لیے نامزد امیدوار کا فیصلہ کرنے کے لیے الیکشن کمیشن کے پاس صرف آج کا دن ہے کیونکہ آئین کے آرٹیکل اے-224 کے تحت الیکشن کمیشن کو دیا گیا 2 روز کا وقت آج ختم ہو رہا ہے۔
یاد رہے کہ چودھری پرویز الہٰی نے سردار احمد نواز سکھیرا اور نوید اکرم چیمہ کے نام تجویز کئے ہیں جبکہ حمزہ شہباز نے نگراں وزیراعلیٰ کے لئے محسن نقوی اور احد چیمہ کے ناموں کی توثیق کی ہے۔
واضح رہے کہ پنجاب میں نگران وزیراعلیٰ کے تقرر کا معاملہ گزشتہ ہفتے پنجاب اسمبلی کی تحلیل کے بعد نامزد امیدواروں پر صوبائی حکومت اور اپوزیشن کے درمیان مسلسل تناؤ اور عدم اتفاق کے سبب غیر معمولی تاخیر کا شکار ہوگیا۔

لندن: (ویب ڈیسک) وزیرداخلہ رانا ثنا اللہ کا کہنا ہے کہ مریم نواز کا پاکستان واپسی کا پروگرام کچھ تبدیل ہوا ہے۔
رانا ثنا اللہ نے کہا کہ مریم نواز 27 جنوری کو لندن سے دبئی جائیں گی، دبئی سے 28 جنوری کو پاکستان پہنچیں گی۔
خیال رہے کہ مریم نواز گزشتہ کچھ عرصے سے لندن میں مقیم ہیں۔
تحریک انصاف میں شامل ہونے والے پیر امین الحسنات کے حوالے سے رانا ثنا نے کہا کہ پارٹی ٹکٹ نہ ملنے کے بعد وہ غیر فعال ہوگئے تھے۔

لاہور: (ویب ڈیسک) وزیر اعظم شہبا زشریف نے کہا ہے کہ جب بھی الیکشن ہوئے بھاری اکثریت سے جیتیں گے، ن لیگ مضبوط اور بڑی جماعت ہے، کوئی بھی اسے ختم نہیں کر سکا۔
وزیر اعظم کے زیر سربراہی اجلاس میں موجودہ سیاسی اور معاشی صورتحال پر تبادلہ خیال کیا گیا، اجلاس میں پارٹی کارکنوں کو متحرک کرنے کے لیے پارٹی عہدیداروں کو ٹاسک دیئے گئے۔
شہباز شریف نے کہا کہ عمران خان نے ملک کو خطرناک صورتحال پر پہنچایا، ہم نے آنے کے بعد ملک کو سنبھالا دیا، ن لیگ ایک مضبوط اور بڑی جماعت ہے اس کو کوئی بھی ختم نہ کر سکا، جب بھی الیکشن ہوں گے مسلم لیگ ن بھاری اکثریت سے کامیاب ہو گی۔
شہباز شریف نے کہا کہ ہم نہیں چاہتے کہ عوام پر مہنگائی کا بوجھ ڈالیں، ہمیں غریب عوام کا احساس ہے، ہماری کوشش ہے کہ ایسے قدم اٹھائیں جس سے غریب آدمی کو نقصان نہ ہو۔
وزیر اعظم کا کہنا تھا کہ آئی ایم ایف سے معاملات جلد حل ہو جائیں گے، معاشی معاملات سےنمٹنے کے لئے تمام پلان موجود ہیں، ہم عنقریب معاشی بحرانی کیفیت سےنکل جائیں گے، مہنگائی پر بہت جلد قابو پالیا جائے گا۔
شہباز شریف نے کہا کہ سابق حکمران جماعت کی خرابی کو درست کرنے میں وقت لگتا ہے، ہم نے پاکستان اور معیشت کو سنبھال لیا ہے، ہر طرح سے معاملات کنٹرول میں ہیں، فکر کی کوئی بات نہیں۔

کوئٹہ: (ویب ڈیسک) ترجمان بلوچستان حکومت نے کہا ہے کہ ریکوڈک صوبے میں بڑی سرمایہ کاری اور روزگار کے مواقع لائے گا، اس کے خلاف کوئی پروپیگنڈا برداشت نہیں کیا جائے گا۔
اپنے ایک بیان میں ترجمان بلوچستان حکومت نے کہا کہ ریکوڈک معاہدے کے خلاف بھارتی میڈیا پر کیے جانے والے پروپیگنڈے کی مذمت کرتے ہیں، اندرونی اور بیرونی ملک دشمن قوتیں پاکستان کو ترقی کی منزل پر گامزن نہیں دیکھنا چاہتی، یہ منصوبہ نہ صرف بہتر انداز سے جاری رہے گا بلکہ مستقبل میں مزید سرمایہ کاری کا باعث بھی بنے گا۔
انہوں نے مزید کہا کہ ریکوڈک پراجیکٹ حکومت بلوچستان اور بیرک گولڈ کا مشترکہ اور ایک تاریخی معاہدہ ہے، منصوبے سے بلوچستان کو خاص طور پر اور پاکستان کو بالعموم متعدد محاذوں پر فائدہ ہوگا، معاہدے سے پاکستان میں 8 ارب ڈالر کی سرمایہ کاری آئے گی، مقامی لوگوں کیلئے 8 ہزار سے زائد ملازمتیں پیدا ہوں گی اور مقامی طور پر سماجی و اقتصادی ترقی اور شراکت داری کے مواقع بھی پیدا ہوں گے۔
ترجمان بلوچستان حکومت نے کہا ریکوڈک ڈیل کو قانونی طور پر سپریم کورٹ آف پاکستان سے تحفظ حاصل ہے اور ریاستی اداروں، سیاسی قوتوں سمیت تمام اسٹیک ہولڈرز کا اتفاق ہے، منصوبہ بلوچستان اور پاکستان کا معاشی مستقبل ہے اور ملک کو کامیابی سے ہمکنار کرنے تک جاری رہے گا، صوبے کے محب وطن بلوچ، پشتون عوام امن پسند ہیں، یہاں کے عوام ایسے منصوبوں کا خیر مقدم کرتے ہیں جن کا مقصد سب کا اجتماعی فائدہ ہو۔

اسلام آباد: (ویب ڈیسک) پاکستان کی جانب سے سویڈن میں قرآن پاک کی بے حرمتی کرنے کے گھناؤنے فعل کی شدید مذمت کی گئی ہے۔
ترجمان دفتر خارجہ نے اپنے مذمتی بیان میں کہا ہے کہ قرآن پاک کی بے حرمتی دنیا بھر کے ڈیڑھ ارب مسلمانوں کے مذہبی جذبات کو ٹھیس پہنچاتا ہے، پاکستان سویڈن کو اپنے تحفظات سے آگاہ کر رہا ہے، سویڈن پاکستانی عوام اور دنیا بھر کے مسلمانوں کے جذبات کا خیال رکھے اور اسلامو فوبک کارروائیوں کو روکنے کیلئے اقدامات کرے۔
ترجمان دفتر خارجہ نے مزید کہا کہ مسلمانوں کے مذہبی جذبات کو ٹھیس پہنچانا اظہار رائے کی آزادی میں کسی صورت نہیں آتا، انسانی حقوق کے علمبردار نفرت انگیز عمل نہ کرنے اور لوگوں کو تشدد پر نہ اکسانے کی ذمہ داری نبھائیں، اسلام امن کا مذہب ہے، دنیا بھر کے مسلمان تمام مذاہب کے احترام پر یقین رکھتے ہیں۔
دفتر خارجہ نے مزید کہا کہ عالمی برادری کو اسلامو فوبیا، زینو فوبیا، عدم برداشت اور مذہب یا عقیدے کی بنیاد پر تشدد پر اکسانے کے خلاف مشترکہ عزم ظاہر کرنے اور بین المذاہب ہم آہنگی، پرامن بقائے باہمی کے فروغ کیلئے مل کر کام کرنے کی ضرورت ہے۔